Laeberia Wok Blong Kingdom i Gru Nating We Faet i Gohed

FAET we i gohed bitwin ol man long Laeberia i gohed blong bitim 10 yia finis. Long medel blong 2003, ol rebel oli faet i kam insaed long kapital siti ya Monrovia. Plante long ol Witnes blong Jeova oli mas ronwe long haos blong olgeta nao biaen taem oli kambak oli mas ronwe bakegen, samting ya i gohed plante taem. Ol man oli stilim olting blong olgeta bakegen mo bakegen.

Sore tumas, long taem we oli faet long kapital, plante taosen man oli ded. I gat wan brata mo wan sista we tufala tu i ded long taem ya. ?Olsem wanem ol narafala brata sista oli dil wetem ol traem ya, mo olsem wanem oli kasem help?

Help Blong Olgeta We Oli Gat Nid

Long taem ya we faet i gohed, branj ofis blong ol Witnes blong Jeova long Laeberia, i wokem wan plan blong givhan long olgeta we oli gat nid. Oli givim ol kakae, ol samting insaed long haos, mo ol meresin. Long taem ya we ol rebel oli bos long eria blong wof, kakae i sot. Be branj ofis i bin luksave finis samting ya, mo i bin putumgud plante samting we i naf blong bitim tu taosen Witnes we oli ronwe blong go laef long ol Haos Kingdom raonabaot long kapital siti ya. Ol brata oli skelem ol kakae ya taem oli givimaot, blong mekem se ol kakae ya oli save stap longtaem, gogo kasem we wof i open bakegen. Ol branj ofis long Beljiom mo Siera Leon oli sanem ol meresin i kam long plen, mo branj ofis long Briten mo Franis oli givim ol klos.

Nating we oli kasem ol bigfala trabol, ol brata blong yumi oli gat gudfala tingting mo oli stap glad. Wan brata we i ronwe long haos blong hem tri taem finis i talem tok ya we plante oli talem tu se: “Hemia nao ol samting we yumi stap tokbaot taem yumi go prij; yumi laef long ol lasdei.”

Lesin Long Gud Nius

Nating se kantri ya i kasem trabol, ol Witnes oli gohed blong kasem gudfala frut long wok blong prij. I gat wan niufala namba blong 3,879 pablisa blong Kingdom long Jenuware 2003, mo long Februari oli mekem 15,227 Baebol stadi.

Ol man oli kwik blong lesin long gud nius. Wan eksampol i kamaot long wan vilej saot is blong kantri ya. Wan kongregesen i plan blong mekem lafet blong Memoriol blong ded blong Kraes long bigfala vilej ya Bewahn. Blong kasem ples ya, man i mas wokbaot 5 aoa stat long ples we oli stap mekem memoriol long hem fastaem. Bifo we ol brata oli go blong invaetem ol man blong kam long Memoriol, oli invaetem mea blong Bewahn fastaem. Taem hem i kasem pepa ya, hem i karem Baebol blong hem, i go long ol man long vilej mo i ridimaot vas we i stap long pepa ya. !Mekem se taem ol pablisa oli kasem vilej ya oli luk se wok we oli kam blong mekem be mea i mekem finis! Mea wetem ol pikinini mo tufala waef blong hem oli kam long Memoriol. I gat 27 man evriwan we oli kam long Memoriol ya. Stat long taem ya mea i lego Metodis  Jos mo i stadi wetem ol Witnes, mo hem i givim wan pis graon blong bildim Haos Kingdom.

Hat We i Jenis

Ol gudfala fasin blong ol brata i gat paoa long sam man we oli gat nogud tingting long saed blong trutok. Tingbaot wan man we nem blong hem Opoku. Wan spesel paenia i luk hem long wok blong prij mo i soem wan Wajtaoa magasin long hem. Opoku i intres long wan haf long magasin ya be hem i no gat mane. Paenia i givim magasin long man ya mo i eksplenem se magasin i no gat praes long hem, mo hem i plan blong kambak bakegen. Taem paenia ya i kambak, Opoku i askem long hem se: “?Yu yu save mi? Plante long yufala long taon blong Harper oli save mi. !Mi nao mi stap sakemaot ol pikinini blong yufala long skul!” Nao hem i talem se hem i hedmasta long wan hae skul long taon ya mo hem i bin agensem ol pikinini blong ol Witnes blong Jeova we oli no salut long flag.

Be, Opoku i luk Kristin lav blong ol Witnes blong Jeova long tri samting, mo from samting ya hem i stat luksave se tingting blong hem i rong. Faswan samting, hem i luk ol Witnes oli kea long wan brata we i kasem bigfala sik. Oli mekem rod blong hem blong go long narafala kantri blong kasem tritmen we hem i nidim. Opoku i ting se man ya i wan “haeman” blong ol Witnes, be hem i faenemaot se man ya i wan Witnes nomo olsem ol narawan. Namba tu samting hemia long ol yia 1990, taem Opoku i wan refuji long kantri ya Côte d’lvoire. Wan dei, hem i tosta, ale hem i go blong pem wota long wan yangfala man. Opoku i karem wan pepa mane nomo, mo yangfala ya i no gat naf mane blong givim olsem jenis blong pepa mane ya, taswe hem i letem Opoku i karem wota ya i fri nomo. Taem yangfala ya i givim wota ya long Opoku hem i askem se: “?Yu yu ting se taem bambae i kam we ol man olsem yumitu oli save givgivim samting long olgeta we oli no nid blong pem?” Wantaem nomo, Opoku i save se yangfala ya ating hem i wan Witnes blong Jeova, mo yangfala i talem se yes hem i wan Witnes. Opoku i laekem kaen fasin we brata ya i soemaot. Ale, namba tri samting hemia we spesel paenia ya i glad blong givim magasin long hem we hem i no pem. Ol samting ya oli pulum Opoku blong gat stret tingting long saed blong ol Witnes. Hem i gru long saed blong spirit mo naoia hem i wan pablisa we i no baptaes.

Nating se ol brata long Laeberia oli gohed blong kasem ol strongfala traem, oli trastem Jeova mo oli holemstrong long wok blong talemaot gud nius blong ol gudgudfala samting we bambae oli kamtru aninit long Kingdom blong God we stret fasin nomo i stap long hem. Jeova bambae i no save fogetem hadwok mo lav we oli soemaot long nem blong hem.​—Hibrus 6:10.

[Map blong pija long pej 30]

(Lukluk niuspepa)

MONROVIA

[Tok blong pija long pej 31]

Long taem blong trabol, ol man blong Jeova oli givim ol samting long saed blong spirit mo bodi long olgeta we oli gat nid