Mining Blong Wael Anamol Mo Mak Blong Hem

?YU YU laekem blong traem faenemaot mining blong wan tok haed? Blong mekem samting ya, yu lukaotem ol defdefren save we oli save lidim yu blong faenem ansa blong hem. Long Baebol, God i givim ol save we yumi nidim blong faenemaot mining blong namba ya 666, hemia nem, no mak blong wael anamol blong Revelesen japta 13.

Long haf ya, bambae yumi luk fo defren rod​—sam impoten save—​we i lidim yu blong faenemaot mining blong mak blong anamol ya. Bambae yumi luk (1) olsem wanem oli jusum nem blong sam man insaed long Baebol, (2) wael anamol hem i hu, (3) mining blong tok ya se 666 hem i “saen blong nem blong wan man,” mo (4) mining blong namba 6 mo from wanem oli talem tri taem, olsem 600 mo 60 mo 6, hemia 666.​—Revelesen 13:18.

Ol Nem Long Baebol​—I No Wan Tok Nomo We i Makemaot Man

Plante taem, ol nem long Baebol oli gat wan spesel mining, speseli taem God i givim ol nem ya. Eksampol, Ebram i kam papa blong olgeta nesen, taswe God i jenisim nem blong hem i kam Ebraham, we i minim se “Papa blong Bigfala Hip Man.” (Jenesis 17:5) God i talem long Josef mo Meri se tufala i mas putum nem blong pikinini blong Meri se Jisas, we i minim se “Jeova i Sevem Ol Man.” (Matiu 1:21; Luk 1:31) Folem spesel mining blong nem ya, Jeova i openem rod blong sevem ol man tru long wok blong prij mo sakrefaes blong Jisas.​—Jon 3:16.

Long sem fasin, namba ya 666 we God i givim long wael anamol olsem wan nem, hem i olsem wan pija blong ol stamba fasin we God i luk long wael anamol ya. Nao, blong kasem save ol stamba fasin ya, fastaem yumi mas save se anamol ya hem i hu, mo wanem wok blong hem.

Mining Blong Anamol Ya i Kam Klia

Long Baebol, buk blong Daniel i givim plante save long saed blong mining blong ol anamol. Long japta 7, Daniel i eksplenem klia “fo bigbigfala anamol”​—wan laeon, wan bea, wan leped, mo wan anamol we i mekem man i fraet tumas, we bigbigfala tut blong hem oli olsem aean. (Daniel 7:​2-7) Daniel i talem se ol anamol ya oli pija blong ‘fo kantri we oli rulum olgeta man,’ hemia ol politik paoa, we oli rul wan afta narawan antap long plante kantri.​—Daniel 7:​17, 23.

Long saed blong anamol blong Revelesen 13:​1, 2, buk ya The Interpreter’s Dictionary of the Bible i talem se anamol ya “hem wan i gat ol stamba fasin blong ol fofala anamol long vison blong Daniel . . . Taswe, faswan anamol ya [blong Revelesen] i pija blong olgeta politik paoa long wol ya we oli agensem God.” Revelesen 13:7 i sapotem tingting ya, i talem se: “God i letem anamol ya . . . i bos long olgeta man blong olgeta kala, mo kantri, mo laen, mo lanwis.” *

?From wanem Baebol i yusum ol anamol olsem pija blong rul blong ol man? I gat tu risen. Faswan risen, hemia from we ol gavman we oli mekem plante blad i ron long ol handred yia we oli pas, oli olsem ol anamol nomo. Will mo Ariel Durant, we tufala i raetem histri, tufala i talem se “oltaem i bin gat ol wo long ol handred yia we oli pas, mo namba blong ol wo ya i no godaon, nating se laef  blong ol man i kam gud moa mo oli gat ol demokratik gavman.” !Baebol i talem tru nomo taem hem i se “sam man oli gat paoa, mo ol narafala man oli stap aninit long olgeta, oli stap harem nogud”! (Prija 8:9) Namba tu risen, hemia se “bigfala algita ya [Setan] i givim paoa blong hem long anamol ya, i mekem hem i sidaon long bigfala jea blong hem, mo i givim paoa long hem blong i wokem plante samting.” (Revelesen 12:9; 13:2) Taswe, ol politik paoa blong man oli kamaot long Devel Setan, mo oli soem ol semfala fasin olsem wan wael anamol, no wan bigfala algita.​—Jon 8:44; Efesas 6:12.

Be samting ya i no minim se ol rula blong wol oli olsem tul blong Setan. Baebol i talem se long sam fasin, ol gavman blong man oli olsem “man blong wok blong God” we i stanemap oda long wol ya. Sipos ol gavman oli no stap, bambae wol ya i olbaot nomo. Mo tu, sam lida oli letem ol man oli mekem samting we oli gat raet blong mekem, olsem raet ya blong wosipim trufala God​—wan samting we Setan i agensem. (Rom 13:​3, 4; Esra 7:​11-27; Ol Wok 13:7) Nating se i olsem, paoa blong Devel Setan long ol man i mekem se i no gat wan man no wan grup blong man we i naf blong karem trufala pis mo fasin sef i kam long ol man. *​—Jon 12:31.

“Namba Blong Man”

Namba tri samting we i halpem yumi blong kasem mining blong namba ya 666, hemia se Baebol i talem we hem i “saen blong nem blong wan man,” no, folem Baebol ya The Amplified Bible, hem i wan “namba blong man.” Tok ya i no save minim wan prapa man, from we Setan nao i bos long wael anamol ya, i mo wan man we i bos long hem. (Luk 4:​5, 6; 1 Jon 5:19; Revelesen 13:​2, 18) Sipos anamol ya i gat mak no “namba blong man,” hemia i min se hem i wan samting long saed blong ol man long wol ya, i no wan spirit no wan devel. Taswe hem i gat sam fasin blong ol man. ?Wanem ol fasin ya? Baebol i talem se: ‘Olgeta man oli mekem nogud finis, mo oli stap afsaed olgeta long ol gudgudfala fasin blong God.’ (Rom 3:23) Taswe, sipos wael anamol ya i gat wan “namba blong man,” samting ya i soem we ol gavman oli gat sem fasin olsem ol man we oli gat sin, oli no stretgud olgeta.

Histri i pruvum we samting ya i tru. Henry Kissinger, we bifo hem i Sekretari blong Gavman blong Amerika, i talem se: “Evri nesen we i bin stanap samtaem, i foldaon finis. I gat plante eksampol long histri, blong ol traehad blong man we oli no karem frut, mo ol drim we oli neva kamtru . . . Taswe, wan man we i stadi long histri i mas rere oltaem blong raetem ol stori we oli tokbaot trabol nomo.” Tingting ya blong Kissinger i laenap wetem wan stamba trutok blong Baebol se: ‘I no gat man i save wanem samting bambae i kamtru long laef blong hem, mo i no gat man i save kam bos long laef blong hem.’​—Jeremaea 10:23.

 Naoia yumi save hu ya wael anamol mo yumi luksave tingting blong God long saed blong hem. Taswe yumi naf blong kasem save mining blong namba sikis ya we hem i lashaf blong tok haed ya, mo from wanem oli raetem tri taem, hemia se 600 mo 60 mo 6.

?From Wanem Oli Raetem Namba Sikis Tri Taem?

Long Baebol, sam namba oli gat spesel mining. Eksampol, plante taem, namba seven i minim se wan wok i finis fulwan, no i stretgud olgeta long lukluk blong God. Olsem ol seven “dei” blong wik ya we God i wokem olgeta samting, hem i wan longfala taem we God i finisim gud samting we hem i wokem long wol. (Jenesis 1:3–2:3) Baebol i talem se “ol promes” blong God oli olsem silva “we oli bonem seven taem long faea,” mekem se oli klin mo oli stretgud olgeta. (Ol Sam 12:6; Ol Proveb 30:​5, 6) Man ya Neman i kasem rabis sik ya leprosi, mo taem hem i swim seven taem long Jodan Reva, sik blong hem i finis gud.​—2 King 5:​10, 14.

Namba ya sikis i daon moa long namba ya seven. !Taswe i stret nomo we Baebol i yusum namba ya sikis olsem pija blong samting we i no stretgud olgeta, samting we God i luk se wan samting i rong long hem! (1 Kronikel 20:​6, 7) Antap long samting ya, fasin blong raetem namba sikis ya tri taem, hemia 666, hem i makem strong moa se i no stretgud olgeta. Mo yumi sua we hemia i tru, from we namba ya 666 hem i wan “namba blong man,” olsem yumi luk finis. Taswe, histri blong wael anamol ya, namba blong hem we i “namba blong man,” mo namba ya 666 hem wan, evri samting ya i pulum yumi blong gat wan tingting nomo​—wael anamol i no stretgud nating mo i no save mekem wan gudfala samting nating long lukluk blong Jeova.

Ol nogud fasin blong wael anamol ya i mekem yumi tingbaot ol tok blong Daniel long saed blong King blong Babilon bifo, nem blong hem Belsasa. Jeova i yusum Daniel blong talem long hed gavman ya se: “Hem [God] i skelem yu finis long skel, mo i luk se yu no hevi nating.” Long naet ya, oli kilim i ded Belsasa mo bigfala nesen blong Babilon i foldaon. (Daniel 5:​27, 30) Long sem fasin, jajmen blong God long wael anamol mo long olgeta we oli gat mak blong hem, i minim se anamol ya wetem ol sapota blong hem bambae oli lus olgeta. Be long jajmen ya, God bambae i spolemgud olgeta politik paoa blong wol ya, i no wan nesen nomo. (Daniel 2:44; Revelesen 19:​19, 20) !Taswe i impoten tumas we yumi no gat mak blong wael anamol!

Yumi Luksave Mining Blong Mak

Long buk blong Revelesen, jes afta we oli tokbaot namba ya 666, oli tokbaot ol 144,000 man we oli stap folem Smol Sipsip ya Jisas Kraes. Ol man ya oli gat nem blong Jisas wetem nem blong Papa blong hem, Jeova, i stap long fes blong olgeta. Mak ya i soemaot se oli man blong Jeova mo blong Pikinini blong hem, mo oli praod blong talemaot nem blong tufala. Long sem fasin, olgeta  we oli gat mak blong wael anamol oli soem se oli slef blong anamol ya. Taswe, mak ya we i save stap long raethan no long fes blong ol man, hem i olsem wan pija nomo. Hem i soem se ol man ya oli sapotem mo oli wosipim ol gavman blong wol we oli gat ol fasin blong ol anamol. Olgeta we oli gat mak ya oli stap givim long “Sisa” ol samting we i mas go long God. (Luk 20:25; Revelesen 13:​4, 8; 14:1) ?Olsem wanem oli mekem samting ya? Oli givim ona we i olsem wosip long ol gavman, ol flaeg blong ol gavman mo ol ami blong olgeta, mo oli putum hop blong olgeta i stap long ol gavman ya blong sevem olgeta. Wosip we oli givim long trufala God i kamaot long maot nomo be i no kamaot long hat blong olgeta.

Defren olgeta, Baebol i givim woning ya long yumi se: “Yufala i no mas trastem ol lida blong wol ya. Olgeta oli no save sevem yufala. Taem oli ded, oli stap gobak long graon nomo, nao ol plan blong olgeta oli no save kamtru.” (Ol Sam 146:​3, 4) Olgeta we oli folem waes advaes ya oli no letem tingting blong olgeta i foldaon taem ol gavman oli no holem ol promes blong olgeta, no taem ol lida we oli save tok swit blong pulum man oli lusum posisen blong olgeta.​—Ol Proveb 1:33.

Hemia i no minim we ol trufala Kristin oli no kea long ol trabol blong ol man, nogat. Oli bisi blong talemaot Kingdom blong God, gavman ya we bambae i stretem olgeta trabol blong man, mo we oli stanap strong long saed blong hem.​—Matiu 24:14.

Kingdom Blong God​—Wan Hop Nomo Blong Olgeta Man

Taem Jisas i stap long wol, Kingdom blong God nao i bigfala samting we hem i talemaot. (Luk 4:43) Long Lodsprea, Jisas i tijim ol disaepol blong hem se oli mas prea blong Kingdom ya i kam, mo blong olgeta man long wol oli mekem ol samting we God i wantem. (Matiu 6:​9, 10) Kingdom ya hem i wan gavman we bambae i rul antap long fulwol, we kaptel blong hem i stap long heven, i no stap long wol. Hemia risen from wanem Jisas i kolem hem se “kingdom blong heven.”​—Matiu 11:​12, NW.

Jisas Kraes nomo i naf blong kam King blong Kingdom ya, hem we i ded from ol man we bambae oli stap aninit long Kingdom blong hem. (Aesea 9:​6, 7; Jon 3:16) I no longtaem, Rula ya we i stretgud olgeta, we naoia hem i wan strong spirit man, bambae i sakem wael anamol wetem ol king mo ol ami blong hem oli go “long bigfala hol blong faea, we i gat salfa i stap laet long hem,” hemia wan pija blong ded blong olwe. Be i no hemia nomo. Bambae hem i kilim i ded Setan blong olwe. Hemia wan samting we ol man oli no naf blong mekem.​—Revelesen 11:15; 19:​16, 19-21; 20:​2, 10.

Kingdom blong God bambae i karem pis i kam long ol man we oli obei long hem. (Ol Sam 37:​11, 29; 46:​8, 9) Bambae i no moa gat man i krae, i harem nogud, mo bambae i no moa gat ded. !Hemia wan nambawan blesing blong ol man we oli no gat mak blong wael anamol ya!​—Revelesen 21:​3, 4.

[Ol Futnot]

[Bokis blong pija long pej 5]

Ol Samting We Oli Soemaot Mining Blong Namba Ya 666

1. Plante taem, ol nem long Baebol oli talem wan samting long yumi long saed blong fasin no laef blong man, olsem nem blong Ebraham, Jisas, mo sam narafala bakegen. Long sem fasin, nem blong wael anamol i wan pija blong ol stamba fasin blong hem.

2. Long Baebol, long buk blong Daniel, ol defren anamol oli pija blong ol defren gavman we oli rul, wan afta narawan. Wael anamol blong Revelesen 13:​1, 2 i wan pija blong olgeta politik paoa blong wol ya, we Setan i givim paoa long olgeta mo i bos long olgeta.

3. Namba blong anamol ya i “saen blong nem blong wan man,” no wan “namba blong man,” hemia i min se hem i wan samting long saed blong ol man long wol ya, be i no wan devel. Taswe namba ya i soem ol slak fasin blong ol man, we oli kamaot from we oli sinman mo oli no stretgud olgeta.

4. Long lukluk blong God, namba ya seven i wan pija blong ol samting we oli finis gud mo oli stretgud olgeta. Namba sikis i daon moa long seven, taswe hem i pija blong ol samting we i no stretgud nating. Oli talem namba sikis tri taem, hemia 666, blong makem strong moa fasin blong wan samting we i no stretgud nating.

[Tok blong pija long pej 6]

Rul blong ol man i no save givim wan gudfala samting nating long yumi, mo namba ya 666 i stret blong soem samting ya

[Credit Line]

Starving child: UNITED NATIONS/Photo by F. GRIFFING

[Tok blong pija long pej 7]

Bambae Jisas Kraes i rulum wol ya long fasin we i stretgud olgeta