Ripot Long Wok Blong Kingdom

Prij Long Ol Man Long Ples Blong Wok

JISAS i singaot aposol Matiu, Pita, Andru, Jemes mo Jon long ples blong wok blong olgeta. Pita, Andru, Jemes mo Jon oli stap bisi long bisnes blong olgeta blong hukum fis, taem Jisas i singaot olgeta se: “Yu biaen long mi.” Matiu i wan man blong tekem mane blong takis mo hem i stap sidaon long ofis blong hem taem Jisas i singaot hem.​—Matiu 4:18-21; 9:9.

Gudfala frut i save kamaot taem yumi prij long ples blong wok. Taem ol Witnes blong Jeova long Japan oli luksave samting ya oli plan blong mekem moa long saed ya. ?Wanem ol frut we i kamaot from? Long sam manis nomo, oli mekem plante taosen visit mo oli statem klosap 250 Baebol stadi. Tingbaot sam long ol ekspiriens ya.

Wan fultaem paenia long Tokyo i luk wan bos blong wan restoron we i bin storian wetem wan Witnes bitim 30 yia finis taem hem i wan studen long skul. Nating we long taem ya, man ya i no kasem save plante long ol samting we hem i harem, be hem i intres long Baebol. From we hem i intres finis long Baebol, naoia hem i glad blong stadi Baebol wetem buk ya Save Blong Lidim Yu Long Laef We i No Save Finis. * Mo tu, hem i wokem wan program blong hem wan blong ridim Baebol evri sapa bifo we hem i slip.

Wan spesel paenia i go prij long wan ofis. Nating we bos i no stap, woman ya we i ansarem telefon long ofis blong bos i askem se, “?Yu yu wantem blong storian wetem mi?” Afta we tufala i storian smoltaem long telefon, woman ya i kamaot long ofis, mo i talem long paenia ya se hem i intres blong ridim Baebol. Ale, paenia i mekem plan blong kambak wetem wan Baebol mo blong statem stadi wetem hem. Tufala i stap mekem stadi long wan naesfala garen, evri moning bifo we woman ya i go long wok.

Long wan narafala ofis, wan man i luk we wan woman we tufala i stap wok tugeta, i glad blong karem Wajtaoa mo Wekap long wan Witnes we i kam prij long hem, be afta we Witnes ya i go woman ya i sakem ol magasin ya. Taem man ya i gobak hom, hem i talem long waef blong hem we i wan Witnes, samting we i hapen mo i talem toktok ya se sipos hem, bambae hem i lesin smol long Witnes ya. Smol gel blong man ya i harem samting we papa blong hem i talem, ale hem i talem stori ya bakegen long wan Witnes we i stap prij long ol bisnes teritori ya. Ale Witnes ya i go luk man ya long ofis blong hem mo i statem wan Baebol stadi wetem hem. I no longtaem biaen, man ya i stap go long ol miting long Sande.

Sam narafala gud samting tu i kamaot from fasin ya blong prij long ples blong wok. Plante pablisa long Japan oli gat gudhan nao blong mekem visit long ol man long ol stoa, ol faktri mo ol ofis. Mo tu, taem oli mekem olsem, oli faenem plante man we oli bin kam slak mo oli statem stadi bakegen wetem olgeta ya. Frut we i kamaot i nambawan. Wan kongregesen long sentrol blong Tokyo i ripotem 108 Baebol stadi, hemia i bitim namba we oli ripotem long yia we i pas.

[Futnot]