Laef Stori

Smol Samting We Mitufala i Lego i Karem Plante Blesing Long Mitufala

GEORG MO ANN ALJIAN TUFALA I TALEM STORI YA

Mi wetem waef blong mi, mitufala i neva ting se wan dei bambae mitufala i miksimap tufala wod ya “tija” mo “smol rat.” Mo mitufala i neva ting se taem mitufala i kasem 60 yia, bambae mitufala i traehad blong kasem save long sam narakaen hanraet, blong toktok wetem ol man blong ol kantri long Is blong Esia. Be hemia nao samting we mi wetem Ann mitufala i mekem long en blong ol yia 1980. Mitufala i glad blong talem long yufala olsem wanem fasin blong lego ol smol samting we mitufala i laekem i karem plante blesing long laef blong mitufala.

FAMLE blong mi i kamaot long Amenia mo mi mi stap go long Jos blong Amenia. Ann, hem i wan Katolik bifo. Taem mitufala i mared long 1950, mitufala i brekem ol rul blong ol jos blong mitufala. Long taem ya mi gat 27 yia, mo Ann i gat 24 yia. Mi gat wan stoa blong klinim klos long Jersey City, long taon ya New Jersey, Yunaeted Stet. Mi wetem Ann, mitufala i laef long wan smol haos antap long stoa ya. Mi bin lidim bisnes ya blong klosap fo yia finis bifo we mitufala i mared.

Long 1955 mitufala i pem wan naesfala haos we i gat 3 rum blong slip long hem, long Middletown, long taon ya New Jersey. Haos ya i stap samwe 60 kilometa longwe long stoa blong mi. Mi stap wok sikis dei long wan wik. Oltaem mi stap kamhom let long naet. Mi luk nomo ol Witnes blong Jeova taem oli kam long stoa blong mi blong givim ol buk we i tokbaot Baebol. Mi rili intres blong ridim ol buk ya. Nating se bisnes blong mi i tekem bighaf blong taem blong mi, be sloslo mi gat moa respek long Baebol.

I no longtaem mi faenemaot se long radio stesen blong Watchtower, nem blong hem WBBR, oli stap givimaot sam tok long saed blong Baebol long taem ya we mi stap ron long trak blong mi blong gokam long stoa evri dei. Mi stap lesingud long ol tok ya gogo intres blong mi i kam dip moa long Baebol,  mo samting ya i pulum mi blong askem ol Witnes sipos oli save kam luk mi. Long Novemba 1957, George Blanton i kam long haos blong mi mo i statem wan Baebol stadi wetem mi.

Famle Blong Mitufala i Joengud Long Klin Wosip

?Wanem tingting blong Ann long saed blong stadi ya? I gud mi letem hem i talem long yu.

“Fastaem mi mi strong blong agensem stadi ya. Oltaem mi stap mekem trabol taem George i stadi long Baebol, taswe hem i tekem disisen blong mekem stadi blong hem long wan narafala ples, mo hem i mekem olsem blong eit manis. Long taem ya, George i stat go long ol miting long Haos Kingdom evri Sande. Mi luksave se hem i rili tinghae long Baebol stadi blong hem, from we i gat wan dei nomo we hem i no wok, be hem i yusum dei ya blong go long ol miting. Nating se i olsem, hem i wan gudfala hasban mo wan gudfala papa yet​—ol fasin blong hem i kam gud moa long saed ya—​ale fasin blong mi i stat jenis. Samtaem, taem mi klinim smol tebol mo i no gat man i stap luk mi, mi tekem magasin ya Wekap! we George i livim oltaem long smol tebol ya, mo mi ridim. Samtaem bakegen, George i ridim long mi sam haf blong Wekap! we oli no tokbaot ol bilif blong jos, be i leftemap God we i wokem yumi.

“Wan naet we George i no stap long haos from we hem i mekem Baebol stadi blong hem wetem Brata Blanton, mi tekem wan buk we smol boe blong mitufala, we i gat 2 yia blong hem, nem blong hem George, i bin livim long tebol klosap long bed blong mi. Buk ya i tokbaot hop blong ol dedman. Mi mi taed, be nating se i olsem, mi stat ridim buk ya from we bubu woman blong mi i jes ded, mo mi harem nogud tumas from samting ya. Wantaem nomo mi kasem save trufala tijing blong Baebol long saed blong ol dedman se olgeta oli no safa sam ples, mo se bambae oli save laef bakegen long fiuja. I no longtaem, mi wekap gud mo mi stap sidaon long bed. Mi wantem tumas blong ridim buk ya mo mi makem ol defren poen we mi wantem soem long George taem hem i kamhom, afta long Baebol stadi blong hem.

“Hasban blong mi i no save bilif se tingting blong mi i jenis wantaem olsem. !Taem hem i aot long haos, mi stap agensem hem, mo naoia mi glad we mi glad blong tokbaot ol nambawan trutok we mi lanem insaed long Baebol! Mitufala i storian long Baebol gogo kasem eli moning. George i eksplenem long mi wanem nao stamba tingting blong God long saed blong wol ya. Long naet ya, mi askem hem sipos hem i save mekem Baebol stadi blong hem long haos, blong mi joenem hem long stadi ya.

“Brata Blanton i talem se i gud sipos ol pikinini oli joen wetem mitufala blong stadi long Baebol. Mitufala i ting se ol pikinini oli yangfala tumas, from we wan i gat tu yia mo narawan i gat fo yia nomo. Be Brata Blanton i soem vas blong Dutronome 31:12 long mitufala, we i talem se: “Yufala i mas singaot olgeta man wetem ol woman oli kam wanples, wetem ol pikinini . . . , blong olgeta evriwan oli save harem tok ya.” Mitufala i folem advaes ya mo mitufala i mekem plan blong ol pikinini oli givim ansa long Baebol stadi. Mifala i rerem ol ansa tugeta, be mitufala i neva talem long ol pikinini ol samting we oli mas talem. Mitufala i ting se fasin ya i givhan long ol pikinini blong mitufala blong oli lan blong lavem  trutok. Mitufala i tangkiu tumas long Brata Blanton from ol gudfala advaes we hem i givim long mitufala, blong halpem famle blong mifala blong gru long saed blong spirit.”

Sam Traem We Oli Mekem Se Mifala i Mas Lego Sam Samting

From we mifala evriwan i stadi long Baebol, nao i gat sam niufala jenis we mifala i mas mekem. Stoa blong mi i stap longwe long haos, mekem se klosap evri naet mi kamhom afta naen klok nomo. From samting ya, mi no save go long ol miting long wik, mi save go long Sande nomo. Long taem ya Ann i stap go long olgeta miting mo hem i gohedgud long saed blong spirit. Mi tu mi wantem go long olgeta miting mo mekem gud stadi wetem famle blong mi. Mi save finis se blong kasem mak ya, bambae mi mas lego sam samting we mi laekem. Taswe mi tekem disisen blong sotem ol aoa blong wok blong mi, nating se bambae mi lusum sam kastoma from. 

Disisen ya i karem ol gudfala frut nomo. Mifala i tinghae long famle stadi olsem we mifala i tinghae long ol faef narafala miting we mifala i holem long Haos Kingdom. Mifala i kolem famle stadi ya se namba sikis miting blong mifala. Taswe, mifala i putum wan stret dei mo aoa blong hem, hemia evri wik long Wenesde, long eit klok long naet. Samtaem, afta we mifala i kakae long naet mo afta we mifala i wasem ol dis, wan long mifala i talem se, “!‘Miting’ bambae i stat i no longtaem!” Samtaem, sipos mi let lelebet, Ann i statem stadi wetem ol pikinini, mo mi gohed blong lidim stadi taem mi kasem haos.

Wan narafala samting we i halpem famle blong mifala blong stap strong mo joengud tugeta, hemia fasin blong ridim vas blong dei tugeta evri moning. Be i no isi blong mekem samting ya, from we evriwan i wekap long defdefren taem. Mifala i storian long saed blong samting ya, mo mifala i tekem disisen se bambae mifala evriwan i wekap long sem taem, dring ti long haf pas sikis long moning, mo ridim vas blong dei tugeta. Fasin ya i karem gudfala frut long mifala evriwan. Taem ol pikinini boe blong mitufala i gruap, oli tekem disisen blong wok long Betel. Mitufala i harem se fasin ya blong storian evri dei long Baebol i halpem olgeta blong gruap long saed blong spirit.

Blesing We Mifala i Kasem Afta Baptaes i Pulum Mifala Blong Lego Plante Moa Samting

Mi tekem baptaes long 1962. Mi bin lidim prapa bisnes blong mi blong 21 yia, be mi tekem disisen blong salem stoa blong mi mo wok blong wan bos. Olsemia mi stap klosap moa long famle blong mi mo mifala i naf blong mekem wok blong Jeova tugeta. Samting ya i openem rod long plante moa blesing. Mifala i putum mak se bambae mifala evriwan i joen long wok blong prij fultaem. Ale, long stat blong ol yia 1970, fasbon boe blong mitufala, Edward, i kam wan fultaem paenia jes afta we hem i finisim hae skul. Smoltaem biaen, narafala boe blong mitufala, George, hem i stat paenia tu, mo Ann i kam wan paenia biaen long hem. Eksampol blong trifala i leftemap tingting blong mi, from we oltaem oli stap talem ol stori blong olgeta long wok blong prij. Ful famle i storian tugeta blong luksave samting we mifala i save mekem blong gat wan laef we i no fasfas long tumas samting, mo mekem se mifala evriwan i save joen long wok blong paenia. Mifala i tekem disisen blong salem haos blong mifala. Mifala i bin laef long haos ya blong 18 yia finis, mo ol pikinini blong mitufala i bin gruap long haos ya. Mifala i laekem tumas haos ya, be Jeova i blesem disisen blong mifala.

Long 1972, oli singaot Edward blong go wok long Betel, mo long 1974 oli singaot George i go long Betel. Mi wetem Ann, mitufala i mestem tufala boe blong mitufala, be nating se i olsem, mitufala i neva tingbaot se bambae i gud tumas sipos oli stap klosap long mifala, oli mared, mo oli gat pikinini. Defren olgeta, mitufala i glad blong luk tufala boe blong mitufala i wok blong Jeova long Betel. * Mitufala i agri wetem Ol Proveb 23:15 we i talem se: “Pikinini  blong mi, sipos yu kam waes, bambae mi mi glad we mi glad.”

Mitufala i Kam Spesel Paenia

Tufala boe blong mitufala i stap wok long Betel, mo mitufala i gohed blong paenia. Ale wan dei long 1975, mitufala i kasem wan leta we i singaot mitufala blong wok olsem spesel paenia long wan ples we i no gat pablisa long hem, hemia long Clinton County, Illinois. !Mitufala i sapraes tumas! Sipos mitufala i agri, i min se mitufala i mas lego New Jersey, wan ples klosap long tufala boe blong mitufala long New York. Mo ol fren mo ol famle blong mitufala i stap long ples ya tu. Nating se i olsem, mitufala i ting se hemia wan wok we Jeova i givim long mitufala. Mitufala i lego ol samting ya we mitufala i laekem, be biaen mitufala i kasem plante moa blesing bakegen.

Mitufala i prij long teritori ya we i no gat pablisa long hem bifo. Plante manis i pas, nao mifala i naf blong holem ol miting long wan bigfala pablik haos long Carlyle, Illinois. Be mifala i wantem gat wan haos we mifala i save holem ol miting oltaem long hem. Wan brata blong ples ya wetem waef blong hem, tufala i faenem wan graon wetem wan smol haos long hem, we mifala i save rentem. Mifala i klinim graon ya, wetem haos blong hem mo ol toelet we i stap afsaed, mo mifala i jenisim haos ya i kam wan smol ples blong miting. Mifala i rimemba yet wan hos we i stap kam luk mifala oltaem. !Plante taem, hos ya i pusum hed blong hem long wan windo, mo hem i stap lukluk mifala taem mifala i mekem ol miting!

Ol yia oli pas, ale oli stanemap Kongregesen blong Carlyle, mo mitufala i glad we mitufala i givhan blong stanemap kongregesen ya. Steve mo Karil Thompson, tufala i kam wok olsem paenia tu blong prij long teritori ya we i no gat pablisa long hem. Tufala i givhan long mitufala long wok ya. Tufala i stap long ples ya blong plante yia mo biaen tufala i go long Watchtower Baebol Skul blong Gilead mo oli muv i go long Is Afrika olsem misinari, mo naoia oli stap mekem wok blong seket.

Kwiktaem nomo, plante moa man oli kam long smol ples blong miting blong mifala, mekem se mifala i nidim wan ples we i bigwan moa. Semfala brata blong ples ya wetem waef blong hem, tufala i halpem mifala bakegen, mo tufala i pem wan graon we i moagud blong bildim wan Haos Kingdom long hem. !Sam yia biaen, mitufala i glad tumas taem oli invaetem mitufala long dedikesen blong niufala Haos Kingdom blong Carlyle! Mi gat janis blong mekem tok blong dedikesen. Mitufala i glad tumas we mitufala i bin wok long ples ya, mo mitufala i harem se hemia i wan blesing we i kamaot long Jeova.

Wan Niufala Teritori Blong Mitufala

Long 1979, oli singaot mitufala blong mitufala i go long wan narafala teritori, long Harrison, New Jersey. Mitufala i prij long ples ya klosap 12 yia. Long taem ya mitufala i statem wan Baebol stadi wetem wan woman Jaena, mo biaen mitufala i gat janis blong stadi long Baebol wetem plante man Jaena. Long taem ya, mitufala i lanem se plante taosen man Jaena oli kam olsem studen blong skul no oli kam wetem famle blong olgeta blong laef long  ples ya. Samting ya i pulum mitufala blong lanem lanwis Jaena. Mitufala i mas spenem plante aoa evri dei blong stadi long lanwis ya, be biaen mitufala i stadi long Baebol wetem plante man Jaena we oli laef long ples ya.

Long ol yia ya, plante fani samting i hapen long mitufala, speseli taem mitufala i traem toktok lanwis Jaena. Wan dei, Ann i stap toktok long wan woman long wok blong prij, mo hem i talem se hem i wan “smol rat” blong Baebol, be hem i minim se hem i wan “tija” blong Baebol. Long lanwis Jaena, tufala wod ya i klosap sem mak. Woman blong haos ya i smael mo hem i talem se: “Plis, kam insaed. Mi neva toktok wetem wan smol rat blong Baebol.” Mitufala i traehad yet blong toktok lanwis ya.

Biaen oli sanem mitufala i go long wan narafala ples long New Jersey we mitufala i gohed blong prij long ol man Jaena. Afta, oli singaot mitufala blong muv i go long Boston, Massachusetts, we long ples ya i gat wan grup blong man Jaena i stap blong tri yia finis. Mitufala i gat janis blong givhan long grup ya long ol seven yia we i jes pas, mo mitufala i glad tumas taem mitufala i luk grup ya i kam wan kongregesen long Jenuware 1, 2003.

Mitufala i Kasem Plante Blesing From We Mitufala i Lego Ol Samting We Mitufala i Laekem

Long Malakae 3:​10, Jeova i singaot ol man blong hem se oli mas karem ol presen mo ol sakrefaes blong olgeta oli kam, nao bambae hem i givim plante gudgudfala samting long olgeta, we i plante we i plante. Mitufala i lego wan bisnes we mi intres tumas long hem. Mitufala i salem haos blong mitufala, we mitufala i laekem tumas. Mo mitufala i lego sam narafala samting bakegen we mitufala i laekem. Be ol samting ya we mitufala i bin lego, oli nating nomo taem yu skelem wetem ol blesing we Jeova i givim long mitufala.

!Yes, Jeova i kafsaedem plante nambawan blesing long mitufala! Mitufala i glad tumas we tufala boe blong mitufala oli gohedgud long trutok, mitufala i haremgud from we mitufala i joen long fultaem wok blong prij blong sevem laef blong ol man, mo mitufala i luk we Jeova i lukaotgud long mitufala. !Yes, ol smol samting we mitufala i lego oli karem plante bigfala blesing i kam long mitufala!

[Futnot]

[Tok blong pija long pej 25]

Louise mo George Blanton wetem Ann, long 1991

[Tok blong pija long pej 26]

Haos Kingdom long Carlyle, we oli dediketem long Jun 4, 1983

[Tok blong pija long pej 27]

Wetem niufala Kongregesen blong ol man Jaena long Boston

[Tok blong pija long pej 28]

Wetem Edward, Connie, George, mo Grace