?Yu Yu Stap Lukluk i Go Nomo Long Praes Blong Laef?

I GAT wan sik we sloslo i save spolem ae blong man. Fastaem, sik ya i mekem se man i save lukluk nomo ol samting stret long fored blong hem, be i no ol samting long tufala saed. Sipos man ya i no go luk dokta, sik ya bambae i go moa, bambae i mekem we hem i no moa save lukluk ol samting stret long fored blong hem tu. Biaen, bambae hem i save kam blaen olgeta. ?Wanem sik ya? Nem blong hem Glaucoma, mo hem i mekem plante moa man oli kam blaen i bitim ol narafala sik.

Yes, wan sik olsem i save mekem we sloslo, man i no moa save lukluk klia, gogo hem i no moa lukluk nating. Be, yumi save kam blaen sloslo long wan narafala fasin tu we i moa impoten, hemia long saed blong spirit. Taswe, yumi mas meksua se yumi stap lukluk ol samting long saed blong spirit i klia nomo, olsem we oli ol bigfala samting long laef blong yumi.

Lukluk Klia Praes Blong Laef

Wan long “ol samting ya we yumi no save luk” wetem prapa ae blong yumi, hemia nambawan praes blong laef olwe. Hemia praes we Jeova bambae i givim long olgeta we oli stap tru long hem. (2 Korin 4:18) I tru, faswan risen from wanem ol Kristin oli mekem wok blong God, hemia se oli lavem hem. (Matiu 22:37) Nating se i olsem, Jeova i wantem tu we yumi tingting wetem glad long praes we yumi save kasem long fiuja. Hem i wantem we yumi tingbaot hem olsem wan Papa we i glad blong givim presen, mo we “i stap mekem i gud long olgeta we oli stap traem faenem hem.” (Hibrus 11:6) Taswe, olgeta we oli rili save God mo lavem hem, oli tinghae tumas long ol blesing we hem i promes blong givim, mo oli wantem tumas blong luk ol blesing ya oli kamtru.​—Rom 8:​19, 24, 25.

Plante man we oli stap ridim ol Wajtaoa mo Wekap! oli laekem tumas ol pija blong Paradaes long tufala buk ya. I tru, yumi no save stret evri samting long saed blong Paradaes long fiuja, mo ol pija ya oli soemaot nomo ol samting we Baebol i talem long ol vas olsem Aesea 11:​6-9. Nating se i olsem, wan Kristin woman i talem se: “Taem mi luk ol pija blong Paradaes long Wajtaoa mo Wekap!, mi tektaem blong luklukgud long olgeta, olsem we mi stap lukluk ol buk we ol turis oli ridim bifo we oli go long wan trip. Mi traehad blong putum mi wan insaed long ol pija ya, from we hemia nao samting we mi rili wantem long fiuja, long stret taem blong God.”

Aposol Pol i gat sem tingting ya long saed blong taem ya we bambae hem i “go stap antap” wetem Kraes. Hem i no ting se hem i kasem praes ya finis, hem i save se i mas stanap strong go kasem en blong laef blong hem. Be hem i ‘stap traehad oltaem blong kasem ol samting we oli stap long fes blong hem.’ (Filipae 3:​13, 14) Long sem fasin, Jisas i stanap strong go kasem we hem i ded long pos, from we “hem i luksave finis we bambae i save harem gud.”​—Hibrus 12:2.

?Samtaem yu bin ting se yu yu no naf blong kasem laef long niufala wol? I tru se, yumi no mas sua bitim mak long yumi wan, yumi save se blong kasem praes blong laef yumi mas gohed blong stanap strong go kasem en. (Matiu 24:13) Be sipos yumi stap traehad fulwan blong mekem ol samting we God i wantem, yumi save gat strong tingting se bambae yumi kasem praes ya. Tingbaot we Jeova “i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.” (2 Pita 3:9) Sipos yumi trastem Jeova, hem bambae i givhan long yumi blong kasem praes ya  blong laef. Yes, God i no gat fasin ya blong traem faenem poen long olgeta we oli stap traehad blong mekem hem i glad, olsem we hem i wantem blokem olgeta blong oli no kasem laef.​—Ol Sam 103:​8-11; 130:​3, 4; Esikel 18:32.

Taem yumi save filing we Jeova i gat long ol man blong hem, samting ya i mekem se yumi save putum tingting blong yumi i stap strong long hem. Hemia wan fasin we i impoten, sem mak olsem bilif. (1 Korin 13:13) Grik tok long Baebol we oli tanem i kam “putum tingting i stap strong long God,” i karem mining ya se yumi wantem “kasem samting we i gud.” Aposol Pol i gat tingting olsem taem hem i raetem se: “Mifala i wantem tumas we tingting blong yufala bambae i stap strong oltaem, nao bambae yufala i save kasem ol samting ya we yufala i putum tingting blong yufala i stap strong long hem. Mifala i no wantem we bambae yufala i kam slak. Mifala i wantem we yufala bambae i folem fasin blong olgeta ya we oli bilif strong, mo we tingting blong olgeta i longfala, nao oli save kasem ol samting we God i promes blong givim long olgeta.” (Hibrus 6:​11, 12) Makemgud se sipos yumi gohed blong mekem wok blong Jeova mo stap tru long hem, yumi save sua se bambae yumi kasem laef. Hemia i no olsem samting we ol man blong wol oli putum tingting blong olgeta long hem, nogat. Strong tingting blong yumi i no save lidim yumi blong “harem nogud.” (Rom 5:5) ?Ale, olsem wanem yumi save holem klia mo strong tingting long saed blong praes we yumi save kasem?

Mekem Ae Blong Yumi i Klia Long Saed Blong Spirit

Yumi no save lukluk tufala samting wantaem. Sem mak long saed blong spirit. Sipos yumi tingting oltaem long ol samting blong wol, yumi no save putum tingting blong yumi i stap strong long niufala wol we God i promes blong mekem. Sloslo, bambae yumi no moa lukluk klia niufala wol ya, nao maet yumi no moa wantem kasem praes ya, ale yumi no moa tingting long niufala wol ya nating. !Samting ya bambae i nogud tumas! (Luk 21:34) !Taswe, i impoten tumas blong mekem ae blong yumi i “klia gud,” hemia i min se yumi stap tingting nomo long Kingdom blong God mo praes blong laef we i no save finis!​—Matiu 6:​22, Nyutesteman wetem Ol Sam long Bislama.

I no isi oltaem blong mekem ae blong yumi i stap klia gud. I gat ol trabol we yumi mas winim evri dei, mo ol samting blong pulum tingting blong yumi i go long narafala rod, wetem ol traem tu. ?Olsem wanem yumi save tingting nomo long Kingdom blong God mo niufala wol we hem i promes blong mekem, mo long semtaem lukaotgud long ol narafala wok we yumi mas mekem? Bambae yumi tokbaot tri rod blong givhan long yumi.

Stadi long Tok blong God evri dei. Sipos yumi ridim Baebol evri dei mo stadi long ol buk we oli eksplenem Baebol, samting ya bambae i givhan long yumi blong putum tingting blong yumi oltaem long ol samting long saed blong spirit. Maet yumi bin stadi long Tok blong God blong plante yia finis, be nating, yumi mas gohed blong stadi, olsem we yumi mas gohed blong kakae blong mekem bodi blong yumi i stap strong oltaem. Nating se yumi kakae plante taosen taem finis long ol yia we oli pas, be yumi no save stop naoia, yumi mas gohed blong kakae oltaem. Long sem fasin, nating se yumi savegud Baebol, be yumi mas gohed oltaem blong tekem kakae long saed blong spirit, nao tingting blong yumi bambae i stap strong long praes blong laef, mo bilif wetem lav blong yumi tu bambae i stap strong.​—Ol Sam 1:​1-3.

Wetem tangkiu long hat blong yumi, tingting dip long Tok blong God. ?From wanem i impoten blong tingting dip? I gat tu risen. Faswan se, taem yumi  tingting dip, yumi kasem save gud long ol samting we yumi ridim, mo yumi wokem fasin tangkiu long hat blong yumi. Seken risen se, taem yumi tingting dip, yumi no save fogetem Jeova, ol nambawan wok blong hem, mo praes we hem i wantem givim long yumi. Tingbaot ol man Isrel we Moses i lidim olgeta oli aot long Ijip. Olgeta ya oli luk wetem prapa ae blong olgeta ol bigbigfala wok we Jeova i mekem blong soem paoa blong hem. Mo tu, oli haremsave se hem i stap lukaot long olgeta wetem lav, taem hem i stap lidim olgeta oli go long ples we hem i promes blong givim long olgeta. Be, taem ol man Isrel ya oli stap long draeples long rod blong olgeta blong go long Promes Lan, oli stat komplen. Samting ya i soem se oli sot long bilif. (Ol Sam 78:​11-17) ?From wanem oli kam olsem?

Ol man Isrel ya oli no moa putum tingting blong olgeta i stap strong long Jeova mo nambawan promes we hem i stap mekem i kamtru long olgeta. Oli stap tingbaot olsem wanem blong haremgud naoia nomo mo ol samting we bodi blong olgeta i wantem. Nating se oli bin luk wetem prapa ae blong olgeta plante merikel mo plante samting blong sapraes we Jeova i mekem, be plante long olgeta oli lusum bilif, oli kam man blong komplen nomo. Ol Sam 106:13 i talem se. “I no longtaem, olgeta oli fogetem ol samting ya we [Jeova] i mekem.” Nogud fasin ya blong fogetem Jeova i mekem se ol man Isrel we oli laef long taem ya oli no go insaed long Promes Lan.

Taswe, taem yu ridim Baebol mo ol buk we oli eksplenem Baebol, yu mas tektaem blong tingting dip long samting we yu ridim. Yu nidim blong tingting dip, from we samting ya bambae i mekem se yu yu strong long saed blong spirit mo bambae i givhan long yu blong gru long saed blong spirit. Tingbaot Sam 106 we haf blong hem i stap antap. Taem yu ridim Sam ya, yu save tingting dip long ol fasin blong Jeova. Tingbaot longfala tingting blong hem mo sore we hem i soem long ol man Isrel. Tingbaot ol samting we hem i mekem blong givhan long olgeta blong kasem Promes Lan. Makemgud stronghed fasin blong olgeta. Traem haremsave filing mo wari blong Jeova, taem nesen ya i no moa kea mo i no moa gat tangkiu nating, mo taem we olgeta oli traem longfala tingting mo sore blong Jeova go kasem laswan mak blong hem. Mo tu, vas 30 mo 31 i tokbaot Finehas, we i no fraet blong tekem strong aksin blong mekem stret fasin i stanap. Taem yumi tingting dip long haf ya, yumi luksave se Jeova bambae i no fogetem ol man we oli stap tru long hem, mo se bambae hem i givim bigfala blesing long olgeta.

Folem ol rul blong Baebol long laef blong yu. Taem yumi folem ol rul blong Baebol long laef blong yumi, yumi luksave se advaes blong Jeova i gud tumas. Ol Proveb 3:​5, 6 i talem se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu.” Tingbaot ol man blong mekem rabis fasin, mo tingbaot nogud frut we oli kasem long laef blong olgeta. Olgeta ya oli harem nogud long tingting blong olgeta, filing blong olgeta, mo long bodi blong olgeta tu. Rabis fasin i mekem olgeta oli haremgud blong smoltaem nomo, be biaen, taem oli kasem nogud frut blong hem, oli harem nogud blong plante yia, no maet blong ful laef blong olgeta. Be samting ya i no save hapen long olgeta we oli stap wokbaot long ‘rod we i smol nomo.’ Olgeta ya oli kasem save finis se laef bambae i olsem wanem long niufala wol, nao samting ya i pulum olgeta blong gohed blong wokbaot long rod blong laef.​—Matiu 7:​13, 14; Ol Sam 34:8.

I no isi oltaem blong folem ol rul blong Baebol long laef blong yumi. Sam samtaem, i luk olsem we yumi save winim wan traem hareap, sipos yumi folem  wan rod we i agensem Baebol. Olsem nao, long taem we yumi gat trabol long saed blong mane, maet yumi ting se yumi mas putum ol wok blong Kingdom long seken ples long laef blong yumi. Be, olgeta we oli gat bilif mo oli gohed blong putum ol samting long saed blong spirit long fasples long laef blong olgeta, oli save sua long promes ya blong God se: “Man we i stap obei long God, olgeta samting long laef blong hem bambae oli stap ron gud.” (Prija 8:12) Ating wanwan taem sam Kristin oli mas wok sam moa aoa, be oli neva mas kam olsem Esao, we i ting nating long ol samting long saed blong spirit, i sakemaot olgeta olsem we oli nating nomo.​—Jenesis 25:34; Hibrus 12:16.

Jisas i eksplenem klia wanem wok we ol Kristin oli mas mekem. Yumi mas ‘gohed blong lukaot kingdom mo stret fasin blong God fastaem.’ (Matiu 6:​33, NW ) Sipos yumi mekem olsemia, Jeova bambae i soem se hem i olsem wan papa we i lavem yumi, mo bambae hem i givim ol samting we yumi nidim blong laef. Hem i no wantem we yumi wari tumas long ol samting we hem i talem se bambae hem i lukaot long olgeta. Sipos yumi wari long ol samting ya, yumi save kasem sik ya glaucoma long saed blong spirit. Mo sipos yumi no winim sik ya, bambae yumi no moa lukluk klia, bambae yumi lukluk nomo ol wari blong laef gogo yumi kam blaen olgeta long saed blong spirit. Nao sipos yumi stap olsem, dei blong Jeova i save kamtru long yumi wantaem nomo, olsem we yumi “fas long wan trap.” !Samting ya bambae i nogud tumas!​—Luk 21:​34-36.

Lukluk Klia Olsem Josua

Yumi mas gohed blong lukluk klia nambawan fiuja aninit long Kingdom blong God, mo putum ol narafala wok long seken ples long laef blong yumi. Sipos yumi gat wan program blong stadi Baebol, tingting dip long hem, mo yumi gohed blong folem ol rul blong Baebol long laef blong yumi, yumi save gat strong tingting se bambae yumi kasem praes blong laef. Bambae yumi olsem Josua we i lidim ol man Isrel oli go long Promes Lan, nao i talem se: “Yufala evriwan i savegud long tingting blong yufala we Hae God ya i givim ol gudgudfala samting ya long yumi, stret olsem we hem i promes bifo finis. Olgeta promes ya blong hem, hem i mekem oli kamtru evriwan, i no gat wan promes nating i stap we i no kamtru.”​—Josua 23:14.

Strong tingting blong laef aninit long Kingdom i mas givim paoa long yu, i mas mekem se evri dei yu yu hapi long laef blong yu. Bambae i olsem sipos tingting ya i gat paoa long maen blong yu, ol filing mo disisen blong yu, mo ol wok blong yu.​—Ol Proveb 15:15; Rom 12:12.

[Tok blong pija long pej 21]

?Samtaem yu bin ting se yu yu no naf blong kasem laef long niufala wol?

[Tok blong pija long pej 22]

I impoten blong tingting dip taem yumi stadi Baebol

[Tok blong pija long pej 23]

Putum tingting blong yu i stap oltaem long wok blong Kingdom