?Yumi Mas Prea Long Ol Enjel Blong Kasem Help?

?I STRET we yumi prea long ol enjel long taem blong trabol? Plante man oli gat tingting olsemia. Wan buk, hemia New Catholic Encyclopedia i talem se: “Man i prea long . . . ol enjel . . . be wetem tingting ya nomo se ol enjel ya bambae oli tekem ol prea blong hem i go long God.” ?Yumi mas prea i go long ol enjel blong oli karem prea blong yumi i go long God?

I gat plante enjel we oli stap tru long God, be Baebol i talemaot nem blong tu enjel nomo, hemia, Mikael mo Gabriel. (Daniel 8:16; 12:1; Luk 1:26; Jud 9) From we Baebol i talemaot nem blong tufala enjel ya, yumi luksave we wanwan enjel hem i wan spirit man we i gat wan nem, hem i no wan kaen paoa nomo. Be, i gat sam narafala enjel we oli no wantem talemaot nem blong olgeta. Eksampol, taem Jekob i askem wan enjel we i kam visitim hem blong i talemaot nem blong hem long hem, enjel ya i no wantem talem. (Jenesis 32:​29; Jajes 13:​17, 18) Baebol i no givim wan lis blong ol nem blong ol enjel we yumi save faenem, samting ya i blokem ol man blong oli no putum tingting blong olgeta i strong moa long ol enjel i bitim we oli putum tingting blong olgeta long God.

Wan long ol wok blong ol enjel, hem i blong talemaot ol mesej blong God long ol man. Long lanwis Hibru mo Grik, tok ya we yumi tanem i kam “enjel” i minim “man blong karem mesej.” Be, ol enjel oli no wok blong karem ol prea blong ol man long wol ya i go long jea blong God ya we i Hae Olgeta. God i talemaot finis se ol prea oli mas go long hem tru long nem blong Pikinini blong hem, Jisas Kraes, i se: “Mo sipos yufala i askem samting long Papa blong mi long nem blong mi, bambae hem i save givim long yufala.”​—Jon 15:16; 1 Timoti 2:5.

Jeova God i neva bisi tumas blong lesin long ol prea blong yumi sipos ol prea blong yumi oli folem fasin we i stret. Baebol i givim advaes ya se: “Oltaem Jeova i stap klosap long olgeta we oli singaot long hem long tru fasin.”​—Ol Sam 145:​18, NW.