Baebol i Halpem Hem Blong Winim Traem

I gat fulap traem i stap long wol tede. I no isi blong folem ol rul blong Baebol. Eksampol, maet i had blong folem advaes ya blong Baebol we i se: “Yufala i mas ronwe long fasin ya blong mekem nogud wetem woman.”​—1 Korin 6:​18, NW.

Sebastian, we hem i wan long ol Witnes blong Jeova, i wok long wan kampani blong Scandinavia, long Polan. Hem i mas faet strong blong holem bilif blong hem.

Ol fren blong hem long wok oli save se hem i wan Witnes blong Jeova. Bos blong hem i laekem tumas wok blong hem mo gudfala fasin blong hem, ale hem i givim plante defdefren kaen wok long hem. Be, Sebastian i save se sipos hem i holem ol wok ya bambae hem i mas stap long ol bisnes miting blong kampani ya. Mo long ol miting ya i gat sam rabis fasin tu we i stap gohed.

Sloslo, tingting blong Sebastian i stat blong konfius. “Bos blong mi i save we mi mi wan Witnes blong Jeova. Taswe hem i trastem mi mo hem i dipen long mi tu. Sipos mi no wantem joen, bambae mi lusum wok blong mi, mo i had tumas blong faenem wok naoia. ?Olsem wanem sipos mi mi stap long ol miting ya blong lukluk nomo be mi no joen long fasin blong olgeta?”

Ale, Sebastian i faenemaot moa save long saed blong wok blong hem. Hem i luksave se bambae oli askem long hem blong hem i “lukaot” long ol man blong narafala kantri taem oli kam mo hem i mas mekem plan wetem olgeta blong ol woman blong rod oli kam mitim olgeta long naet. ?Bambae hem i mekem wanem nao?

Sebastian i mekem plan blong toktok bakegen wetem bos blong hem long saed blong fasin we hem i gat we i stanap long Baebol, we i agensem ol rabis fasin ya long saed blong seks. Smol taem afta, i klia se wok ya i no stret long Sebastian mo hem i mas lego wok blong hem. Sebastian i faenem wan narafala wok bakegen we pei blong hem i smol nomo, be i no moa gat traem long saed blong rabis fasin long saed blong seks. Naoia hem i gat wan tingting we i klin.

?Bambae yu yu mekem wanem sipos samfala i pulum yu blong joen wetem olgeta blong mekem sam nogud fasin long saed blong seks? ?Yu yu rere blong mekem sam jenis? Hemia samting we Josef, man ya blong bifo i mekem we yumi save faenem stori ya blong hem long buk blong Jenesis 39:​7-12.