?God i Mekem Ol Samting We Hem i Wantem Oli Kamaot Long Wol?

“Mekem ol samting we yu yu wantem oli kamaot long wol, olsem we oli kamaot finis long heven.”​—Matiu 6:​10, NW.

JULIO mo Christina tufala i harem nogud bitim mak taem tufala i luk fofala pikinini blong tufala i ded long faea. Wan drong man we i spid tumas long trak blong hem, i bangem trak blong olgeta we i stap long saed blong rod, nao trak blong olgeta i bosta mo faea i laet long hem. Marcos, namba faef pikinini blong tufala, hem i laef i stap. Hem i kamaot long trak, be faea i bonem bodi blong hem mo ol kil we hem i kasem long bodi bambae oli stap long ful laef blong hem. Marcos i gat naen yia nomo. Papa blong hem i harem nogud tumas. Blong leftemap tingting blong hem mo famle blong hem, hem i talem se: “God i wantem se samting ya i hapen, yumi mas traem kasem save se i olsem. Nating se wan gud samting no wan nogud samting, be hemia samting we God i wantem se i hapen.”

Plante man oli gat semfala tingting taem oli fesem ol bigfala trabol olsemia. Oli talem se: ‘Sipos God i gat olgeta paoa mo i kea long yumi, samting we i bin hapen i mas mekem i gud long yumi long sam rod, nating se i had blong kasem save.’ ?Olsem wanem long yu? ?Yu yu agri wetem tingting ya?

Plante man oli gat tingting ya se evri samting we i hapen, nating se i gud no i nogud, hem i wan samting we God nao i wantem, from we oli ridim tok blong Jisas long Lodsprea, we i stap antap. Ol man ya oli stap tingting olsem: ‘!Be ol samting we God i wantem oli kamaot finis long heven! Taswe, taem yumi prea se “Mekem ol samting we yu yu wantem oli kamaot long wol,” i olsem we yumi talem se evri samting we i hapen long wol, hemia ol samting we God nao i wantem.’ ?Be olsem wanem? ?Samting ya i tru no nogat?

Plante man oli no agri wetem tingting ya. Long tingting blong olgeta, sipos samting ya i tru, i min se God i no kea long ol filing blong ol man we hem i bin wokem. Oli talem se: ‘?Olsem wanem wan God we i gat lav i save letem wan nogud samting i kasem wan man we i no gat fol? ?Sipos God i letem samting ya i hapen blong tijim yumi, wanem lesen nao hem i wantem we yumi lanem from?’ Maet yu yu gat semfala tingting.

Jemes, haf brata blong Jisas, hem i raetem se: “Sipos ol samting i kam blong pulum tingting blong man, blong mekem hem i foldaon long sin, bambae hem i no mas talem se, ‘Ol samting ya i kamaot long God,’ from we i no gat samting nogud we i save pulum God blong mekem hem i gorong. Mo i no fasin blong God blong pulum man blong mekem hem i foldaon long sin.” (Jemes 1:13) God i no stamba blong ol nogud samting we i hapen. Taswe, i klia se God i no stamba blong olgeta samting we i kamaot long wol tede. Baebol i tokbaot ol samting we ol man oli wantem, ol samting we ol nesen oli wantem, mo ol samting we Devel Setan tu i wantem. (Jon 1:13; 2 Timoti 2:26; 1 Pita 4:3) ?Yu yu agri wetem tingting ya se, Papa blong yumi antap long heven, we i gat lav, maet hem i no wantem we ol pikinini blong Julio mo Christina oli ded long faea?

?Nao, sipos i olsem, Jisas i minim wanem taem hem i tijim ol disaepol blong hem blong prea se: ‘Mekem ol samting we yu yu wantem i kamaot’? ?Hem i min se samtaem, God i save tekem aksin blong stretem sam samting long laef blong man? ?No Jisas i tijim yumi blong prea from wan samting we i impoten moa mo we i gud moa tu, wan samting we yumi evriwan i save putum hop long hem? Nekis haf i talem tingting blong Baebol long saed blong samting ya.

[Foto Credit Lines blong pija long pej 3]

Car: Dominique Faget-STF/AFP/Getty Images; child: FAO photo/B. Imevbore