Ol Man Blong God Oli Mas Laekem Kaen Fasin

“?Jeova i askem wanem long yu? Yu mas wokem stret fasin, yu mas laekem kaen fasin, mo yu mas wokbaot wetem God we tingting blong yu i stap daon.”​—MAEKA 6:​8, NW.

1, 2. (a) ?Olsem wanem yumi save se Jeova i wantem we yumi soem kaen fasin? (b) ?Wanem ol kwestin long saed blong kaen fasin we yumi mas tokbaot?

 JEOVA GOD i gat kaen fasin. (Rom 2:4; 11:22) !Faswan man mo woman, Adam mo Iv, tufala i save samting ya! Tufala i stap long garen blong Iden, mo ol samting we God i wokem raonabaot long tufala i soemaot klia we God i kaen tumas long tufala. God i wokem tufala blong tufala i naf blong haremgud long ol samting we hem i mekem. Mo hem i stap gohed yet blong soemaot kaen fasin long olgeta man, mo long ol rabis man tu we oli no gat tangkiu.

² God i wokem ol man blong oli olsem pija blong hem, taswe oli naf blong soemaot ol semfala fasin we God i stap soemaot. (Jenesis 1:26) From samting ya, Jeova i wantem se yumi soemaot kaen fasin. Olsem Maeka 6:8 i talem, ol man blong God oli mas “laekem kaen fasin.” ?Be, kaen fasin i olsem wanem? ?Olsem wanem kaen fasin i joen wetem ol narafala fasin blong God? ?Sipos ol man oli naf blong soem kaen fasin, from wanem wol ya i nogud mo i had? ?From wanem ol Kristin oli mas traehad blong soem kaen fasin long ol narafala?

?Kaen Fasin i Olsem Wanem?

3. ?Kaen fasin i olsem wanem?

³ Man we i gat kaen fasin, hem i soemaot intres long narafala. Hem i givhan long narafala mo i talem ol tok we i soem se hem i tingbaot narafala. Hem i mekem i gud long narafala, i no save mekem samting blong spolem narafala. Hem i frengud wetem ol man, hem i no raf, hem i gat sore, mo hem i no talem ol tok blong stikim narafala. Hem i glad blong givim samting long narafala mo i tingbaot narafala oltaem. Aposol Pol i givim advaes ya long ol Kristin se: “Putum niufala laef ya blong yufala olsem prapa klos blong yufala. Yufala i mas gat sore long ol man mo yufala i mas mekem i gud [“kaen,” NW ] long olgeta. Tingting blong yufala i mas stap daon, mo yufala i mas kwaet man, mo tingting blong yufala i mas longfala.” (Kolosi 3:12) Yes, olgeta trufala Kristin oli mas gat kaen fasin, olsem we i prapa klos blong olgeta.

4. ?Olsem wanem Jeova i tekem faswan step oltaem blong soem kaen fasin long ol man?

⁴ Oltaem Jeova God i tekem faswan step blong soemaot kaen fasin. Pol i talem se God i soemaot we hem i ‘lavem tumas ol man, mo i mekem i gud long olgeta’ taem ‘hem i sevem yumi, i wasem yumi long wota, i mekem we yumi bon bakegen long tabu spirit we i givim niufala laef long yumi.’ (Taetas 3:​4, 5) I olsem we God i “wasem” ol tabu Kristin long blad blong Jisas, hemia se, i yusum ransom sakrefaes blong Kraes blong mekem olgeta oli klin. Mo tu, tabu spirit i givim wan niufala laef long olgeta. Yes, oli kam ol “niufala man” taem tabu spirit i makemaot olgeta blong oli kam pikinini blong God. (2 Korin 5:17) God i soem kaen fasin mo lav long “bigfala kampani” tu. Olgeta ya oli ‘wasem ol klos blong olgeta finis long blad blong Smol Sipsip ya, blong mekem ol klos ya oli waet.’​—Revelesen 7:​9, 14, NW; 1 Jon 2:​1, 2.

5. ?From wanem ol man we spirit blong God i lidim olgeta oli mas soem kaen fasin long ol narafala?

⁵ Kaen fasin i wan frut blong tabu spirit, i min se paoa blong God nao i mekem fasin ya i kamaot. Pol i talem se: “Frut blong spirit, hemia lav, glad, pis, longfala tingting, kaen fasin, gud fasin, bilif, kwaet fasin, fasin we man i save bos long tingting blong hem. Ol fasin olsem, i no gat loa we i save blokem olgeta.” (Galesia 5:​22, 23, NW ) Taswe, ol man we spirit blong God i lidim olgeta oli mas soem kaen fasin long ol narafala.

Trufala Fasin Kaen i No Wan Slak Fasin

6. ?Wetaem nao kaen fasin i save kam wan slak fasin, mo from wanem i olsem?

⁶ Samfala oli ting se kaen fasin i wan slak fasin. Oli ting se blong soem paoa blong olgeta, oli mas  mekem i strong long ol narafala mo spolem olgeta. Be, man we i rili gat paoa, hemia man we i kaen. Samting ya i no min se hem i kaen long ol man we i no stret blong soem kaen fasin long olgeta. Trufala fasin kaen i wan frut blong tabu spirit, taswe man we i gat fasin ya i no save agri long man we i mekem nogud fasin, mo i no save slak blong stretem hem. Sipos kaen fasin i pulum wan man blong agri long narafala we i mekem nogud fasin, kaen fasin ya blong hem i rili wan slak fasin.

7. (a) ?Wanem i soem se Ilae i wan slak man? (b) ?From wanem ol elda oli mas lukaot blong no letem kaen fasin i pulum olgeta blong agri wetem man we i mekem nogud fasin?

⁷ Tingbaot man ya Ilae we hem i hae pris long Isrel bifo. Tufala boe blong hem, Hofni mo Finehas, tufala i mekem wok blong pris long haos tapolen blong God. Loa blong God i talem se tufala i gat raet blong tekem haf mit blong ol sakrefaes. Be tufala i no glad long samting ya. Tufala i stap sanem wan man blong wok blong tufala i go, blong talem long ol man we oli mekem sakrefaes se oli mas givim sam mit long tufala bifo we oli bonem gris blong sakrefaes ya long olta. Be Ilae i no stretem tufala from. Antap long samting ya, tufala boe ya i stap slip wetem ol woman we oli wok long yad blong haos tapolen. Be Ilae i no sakemaot tufala long wok blong tufala. Hem i tok long tufala smol nomo. (1 Samuel 2:​12-29) !From samting ya, long taem ya “i no gat plante man we Hae God i givim tok blong hem long olgeta”! (1 Samuel 3:1) Tede tu, ol Kristin elda oli mas lukaot blong no letem kaen fasin i pulum olgeta blong agri wetem man we i stap mekem nogud fasin. Samting ya i save spolem kongregesen long saed blong spirit. Man we i gat trufala fasin kaen i no save satem ae blong hem long ol rabis tok mo fasin we oli agensem loa blong God.

8. ?Olsem wanem Jisas i soemaot trufala fasin kaen?

⁸ Man we hem i Eksampol blong yumi, Jisas Kraes, hem i neva agri long wan man we i mekem nogud fasin, jes blong mekem i gud long man ya. Hem nao i beswan eksampol blong kaen fasin. Hem i ‘sore tumas long ol man, from we olgeta oli trabol tumas, oli no moa gat paoa, oli olsem ol sipsip we i no gat man blong lukaot long olgeta.’ Ol man we hat blong olgeta i stret oli no fraet blong toktok wetem Jisas, oli karem ol smol pikinini blong olgeta tu oli kam long hem. Tingbaot kaen fasin mo sore we hem i soem long ol pikinini ya, taem hem i ‘putum han blong hem i goraon long olgeta, mo i blesem olgeta.’ (Matiu 9:36; Mak 10:​13-16) Be, nating se Jisas i kaen, hem i strong blong leftemap fasin we i stret long ae blong Papa blong hem long heven. Hem i neva agri long rabis fasin. Long paoa blong God, hem i daonem ol lida blong skul we oli gat tu fes. Long Matiu 23:​13-26, Jisas i talem bakegen mo bakegen se: “Ol tija blong Loa mo ol Farisi. Sore tumas long yufala. Yufala i gat tu fes.”

Kaen Fasin Mo Sam Narafala Fasin Blong God

9. ?Olsem wanem kaen fasin i joen wetem longfala tingting mo gud fasin?

⁹ Kaen fasin i joengud wetem sam narafala fasin we oli kamaot long tabu spirit blong God. Long lis blong ol frut blong spirit, oli raetem kaen fasin long medel blong “longfala tingting” mo “gud fasin.” Tru ya, man we i kaen, hem i gat longfala tingting. Hem i gat longfala tingting tu long ol man we oli no kaen long hem. Kaen fasin i joen tu wetem gud fasin, from we man we i kaen hem i stap mekem i gud long narafala. Long sam ples long Baebol, Grik tok we i minim “kaen fasin” oli tanem i kam “gud fasin.” Ol hiten man oli sapraes long  kaen fasin we ol faswan Kristin oli soemaot. Taswe, Tertullian i talem se ol hiten man ya oli tokbaot ol man blong Jisas se, ‘bigfala fasin blong olgeta hemia kaen fasin.’

10. ?Olsem wanem kaen fasin i joen wetem lav?

¹⁰ Kaen fasin i joen wetem lav tu. Jisas i tokbaot ol man blong hem, se: “From we yufala i stap lavlavem yufala, bambae olgeta man oli luksave se yufala i man blong mi.” (Jon 13:35) Long saed blong lav ya, Pol i talem se: “Man we i gat lav, tingting blong hem i longfala, mo hem i kaengud.” (1 Korin 13:​4, NW ) Plante taem, Baebol i yusum wan wod we i minim “lav we i pulum man blong stap tru long narafala.” Kaen fasin i joen tu wetem lav ya. Long lanwis Hibru, tok ya i minim kaen fasin we man i soem taem hem i lavem narafala mo i fasgud long hem. Long plante defren rod, Jeova i stap soemaot kaen fasin mo lav, no lav we i pulum hem blong stap tru long ol man. Yumi luk nambawan fasin ya blong hem long ol wok we hem i mekem blong sevem mo lukaotgud long ol man blong hem.​—Ol Sam 6:4; 40:11; 143:12.

11. ?From we God i gat lav mo kaen fasin, yumi save sua long wanem samting?

¹¹ Fasin blong Jeova blong mekem i gud long ol man mo soem lav, i save pulum man i kam long hem. (Jeremaea 31:3) Taem ol man blong God oli nidim God blong halpem no sevem olgeta, oli save sua se bambae hem i soem lav mo kaen fasin long olgeta. Oli save se hem i neva mestem blong soem fasin ya. Taswe, oli prea wetem bilif, olsem man blong raetem Sam ya i prea se: “Mi mi trastem yu from fasin ya blong yu we oltaem yu yu lavem man [“mo yu kaen,” NW ] tumas. Mi bambae mi glad, from we yu bambae yu sevem mi.” (Ol Sam 13:5) From we God i gat lav oltaem, ol man blong hem oli save trastem hem fulwan. Promes ya i stap se: “Hae God bambae i no save lego yumi ya we yumi ol man blong hem, hem bambae i no save gowe long yumi ya we nem blong hem i stap finis long yumi.”​—Ol Sam 94:14.

?From Wanem Wol i No Kaen?

12. ?Wetaem mo olsem wanem rabis rul i stat long wol ya?

¹² Blong faenem ansa long kwestin ya, yumi mas tingbaot samting we i hapen long garen blong Iden. Smoltaem afta we God i mekem faswan man mo woman, wan enjel i stat tingbaot hem wan nomo mo tingting blong hem i go antap tumas, nao hem i mekem wan plan blong kam rula blong wol ya. Hem i folem plan ya, ale hem i kam man we i “rulum wol ya,” mo hem i rul long fasin we i strong tumas. (Jon 12:31) Hem i kam Devel Setan, bigfala enemi blong God mo man. (Jon 8:44; Revelesen 12:9) I no longtaem afta we God i wokem Iv, rabis plan ya blong Setan i kam long klia ples. Hem i wantem leftemap hem wan olsem wan rula we i wok agensem Jeova, God ya we i stap rul long kaen fasin. Ale, rabis rul i stat long wol ya taem Adam i sakemaot kaen fasin blong Jeova, mo i jusum blong no moa stap aninit long rul blong Hem. (Jenesis 3:​1-6) Be Adam mo Iv tufala i no rili kam independen, from we tufala i putum tufala aninit long paoa blong Setan. Yes, tufala i kam aninit long rul blong flas man ya we i tingbaot hem wan nomo.

13-15. (a) ?Wanem frut i kamaot taem Adam mo Iv i no wantem gudfala rul blong Jeova? (b) ?From wanem wol ya i wan had ples?

¹³ Tingbaot frut we i kamaot from samting we Adam mo Iv i mekem. Fastaem tufala i stap long paradaes we evri samting i grugud mo i isi nomo blong tufala i kasem ol gudfala kakae mo frut. Be biaen, God i ronemaot tufala, nao tufala i stap afsaed long garen blong Iden long wan ples we i had. God i talem long Adam se: “From we yu harem tok blong woman blong yu, mo yu kakae frut ya we mi talem long yu se i tabu blong yu kakae, naoia bambae mi spolem graon ya, mi mekem i kam nogud. Oltaem long laef blong yu, bambae yu yu stap hadwok tumas blong kasem kakae long hem we i naf long yu. Ol ropnil wetem ol narafala rabis gras bambae oli stap gru long hem.” Afta we God i tok blong spolem graon ya, i no isi blong ol samting i gru, ale tufala i mas hadwok blong kasem kakae. Ol pikinini we oli kamaot biaen long Adam oli hadwok tu, from we graon i kam nogud mo i fulap long ol ropnil mo rabis gras. Taswe, Lamek, papa blong Noa, i tokbaot ‘hadwok blong hem long graon we Hae God i jajem finis, i mekem i kam nogud.’​—Jenesis 3:​17-19; 5:29.

¹⁴ Fastaem, laef blong Adam mo Iv i kwaet. Be biaen, laef blong tufala i fulap long trabol. God i talem long Iv se: “Bambae mi mi mekem we long taem we yu yu gat bel, bambae yu harem nogud moa long bodi blong yu, mo long taem we yu bonem pikinini, bambae yu harem bak blong yu i soa moa. Be bambae yu stap wantem man blong yu yet, mo hem bambae i bos blong yu.” Biaen, fasbon pikinini  blong Adam mo Iv, nem blong hem Ken, i mekem wan rabis samting, hem i kilim brata blong hem Ebel i ded.​—Jenesis 3:16; 4:8.

¹⁵ Aposol Jon i talem se: “Olgeta man blong wol ya oli stap long paoa blong Setan.” (1 Jon 5:19) Ol man blong wol tede oli gat sem fasin olsem rula blong olgeta, hemia se oli tingbaot olgeta nomo mo oli gat flas tingting. !From samting ya, wol i fulap long fasin blong mekem i strong long narafala mo spolem narafala! Be, bambae i no stap olsem blong olwe. Jeova bambae i mekem promes blong hem i kamtru, se ol man we oli laef aninit long Kingdom blong hem bambae oli kaen mo oli gat sore. Ol man we oli mekem i strong tumas long narafala mo oli spolem narafala, oli no save laef aninit long Kingdom ya.

Aninit Long Kingdom Blong God Kaen Fasin Bambae i Fulap

16. ?From wanem kaen fasin bambae i stap olsem stamba fasin we i makem rul blong God tru long Jisas Kraes, mo samting ya i putum wanem wok long yumi?

¹⁶ Jeova mo Man ya we hem i makemaot blong kam King blong Kingdom blong Hem, Jisas Kraes, tufala i wantem se ol man we oli stap aninit long Kingdom ya bambae oli gat kaen fasin. (Maeka 6:8) Jisas Kraes i soemaot finis olsem wanem kaen fasin bambae i stap olsem wan stamba fasin blong Kingdom ya we Papa blong hem i putum long han blong hem. (Hibrus 1:3) Yumi luk samting ya long tok we Jisas i talem long ol lida blong ol giaman skul, we oli mekem i strong tumas long ol man mo oli putum ol rul long ol man we oli hevi tumas. Hem i se: “Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud. Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala. Yufala i mas mekem olsem, from we yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi.” (Matiu 11:​28-30) Ol lida blong skul mo ol narafala lida blong wol oli mekem ol man oli taedgud. Oli putumap tumas rul mo givim tumas wok long ol man, mo oli neva talem tangkiu long olgeta. Be, Jisas i neva askem ol man blong mekem samting we oli no naf blong mekem, no samting we oli no nidim blong mekem. !Tru ya, yok we hem i putum long olgeta i no hevi nating! Taswe, yumi harem se yumi wantem kam olsem hem mo soem kaen fasin long ol narafala.​—Jon 13:15.

17, 18. ?From wanem yumi save se olgeta we oli rul wetem Kraes long heven mo olgeta we oli mekem wok blong hem long wol ya bambae oli soemaot kaen fasin?

¹⁷ Ol tok we Jisas i talem long ol aposol blong hem i soemaot klia olsem wanem rul blong Kingdom blong God i defren olgeta long rul blong man. Baebol i talem se: “Ol man blong Jisas oli rao from tingting ya se hu nao i hae moa long olgeta. Nao Jisas i talem long olgeta se, ‘Ol king blong ol hiten man oli gat paoa long ol man blong olgeta. Mo ol haeman blong olgeta oli wantem kasem nem ya se, “Fren blong ol man”. Be fasin blong yufala bambae i no olsem. Sipos wan long yufala i hae moa, hem i  mas kam olsem man we i yangfala moa long yufala. Mo man we i lida blong yufala, hem i mas kam olsem man blong wok nomo blong yufala. ?Hu man we i hae moa? ?Man we i stap kakae long tebol, no man we i stap karem kakae i kam? Yufala i save se man we i stap kakae long tebol, hem nao i hae moa. Be mi mi stap long medel blong yufala olsem man blong karem kakae nomo.’ ”​—Luk 22:​24-27.

¹⁸ Ol rula blong wol ya oli wantem soem se oli hae moa long ol narafala man. Blong mekem olsem, oli traem ‘gat paoa antap long ol man.’ Oli traem kasem haenem, olsem we nem ya i mekem olgeta oli moa gud long ol man we oli stap aninit long rul blong olgeta. Be Jisas i talem se man we i hae moa, hemia man we i kam olsem man blong wok blong narafala. Ol man olsem oli traehad oltaem blong faenem rod blong halpem narafala. Olgeta we bambae oli rul wetem Kraes long heven mo olgeta we oli mekem wok blong hem long wol ya, oli mas traehad blong folem eksampol blong hem long saed blong fasin daon mo kaen fasin.

19, 20. (a) ?Olsem wanem Jisas i soemaot se Jeova i kaen tumas long ol man? (b) ?Olsem wanem yumi save folem kaen fasin blong Jeova?

¹⁹ Bambae yumi lukluk naoia long sam narafala advaes we Jisas i givim wetem lav. Blong soem olsem wanem Jeova i kaen tumas, Jisas i talem se: “?Sipos yufala i stap lavem olgeta ya nomo we oli stap lavem yufala, from wanem yufala i ting se God i save blesem yufala? Ol man nogud tu, oli stap lavem ol man ya we oli stap lavem olgeta. ?Mo sipos yufala i stap mekem i gud long olgeta ya nomo we oli stap mekem i gud long yufala, from wanem yufala i ting se God i save blesem yufala? Ol man nogud tu, oli save mekem olsem. ?Mo sipos yufala i letem kaon long ol man ya nomo we bambae oli save pem kaon blong olgeta, from wanem yufala i ting se God i save blesem yufala? Ol man nogud tu, sipos oli luk se ol narafala man nogud oli save pem kaon blong olgeta, oli save letem olgeta oli kaon long olgeta. Be yufala i mas lavem ol enemi blong yufala, yufala i mas mekem i gud long ol man, mo yufala i mas letem ol man oli kaon long yufala, we yufala i no tingbaot se bambae oli pem. Nao fasin blong yufala bambae i folem fasin blong God ya we i hae we i hae, from we hem i kaen tumas long olgeta we oli no save talem tangkiu long hem, oli stap tingbaot olgeta nomo. Mo presen we hem bambae i givim long yufala, bambae i bigwan we i bigwan. Yufala i mas gat sore long man, olsem we Papa blong yufala i gat sore long man.”​—Luk 6:​32-36.

 ²⁰ Man we i folem kaen fasin blong God, hem i no tingbaot hem wan nomo. Taem hem i soem kaen fasin long narafala man, hem i no ting se man ya i mas givim wan samting long hem no pem hem from. Long kaen fasin, Jeova i “stap letem san blong hem i saen long ol gudfala man, mo long ol man nogud long sem mak nomo. Mo hem i stap sanem ren i kam long ol man we laef blong olgeta i stret, mo long olgeta we laef blong olgeta i no stret tu.” (Matiu 5:​43-45; Ol Wok 14:​16, 17) Taem yumi folem fasin blong Papa blong yumi long heven, yumi no agensem ol man we oli no talem tangkiu long yumi. Yumi mekem i gud long olgeta, mo long ol man tu we oli agensem yumi stret. Taem yumi gat kaen fasin, yumi soem long Jeova mo Jisas se yumi wantem stap aninit long Kingdom blong God. Long taem ya, olgeta man bambae oli gat kaen fasin mo ol narafala fasin we oli kamaot long God.

?From Wanem Yumi Mas Soem Kaen Fasin?

21, 22. ?From wanem yumi mas soem kaen fasin?

²¹ I impoten tumas we ol trufala Kristin oli soem kaen fasin. Fasin ya i pruvum se tabu spirit blong God i stap wok long laef blong yumi. Mo tu, taem yumi soem trufala fasin kaen, yumi folem fasin blong Jeova God mo Jisas Kraes. Olgeta we oli wantem laef aninit long Kingdom blong God, oli mas gat kaen fasin. From samting ya, yumi mas laekem kaen fasin mo soemaot fasin ya long ol narafala.

²² ?Wanem sam samting we yumi save mekem evri dei long laef blong yumi blong soem kaen fasin? Nekis stadi bambae i ansarem kwestin ya.

?Bambae Yu Yu Ansa Olsem Wanem?

• ?Kaen fasin hem i olsem wanem?

• ?From wanem wol ya i had mo i spolem ol man?

• ?Olsem wanem yumi save se olgeta man we oli laef aninit long rul blong God bambae oli soem kaen fasin?

• ?From wanem i impoten we olgeta we oli wantem laef aninit long Kingdom blong God oli mas soem kaen fasin?

[Kwestin]

[Tok blong pija long pej 13]

Ol Kristin elda oli traehad blong soem kaen fasin long ol sipsip

[Tok blong pija long pej 15]

Jeova i no save mestem blong soem lav mo kaen fasin long ol man blong hem taem oli fesem trabol mo hadtaem

[Tok blong pija long pej 16]

Long kaen fasin, Jeova i letem san i saen mo ren i foldaon long olgeta man