Soem Kaen Fasin Long Wol Ya We i Fulap Long Fasin Agens
Soem Kaen Fasin Long Wol Ya We i Fulap Long Fasin Agens
“Sipos man i gat lav we i kaengud, samting ya i gud tumas.”—OL PROVEB 19:22, NW.
1. ?From wanem i no isi blong soem kaen fasin?
?YU TING se yu yu gat kaen fasin? Sipos yes, ating yu faenem se i no isi blong laef long wol ya. Baebol i talem se kaen fasin i wan ‘frut blong tabu spirit.’ ?Be, from wanem i hadwok blong soem kaen fasin long ol narafala, nating se yumi stap long wan kantri we ol man oli talem se oli Kristin? (Galesia 5:22, NW ) Long laswan stadi, yumi faenem finis wan haf blong ansa blong kwestin ya. Hemia ol tok blong aposol Jon se wol i stap long paoa blong Devel Setan, we i no gat kaen fasin nating. (1 Jon 5:19) Jisas Kraes i talem se Setan nao i “masta blong wol ya.” (Jon 14:30) Wol ya i gat sem fasin olsem stronghed masta blong hem we i wantem tumas blong agensem yumi mo spolem yumi.—Efesas 2:2.
2. ?Wanem i save mekem se yumi no wantem soem kaen fasin long narafala?
2 Taem narafala i no soem kaen fasin long yumi, yumi harem nogud tumas. Ating sam man we oli stap raonabaot long yumi oli jalus. Ating sam strenja we yumi mitim olgeta oli no wantem fren wetem yumi. Ating sam fren no famle blong yumi oli mekem samting we i no kaen nating from we oli no tingting gud fastaem. Yumi harem nogud blong stap klosap long ol man we oli tok nogud long narafala, oli kros, oli singaot strong mo swea long narafala. Taem narafala i mekem nogud fasin long yumi, i isi blong yumi tu yumi kam kros nao maet yumi wantem givimbak long hem. Be sipos yumi mekem olsem, yumi save kam sik long saed blong spirit mo long bodi tu.—Rom 12:17.
3. ?Wanem ol bigfala trabol we ol man oli fesem we i mekem se i hadwok blong soem kaen fasin?
3 Ol trabol long wol ya tu i save mekem se i hadwok blong soem kaen fasin. Trabol we ol teroris oli mekem, mo tingting blong sam lida blong wol blong wantem yusum ol niuklia bom no yusum ol bebet blong kilim man i ded olsem ol tul blong faet, hemia ol samting we oli mekem ol man oli wari. Mo tu, plante milian man long wol oli pua tumas, oli sot long kakae, oli no gat wan gudfala haos, klos, mo meresin. Yes, taem man i harem se neva bambae laef blong hem i save kamgud, i no isi blong hem i soem kaen fasin long narafala.—Prija 7:7.
4. ?Wanem rong tingting we samfala oli gat long saed blong kaen fasin?
4 From samting ya, maet sam man oli ting se i no impoten blong soem kaen fasin, mo se man we i soem kaen fasin hem i rili wan slak man. Maet oli harem se ol narafala oli stap yusum olgeta nomo blong kasem samting we oli wantem, speseli taem ol narafala ya oli mekem i strong tumas long olgeta mo spolem olgeta. (Ol Sam 73:2-9) Be, Baebol i givim gudfala advaes long yumi, se: “Sipos yu toktok gud long man we i kros, bambae yu save mekem tingting blong hem i kam kwaet, be sipos yu tok strong long hem, bambae yu mekem hem i kros moa.” (Ol Proveb 15:1) Kwaet fasin mo kaen fasin, tufala i frut blong tabu spirit, mo tufala i wok tugeta. Yumi nidim tufala fasin ya taem yumi fesem hadtaem mo trabol.
5. ?Wetaem nao yumi nidim blong soem kaen fasin?
5 I impoten tumas we yumi ol Kristin, yumi traehad blong gat ol frut blong tabu spirit. Taswe, i gud we yumi tokbaot olsem wanem blong soem wan long ol frut ya, hemia kaen fasin. ?Yumi save soem kaen fasin long wol ya we i fulap long fasin agens? ?Sipos yes, yumi save mekem wanem blong no letem Setan i spolem kaen fasin blong yumi, antap moa, taem yumi fesem wan trabol no traem? Bambae yumi tokbaot kaen fasin insaed long famle, long ples blong wok, long skul, wetem ol man raonabaot long yumi, long wok blong prij, mo wetem ol Kristin brata sista blong yumi.
Kaen Fasin Insaed Long Famle
6. ?From wanem i impoten blong soem kaen fasin insaed long famle, mo olsem wanem yumi save soem fasin ya?
6 Blong kasem blesing blong Jeova mo letem Hem i lidim yumi, yumi nidim ol frut blong tabu spirit, mo yumi mas strong long ol fasin ya. (Efesas 4:32) Ol famle oli nidim tumas we olgeta memba oli soem kaen fasin. Bambae yumi tokbaot samting ya naoia. Evri dei, hasban mo waef i mas soem se tufala i stap tingbaot tufala mo tingbaot ol pikinini blong tufala, mo tufala i mas soem kaen fasin. (Efesas 5:28-33; 6:1, 2) Blong soem kaen fasin insaed long famle, wanwan memba blong hem oli mas toktokgud long ol narawan, ol pikinini oli mas soem ona mo respek long papa mama blong olgeta, mo papa mama i mas mekem i stret long ol pikinini blong tufala. Evriwan oli mas rere oltaem blong talem gudfala toktok blong leftemap narafala, be oli no mas kwik blong jajem narawan.
7, 8. (a) ?Blong soem kaen fasin insaed long famle, yumi no mas mekem wanem? (b) ?Olsem wanem gudfala fasin blong toktok tugeta oltaem i save mekem se famle i joengud? (c) ?Yu yu save mekem wanem blong soem kaen fasin insaed long famle blong yu?
7 Blong soem kaen fasin insaed long famle, yumi mas folem advaes ya blong aposol Pol, se: “Yufala i mas sakemaot [ol fasin ya] i gowe long laef blong yufala. Bambae yufala i no moa kros. Bambae yufala i no moa faerap. Bambae yufala i no moa stap badfren long yufala. Bambae yufala i no moa tok agens long narafala man, mo yufala i no moa yusum ol doti tok.” Evri dei, ol Kristin famle oli mas tektaem blong toktok tugeta wetem respek. ?From wanem? From we ol famle we oli toktok tugeta oltaem oli joengud, mo oli haremgud blong stap wanples. Taem wan i no gat sem tingting olsem ol narafala long famle, oli mas traem faenem rod blong stretem trabol ya, i no se wan i wantem win nomo. Long ol famle we oli hapi, olgeta evriwan oli traehad blong soem kaen fasin oltaem mo tingbaot narafala.—Kolosi 3:8, 12-14.
8 Kaen fasin i wan gudfala fasin we i pulum yumi blong mekem i gud long narafala. Taswe, yumi traehad blong givhan, tingbaot, mo agri wetem ol narafala long famle. Blong gat wan gudfala famle, i nidim we wanwan memba mo ful famle tugeta i soem kaen fasin. Sipos oli mekem olsem, God bambae i blesem olgeta. Mo tu, fasin blong olgeta insaed long kongregesen mo wetem ol man raonabaot long olgeta bambae i givim ona long Jeova God, we hem i nambawan eksampol blong kaen fasin.—1 Pita 2:12.
Soem Kaen Fasin Long Ples Blong Wok
9, 10. ?Wanem trabol i save kamaot long ples blong wok, mo yu yu save mekem wanem blong stretem trabol ya long kaen fasin?
9 Wok we ol Kristin oli mas mekem evri dei i save traem kaen fasin blong olgeta. Maet wan man we i wok wetem yu i jalus, nao hem i giaman mo i yusum sam narafala trik blong traem pulum bos blong yu blong sakemaot yu. (Prija 4:4) I no isi blong soem kaen fasin long wan man olsem. Be ol man blong Jeova oli tingbaot se kaen fasin, hem i stret samting blong mekem. Taswe oli traem bes blong olgeta blong faenem wan rod blong gat pis wetem man we i agensem olgeta. Sipos yu soem se yu tingbaot narafala, samting ya i save givhan blong winim trabol. Maet narafala wokman ya i sik no wan famle blong hem i sik, ale yu save soem se yu stap tingbaot olgeta. Maet i naf blong askem long hem nomo sipos hemia we i sik i kamgud finis no olsem wanem. Yes, ol Kristin oli mas traehad blong joengud mo mekem pis wetem narafala. Wan tok nomo we i soem se yu tingbaot narafala mo yu gat kaen fasin, i save mekem trabol i godaon.
10 Sam bos oli traem fosem ol wokman blong olgeta blong folem prapa tingting blong olgeta. Maet oli wantem se ol wokman oli joen long wan selebresen blong kantri no wan narafala selebresen we Baebol i no agri long hem. Taem wan Kristin i no wantem joen long samting ya from we hem i save se i no stret, trabol i save kamaot. Maet i no waes blong mekem wan bigfala toktok long taem ya, blong soem from wanem i rong blong mekem samting ya we bos i wantem. Yu mas tingbaot se ol man we oli no gat Kristin bilif, maet oli ting se i stret nomo blong joen long selebresen ya. (1 Pita 2:21-23) Ating i gud blong eksplenem long kaen fasin from wanem yu wan yu no save joen long selebresen ya. Sipos bos no sam wokman oli sakem nogud tok long yu, yu no mas givimbak. I gud we ol Kristin oli folem gudfala advaes ya long Rom 12:18: “Oltaem, long saed blong yufala, yufala i mas traehad blong faenem rod blong yufala i gat pis wetem olgeta man.”
Soem Kaen Fasin Long Skul
11. ?Wanem i save mekem se i hadwok blong soem kaen fasin long ol yangfala long skul?
11 Long skul, i no isi blong soem kaen fasin long ol narafala yangfala. Plante yangfala oli wantem tumas we ol narafala oli laekem olgeta. Sam boe oli mekem raf fasin blong traem soem se oli bigman finis. Oli wantem se ol narafala yangfala oli tinghae long olgeta. Samfala oli mekem i strong long ol narafala, maet oli pusum no kilim olgeta blong mekem oli fraet. (Matiu 20:25) Sam yangfala we oli kasem wan gudfala mak long skul, no oli gud long spot no long wan narafala samting, oli wantem soem olgeta nomo. Blong leftemap olgeta, maet oli mekem fasin we i no kaen nating long sam narafala long klas blong olgeta. Oli gat rong tingting ya se oli hae moa long ol narafala from we oli kasem wan gudfala mak. Be ol yangfala Kristin oli mas lukaot blong no folem fasin blong ol yangfala ya. (Matiu 20:26, 27) Aposol Pol i talem se man we i gat lav, “tingting blong hem i longfala, mo hem i kaengud.” Hem “i no save tok flas, mo tingting blong hem i no antap tumas.” Wan Kristin i mas folem advaes ya blong Baebol taem hem i stap long skul. Hem i no mas folem fasin blong olgeta we oli no kaen nating.—1 Korin 13:4, NW.
12. (a) ?From wanem i hadwok long plante yangfala blong soem kaen fasin long tija blong olgeta? (b) ?Yangfala Kristin i save lukluk i go long hu blong halpem hem, taem narafala i traem pulum hem blong mekem samting we i no kaen?
12 Ol yangfala oli mas soem kaen fasin tu long ol tija blong olgeta. Plante yangfala oli traem mekem tija i harem nogud, oli minim nomo blong mekem samting we tija i no laekem. Oli no soem respek long tija, mo oli ting se oli bigman taem oli mekem olsem. Maet oli brekem sam rul blong skul mo pulum sam narafala yangfala blong brekem ol rul ya tu. Ating oli talem long ol narafala yangfala ya se oli mas folem olgeta, sipos no, bambae oli kilim olgeta. Taem wan yangfala Kristin i no wantem folem rabis fasin blong olgeta, maet oli jikim hem mo tok nogud long hem. Sipos wan yangfala Kristin i fesem trabol ya blong fulyia, hem i save harem se i no moa wantem soem kaen fasin long olgeta. Be, yu mas tingbaot se yu mas stap tru long God blong yu Jeova. Yu mas bilif strong se hem bambae i givim tabu spirit blong halpem yu blong winim hadtaem ya long laef blong yu.—Ol Sam 37:28.
Soem Kaen Fasin Long Ol Man Raonabaot
13-15. ?Wanem i save mekem se i hadwok blong soem kaen fasin long ol man we oli stap klosap long yu, mo yu save mekem wanem blong winim traem ya?
13 Nating sipos yu stap long wan haos, wan rum, wan haos we trak i pulum, no wan narafala ples, yu save tingbaot sam rod blong soem kaen fasin long ol man raonabaot long yu mo soem se yu tingbaot olgeta. Bakegen, plante taem samting ya i no isi.
14 ?Olsem wanem sipos wan man we i stap klosap long yu i no laekem yu from kala blong skin, kantri, no jos blong yu? ?Olsem wanem sipos hem i tok nogud long yu no i no wantem toktok nating long yu? Sipos yu soem kaen fasin olsem ol man blong Jeova oli mas mekem, bambae i gat gudfala frut i kamaot. Taem hem i luk se yu no mekem olsem ol narafala man, mo fasin blong yu i gud tumas, samting ya bambae i givim ona long Jeova. Mo bambae yu soem gudfala eksampol blong kaen fasin. Yu no save, maet wan dei man ya i jenisim tingting blong hem from we yu yu bin soem kaen fasin long hem. Maet bambae hem i kam wan man blong presem Jeova.—1 Pita 2:12.
15 ?Yu save mekem wanem blong soem kaen fasin long hem? Wan samting se, olgeta memba blong famle oli save soem ol frut blong tabu spirit. Maet man we i stap klosap long yu i luksave samting ya. Maet sam samtaem yu save mekem wan samting blong givhan long hem. Yu no mas fogetem se kaen fasin i mas pulum yu blong mekem samting blong soem se yu tingbaot narafala.—1 Pita 3:8-12.
Soem Kaen Fasin Long Wok Blong Prij
16, 17. (a) ?From wanem i impoten blong soemaot kaen fasin taem yu stap prij? (b) ?Olsem wanem yu save soem kaen fasin taem yu prij long ol defdefren ples?
16 Long Kristin wok blong prij, yumi mas soem kaen fasin taem yumi stap traehad blong faenem ol man long haos blong olgeta, long ples we oli wok long hem, no long wan narafala ples afsaed long hom. Yumi no mas fogetem se yumi stap mekem wok blong Jeova we hem i kaen oltaem.—Eksodas 34:6.
17 ?Olsem wanem yu save soem kaen fasin taem yu stap prij? Tingbaot wok blong prij long rod. Blong soem kaen fasin, yu no mas storian longtaem tumas long ol man, mo yu no mas mekem man i sek taem yu go klosap long hem blong toktok wetem hem. Yu mas lukaot blong no blokem rod blong ol man we oli stap wokbaot hareap. Mo tu, taem yu prij long ol stoa, yu mas tingbaot se ol man blong stoa oli mas lukaot long ol kastoma blong olgeta. Ale yu mas storian smoltaem nomo wetem olgeta. Hemia nao kaen fasin.
18. ?Olsem wanem fasin luksave i save givhan long yumi blong soem kaen fasin taem yumi stap prij?
18 Taem yu stap prij long olgeta haos wanwan, yu mas waes. Yu no mas stap longtaem tumas long haos blong wan man, antap moa sipos ples i kolkol tumas no i gat bigfala ren. ?Yu yu naf blong luksave, taem we man i no moa wantem storian no i stap kam kros? Maet long ples blong yu, ol Witnes blong Jeova oli stap prij bakegen mo bakegen long semfala teritori. Sipos i olsem, yu mas soem se yu tingbaot filing blong ol man, mo yu mas kaen oltaem mo frengud wetem olgeta. (Ol Proveb 17:14) Taem wan man i eksplenem from wanem hem i no save lesin long yu, traem kasem save long tingting blong hem. Yu no mas fogetem se bambae i no longtaem, wan Kristin brata no sista blong yu i mas kambak blong prij long man ya bakegen. Sipos wan man i tok nogud long yu, yu mas rili traehad blong soem kaen fasin long hem. Yu no mas mekem voes blong yu i go antap no lukluk nogud long man ya, be yu mas toktok long kwaet fasin. Wan Kristin we i gat kaen fasin, i no save mekem man blong haos i kros mo pulum hem blong agiu. (Matiu 10:11-14) Wan dei, maet man ya bambae i glad blong lesin long gud nius we yumi stap talemaot.
Soem Kaen Fasin Long Ol Miting Blong Kongregesen
19, 20. ?From wanem i nidim kaen fasin long kongregesen, mo olsem wanem yumi save soem fasin ya?
19 I impoten tu blong soem kaen fasin long ol Kristin brata sista blong yumi. (Hibrus 13:1) Yumi stap insaed long wan bigfala famle blong ol brata sista raon long wol, ale yumi mas soem kaen fasin long olgeta memba blong famle ya.
20 Sipos tu no tri kongregesen oli stap yusum semfala Haos Kingdom, i impoten we oli soem kaen fasin mo respek. Taem oli stap putum wan stret taem blong ol miting blong ol wanwan kongregesen ya mo program blong klinim mo fiksimap Haos Kingdom, i nogud we oli rao from. Fasin ya i no save mekem se ol kongregesen ya oli wokgud tugeta. Nating se olgeta evriwan oli no gat sem tingting, traem soem kaen fasin mo tingbaot narafala fastaem. Long rod ya, kaen fasin bambae i win, mo Jeova bambae i blesem fasin blong yu blong mekem i gud long narafala.
Gohed Blong Soem Kaen Fasin
21, 22. ?Folem tok blong Kolosi 3:12, yumi mas gat strong tingting blong mekem wanem?
21 Kaen fasin i save gat paoa long evri haf blong laef blong yumi. Taswe, yumi mas mekem se hem i kam wan fasin blong yumi. Kaen fasin i wan Kristin fasin we yumi mas lanem blong soemaot oltaem.
22 I gud we evri dei, yumi wanwan i traem soem kaen fasin long ol narafala. I gud yumi folem tok ya blong aposol Pol, se: “Yufala i tabu, yufala i man blong God. Hem i lavem yufala tumas, mo hem i jusumaot yufala finis, blong yufala i man blong hem. Nao from samting ya, yufala i mas putum niufala laef ya blong yufala olsem prapa klos blong yufala. Yufala i mas gat sore long ol man mo yufala i mas mekem i gud [“kaen,” NW ] long olgeta. Tingting blong yufala i mas stap daon, mo yufala i mas kwaet man, mo tingting blong yufala i mas longfala.”—Kolosi 3:12.
?Yu Yu Rimemba?
• ?Wanem i mekem se i no isi long ol Kristin blong soem kaen fasin?
• ?From wanem i impoten blong soem kaen fasin insaed long famle?
• ?Wanem i save mekem se i hadwok blong soem kaen fasin long skul, long ples blong wok, mo long ol man we oli stap raonabaot long yumi?
• ?Olsem wanem ol Kristin oli save soem kaen fasin long wok blong prij?
[Kwestin]
[Tok blong pija long pej 18]
Taem olgeta long famle oli soem kaen fasin, famle i joengud mo i wokgud tugeta
[Tok blong pija long pej 19]
Yu save soem kaen fasin taem wan man we yu wok wetem hem no wan famle blong hem i sik
[Tok blong pija long pej 20]
Jeova i stap givhan long olgeta we oli soem kaen fasin nating se narafala i jikim olgeta
[Tok blong pija long pej 21]
Taem yumi givhan long ol man we oli stap raonabaot long yumi, yumi soem kaen fasin