Taem Ol Samting We God i Wantem Oli Kamaot Long Wol

TAEM Jisas i tijim ol disaepol blong hem blong prea se, “Mekem ol samting we yu yu wantem oli kamaot long wol, olsem we oli kamaot finis long heven,” hem i tok olsem from we hem i bin laef long heven wetem God. (Matiu 6:​10, NW; Jon 1:​18, NW; 3:13; 8:42) Taem Jisas i stap long heven, hem i bin luk se laef i olsem wanem taem olgeta samting we oli hapen long heven mo long wol oli laenap wetem samting we God i wantem. Long taem ya, evri samting i nambawan mo i gud nomo.​—Ol Proveb 8:​27-31.

Ol faswan laef we God i wokem oli spirit man, ‘ol enjel ya oli strong, oli gat paoa, mo oli stap obei long ol tok blong Hae God.’ Oli ‘man blong wok blong hem mo oli stap mekem ol samting we hem i wantem.’ (Ol Sam 103:​20, 21) ?Ol enjel wanwan oli fri blong talem samting we oli wantem mo blong tekem prapa disisen blong olgeta? Yes, mo taem God i wokem graon ya, ‘ol enjel long heven oli glad tumas mo oli singsingaot.’ (Job 38:7) Glad ya blong ol enjel i soem we oli haremgud tumas long ol samting we God i mekem, mo oli laef folem ol samting we God i wantem.

God i wokem graon fastaem, biaen hem i rerem graon ya blong putum ol man long hem, nao hem i wokem faswan man mo woman. (Jenesis, japta 1) ?God i glad long ol wok blong hem? Baebol i talem se: “Mo taem hem i luk olgeta wok ya we hem i mekem, hem i luk we oli gud we i gud tumas.” Yes, olgeta samting ya oli stret gud olgeta, i no gat wan samting we i nogud.​—Jenesis 2:1.

?God i wantem wanem long saed blong tufala faswan papa mama blong yumi mo ol pikinini blong tufala? Jenesis 1:28 i talem se: “Nao hem i blesem tufala, mo i talem long tufala se, ‘I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala. Mi mi putum yufala blong yufala i bos long ol fis, wetem ol pijin, mo ol narafala samting we i gat laef we oli stap long wol ya, i stat long olgeta we oli bigbigfala, i go kasem olgeta we oli smosmol.’ ” Blong mekem nambawan wok ya, faswan papa mama blong yumi, tufala i mas laef blong olwe, wetem ol pikinini blong tufala tu. Long taem ya, i no gat trabol, i no gat wan samting we i no stret no i mekem man i harem nogud, mo i no gat ded.

Long taem ya, ol samting we oli stap hapen long heven mo long wol oli kamaot stret olsem we God i wantem. Olgeta we oli mekem samting we God i wantem oli save harem gud tumas long laef blong olgeta. ?Be wanem i hapen?

Wan traem i kamaot we i agensem ol samting we God i wantem. Be i gat wan rod blong stretem traem ya. Nating se i olsem, traem ya i mekem ol man oli safa mo oli harem nogud tumas blong longtaem. Mo safa ya i mekem ol man oli konfius long saed blong ol samting we God i wantem. Yumi evriwan yumi safa from ol trabol ya. ?Traem ya, hem i olsem wanem?

Samting We God i Wantem Long Taem Blong Rebelian

Wan long ol ‘enjel blong God’ i gat tingting blong agensem God. Hem i wantem blokem plan blong God long saed blong ol man, mo hem i wantem kasem hae nem. Enjel ya i stap tingbaot samting ya oltaem, nao hem i wantem tumas blong mekem samting ya, mo fasin ya i kam bigwan moa long hem. (Jemes 1:​14, 15) Maet hem i ting se, sipos hem i save trikim Adam mo Iv blong tufala i obei  long hem mo tufala i no moa obei long God, God bambae i mas lego haf blong rul blong hem i go long han blong rabis enjel ya. Maet enjel ya i ting se bambae God i no kilim olgeta i ded, from we sipos God i mekem olsem, i min se hem i no save mekem stamba tingting blong hem i kamtru. Enjel ya i ting se God bambae i jenisim plan blong hem, mo hem i letem enjel ya i rul antap long ol man we God i bin wokem, nao ol man bambae oli obei long enjel ya. I stret nomo we biaen, Baebol i kolem enjel ya Setan, we i min se “Man we i agens.”​—Job 1:​6, futnot.

Setan i folem plan blong hem, nao hem i kam toktok long woman ya Iv. Hem i pulum Iv blong no mekem samting we God i wantem, mo blong folem tingting blong hem wan nomo. Setan i talem long Iv se: ‘Yu no save ded. . . . Bambae yu kam olsem God, we i save ol fasin we i nogud mo ol fasin we i gud.’ (Jenesis 3:​1-5) Iv i ting se bambae hem i kam fri sipos hem i folem advaes ya. Taswe hem i agri blong mekem wan samting we, long lukluk blong hem, i save mekem laef blong hem i kam moa gud. Afta, hem i pulum man blong hem blong joen wetem hem long fasin ya.​—Jenesis 3:6.

God i no wantem we samting ya i hapen, long saed blong Adam mo Iv. Adam mo Iv, tufala nomo i wantem olsem. Biaen, fasin agens blong tufala i karem ol nogud frut nomo. God i talem finis long tufala se, sipos tufala i no obei, bambae tufala i ded. (Jenesis 3:3) God i wokem tufala long wan fasin we tufala i mas obei long Hem sipos tufala i wantem haremgud. (Jeremaea 10:23) Mo tu, sipos tufala i no obei, bambae sin mo ded i kasem tufala wetem ol pikinini blong tufala tu. (Rom 5:12) Setan i no naf blong blokem panis ya.

?Be olsem wanem? ?Rebelian blong trifala ya i jenisim stamba tingting blong God, samting we hem i wantem long saed blong wol mo ol man? Nogat. (Aesea 55:​9-11) Be rebelian ya i stanemap sam kwestin we yumi evriwan yumi mas ansa long olgeta. Ol kwestin ya hemia se: ?Ol man oli save ‘kam olsem God, we i save ol fasin we i nogud mo ol fasin we i gud,’ olsem Setan i talem? Min se, ?Sipos yumi gat naf taem, bambae yumi save faenemaot samting we i stret mo samting we i no stret, samting we i mekem i gud long yumi, mo samting we i karem trabol, long olgeta haf blong laef blong yumi? ?I stret we yumi obei long evri samting we God i talem? ?Fasin blong hem blong rulum man, hem i beswan rul? ?I stret we yumi obei fulwan long ol samting we God i wantem? ?Bambae yu yu ansa olsem wanem?

God i gat wan rod nomo blong ansarem ol kwestin ya long fored blong ol man mo ol enjel: Hem i mas givim taem long ol man we oli wantem bos long olgeta wan, blong oli traem pruvum sipos oli naf blong mekem olsem. Sipos God i bin kilim ol rebel ya oli ded, bambae hem i no ansarem ol kwestin we oli bin stanemap. Taswe God i givim naf taem long ol man blong stretem ol kwestin ya, olsemia bambae evriwan i luksave we ol man oli no naf blong bos long olgeta wan. God i talem se bambae hem i folem rod ya blong stretem ol problem, taem hem i talem long Iv se bambae hem i karem pikinini. Nao wan famle i stat long wol. !Yumi laef tede, from we God i letem faswan famle ya i stap!​—Jenesis 3:​16, 20.

Be samting ya i no min se bambae God i letem ol man mo ol rabis spirit oli mekem evri samting we oli wantem. God i no lego posisen blong hem olsem king, mo hem i no jenisim stamba tingting blong hem. (Ol Sam 83:18) Samting ya i klia long tok blong hem taem hem i talem se rabis enjel ya we i stamba blong fasin rebel, bambae hem i lus, wetem ol rabis frut we oli kamaot from rebelian ya. (Jenesis 3:15) Taswe, stat bifo finis, God i promes long ol man se bambae hem i karemaot olgeta long ol trabol.

Be Adam mo Iv wetem ol pikinini blong olgeta, oli jus blong no moa obei long rul blong God. Sipos God i wantem blokem ol rabis frut blong fasin ya, hem i mas fosem olgeta blong mekem ol samting  we hem i wantem. Be sipos God i mekem olsem, bambae hem i no givim wan janis long olgeta blong traem pruvum sipos oli naf blong bos long olgeta wan.

Olgeta man wanwan oli fri blong jusum sipos oli wantem stap aninit long rul blong God no nogat. Oli save lanem samting we God i wantem long saed blong ol man, mo oli save mekem bes blong olgeta blong obei long God. (Ol Sam 143:10) Be fasin obei blong olgeta i no save blokem ol trabol we bambae oli mas fesem, go kasem taem ya we Jeova bambae i stretem bigfala kwestin ya long saed blong ol man, se oli save rulum olgeta wan no nogat.

Kwiktaem nomo, ol man oli stat luk ol rabis frut we i kamaot from fasin ya blong no obei long God. Fasbon blong Adam mo Iv, hemia Ken, i kilim i ded Ebel, brata blong hem, from we “fasin blong brata blong hem i stret, be hem, fasin blong hem i no stret.” (1 Jon 3:12) I klia se rabis fasin ya i no wan samting we God i wantem, from we God i givim woning long Ken mo biaen i panisim hem. (Jenesis 4:​3-12) Ken i jus blong folem rod blong Setan mo hem i bos long hem wan, mo long rod ya hem i kam “wan man blong Setan.” Sam narafala man oli folem fasin ya blong Ken.

Wan taosen mo faef handred yia i pas, nao ol “man oli stap mekem ol rabis fasin long fes blong God. Olbaot long evri ples, oli stap faet mo oli stap kilim man i ded.” (Jenesis 6:11) God i mas tekem aksin kwiktaem blong wol ya i no lus. Taswe God i mekem bigfala wota i ron blong spolem ol man nogud, mo hem i protektem wan stret famle, hemia Noa, wetem waef blong hem, ol pikinini boe blong tufala, mo ol waef blong olgeta. (Jenesis 7:1) Yumi evriwan yumi ol smol bubu blong olgeta ya.

Stat long taem blong Noa kam kasem tede, God i givim advaes long ol man we oli wantem save ol samting we hem i wantem. Hem i sanem tabu spirit long sam man blong oli raetemdaon ol advaes ya, blong ol man we oli lukaotem save blong God. Ol advaes ya oli stap insaed long Baebol. (2 Timoti 3:16) Wetem lav, hem i letem sam man oli kam klosap long hem, oli kam fren blong hem. (Aesea 41:8) Mo hem i givim paoa long olgeta blong oli stanap strong, nomata wanem trabol we oli fesem long ol taosen yia we ol man long wol ya oli wantem bos long olgeta wan. (Ol Sam 46:1; Filipae 4:13) !Yumi save soem tangkiu long Jeova from ol samting ya!

“Mekem Ol Samting We Yu Yu Wantem Oli Kamaot”​—Fulwan

Kam kasem tede, God i no mekem olgeta samting we hem i wantem i kamaot yet. Kristin aposol Pita i talem se: “God i promes finis blong putum niufala skae mo niufala wol, we stret fasin nomo bambae i stap long hem. Mo yumi stap wet long ol samting ya blong oli kamtru.” (2 Pita 3:13) Pijatok ya i tokbaot wan niufala gavman we bambae i rul antap long ol man, mo wan niufala wol blong ol man, we bambae oli stap aninit long gavman ya.

Profet Daniel i talem stret se: “Nao long taem blong ol king ya, God ya we i stap long heven bambae i stanemap wan king we rul blong hem bambae i no save finis samtaem. . . . Bambae hem i save flatemgud paoa blong ol narafala king, nao bambae hem i rul oltaem gogo i no save finis.” (Daniel 2:44) Profet tok ya i tokbaot wan niufala Kingdom, no gavman blong God, we bambae i mas finisim ol gavman blong rabis wol ya mo i tekem ples blong olgeta. !Hemia wan gudfala nius ya! Klosap i no longtaem bambae i no moa gat ol faet mo fasin blong man we i tingbaot hem wan nomo. Ol fasin ya nao oli mekem wol i fulap long raf fasin mo i save spolem wol ya bakegen, be bambae oli lus olgeta.

?Ol samting ya bambae oli kamtru wetaem? Ol disaepol blong Jisas oli askem long hem se: “?Bambae ol samting ya oli kamtru wetaem? ?Mo wanem saen we bambae i soemaot we yu bambae yu kambak bakegen, mo wol ya i finis?” Wan haf long ansa blong Jisas i se: “Bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae Lasdei i save kam.”​—Matiu 24:​3, 14.

Olgeta man oli save se wok blong prij ya i stap gohed long fulwol. Ating yu luk finis sam man oli kam prij long ples blong yu. Profesa Charles S. Braden, long buk blong hem These Also Believe, i talem se: “Ol Witnes blong Jeova oli rili kavremap wol wetem wok blong prij blong olgeta. . . . I no gat wan narafala grup blong skul long fulwol we i wokhad mo i traehad blong talemaot gud nius blong Kingdom, i bitim ol Witnes blong Jeova.” Ol Witnes oli wok strong blong talemaot gud nius ya long bitim 230 kantri mo long klosap 400 lanwis. Wok blong prij ya we Baebol i tokbaot, hem i kasem plante man long fulwol, long wan fasin we ol man oli neva  luk bifo. Hemia wan long ol pruf we i soem se, bambae i no longtaem, Kingdom blong God i tekem ples blong ol gavman blong wol ya.

Jisas i talem se bambae ol man oli talemaot wan Kingdom, mo hemia semfala Kingdom ya we hem i tijim yumi blong prea from long Lodsprea, taem hem i se: “Letem kingdom blong yu i kam. Mekem ol samting we yu yu wantem oli kamaot long wol, olsem we oli kamaot finis long heven.” (Matiu 6:​10, NW ) Yes, bambae God i yusum Kingdom ya olsem wan tul blong mekem ol samting we hem i wantem oli kamaot long wol, hemia i minim graon wetem ol man.

?Samting ya i minim wanem? Revelesen 21:​3, 4 i ansa se: “Nao mi harem wan tok we i kamaot long bigfala jea blong God, we i singaot bigwan, i talem se, ‘!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, mo olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.’ ” Long taem ya nao, olgeta samting we God i wantem bambae oli kamaot long wol mo long heven, fulwan. * ?Olsem wanem? ?Yu yu glad blong stap long taem ya?

[Futnot]

[Tok blong pija long pej 5]

Ol man oli no wantem mekem ol samting we God i wantem, nao fasin ya i karem trabol