Tekem Janis Blong Prij Long Ol Man Long Meksiko We Oli Toktok Inglis

TAEM aposol Pol i stap wet long ol fren blong hem long Atens, hem i tekem janis ya blong prij long ol man. Baebol i talem se: “Evri dei, long ples blong maket, hem i stap toktok wetem ol man olbaot.” (Ol Wok 17:17) Jisas i tekem janis blong prij long wan woman Sameria klosap long wel, taem hem i aot long Judia blong go long Galili. (Jon 4:​3-26) ?Yu yu rere blong yusum eni janis we yu gat blong tokbaot gud nius blong Kingdom blong God?

Long Meksiko, plante Witnes blong Jeova we oli save toktok Inglis oli tekem janis blong prij long ol turis we oli kam long ol hotel, ol studen long yunivesiti, mo ol man long narafala kantri we oli kam ritae long Meksiko no oli kam long ol restoron mo ol naesfala garen blong spel. Ol Witnes ya oli gat gudhan blong statem storian wetem ol man olsem. Oli luksave kwiktaem, hu ol man blong narafala kantri no hu ol man we oli toktok Inglis nao oli toktok wetem olgeta. I gud yumi luk olsem wanem oli mekem samting ya.

Plante taem ol Witnes blong narafala kantri we oli mekem wok blong Jeova long Meksiko oli statem storian wetem ol man blong narafala kantri taem oli askem olgeta se oli blong wea. Samting ya i pulum ol man ya blong askem long ol Witnes ya se oli stap mekem wanem long Meksiko, nao ol Witnes ya oli gat janis blong talemaot bilif blong olgeta. Gloria i yusum fasin ya mo hem i talem se i isi nomo blong statem storian folem rod ya. Hem i go wok long wan ples we i nidim moa man blong prij, hemia long ol Inglis man we oli laef long Oaxaca. Afta we hem i prij long taon hem i stap gobak hom nao wan man wetem woman blong hem, we tufala i blong Inglan, tufala i stopem hem long rod. Woman ya i talem se: “!Mi no save bilif se mi luk wan blak woman i wokbaot long Oaxaca!” Samting ya i no mekem Gloria i harem nogud, hem i laf nomo mo i talem from wanem hem i stap long Meksiko. Woman ya i askem Gloria blong kam long haos blong hem blong dring kofe. Afta we oli makem wan taem blong Gloria i luk hem bakegen, Gloria i wantem givim sam Wajtaoa mo Wekap! magasin long woman ya be woman i no wantem, hem i talem se hem i no bilif se i gat wan God i stap. Gloria i talem se hem i glad blong storian wetem ol man we oli gat tingting ya mo hem i glad blong save tingting blong woman ya long stori ya long Wajtaoa se “Ol Ples Blong Wosip​—?Yumi Nidim Olgeta?” Woman ya i agri blong tekem magasin ya mo i talem long hem se: “Sipos yu winim tingting blong mi blong bilif se i gat wan God, samting ya i nambawan.” Tufala i storian gud taem tufala i dring kofe. Biaen woman ya wetem man blong hem, tufala i gobak long Inglan, ale oli stap toktok i kam wetem Gloria long E-mail nomo.

Gloria i statem storian tu wetem Saron, wan studen blong Washington, D.C., we hem i kam long Oaxaca blong wok olsem volontia wetem ol woman long ples ya blong kasem  setifiket blong hem. Afta we Gloria i presem Saron long gudfala wok we hem i mekem, hem i talemaot from wanem hem i stap long Meksiko. Samting ya i lidim hem blong storebaot Baebol mo samting we God bambae i mekem blong givhan long olgeta man. !Saron i talem se hem i sapraes, from we hem i neva storian long ol Witnes long Yunaeted Stet, mo faswan man we hem i mitim long Meksiko hemia wan Witnes blong Jeova! Kwiktaem nomo, Saron i stadi Baebol mo i stat go long ol Kristin miting.

Plante man long narafala kantri oli muf i go long ol hotel klosap long solwota blong Meksiko, blong faenem gudfala laef. Laurel i yusum samting ya nao olsem rod blong statem storian wetem ol man long siti ya Acapulco. Hem i askem ol man sipos Acapulco i luk moa olsem wan paradaes i bitim ples blong olgeta mo wanem samting we oli laekem long Acapulco. Biaen hem i eksplenem se i no longtaem nao, fulwol bambae i kam wan paradaes. Hem i yusum rod ya blong storian mo stadi Baebol wetem wan woman blong Kanada we hem i luk long ofis blong dokta blong ol anamol. Maet yu save yusum sem rod blong storian long ples blong yu.

‘Long Ol Rod Mo Pablik Ples’

Plante taem ol brata sista oli save statem storian wetem ol man long rod mo long ol pablik ples, taem oli askem kwestin ya se: “?Yu yu toktok Inglis?” Plante man Meksiko we oli gat gudfala wok mo oli bin laef long Yunaeted Stet oli save tok Inglis.

Wan man mo waef blong hem we tufala i Witnes, oli storian long wan olfala we wan nes i pusum hem long wiljea. Oli askem olfala ya sipos hem i save toktok Inglis. Olfala ya i talem yes from we hem i bin laef long Yunaeted Stet bifo. Hem i glad blong karem Wajtaoa mo Wekap! we hem i talem se hem i neva ridim bifo. Hem i talem nem blong hem, Consuelo, mo i givim adres blong hem tu. Taem oli go long adres ya afta fo dei i pas, oli faenemaot se hem i stap long ples blong ol olfala we ol sista blong Katolik Skul oli lukaot. Fastaem, i hadwok blong luk Consuelo, from we ol sista ya blong Katolik oli gat nogud tingting mo oli talem se Consuelo i no save storian wetem tufala. Tufala i strong blong askem ol sista blong Katolik ya blong talem long Consuelo se oli wantem blong talem halo. Consuelo i glad blong luk tufala. Biaen olfala ya we i gat 86 yia blong hem, i glad long ol stadi blong hem long Baebol, nating we ol sista long Katolik oli talem sam toktok blong mekem tingting blong hem i foldaon. Mo tu hem i go long sam Kristin miting.

Ol Proveb 1:20 (NW ) i talem se: “Trufala waes i stap singaot bigfala long rod. Long ol pablik ples, oltaem voes blong hem i stap singaot.” Luk samting we i hapen long wan pablik ples we ol man oli save kam sidaon no spel long hem, long San Miguel de Allende. Long wan moning, Ralph i storian long wan medel man we i sidaon long wan jea. Man ya i sapraes taem Ralph i givim Wajtaoa mo Wekap! magasin long hem, samting ya i pulum man ya blong talemaot laef stori blong hem long Ralph.

Hem i wan man we i bin go long faet blong Vietnam, mo hem i safa bigwan long tingting mo filing blong hem from we hem i luk plante man oli ded taem hem i wok long ami. Taem hem i stap long ples blong faet, oli sanem hem i gobak long wan kamp. Long ples ya, oli givim wok ya long hem blong wasem bodi blong ol soldia we oli ded finis, mo rerem olgeta blong sanem olgeta long sip i gobak long Yunaeted Stet. Naoia 30 yia i pas, be hem i stap safa yet long ol nogud drim we oli stap  mekem hem i fraet. Be long moning ya, taem hem i stap sidaon long ples ya, hem i bin prea blong God i halpem hem.

Olfala soldia ya i glad blong karem wan buk, mo i agri tu blong go long wan miting long Haos Kingdom. Afta long miting ya, hem i talem se long tu aoa we hem i stap long Haos Kingdom, hem i harem pis long tingting we hem i neva gat long 30 yia. Man ya i stap long San Miguel de Allende blong tu wik nomo, be hem i laekem tumas ol Baebol stadi mo ol miting we hem i go long hem kasem taem we hem i rere blong gobak long hom blong hem. Ol brata oli mekem plan blong hem i gohed long stadi blong hem.

Tekem Janis Blong Prij Long Wok Mo Skul

?Yu yu soemaot se yu wan Witnes blong Jeova long ples blong wok? Adrian we i stap salem ol stori haos blong holide long taon ya Cape San Lucas i mekem olsemia nao. From samting ya, wan gel we i stap wok wetem hem, nem blong hem Judy, i talem se: “Long tri yia we i pas, sipos yu yu talem long mi se bambae mi kam wan Witnes blong Jeova, bambae mi mi talem stret se ‘!No!’ Be mi mekem disisen blong ridim Baebol. Mo mi tingting se, ‘i no had nating blong ridim Baebol from we mi mi laekem tumas blong rid.’ Be afta we mi ridim sikis pej long Baebol, mi luksave se mi nidim moa help. Mi tingbaot Adrian nomo se hem bambae i naf blong givhan long mi. Mi laekem blong storian long hem from we hem nomo i gat ol gudfala fasin long ples blong wok.” Adrian i talem se bambae hem i kam wetem gelfren blong hem, Katie, blong givim ansa long ol kwestin blong Judy. Katie i statem Baebol stadi wetem Judy mo biaen, Judy i tekem baptaes.

?Olsem wanem blong tekem janis blong prij long skul? Tufala Witnes we oli lanem lanwis Spen long yunivesiti, tufala i no go long skul from we tufala i go long wan Kristin asembli. Taem tufala i kambak, tija i askem tufala blong talem wanem we tufala i go blong mekem, be long lanwis Spen. Ale tufala i traem bes blong tufala blong tekem janis nao blong prij long lanwis Spen. Silvia, tija blong tufala, i glad blong lesin long ol profet tok blong Baebol. Hem i agri blong stadi Baebol long Inglis mo naoia hem i wan Witnes blong Jeova. Sam long famle blong hem tu oli stadi Baebol. Silvia i talem se: “Mi mi faenem wanem we mi bin lukaotem long laef blong mi.” Tru ya gudfala frut i save kamaot taem yumi tekem janis blong prij long ol man.

Yusum Ol Narafala Janis Blong Prij

Taem yumi soem kaengud fasin long narafala, hemia tu i save givim janis long yumi blong prij. Jim mo Gail we tufala i mekem wok blong Jeova long San Carlos, Sonora, tufala i luk se samting ya i tru. Wan woman we i stap wokbaot wetem ol dog blong hem long sikis klok moning i stop fored long haos blong tufala mo i lukluk garen blong tufala. Ale Jim mo Gail, tufala i askem woman ya blong kam dring kofe. Hemia fastaem long 60 yia we hem i harem stori long saed blong Jeova mo hop blong laef olwe. Oli statem wan Baebol stadi wetem hem.

Adrienne tu i soemaot kaen fasin long ol strenja. Hem i stap kakae long wan restoron long Cancun  taem wan yangfala boe i kam askem sipos hem i blong Kanada. Taem Adrienne i talem yes, yangfala ya i talem long hem se, hem mo mama blong hem i stap givhan long sista blong hem blong raetem wan ripot long saed blong ol man Kanada. Ale, mama blong yangfala ya we i save toktok Inglis i kam sidaon wetem Adrienne. Afta we Adrienne i givim ansa long ol kwestin blong woman ya long saed blong ol man Kanada, Adrienne i se: “Be i gat wan impoten risen from wanem mi lego Kanada blong kam long ples ya​—hemia blong halpem ol man blong save Baebol. ?Yu yu intres long samting ya?” Woman ya i talem se yes hem i glad long samting ya. Hem i talem se i mekem ten yia nao we hem i no moa go long jos blong hem mo hem i bin traem stadi Baebol hem wan. Hem i givim long Adrienne adres mo telefon namba blong hem mo stadi i gohed gud.

‘Sakem Bred Blong Yu i Go Long Wota’

Taem yumi tekem janis blong talemaot trutok long eni ples, samting ya i givim janis blong storian long ol man we maet oli neva harem gud nius no maet oli neva gat inaf taem blong lesin long yumi. Long wan bisi ples blong kakae we i stap long taon ya Zihuatanejo, i gat wan Witnes we i askem wan man mo waef blong hem blong tufala i sidaon wetem hem, from we ples blong kakae i fulapgud long man. Tufala i sel long bot blong tufala long plante defdefren ples blong seven yia finis. Tufala i talemaot ol nogud tingting we tufala i gat long saed blong ol Witnes blong Jeova. Afta long storian ya, Witnes ya i go luk tufala long bot blong tufala mo hem i askem tufala blong kam long haos blong hem. Tufala i glad blong karem 20 magasin mo 5 buk mo tufala i promes blong faenem sam Witnes long nekiswan ples we bambae tufala i go long hem.

Jeff mo Deb, tufala i luk wan famle wetem naesfala smol gel blong tufala long wan ples blong kakae long wan bigfala stoa long Cancún. Taem tufala i talem wan gudfala tok long saed blong bebi ya, papa mama blong bebi i askem Jeff mo Deb blong kam kakae wetem olgeta. Tufala i faenemaot se famle ya i kamaot long India. Oli neva save ol Witnes blong Jeova, mo oli neva luk ol buk blong olgeta. Ale taem oli aot long stoa ya oli go wanwan, famle ya i karem sam buk blong ol Witnes.

Samting we i klosap sem mak i hapen long tufala Jaenis we tufala i jes mared mo tufala i kam long wan Aelan klosap long Yucatan. Tufala i askem Jeff blong karem foto blong tufala, mo hem i glad blong mekem olsem. !Hem i faenemaot se tufala i laef long Yunaeted Stet blong 12 yia finis, be tufala i neva luk, no save, ol Witnes blong Jeova! Oli storian gud mo Jeff i leftemap tingting blong tufala blong faenem ol Witnes taem oli go bak long hom.

Maet yu yu gat janis blong prij long ples blong yu taem i gat wan impoten samting we i hapen. Taem presiden blong Yunaeted Stet i go luk presiden blong Meksiko long fam blong ol buluk blong hem klosap long Guanajuato, ol man we oli wok blong niuspepa mo televisin blong plante ples oli kam tu long ples ya. Wan famle i tekem janis blong prij long Inglis. Plante man oli lesin. Eksampol, wan man blong talemaot nius i wok long sam ples we i gat faet long hem, olsem long Kosovo mo Kuwait. Wan long ol fren blong hem i ded long han blong hem taem wan man we i haed long bus i sutum hem. Taem hem i save se i gat hop blong ol man we oli ded, man ya i krae mo i talem tangkiu long God blong letem hem i save se laef i gat mining. Hem i talem se nating we bambae hem i no luk ol Witnes ya bakegen, be bambae hem i holemtaet gud nius long Baebol long hat blong hem.

Olsem we yu luk finis long ol stori ya, plante taem yumi no save wanem samting i hapen long ol man ya afta we ol Witnes oli prij long olgeta. Be, waes King Solomon i se: “Sakem bred blong yu i go long wota from we plante dei biaen, bambae yu faenem hem bakegen” (NW ). Mo hem i talem tu se: “Yu mas planem ol kakae long garen blong yu long moning, mo long sapa tu, from we yu no save weswan bambae oli gru gud. Maet olgeta evriwan oli karem gudfala kakae, no narawan nomo i karem, narawan i no gat.” (Prija 11:​1, 6) Yes i gud yu gohed blong “sakem bred blong yu i go long wota” mo glad blong “planem ol kakae long garen blong yu,” olsem we Pol mo Jisas tufala i mekem, mo olsem ol Witnes ya tede tu oli mekem taem oli prij long ol man long Meksiko we oli toktok Inglis.