?Yu Yu Rimemba?

?Yu yu bin glad blong ridim ol Wajtaoa we oli kamaot long ol manis we i jes pas? Ale, traem luk sipos yu save ansa long ol kwestin ya:

• ?Wanem i soemaot se Jisas i gat sam brata mo sista?

Long Matiu 13:​55, 56 mo Mak 6:​3, Baebol i talem klia se Jisas i gat sam brata mo sam sista. Grik wod (adelphos) we oli yusum long vas ya i blong soemaot “fasin fren we i gat bitwin tu man insaed long wan famle, no long saed blong loa, [mo] i minim stret brata, no haf brata.” (The Catholic Biblical Quarterly, Jenuware 1992)​—12/15, pej 3.

• ?Wanem samting we yumi luk we i defren long saed blong ol wo tede mo wanem nao i stamba blong olgeta wo ya?

Long ol yia we oli jes pas, ol faet we oli spolem ol man hem i ol faet bitwin ol manples​—ol faet bitwin ol grup blong man we oli blong sem kantri nomo. Fasin blong no laekem nating man blong narafala laen mo man blong defren jos, fasin blong no mekem i stret, mo ol rao bitwin ol man blong politik, oli ol bigfala risen biaen long ol wo ya. Wan narafala stamba risen hemia fasin griri​—ol man oli griri from paoa mo oli griri from mane.​—1/1, pej 3-4.

• ?Olsem wanem yumi save se Jisas i no talem long ol Kristin blong oli ripitim baehat ol toktok blong Lodsprea ya we hem i bin talem long olgeta?

Jisas i givim eksampol blong prea ya taem hem i givim Bigfala Toktok blong hem antap long Hil. Samwe long 18 manis biaen, Jisas i talem bakegen ol bigfala poen blong prea ya. (Matiu 6:​9-13; Luk 11:​1-4) I gud blong makem we taem Jisas i mekem samting ya, hem i no talem bakegen ol wanwan wod blong prea ya olsem we hem i bin talem fastaem. Hemia i soem klia se prea ya i wan eksampol nomo, i no wan prea we man i mas ripitim baehat.​—2/1, pej 8.

• ?Afta we Bigfala Wota i ron, long weples nao sotleg i faenem lif ya blong oliftri we hem i karem i kambak long sip?

Yumi no save talem stret se wanem tempraja mo hamas sol i stap long wota ya we i bin kavremap wol. Be tri ya olif, hem i wan tri we i save givim ol niufala branj bakegen afta we oli katem hem i godaon. Maet sam long ol oliftri ya oli laef yet afta we bigfala wota i kavremap wol, taswe biaen oli save putum sam niufala lif bakegen.​—2/15, pej 31.

• ?Taem wo i kamaot bitwin ol manples long Naejeria, mo gavman i blokem ol eria raon long Biafra, olsem wanem ol Witnes blong Jeova long ples ya oli kasem kakae long saed blong spirit?

Gavman i sanem wan manples i go wok long Yurop mo i putum wan narawan i wok long epot long Biafra. Tufala man ya tugeta oli Witnes. Tufala Witnes ya i putum laef blong tufala long denja blong karem ol kakae long saed blong spirit i kam insaed long Biafra, samting ya i givhan long plante brata gogo kasem we wo i finis long 1970.​—3/1 pej 27.

• ?Wanem jenis we Pis blong Westphalia i mekem mo olsem wanem ol skul oli joen long hem?

Refomesen i seraotem ol man we Rom i rul long olgeta oli go long tri skul​—Katolik skul, skul blong Luther, mo skul blong Calvin. Protestan Yunion mo Katolik Lig oli stanap jes afta long yia 1600. Ale i gat raorao i kamaot bitwin ol skul long Bohemia mo samting ya i kam antap gogo i kam wan bigfala faet bitwin ol kantri we oli wantem rul. Plante Katolik mo Protestan rula oli faet blong mekem se politik pati blong olgeta i win, mo blong oli kasem mane. Biaen i gat wan miting blong putum pis long provins blong Jemani we nem blong hem Westphalia. Afta klosap 5 yia i pas, oli saenem Kontrak blong Westphalia long 1648, Wo blong Toti Yia i finis, mo wanwan kantri blong Yurop oli stap aninit long prapa rula blong olgeta.​—3/15, pej 20-3.

• ?Wanem mining blong mak, no nem ya, blong “wael anamol,” we hem i namba 666?

Revelesen 13:​16-18 i tokbaot mak ya. Wael anamol ya i pija blong rul blong ol man, mo hem i gat wan ‘namba we i saen blong nem blong man.’ Samting ya i soem se ol gavman oli gat sem fasin olsem ol man we oli gat sin, oli no stretgud olgeta. Namba ya 666, we i olsem 600 mo 60 mo 6, i soem samting we i no stretgud nating mo i mestem bigwan long lukluk blong Jeova. Olgeta we oli gat mak blong anamol ya oli stap mekem wosip mo ona long gavman, mo hop blong olgeta i stap long ol gavman ya nomo.​—4/1, pej 4-7.