Tingting Blong Yumi i Mas Strong Olsem Jeremaea
Tingting Blong Yumi i Mas Strong Olsem Jeremaea
“Yumi mas trastem Hae God, mo yumi mas bilif long hem. Yumi no mas letem tingting blong yumi i foldaon, oltaem yumi mas trastem hem.”—OL SAM 27:14.
1. ?Wanem gudgudfala blesing we ol Witnes blong Jeova oli stap harem gud long hem?
OL WITNES BLONG JEOVA oli stap long wan paradaes long saed blong spirit. (Aesea 11:6-9) Long wol ya we i fulap long trabol, ol Witnes ya oli haremgud long gudfala fasin blong ol Kristin brata sista blong olgeta we oli stap long pis wetem Jeova God mo oli gat pis bitwin olgeta. (Ol Sam 29:11; Aesea 54:13) Mo paradaes ya long saed blong spirit i stap kam bigwan moa. Evriwan long kampani ya oli stap traehad blong “mekem ol samting we God i wantem.” Mo taem oli mekem samting ya wetem ful paoa blong olgeta, oli givhan blong mekem paradaes ya i gru. (Efesas 6:6) ?Oli mekem samting ya olsem wanem? Oli mekem laef blong olgeta i laenap wetem ol rul blong Baebol mo oli tijim narafala blong mekem olsem, nao oli pulum ol man ya blong kasem ol gudgudfala blesing blong paradaes ya.—Matiu 28:19, 20; Jon 15:8.
2, 3. ?Wanem sam samting we ol trufala Kristin oli stap fesem?
2 Be taem yumi stap long paradaes ya long saed blong spirit, yumi no mas ting se bambae yumi neva kasem trabol. Yumi evriwan i sin man yet mo yumi stap harem nogud from ol samting olsem sik, fasin blong kam olfala, mo ded. Mo tu, yumi stap luk ol profet tok ya oli stap kamtru raonabaot long yumi we oli makem taem blong yumi se hemia ol ‘lasdei.’ (2 Timoti 3:1) Ol wo, fasin blong brekem loa, ol sik, kakae i sot, mo plante narafala hadtaem oli stap mekem plante man oli harem nogud bigwan. Mo ol samting ya oli stap kasem ol Witnes blong Jeova tu.—Mak 13:3-10; Luk 21:10, 11.
3 Antap long ol samting ya, yumi save se nating sipos yumi sefgud insaed long paradaes long spirit, ol man we oli stap afsaed oli stap agensem yumi strong. Jisas i givim woning long ol man blong hem: “Yufala i no man blong wol ya, mi mi jusumaot yufala finis, mo mi tekemaot yufala long ol man blong wol ya. Taswe ol man blong wol ya oli no laekem yufala, oli agens long yufala. Yufala i mas tingbaot tok ya we mi talem finis long yufala, se i no gat man blong wok we i hae moa long masta blong hem. Nao from we ol man blong wol ya oli stap mekem i nogud tumas long mi, i klia gud we bambae oli save mekem sem fasin nomo long yufala.” (Jon 15:18-21) Sem samting i stap hapen tede. Plante man oli no kasem save long wosip blong yumi mo oli no laekem wosip ya. Samfala oli jikim yumi, oli tok nogud long yumi, mo tu—olsem Jisas i talem—oli no laekem yumi nating. (Matiu 10:22) Plante taem, ol man oli traehad blong spolem yumi taem oli mekem ol giaman nius long televisin, radio, no niuspepa. (Ol Sam 109:1-3) Yes, yumi evriwan i fesem samting we i givim hadtaem long yumi, mo maet sam long yumi oli stat blong letem tingting blong olgeta i foldaon. ?Olsem wanem yumi save stanap strong?
4. ?Wanem samting nao i save halpem yumi blong stanap strong?
4 Jeova bambae i halpem yumi. Tabu spirit i pulum wan man blong raetem long buk blong Ol Sam se: “Man we i stret i save harem nogud long plante trabol, be Hae God i save tekemaot hem long olgeta trabol ya.” (Ol Sam 34:19; 1 Korin 10:13) Plante long yumi oli luksave finis se taem yumi putum ful tras blong yumi long Jeova, hem i givim paoa we yumi nidim blong stanap strong long enikaen hadtaem we yumi fesem. Lav we yumi gat long hem mo tingting ya se yumi wantem kasem glad long fiuja, i save halpem yumi blong faet agensem tingting we i foldaon mo fraet. (Hibrus 12:2) Taswe, taem yumi fesem sam trabol, yumi gohed blong stanap strong.
Tok Blong God i Mekem Tingting Blong Jeremaea i Strong
5, 6. (a) ?Wanem samting i save halpem yumi blong luksave se ol trufala man blong God oli save stanap strong? (b) ?Jeremaea i mekem wanem taem Jeova i singaot hem blong mekem wok blong profet?
5 Longtaem finis i kam, i gat plante gudfala man blong wok blong Jeova we oli no lusum glad taem oli fesem sam trabol. Sam long olgeta ya oli laef long taem we Jeova i jajem ol rabis man. Sam long ol gudfala man ya, hemia Jeremaea mo sam man we oli laef long taem blong hem, wetem ol Kristin long faswan handred yia tu. Stori blong olgeta ya i stap long Baebol from we i save leftemap tingting blong yumi. Yumi save lanem fulap samting taem yumi stadi long ol stori ya. (Rom 15:4) Tingbaot stori blong Jeremaea.
6 Taem Jeremaea i yangfala yet, Jeova i singaot hem blong mekem wok olsem profet long ol man Juda. Hemia i no wan isi wok ya. Plante long ol man Juda oli stap wosipim ol giaman god. Taem Jeremaea i statem wok blong profet, Josaea i rul olsem king. Nating se king ya i laekem Jeova, olgeta king we oli kam biaen long hem oli no laekem Jeova. Mo tu, bighaf blong ol man we oli gat wok blong tijim ol man Juda—olsem ol profet mo ol pris—oli no stap leftemap trutok. (Jeremaea 1:1, 2; 6:13; 23:11) ?Taswe Jeremaea i harem olsem wanem taem Jeova i singaot hem blong mekem wok olsem profet? !Hem i fraet! (Jeremaea 1:8, 17) Jeremaea i tingbaot fastaem ya we God i singaot hem, hem i se: “Mi mi talem se, ‘Hae God. Yu yu Masta blong mi. Mi mi no save toktok, from we mi mi yangfala nomo.’ ”—Jeremaea 1:6.
7. ?Ol man we Jeremaea i prij long olgeta oli olsem wanem, mo Jeremaea i mekem wanem from?
7 Bighaf blong ol man we Jeremaea i prij long olgeta oli no wantem lesin long hem, mo plante taem oli agensem hem. Wan taem, pris ya Pasuru i kilim hem mo biaen i givim oda blong oli wipim Jeremaea mo oli lokem tufala han mo tufala leg blong hem long wan wud we i olsem bigfala hankaf. Jeremaea i talemaot filing we hem i gat long taem ya se: “Mi talem se, ‘Naoia bambae mi fogetem Hae God mi no moa talemaot nem blong hem.’ ” ?Samtaem yu yu harem olsem se yu wantem lego evri samting? Yu luk wanem samting i halpem Jeremaea blong no lego. Hem i se: “Ol tok blong [God] i stap bon olsem faea insaed long tingting blong mi. Mi mi traem holem blong mi no talemaot, be mi no save mekem.” (Jeremaea 20:9) ?Tok blong God i mekem yu yu harem olsem tu?
Ol Fren Blong Jeremaea
8, 9. (a) ?Wanem slak fasin blong profet Uria, mo wanem i hapen from? (b) ?From wanem tingting blong Baruk i foldaon, mo wanem i givhan long hem?
8 Jeremaea i no mekem wok blong profet hem wan. Hem i gat ol fren, mo i sua se olgeta ya oli leftemap tingting blong hem. Be, samtaem ol fren blong hem oli no yusum waes fasin. Wan long fren ya blong hem, hemia profet Uria. Profet ya i bisi blong talemaot tok agensem Jerusalem mo Juda “olsem we Profet Jeremaea i mekem.” Be, taem King Jehoeakim i givim oda blong oli kilim Uria i ded, ale, Uria i fraet mo i ronwe i go long Ijip. Samting ya i no sevem hem. Ol man blong king oli go faenem hem, oli kasem hem, mo oli karem hem i kambak long Jerusalem. Long ples ya, oli kilim hem i ded. !Tingbaot Jeremaea! !Ating nius ya i mekem hem i harem nogud tumas!—Jeremaea 26:20-23.
9 Wan narafala fren blong Jeremaea hemia Baruk, we hem i stap raetemdaon olgeta tok blong Jeremaea long wan buk. Baruk i givhangud long Jeremaea. Be wan taem, hem tu i no moa putum tingting blong hem i stap long ol samting long saed blong spirit. Hem i stat komplen se: “!O, sore tumas long mi! Mi mi stap harem nogud tumas, mo Hae God i mekem mi mi trabol moa. Mi mi krae we mi krae, gogo mi slak olgeta. Mi no save harem gud nating.” Tingting blong Baruk i foldaon nao hem i no moa tinghae long ol samting long saed blong spirit. Be Jeova i kaen gud long Baruk mo i givim waes advaes long hem, nao samting ya i stretem tingting blong Baruk bakegen. Ale, Jeova i talem long hem se bambae hem i no lus taem ol ami oli kam spolem Jerusalem. (Jeremaea 45:1-5) !Ating Jeremaea i harem gud tumas taem Baruk i karembak stret tingting blong hem long saed blong spirit!
Jeova i Halpem Profet Blong Hem
10. ?Wanem promes we Jeova i mekem long Jeremaea?
10 Samting we i rili impoten, se Jeova i neva lego Jeremaea. Hem i kasem save filing blong profet blong hem mo i givim paoa mo help we hem i nidim. Olsem taem Jeremaea i jes statem wok blong hem, mo hem i gat tingting ya se hem i no naf blong mekem wok ya, Jeova i talem long hem se: “Yu no mas fraet long olgeta, from we mi bambae mi stap wetem yu blong blokemgud yu. Mi mi Hae God, mo hemia tok blong mi.” Nao taem Jeova i talem wanem wok we Jeremaea i mas mekem, hem i talem long Jeremaea se: “Bambae oli stap tok agens long yu. Be naoia, mi mi givim paoa long yu, blong mekem yu yu stanap strong agens long olgeta. . . . Bambae oli no save winim yu, from we mi bambae mi stap wetem yu, mi blokemgud yu. Mi mi Hae God, mo hemia tok blong mi.” (Jeremaea 1:8, 19) !Samting ya i rili leftemap tingting blong Jeremaea! Mo Jeova i holem promes blong hem.
11. ?Olsem wanem yumi save se Jeova i holem promes we hem i bin mekem long Jeremaea?
11 Taswe, afta we ol man oli lokem hem long hankaf ya finis mo oli jikim hem nogud, tingting blong Jeremaea i stap strong nomo, hem i se: “Hae God, oltaem yu stap givhan long mi, olsem wan strong man blong faet. Olgeta we oli stap ronem mi, bambae oli no save winim mi. Oltaem nomo, bambae oli sem gogo i no save finis.” (Jeremaea 20:11) Long ol yia biaen, taem ol man oli traem kilim Jeremaea i ded, Jeova i gohed blong protektem hem. Mo hem, tugeta wetem Baruk, tufala i no ded taem ol ami oli kam spolem Jerusalem. Yes, tufala i fri. Be ol man ya we oli bin mekem trabol long Jeremaea mo we oli no lesin long ol woning blong hem, sam oli ded mo sam oli go kalabus long Babilon.
12. ?I gat plante samting we oli save mekem tingting blong yumi i foldaon, be nating se i olsem yumi mas tingbaot wanem?
12 Tede, plante Witnes blong Jeova oli olsem Jeremaea, oli harem nogud long plante trabol. Olsem yumi talem finis, sam long ol trabol ya oli kamaot from prapa slak fasin blong yumi, sam i kamaot from we laef long wol ya i had tumas, mo sam narafala trabol i kamaot from ol man we oli agensem wok blong yumi. Ol trabol ya oli save mekem tingting blong yumi i foldaon bigwan. From samting ya, maet yumi gat tingting se bambae yumi no moa naf blong gohed long wok blong Jeova, olsem we Jeremaea tu i tingting. Yes, yumi no mas sapraes we tingting blong yumi i save foldaon samtaem. Samting ya i traem lav we yumi gat long Jeova se hem i strong no olsem wanem. Taswe yumi mas wokhad blong no letem tingting we i foldaon i pulum yumi, nao yumi gowe long wok blong Jeova olsem Uria i bin mekem. Defren olgeta, yumi mas folem fasin blong Jeremaea mo yumi mas trastem se bambae Jeova i halpem yumi.
Olsem Wanem Blong Winim Tingting We i Foldaon
13. ?Olsem wanem yumi save folem fasin blong Jeremaea mo Deved?
13 Oltaem Jeremaea i toktok wetem Jeova God. Hem i talemaot olgeta filing blong hem mo hem i askem long Jeova blong i givim paoa long hem. Hemia wan gudfala eksampol we yumi save folem. Deved we Baebol i tokbaot hem, hem tu i lukluk i go long Jeova blong kasem paoa. Hem i raetem se: “Hae God. Plis yu lesin long ol tok blong mi. Mi mi stap harem nogud we mi krae from. Plis yu lukluk i kam long mi. Yu yu God blong mi, mo yu yu King blong mi. Mi mi stap krae long yu blong yu givhan long mi. Plis yu harem krae blong mi. Hae God. Mi mi stap prea long yu nomo.” (Ol Sam 5:1, 2) Stori blong Deved i soem se plante taem Jeova i ansa long prea we hem i mekem blong askem help. (Ol Sam 18:1, 2; 21:1-5) Long sem fasin, taem ol samting long laef blong yumi oli kam hevi, no maet yumi luk se problem we i kasem yumi i bigwan tumas, i gud tumas blong save se yumi save lukluk i go long Jeova, prea long hem mo talemaot olgeta samting we i stap long hat blong yumi. (Filipae 4:6, 7; 1 Tesalonaeka 5:16-18) Jeova i wantem lesin long yumi. Hem i talem stret long yumi se ‘hem i stap tingbaot yumi.’ (1 Pita 5:6, 7) ?Be yu ting se i stret sipos yumi prea long Jeova be biaen yumi no lesin long samting we hem i talem? No, i no stret.
14. ?Ol tok blong Jeova oli mekem wanem long Jeremaea?
14 ?Jeova i toktok long yumi olsem wanem? Bakegen, i gud yumi tingbaot Jeremaea. From we Jeremaea i wan profet, Jeova i toktok stret wetem hem. Jeremaea i talemaot olsem wanem ol tok blong God oli gat paoa long hem, i se: “Hae God. Yu yu God blong mi, mo yu gat olgeta paoa. Mi mi man blong wok blong yu. Taem yu toktok long mi, mi lesin gud long tok blong yu, mo oltaem, tok ya blong yu i mekem mi mi harem gud, mi glad we mi glad.” (Jeremaea 15:16) Yes, Jeremaea i glad long samting ya se hem i holem nem blong God, mo ol tok blong God ya oli sas long lukluk blong hem. Aposol Pol tu i olsem Jeremaea we i wantem tumas blong talemaot gud nius ya we God i putum long han blong hem.—Rom 1:15, 16.
15. ?Olsem wanem yumi save putum ol tok blong Jeova long hat blong yumi, mo wanem samting we yumi save tingbaot blong pulum yumi blong wantem tokbaot Jeova mo Kingdom blong hem?
15 Tede, Jeova i no moa toktok i go stret long man. Be, yumi gat ol tok blong God i stap long Baebol. Sipos yumi wokhad blong stadi long Baebol blong traem kasem save long hem mo yumi tingting dip long samting we yumi lanem, bambae ol tok blong God oli kam olsem samting we i mekem yumi tu yumi ‘harem gud, yumi glad we yumi glad.’ Mo yumi mas glad from we yumi karem nem blong Jeova taem yumi go talemaot ol tok blong Hem long narafala. I gud yumi neva fogetem se, i no gat narafala man long wol tede we i stap talemaot nem blong Jeova. Ol Witnes blong Jeova nomo oli stap talemaot gud nius blong Kingdom blong God we i stanap finis, mo olgeta nomo oli stap tijim ol man we oli gat tingting daon blong oli kam ol disaepol blong Jisas Kraes. (Matiu 28:19, 20) !Hemia wan bigfala blesing ya we yumi gat! !Taem yumi tingbaot olgeta samting we Jeova i putum long han blong yumi, yumi no save stap kwaet, yumi wantem tokbaot Jeova mo Kingdom blong hem!
Lukaot Gud Long Wanem Kaen Fren We Yu Jusum
16, 17. ?Wanem tingting blong Jeremaea long saed blong ol fren, mo olsem wanem yumi save folem fasin blong hem?
16 Jeremaea i tokbaot wan narafala samting we i halpem hem blong gat strong tingting. Hem i se: “Mi mi no stap go joen wetem ol narafala man we oli stap harem gud, oli stap laf. Be oltaem, mi stap obei long ol tok blong yu, nao mi go stap mi wan nomo, mo yu yu mekem we mi tu mi kros long olgeta.” (Jeremaea 15:17) Jeremaea i laekem moa blong stap hem wan i bitim we hem i joen wetem ol rabis man. Tede yumi gat tingting olsem hem. Yumi neva fogetem woning ya blong aposol Pol se “ol stret man nomo, be ol fren blong olgeta we oli no stret, oli save spolem fasin blong olgeta.” Yes, nating se yumi folem ol fasin ya plante yia finis, be ol rabis fren oli save spolem ol fasin ya.—1 Korin 15:33.
17 Taem yumi joen wetem ol nogud fren, yumi letem spirit blong wol i kam spolem tingting blong yumi. (1 Korin 2:12; Efesas 2:2; Jemes 4:4) Taswe, i gud yumi trenem tingting blong yumi blong yumi kam naf blong luksave wanem kaen fren we i save spolem yumi, mo yumi save stap longwe long olgeta. (Hibrus 5:14) ?Sipos Pol i laef long wol tede, yu ting se bambae hem i talem wanem long wan Kristin we i stap wajem ol film we oli soem nogud fasin blong seks mo raf fasin? ?Bambae hem i givim wanem advaes long wan brata we i fren wetem sam strenja long Intenet? ?Bambae hem i tingting wanem long wan Kristin we i spenem plante aoa blong pleplei ol video gem no blong wajem televisin, be i no stap stadi hem wan long Baebol?—2 Korin 6:14b; Efesas 5:3-5, 15, 16.
Stap Oltaem Long Paradaes Long Saed Blong Spirit
18. ?Wanem i save halpem yumi blong stap strong long saed blong spirit?
18 Yumi laekem tumas paradaes long saed blong spirit. I no gat wan samting long wol ya we i olsem paradaes ya. Ol man we oli no bilif, oli luksave samting ya tu mo oli stap tokbaot lav, kea, mo kaen fasin we ol Kristin oli gat. (Efesas 4:31, 32) Nating se i olsem, yumi mas faet strong naoia i bitim olgeta taem bifo, agensem tingting we i foldaon. Yumi nidim ol gudfala fren, yumi mas prea mo stadi oltaem. Ol samting ya oli save halpem yumi blong stap strong long saed blong spirit. Mo bambae oli mekem yumi strong blong fesem eni traem from we yumi trastem Jeova fulwan.—2 Korin 4:7, 8.
19, 20. (a) ?Wanem i save halpem yumi blong stanap strong? (b) ?Nekis stadi i blong hu, mo hu ol narafala we oli mas tingting gud tu long stadi ya?
19 I gat sam man we oli no laekem nating ol tok blong Baebol we yumi stap talemaot. Yumi mas lukaot we yumi neva letem ol man ya oli mekem yumi fraet mo bilif blong yumi i kam slak. Ol man ya oli olsem ol enemi we oli givim hadtaem long Jeremaea. Taem oli faet agensem yumi oli stap faet agensem God. Bambae oli no save win. Jeova, we i strong moa long ol enemi blong yumi, i talem se: “Yumi mas trastem [Jeova], mo yumi mas bilif long hem. Yumi no mas letem tingting blong yumi i foldaon, oltaem yumi mas trastem hem.” (Ol Sam 27:14) Taem yumi trastem Jeova wetem fulhat blong yumi, yumi mekem tingting blong yumi i strong nao yumi no save kam slak blong mekem samting we i stret. Yumi mas sua fulwan, olsem Jeremaea mo Barak, se bambae yumi karem gudfala frut sipos yumi no kam slak.—Galesia 6:9.
20 Plante Kristin oli mas faet evri dei blong no letem tingting blong olgeta i foldaon. Be ol yangfala oli fesem sam trabol we i defren olgeta. Mo long semtaem oli gat sam nambawan janis. Nekis stadi bambae i toktok stret long ol yangfala blong yumi. I gud tu sipos ol papa mama mo ol nara bigman insaed long kongregesen oli tingting gud long stadi ya, from we tru long toktok, eksampol, mo sapot blong olgeta, oli save halpem ol yangfala ya long kongregesen.
?Bambae Yu Yu Ansa Olsem Wanem?
• ?From wanem i gat plante samting we oli save mekem tingting blong yumi i foldaon, mo hu i save halpem yumi?
• ?Olsem wanem Jeremaea i winim tingting we i foldaon nating se wok we hem i kasem i no isi nating?
• ?Wanem i save mekem yu yu ‘harem gud, yu glad we yu glad,’ nating sipos yu fesem hadtaem?
[Kwestin]
[Tok blong pija long pej 9]
Jeremaea i ting se hem i yang tumas mo i no gat naf save blong mekem wok olsem profet
[Tok blong pija long pej 10]
Nating se ol man oli givim hadtaem long Jeremaea, hem i save se Jeova i stap wetem hem “olsem wan strong man blong faet”