?Yu Yu Stap Kasem Paoa Long Tok Blong God?

?TAEM yu fesem wan traem, olsem wanem yu winim traem ya? Taem Setan i traem Jisas, Jisas i tingbaot wan stret vas blong Baebol we i givhan long hem blong fesem traem ya. (Matiu 4:1-11) Sem mak olsem King Deved, taem hem i fesem ol traem long laef blong hem, Tok blong God nao i givim paoa long hem. Hem i talem se: “Taem we mi mi wari, mo mi stap tingting tumas, oltaem yu mekem tingting blong mi i kam gud bakegen, yu stap mekem mi mi glad.”—Ol Sam 94:19.

Sem mak long yumi tu, sipos yumi tingbaot wan vas blong Baebol we i stret long traem ya blong yumi, samting ya i save leftemap tingting blong yumi mo i givim paoa long yumi blong fesem traem ya. Tingbaot eksampol blong Rex we naoia i gat 89 yia. Hem i wan fultaem paenia stat finis long 1931. Be hem i talem se: “Oltaem mi harem se mi seksek taem oli givim wan spesel wok long mi.” ?Olsem wanem hem i winim traem ya? “Mi tingbaot vas ya we mi laekem tumas hemia Ol Proveb 3:5 (NW ), we i talem se: ‘Trastem Jeova wetem ful hat blong yu. Yu no mas stanap long prapa waes blong yu nomo.’ Taem mi tingbaot vas ya mo mi mekem i wok long laef blong mi, samting ya i givhan long mi blong mekem gud ol wok ya we mi kasem.”

Fasin ya blong tingbaot wan vas we yumi laekem, i save givhan bigwan long ol yangfala tu. Wan yangfala blong sikis yia, nem blong hem Jack i talem se vas we hem i laekem tumas hemia Matiu 24:14. Vas ya i pusum hem blong go prij wetem papa mo mama blong hem. Hem i talem se: “Evri Sarede, mi laekem go prij wetem mama mo papa, mo ol bigfala sista blong mi.”

?Olsem Jisas, samtaem yu fesem sam traem we i traem bilif blong yu stret? Ale maet Filipae 4:13 i wan long ol gudfala vas we i save givhan long yu. ?Olsem King Deved, samtaem yu harem se yu no moa gat pis long tingting blong yu? Ale, maet Filipae 4:6, 7 bambae i givhan long yu blong fesem traem ya. ?Samtaem yu harem olsem se wok we yu mekem blong Jeova i no karem frut, i olsem nating nomo? Ale vas long 1 Korin 15:58 bambae i givim paoa long yu.

Taem yumi stap tingbaot ol vas we oli stret long yumi, i olsem we yumi letem Tok blong God, Baebol, i gat paoa long laef blong yumi. (Hibru 4:12) Taem yumi rimemba sam vas we yumi laekem, ol vas ya oli save givim paoa mo oli save leftemap tingting blong yumi.—Rom 15:4.