Yumi Givgivhan Long Yumi Blong Kam Strong Moa

“Trifala ya i stap mekem mi mi harem gud tumas [“oli mekem mi mi strong,” NW ].”—KOLOSI 4:11.

1, 2. ?Nomata se i gat denja, from wanem ol fren blong Pol oli go visitim hem long kalabus?

 SIPOS yu yu gat wan fren we i stap long kalabus, nating sipos fren ya i no mekem wan rong mo oli jajem hem i no stret, ating i no isi long yu blong go visitim hem. Maet evritaem we yu kam blong visitim fren blong yu, ol polis long kalabus oli stap wajem yu, oli lukluk evri samting we yu mekem, blong luk sipos yu mekem wan rong. From samting ya, yu rili nidim fasin no fraet blong go visitim  mo toktok wetem fren blong yu long kalabus.

² Hemia nao samting we sam fren blong aposol Pol oli bin mekem samwe long 1,900 yia bifo. Oli no wet blong go visitim Pol taem hem i stap long kalabus, oli go givhan long hem, leftemap tingting blong hem mo mekem hem i strong long saed blong spirit. ?Hu ya ol gudfala fren ya blong hem? ?Mo fasin blong olgeta blong no fraet, blong stap tru long Pol mo stap olsem gud fren blong Pol i save tijim yumi long wanem?—Ol Proveb 17:17.

Olgeta We Oli ‘Mekem Pol i Strong’

3, 4. (a) ?Hu ya ol faef fren blong Pol, mo hem i tingbaot olgeta ya olsem wanem? (b) ?Wanem mining blong tok ya ‘mekem i strong’?

³ Tingbaot se yu stap long yia 60 K.T. Aposol Pol i stap kalabus long Rom from ol man oli putum sam giaman tok agensem hem se hem i traem kafsaedem gavman. (Ol Wok 24:5; 25:11, 12) Pol i givim nem blong faef Kristin we oli stanap klosap long hem blong givhan long hem. I gat Tikikas we Pol i stap sanem hem blong go luk ol narafala Kristin. Hem i blong provins ya Esia, mo ‘hem i joen long Pol blong mekem ol wok blong Masta.’ Mo i gat Onesimas we i ‘gudfala brata ya we oltaem i stap stanap strong long wok blong Masta.’ Hem i blong Kolosi. Afta i gat Aristakas, wan man Masedonia we i stap long Tesalonaeka. Man ya i bin ‘kalabus wetem Pol’ wan taem finis. Mo i gat Mak, hem i kasen brata blong Banabas ya we i bin folem Pol long sam misinari trip blong hem. Mak ya nao we i raetem buk ya we i karem nem blong hem mo i wan long ol fofala Gospel. Mo i gat Jastas we i kampani wetem aposol Pol mo i stap ‘givhan long Pol blong talemaot long ol man we God i King.’ Pol i tokbaot ol faefala man ya i se: ‘Olgeta ya oli stap mekem mi mi harem gud tumas [“oli mekem mi mi strong,” NW ].’—Kolosi 4:7-11.

⁴ Pol i yusum wan tok we i gat bigfala mining taem hem i tokbaot help we ol fren ya blong hem oli givim long hem. Hem i yusum wan Grik tok (pa·re·go·riʹa) we yumi tanem i kam “mekem i strong,” we long Baebol yumi save faenem long vas ya nomo. Tok ya i save minim plante samting mo ol man oli yusum tok ya moa, taem oli tokbaot meresin. * Grik tok ya i save karem mining olsem ‘no moa sore, kamgud bakegen, leftemap tingting, no harem gud bakegen.’ Pol i nidim ol samting ya, mo faefala man ya oli givim samting ya long hem.

?From Wanem Pol i Nidim We Narafala i ‘Mekem Hem i Strong’?

5. ?Nating se Pol i wan aposol, hem i nidim wanem, mo wanem samting we yumi evriwan i nidim samtaem?

⁵ Maet sam man oli sapraes se Pol, we i wan aposol, i nidim we narafala i mekem hem i strong. Yes, hem i nidim samting ya. I tru se bilif blong Pol i strong, mo hem i stanap strong tru long plante kil we ol man oli givim long hem, olsem taem oli ‘wipim hem’ mo ‘plante taem, klosap hem i ded.’ (2 Korin 11:23-27) Be hem i man nomo olsem yumi. Mo olgeta man oli nidim samtaem long laef blong olgeta we narafala i leftemap tingting blong olgeta mo oli nidim we narafala i halpem olgeta blong mekem bilif blong olgeta i strong moa. Jisas tu i bin nidim help olsem. Long laswan naet bifo we hem i ded, wan enjel i kam luk hem long Getsemane mo i “mekem hem i strong bakegen.”—Luk 22:43.

6, 7. (a) ?Long Rom, hu i mekem tingting blong Pol i foldaon, mo hu i leftemap tingting blong hem? (b) ?Wanem kaen smosmol wok we ol Kristin brata blong Pol oli mekem blong hem long Rom, nao samting ya i ‘mekem hem i strong’?

⁶ Pol tu i nidim we narafala i mekem hem i strong bakegen. Taem hem i kasem Rom, hem i wan prisena, mo ol manples blong hem oli no givim gudfala welkam long hem. Ol man Jiu ya, we oli manples blong hem, oli no lesin long gud nius blong Kingdom. Buk blong Ol Wok i tokbaot wanem i hapen afta we ol haeman blong ol laen blong Isrel oli visitim Pol long kalabus, i se: “Sam long olgeta oli harem tok blong hem, nao oli bilif long hem, be sam narafala man oli no save bilif . . . nao olgeta oli aot, we tingting blong olgeta i stap seraot, mo olgeta oli stap rao.” (Ol Wok 28:17, 24, 25-29) !Ating Pol i harem nogud tumas from we ol man ya oli no gat tangkiu nating long kaen fasin we Jeova i soemaot wetem gladhat nomo! Yumi luksave filing ya blong hem taem yumi ridim leta ya we hem i bin raetem i go long kongregesen blong Rom sam yia bifo. Hem i se: “Tingting blong mi i hevi tumas, mo oltaem mi stap harem nogud tumas from ol laen blong Isrel ya, we oli olsem ol brata blong mi, oli olsem ol stret famle nomo blong mi. Sipos God i save tekemaot mi long  Kraes, blong mekem rod blong olgeta ya oli kam joen long hem, be mi mi glad nomo blong go lus olsem.” (Rom 9:2, 3) Be, long Rom hem i faenem sam trufala fren we oli stap tru long hem, mo ating strong tingting blong olgeta mo kaen fasin blong olgeta i mekem we hem i harem gud tumas. Olgeta ya oli ol trufala brata blong hem long saed blong spirit.

⁷ ?Olsem wanem ol faef brata ya oli mekem Pol i strong? Oli no fraet blong go luk Pol from we hem i stap long kalabus. Defren olgeta, oli laekem Pol mo oli wantem givhan long hem, ale oli mekem sam smosmol wok blong hem we hem i no naf blong mekem from we hem i kalabus. Eksampol, sam long olgeta oli mekem wok olsem mesenja mo oli stap karem ol leta blong Pol no ol toktok blong hem i go long ol defdefren kongregesen. Oli karem kam sam gudfala ripot i kambak long Pol, we i mekem hem i harem gud blong save se ol brata long Rom mo long ol narafala ples oli stap olsem wanem. Mo ating oli tekem sam narafala samting i kam long hem we hem i nidim, olsem ol klos blong kolkol taem, wetem sam skrol mo narafala samting we hem i nidim blong raetem leta. (Efesas 6:21, 22; 2 Timoti 4:11-13) Olgeta smosmol wok olsem oli mekem aposol Pol i strong mo oli leftemap tingting blong hem taem hem i stap kalabus. Ale biaen, Pol nao i naf blong mekem narafala man, wetem plante kongregesen tu, oli strong.—Rom 1:11, 12.

?Olsem Wanem Yumi Save ‘Mekem Narafala i Strong’?

8. ?Wanem lesen we yumi lanem from Pol we i gat tingting daon blong luksave se hem i nidim we narafala i ‘mekem hem i strong’?

⁸ ?Yumi lanem wanem long stori blong Pol mo faefala fren blong hem? I gud yumi tingbaot wan lesen we i kamaot long stori ya: Man i mas gat strong tingting mo i mas rere blong lego samting we hem nomo i wantem blong halpem narafala we i fesem hadtaem. Mo tu, i nidim tingting daon blong luksave se yumi nidim help long taem we yumi fesem trabol. Yes Pol i luksave se hem i nidim help. Be i no hemia nomo. Hem i glad tu we narafala i halpem hem mo i talem gudfala toktok long olgeta we oli halpem hem. Hem i no gat tingting ya se sipos narafala i halpem hem, hemia i min se hem i slak, mo hem i no sem tu se narafala i mas givhan long hem. Yumi mas mekem olsem Pol. Sipos yumi talem se yumi neva nidim we narafala i mekem yumi strong, i min se yumi wan stret man. Tingbaot, eksampol blong Jisas i soem se nating we man i stretgud olgeta, be samtaem bambae hem i krae blong narafala i halpem hem.—Hibrus 5:7.

9, 10. ?Wanem gudfala frut i save kamaot taem wan man i luksave se hem i nidim help, mo samting ya i save mekem wanem long ol narafala insaed long famle mo long kongregesen?

⁹ Gudfala frut i save kamaot taem olgeta we oli holem wok long kongregesen oli luksave se oli no naf blong mekem evri samting mo se oli nidim we narafala i halpem olgeta. (Jemes 3:2) Taem olgeta we oli holem wok oli luksave samting olsem, ale oli save joengud moa wetem olgeta we oli stap long han blong olgeta. Samting ya i pulum olgeta blong oli fren moa, mo oli no fraet blong toktok tugeta. Tingting daon we samfala oli soem taem oli rere blong letem narafala i halpem olgeta i olsem wan gudfala eksampol blong ol narafala we oli nidim help. Fasin blong olgeta ya i soem se ol man we oli holem wok, oli man olsem yumi nomo mo yumi no mas fraet long olgeta.—Prija 7:20.

¹⁰ Eksampol, ol pikinini oli save glad moa blong letem papa mama blong olgeta i givim advaes long olgeta blong winim ol problem mo traem long laef, taem oli tingbaot se papa mama blong olgeta oli bin pikinini bifo tu, mo oli pastru long semfala samting. (Kolosi 3:21) Tingting ya i save pulum pikinini blong i toktok mo i no fraet blong storian wetem papa mama blong hem. Mo long rod ya, i isi moa blong papa mama i talem ol rul blong Baebol mo i isi moa blong pikinini i akseptem ol rul ya. (Efesas 6:4) Long sem fasin, ol memba blong kongregesen oli rere moa blong letem ol elda oli givhan long olgeta sipos oli luksave se ol elda tu oli gat problem, samtaem oli fraet, mo samtaem oli konfius. (Rom 12:3; 1 Pita 5:3) Yes, hemia tu i save givhan long ol memba blong kongregesen blong toktok isi wetem ol elda, nao oli save serem ol gudfala tok we i kamaot long Baebol, mo frut we i save kamaot from se oli save mekem olgeta oli strong moa long bilif. No fogetem samting ya: Ol brata mo sista blong yumi oli nidim we yumi mekem olgeta oli strong moa naoia i bitim ol taem bifo.—2 Timoti 3:1.

11. ?From wanem plante long yumi tede i nidim we narafala i ‘mekem yumi strong’?

¹¹ Nomata weples yumi laef long hem, nomata se yumi olsem wanem no se yumi gat hamas yia, yumi evriwan bambae i fesem sam hadtaem long laef. Hemia  wan haf blong laef long wol tede. (Revelesen 12:12) Ol hadtaem ya oli save mekem we maet yumi harem nogud long bodi no long filing, mo hemia i save traem bilif blong yumi. Sam samting oli save kamaot long wok, long skul, insaed long famle no long kongregesen, we oli save traem yumi. No maet traem blong yumi i kamaot from we yumi sik bigwan no wan samting i bin hapen long laef blong yumi we i livim kil long filing no tingting blong yumi. !Sipos hasban no waef blong yumi, no wan elda, no maet wan gudfala fren, i talem sam tok no i mekem sam wok we oli leftemap tingting blong yumi, hemia i save givhan bigwan long yumi! !I olsem we yumi putum meresin long skin we i soa! Taswe sipos yu luk wan long ol brata blong yu we i nidim help olsem, i gud yu yu mekem hem i strong. No sipos yu yu gat wan problem we i hevi long yu, i gud yu askem help long samfala we oli strong long saed blong spirit.—Jemes 5:14, 15.

Kongregesen i Save Givhan Olsem Wanem

12. ?Olsem wanem evriwan insaed long kongregesen i save givhan blong mekem ol brata oli strong?

¹² Evriwan insaed long kongregesen, wetem ol yangfala tu, oli save givhan blong mekem narafala i strong. Eksampol, taem yu traehad oltaem blong go long ol miting mo blong joen long wok blong prij, samting ya nomo i save mekem bilif blong narafala i strong. (Hibrus 10:24, 25) Fasin blong yu blong holemstrong long ol tiokratik wok ya, i wan pruf se yu yu stap tru long Jeova mo i soem tu se yu wekap gud long saed blong spirit nomata wanem kaen hadtaem we yu stap fesem. (Efesas 6:18) Fasin ya blong yu blong gohed strong oltaem i save givhan blong mekem ol narafala oli strong tu.—Jemes 2:18.

13. ?From wanem maet samfala oli no moa prij, mo yumi save mekem wanem blong halpem olgeta ya?

¹³ Samtaem, laef wetem ol problem mo hadtaem blong hem, i save kam olsem wan hevi samting we yumi stap karem. Ale from samting ya samfala oli no moa mekem plante long wok blong prij, no maet oli stop fulwan. (Mak 4:18, 19) Olgeta ya we oli no moa prij, maet oli no moa kam tu long ol miting blong kongregesen. Be, i sua se long hat blong olgeta ya oli lavem God yet. ?Yumi save mekem wanem blong mekem bilif blong olgeta ya i strong bakegen? Ol elda oli save givhan sipos oli go visitim olgeta. (Ol Wok 20:35) Maet oli askem samfala insaed long kongregesen blong olgeta tu oli save givhan long narafala. Disisen ya we yumi tekem blong soemaot lav mo visitim olgeta, maet hemia nao we i stret meresin blong givim paoa bakegen long olgeta we bilif blong olgeta i no moa strong.

14, 15. ?Wanem advaes we Pol i givim long saed blong fasin blong mekem narafala i strong? Tokbaot eksampol blong wan kongregesen we i folem advaes ya.

¹⁴ Baebol i pulum yumi se yumi mas “toktok gud blong leftemap tingting blong olgeta we oli harem nogud oltaem from we tingting blong olgeta i foldaon. [Mo yumi] mas givhan long olgeta we oli slak.” (1 Tesalonaeka 5:14, NW ) Maet olgeta ya we “tingting blong olgeta i foldaon” oli luk se oli no moa gat strong tingting olsem bifo mo oli no save winim ol trabol olgeta wan, oli nidim we narafala i halpem olgeta. ?Yu yu save halpem olgeta? Long sam buk mo diksonari, tok ya “givhan long olgeta we oli slak,” oli tanem tu se “holemtaet” no “fas strong” long hemia we i no gat paoa. Jeova i gat strong filing long ol sipsip blong hem mo hem i lavem olgeta evriwan. Hem i no luk olgeta olsem samting nating, mo hem i no wantem we wan long olgeta i lusum rod. ?Yu yu save halpem kongregesen blong i “holemtaet” olgeta ya we oli slak long saed blong spirit gogo kasem we oli kam strong bakegen?—Hibrus 2:1.

¹⁵ Wan elda i visitim wan man wetem woman  blong hem we tufala i no moa prij blong sikis yia. Elda ya i raetem se: “Kaen fasin mo lav we fulwan kongregesen i soem long tufala i mekem i gud tumas long tufala, mekem se tufala i wantem kampani bakegen wetem ol sipsip.” ?Sista ya we bifo hem i slak, i tingting olsem wanem long fasin blong kongregesen? Naoia hem i talem se: “Samting we i halpem mitufala blong joen bakegen hemia se, olgeta brata we oli visitim mitufala, wetem ol sista tu, oli neva kam wetem tingting ya blong jajem mitufala no blong tok daonem mitufala. Defren olgeta, oli traem kasem save long tingting blong mitufala mo oli givim ol tok blong Baebol we oli save leftemap tingting blong mitufala.”

16. ?Hu i rere oltaem blong givhan long olgeta we oli nidim paoa?

¹⁶ Yes, wan trufala Kristin i glad blong givhan long ol narafala blong mekem oli strong. Tru ya, taem ol samting long laef blong yumi oli jenis, maet wan dei, yumi tu bambae yumi wan we ol narafala brata bambae oli kam blong mekem yumi strong. Be yumi no mas sapraes se, samtaem, taem yumi nidim help, i no gat man i kam blong givhan long yumi. Long taem olsem, yumi mas tingbaot se i gat wan Man we i stap oltaem mo i rere oltaem blong givhan long yumi mo mekem yumi strong—hemia Jeova God.—Ol Sam 27:10.

Jeova—Nambawan Man Blong Givim Paoa

17, 18. ?Long wanem rod Jeova i givim paoa long Pikinini blong hem, Jisas Kraes?

¹⁷ Taem Jisas i stap hang long pos, hem i singaot se: “!Papa! !Mi mi putum laef blong mi long han blong yu!” (Luk 23:46) Nao, hem i ded. Sam aoa nomo bifo long samting ya, ol man oli kam holem hem mo ol gudfala fren blong hem oli lego hem, oli ronwe, from we oli fraet. (Matiu 26:56) Jisas i stap hem wan wetem wan Man nomo we i save givim paoa long hem—hemia Papa blong hem long heven. Mo tras we hem i putum long Jeova i no blong nating. Jisas i stap tru long Papa blong hem mo Jeova hem wan i stap tru long Jisas, i givim sapot long hem.—Ol Sam 18:25; Hibrus 7:26.

¹⁸ Jeova i givim paoa we Pikinini blong hem, Jisas, i nidim taem hem i stap mekem wok blong hem long wol ya. Samting ya i mekem we Jisas i naf blong stanap strong gogo kasem laswan win blong hem. Eksampol, jes afta we Jisas i baptaes, long stat blong minista wok blong hem, hem i harem voes blong Papa blong hem we i agri long hem mo i talemaot lav we Hem i gat long hem. Taem Jisas i nidim paoa, Jeova i sanem ol enjel oli kam blong givhan long hem. Taem Jisas i fesem hadtaem ya we i moa nogud i bitim ol narafala taem long laef blong hem long wol ya, Jeova i harem ol krae mo prea blong hem. I sua se olgeta samting ya oli mekem Jisas i strong.—Mak 1:11, 13; Luk 22:43.

19, 20. ?Wanem i mekem yumi sua se bambae Jeova i mekem yumi strong taem yumi nidim paoa?

¹⁹ Jeova i wantem stap olsem Man ya we yumi kam long hem taem yumi nidim paoa. (2 Kronikel 16:9) From we hem i holem olgeta paoa mo hem i strong we i strong, hem i save givim paoa long yumi taem yumi nidim. (Aesea 40:26) Wo, fasin pua, sik, ded, no ol prapa slak fasin blong yumi oli save mekem yumi lusum paoa. Taem ol traem long laef oli bigwan tumas olsem ‘wan enemi we i gat paoa’, Jeova i save givim paoa long yumi. (Ol Sam 18:17; Eksodas 15:2) Hem i gat wan strongfala tul blong givhan long yumi—hemia tabu spirit blong hem. Wetem tabu spirit ya Jeova i save givim ‘paoa long olgeta we oli taed,’ nao olgeta ya oli save “girap olsem we oli gat wing olsem bigfala pijin ya igel.”—Aesea 40:29, 31.

²⁰ Tabu spirit blong God hem i wan paoa we i strong moa i winim olgeta paoa blong heven mo wol. Pol i sua fulwan long toktok ya taem hem i talem se: “Mi mi naf blong mekem evri samting long paoa blong Hemia we i stap givim paoa long mi.” Yes, Papa blong yumi long heven i lavem yumi tumas. Hem i save givim long yumi “paoa ya we i bigwan tumas” nao yumi save stanap strong taem yumi kasem trabol, gogo kasem taem we bambae hem i mekem “olgeta samting oli kam niuwan bakegen” long Paradaes we i klosap nao.—Filipae 4:13, NW; 2 Korin 4:7; Revelesen 21:4, 5.

[Futnot]

?Yu Yu Tingbaot?

• ?Olsem wanem ol brata long Rom oli ‘mekem Pol i strong’?

• ?Long wanem rod yumi save stap olsem man we i ‘mekem narafala i strong’ insaed long kongregesen?

• ?Olsem wanem Jeova hem i nambawan man blong givim paoa long yumi?

[Kwestin]

[Tok blong pija long pej 19]

Ol brata oli ‘mekem Pol i strong,’ taem oli no lego fasin fren we oli gat wetem hem, oli leftemap tingting blong hem mo mekem sam smosmol wok blong hem

[Tok blong pija long pej 21]

Ol elda oli soem eksampol long fasin blong givhan long ol sipsip blong oli kam strong