Lukaot Long Ol Olfala—Wan Wok Blong Ol Kristin

“Mi mi God blong yufala, mo mi bambae mi stap lukaot long yufala yet, gogo hea blong yufala i kam waet.”​—AESEA 46:4.

1, 2. ?Olsem wanem kea we Papa blong yumi long heven i givim long yumi i defren long kea we ol prapa papa mama blong yumi oli givim?

 OL GUDFALA papa mama, oli lukaot long ol pikinini blong olgeta, stat taem oli bebi nomo go kasem we oli kam bigwan. Taem ol pikinini ya oli mared mo oli gat prapa pikinini blong olgeta, be ol papa mama blong olgeta oli gohed yet blong lavem olgeta mo blong givhan long olgeta.

² Sam samting i save blokem ol papa mama blong oli no save givim no mekem evri samting long ol pikinini blong olgeta. Be Papa blong yumi long heven, hem i stap oltaem blong givhan mo soem lav long ol man we oli stap tru long hem. Jeova i toktok long ol man we hem i jusumaot olgeta long taem bifo, i se: “Mi mi God blong yufala, mo mi bambae mi stap lukaot long yufala yet, gogo hea blong yufala i kam waet.” (Aesea 46:4) !Ol olfala Kristin tede oli haremgud tumas long tok ya! Jeova i no save lego ol man we oli stap tru long hem. Long defren fasin, hem i promes se bambae hem i givhan long olgeta, givim paoa long olgeta, mo lidim olgeta long ol yia blong laef blong olgeta, mo taem oli kam olfala tu.​—Ol Sam 48:14.

3. ?Bambae yumi tokbaot wanem long stadi ya?

³ ?Olsem wanem yumi save folem fasin blong Jeova blong tingbaot mo lavem ol olfala? (Efesas 5:​1, 2) Bambae yumi tokbaot sam samting we ol pikinini blong ol olfala ya oli save mekem, ol elda long kongregesen oli save mekem, mo ol wanwan Kristin oli save mekem blong givim samting we ol olfala Kristin brata sista blong yumi oli nidim.

Wok Blong Yumi Ol Pikinini

4. ?Wanem wok we ol Kristin pikinini we oli bigwan finis oli mas mekem long papa mama blong olgeta?

⁴ “Yufala i mas ona long papa mo mama blong yufala.” (Efesas 6:2; Eksodas 20:12) Tok ya we aposol Pol i tekem long Hibru haf blong Baebol, i sot be i gat bigfala mining. Hem i stap talem long ol  pikinini we oli bigwan finis, se oli mas luksave we oli gat wan wok blong mekem long ol papa mama blong olgeta. ?Be olsem wanem ol tok ya i joen wetem wok blong lukaot long ol olfala? Gudfala eksampol blong wan man we i laef bifo long Kristin taem, bambae i givhan long yumi blong ansa long kwestin ya.

5. (a) ?Wanem i soem se Josef i no fogetem wok we hem i mas mekem long papa blong hem? (b) ?Olsem wanem yumi ona long papa mama blong yumi, mo wanem gudfala eksampol we Josef i givim long saed ya?

⁵ Blong bitim 20 yia, Josef i no luk olfala papa blong hem, Jekob. Be, i klia se Josef i no lusum lav we hem i gat long Jekob. Yes, taem Josef i talemaot long ol brata blong hem se hem i prapa brata blong olgeta, hem i askem se: “?I tru we papa blong yumi i stap yet?” (Jenesis 43:​7, 27; 45:3) Long taem ya, kantri blong Kenan i sot long kakae. Taswe, Josef i sanem toktok i go long papa blong hem se: “I gud yu aot long ples blong yu naoia nomo, yu kam stap wetem mi. Bambae yu save stap long ples ya Gosen, we i klosap nomo long ples blong mi . . . bambae mi mi save lukaot gud long yu.” (Jenesis 45:​9-11; 47:12) Yes, blong ona long olfala papa mama blong yumi, yumi mas lukaotgud long tufala mo givim ol samting long saed blong bodi we tufala i nidim taem tufala i no moa naf blong mekem samting ya tufala nomo. (1 Samuel 22:​1-4; Jon 19:​25-27) Josef i glad blong mekem wok ya.

6. ?Olsem wanem Josef i soemaot trufala lav long papa blong hem, mo olsem wanem yumi save folem eksampol blong hem?

⁶ Jeova i blesem Josef, nao hem i kam wan rijman we i gat hae posisen long kantri ya Ijip. (Jenesis 41:40) Be hem i no ting se hem i impoten tumas mo i bisi tumas, we hem i no moa gat taem blong ona long olfala papa blong hem we i gat 130 yia finis. Nogat. Taem Josef i harem nius se Jekob (hemia Isrel) i stap kam, hem i “klaem long kat blong hem we hos i pulum, i kam . . . mitim papa blong hem. Taem tufala i mit, Josef i putum han blong hem i goraon long nek blong papa blong hem, i stap holem hem, mo i stap krae longtaem.” (Jenesis 46:​28, 29) Josef i no welkamem papa blong hem long fasin ya jes blong soem long fored blong ol narafala man se hem i gat respek long papa blong hem, nogat. Josef i lavem tumas olfala papa blong hem mo hem i no sem blong soemaot lav ya. ?Olsem wanem long yu? ?Yu yu soemaot plante lav long papa mama blong yu we tufala i stap kam olfala?

7. ?From wanem Jekob i talem long ol pikinini blong hem se taem hem i ded oli mas go berem hem long kantri blong Kenan?

⁷ Jekob i onagud long Jeova go kasem en blong laef blong hem. (Hibrus 11:21) Hem i bilif long ol promes blong God, taswe hem i talem long ol pikinini blong hem se taem hem i ded, oli mas go berem hem long kantri blong Kenan. Josef i mekem samting ya we papa blong hem i wantem, nating se i sas mo i hadwok blong karem dedbodi blong papa blong hem i go longwe. Long fasin ya, Josef i ona long papa blong hem.​—Jenesis 47:​29-31; 50:​7-14.

8. (a) ?Wanem bigfala samting we i mas pulum yumi blong lukaot long olfala papa mama blong yumi? (b) ?Wan brata we i wok fultaem long wok blong God, i mekem wanem blong lukaot long olfala papa mama blong hem? (Lukluk bokis long pej 17.)

⁸ ?From wanem Josef i gat filing ya we i wantem lukaotgud long papa blong hem? I tru, Josef i lavem papa blong hem mo i harem se hem i gat kaon long hem, from we papa blong hem i bin givim laef long hem mo i bin lukaot long hem taem hem i pikinini. Tufala samting ya i pulum hem blong lukaotgud long papa blong hem. Be i gat wan narafala samting tu, hemia se Josef i wantem mekem Jeova i glad. Yumi mas gat sem tingting ya. Pol i raetem se: “Sipos wan wido i gat ol pikinini blong hem no ol smol bubu blong hem, fastaem olgeta oli mas lanem, se  wan nambawan wok blong ol Kristin man, i blong lukaot gud long ol famle blong olgeta. Fasin ya, i olsem we oli pem kaon blong olgeta long ol mama mo papa blong olgeta, from we hemia i wan samting we God i glad long hem.” (1 Timoti 5:4) Yes, lav we yumi gat long Jeova mo fasin blong wantem onagud long hem mo no mekem hem i kros, hemia nao samting we bambae i pulum yumi blong lukaot long olfala papa mama blong yumi, nating se i hadwok. *

?Olsem Wanem Ol Elda Oli Soem Se Oli Kea?

9. ?Jeova i putumap hu blong lukaot long olgeta sipsip blong hem, wetem ol olfala long kongregesen tu?

⁹ Jekob i laef longtaem, nao jes bifo we hem i ded, hem i tokbaot Jeova se hem i trufala God we “oltaem hem i stap lidim mi, kam kasem tede.” (Jenesis 48:15) Long taem blong yumi, Jeova i yusum ol Kristin elda blong lidim ol man blong hem long wol. Olgeta ya oli wok aninit long han blong Pikinini blong God, Jisas Kraes, we hem i “Nambawan Man blong Lukaot long Sipsip.” (1 Pita 5:​2-4) ?Olsem wanem ol elda oli save folem fasin blong Jeova taem oli lukaot long ol olfala long kongregesen?

10. ?Wanem samting we sam elda oli mekem blong givhan long ol olfala Kristin? (Lukluk bokis long pej 19.)

¹⁰ Smoltaem afta we Kristin kongregesen i stanap, ol aposol oli putumap ‘seven man we oli gat gud nem long fes blong ol man . . . [mo] tabu spirit i fulap long olgeta, mo oli waes tu.’ Olgeta ya oli lukaot long wok ya blong “seraot ol mane mo kakae” i go long ol Kristin wido we oli sot long plante samting. (Ol Wok 6:​1-6) Sam yia biaen, Pol i talem long elda ya Timoti, blong raetem nem blong ol olfala wido long wan lis blong ol man we oli gat raet blong kasem help long saed blong kakae mo mane. (1 Timoti 5:​3, 9, 10) Tede tu, ol elda long kongregesen oli glad blong mekem wan plan blong givhan long ol olfala Kristin we oli nidim help. Be oli mas mekem moa yet blong lukaotgud long ol olfala ya we oli gat bilif.

11. ?Jisas i talem wanem long saed blong pua wido woman ya we i sakem smol mane nomo i go long bokis long haos blong God?

¹¹ Klosap long en blong laef blong Jisas long wol, hem i stap sidaon insaed long yad blong haos blong God, “i stap lukluk ol man we oli stap sakem kleksen blong olgeta.” Nao ae blong hem i fas long wan wido woman. Baebol i talem se: “Wan wido woman i kam we hem i pua tumas, mo hem i sakem tu smol mane we i olsem twanti vatu nomo.” Jisas i singaot ol disaepol blong hem oli kam, nao hem i talem long olgeta se: “Tru mi talem long yufala. Kleksen we wido ya i sakem i moa long ol mane we ol narafala man ya oli sakem. Ol man ya, taem oli sakem kleksen blong olgeta, oli stap sakem haf mane blong olgeta we i stap nating nomo. Be woman ya we i pua, hem i sakem olgeta mane we hem i gat, we i blong pem kakae blong hem long hem.” (Mak 12:​41-44) Mane we wido woman ya i sakem i smol nomo, be  Jisas i save se Papa blong hem long heven i tinghae long ol man we oli givim evri samting blong olgeta blong ona long hem. Nating se wido ya i olfala, Jisas i no mestem gudfala samting ya we hem i mekem.

12. ?Olsem wanem ol elda oli save soem se oli tinghae long wok we ol olfala Kristin oli mekem?

¹² Ol Kristin elda oli folem fasin blong Jisas, oli no mestem ol gudfala wok we ol olfala oli mekem blong givhan long trufala wosip. I gud we ol elda oli talem gudfala toktok long ol olfala taem oli joen long wok blong prij, taem oli givim ansa long miting, mo from help we oli givim long kongregesen mo fasin blong olgeta blong stanap strong longtaem. Wan gudfala toktok we i kamaot stret long hat blong elda, i save givim “risen blong glad” long olfala from tabu wok we hem i mekem. Olsem nao, tingting blong hem i no save foldaon from we hem i skelem hem wan wetem sam narafala Kristin we oli save mekem moa wok, mo hem i no save harem nogud from we i no moa save mekem bigfala wok olsem i bin mekem long ol yia we oli pas finis.​—Galesia 6:​4, NW.

13. ?Olsem wanem ol elda oli save yusum save mo ekspiriens blong ol olfala?

¹³ Ol elda oli save soem se oli luksave mo oli tinghae long ol wok we ol olfala Kristin oli mekem, taem oli yusum ol save mo ekspiriens we ol olfala ya oli gat. Maet wanwan taem oli save askem wan olfala we i soem gudfala eksampol, blong hem i mekem wan pleplei, no oli save singaot hem i kam antap long platfom blong ansa long sam kwestin we oli askem long hem. Wan elda i talem se: “Taem mi askem sam kwestin long wan olfala brata no sista we i bin givhan long ol pikinini blong hem blong gruap long trutok, evriwan long kongregesen oli stap kwaet mo oli lesingud.” Ol elda long wan kongregesen oli talem se wan paenia sista we i gat 71 yia blong hem, i givhan finis long plante pablisa long kongregesen ya blong oli joen oltaem long wok blong prij. Sista ya i stap leftemap tingting blong olgeta tu blong mekem ol “stamba samting,” olsem ridim Baebol mo vas blong dei, mo tingting dip long ol tok we oli ridim.

14. ?Olsem wanem ol elda long wan kongregesen oli soem se oli tinghae long wan olfala elda?

¹⁴ Ol elda oli tinghae tu long wok blong ol narafala elda we oli olfala. José we i gat bitim 70 yia blong hem, i bin mekem wok blong elda blong plante plante yia. Be i no longtaem i pas, hem i kasem wan bigfala sik mo dokta i mas katem hem. Dokta i talem se José i no save wok blong longtaem, hem i mas spel nomo. Ale José i ting se maet i moagud hem i no moa mekem wok olsem presiden  elda. Hem i se: “Taem mi talem samting ya long ol narafala elda, mi sapraes long toktok blong olgeta. Oli no agri se mi mas lego wok ya, be oli askem long mi wanem samting we olgeta oli save mekem blong givhan long mi blong gohed long wok blong elda.” Ale wan yangfala elda i givhan long José, mekem se hem i naf blong gohed wetem glad long wok blong presiden elda. Mo plan ya i kam wan blesing long kongregesen. Wan narafala elda i talem se: “Ol brata oli tinghae long wok we José i mekem olsem elda. Oli lavem hem mo oli respektem hem from ekspiriens mo eksampol blong bilif we hem i soemaot. Hem i givhan bigwan long kongregesen.”

Ol Narafala Kristin Oli Lukaot Long Ol Olfala

15. ?From wanem ol Kristin oli mas tingbaot mo givhan long ol olfala long kongregesen?

¹⁵ Ol pikinini we oli bigwan finis mo ol elda tu oli mas tingbaot ol olfala, be i no olgeta ya nomo. Pol i talem se Kristin kongregesen i olsem wan bodi nomo, i se: “God i mekem plan finis blong olgeta haf blong bodi blong yumi. Nao ol haf blong bodi ya blong yumi we yumi ting se oli nating nomo, be God i givim wok long olgeta we i stret long olgeta. Nao long fasin ya, ol haf blong bodi blong yumi oli no save seraot. Evri haf blong bodi oli mas lukaot gud blong givhan long ol narafala haf blong hem.” (1 Korin 12:​24, 25) Blong mekem se Kristin kongregesen i joengud, ol wanwan man oli mas tingbaot mo givhan long ol narafala, mo oli mas mekem olsem long ol olfala tu.​—Galesia 6:2.

16. ?Long ol Kristin miting, olsem wanem yu save soem se yu tingbaot ol olfala?

¹⁶ Ol Kristin miting, hemia wan janis we yumi gat blong soem se yumi tingbaot ol olfala. (Filipae 2:4; Hibrus 10:​24, 25) ?Long ol miting, yu yu tektaem blong storian wetem ol olfala? I gud blong askem olgeta sipos helt blong olgeta i oraet mo ol samting olsem. Be yu save givhan long olgeta blong “kasem paoa” long saed blong spirit tu, maet from wan gudfala stori long saed blong wok blong prij no from wan vas blong Baebol we yu tokbaot. Sam olfala oli no save wokbaot plante, ale i gud we yu go talem halo long olgeta, yu no wet blong olgeta oli kam talem halo long yu. Sipos sora blong olgeta i fas lelebet, maet yu mas toktok slo mo klia. Mo blong mekem se ‘bilif blong olgeta i save givhan long yu, olsem we bilif blong yu tu i save givhan long olgeta,’ yu mas lesingud long ol tok we oli talem.​—Rom 1:​11, 12.

17. ?Olsem wanem yumi save soem se yumi stap tingbaot ol olfala Kristin we oli no save wokbaot plante?

¹⁷ ?Olsem wanem long ol olfala we oli no naf blong kam long ol Kristin miting? Jemes 1:27 i soem se yumi mas “givhan long ol pikinini we oli no gat papa blong olgeta, mo long ol widowoman, long ol trabol we i kasem olgeta.” Grik tok we yumi tanem i kam “givhan,” narafala mining blong hem se “go luk olgeta.” (Ol Wok 15:36) !Ol olfala oli glad tumas blong luk yumi! Long yia 65 K.T. * “olfala” Pol i stap kalabus long Rom, mo ol fren blong hem  oli stap longwe long hem. Hem i wantem tumas blong luk Timoti we i bin wok plante wetem hem, ale hem i raetem leta i go long Timoti se: “Mi wantem blong yu traem kam luk mi kwiktaem.” (Filimon 9; 2 Timoti 1:​3, 4; 4:9) Ol olfala tede oli no stap long kalabus, be plante long olgeta we oli sik oli harem se oli stap kalabus long haos blong olgeta nomo. Maet oli stap tingting se, ‘Plis, yu traem kam luk mi kwiktaem.’ ?Olsem wanem? ?Yu yu stap traehad blong go luk olgeta?

18. ?Wanem gudfala samting i save kamaot taem yumi go luk ol olfala?

¹⁸ Yumi neva mas ting se ol visit we yumi mekem long ol olfala Kristin brata mo sista, oli no stap givhan long olgeta. Long taem bifo, wan Kristin we nem blong hem Onesiforas i stap long Rom, ale hem i lukaot Pol gogo i faenem hem. Nao biaen, ‘plante taem hem i stap mekem Pol i harem gud tumas.’ (2 Timoti 1:​16, 17) Wan olfala sista we hem i no mared, i talem se: “Mi mi laekem tumas blong spenem taem wetem ol yangfala. Samting we mi laekem moa, hemia taem oli mekem long mi olsem we mi mi wan stret famle blong olgeta. Hemia i stap leftemap tingting blong mi bigwan.” Wan narafala olfala Kristin i talem se: “Mi laekem tumas, taem wan narafala Kristin i sanem wan smol leta long mi, i toktok long mi long telefon, no i kam luk mi long haos blong storian smol. Hemia i olsem we mi pulum freswin.”

Jeova i Givim Pei Long Olgeta We Oli Lukaot Long Ol Olfala

19. ?Olgeta we oli lukaot long ol olfala, oli kasem wanem blesing?

¹⁹ Olgeta we oli lukaotgud long ol olfala, oli kasem plante blesing. Wan blesing, hemia blong joen wetem ol olfala ya mo lanem plante samting from ol save mo ekspiriens blong olgeta. Mo tu, olgeta we oli lukaot long ol olfala, oli kasem bigfala glad from we oli stap givim samting long narafala, mo oli haremgud from we oli mekem wan gudfala wok, mo oli gat pis long tingting blong olgeta from we oli mekem samting we Baebol i talem se oli mas mekem. (Ol Wok 20:35) Mo tu, olgeta we oli lukaot long ol olfala, oli no nid blong wari se ol fren blong olgeta bambae oli ronwe long olgeta taem oli kam olfala. Tok blong God i promes se: “Man we i stap givim ol samting long narafala man long gladhat blong hem, oltaem hem i gat plante samting. Man we i stap givhan long ol man, oltaem ol man oli stap givhan long hem.”​—Ol Proveb 11:25.

20, 21. ?Wanem tingting blong Jeova long saed blong olgeta we oli lukaot long ol olfala, mo yumi mas gat strong tingting blong mekem wanem?

²⁰ Jeova bambae i givim pei long olgeta we oli soem se oli onagud long Hem taem oli tingbaot ol olfala Kristin, oli no tingbaot olgeta nomo. Long olgeta ya, i gat ol pikinini blong ol olfala ya, ol elda, mo ol narafala Kristin we oli givhan long olgeta. Wan proveb i tokbaot fasin blong olgeta ya i se: “Taem yu givim samting long puaman, i olsem we yu letem Hae God i yusum fastaem, mo biaen, hem bambae i givim jenis blong samting ya long yu.” (Ol Proveb 19:17) Sipos lav i pulum yu blong givim samting long puaman no long wan man we i no gat nem, i olsem we yu givim samting ya long God blong hem i yusum fastaem. Ale hem bambae i givimbak ol blesing long yu, olsem jenis blong samting ya. Bambae hem i blesem yu tu from lav mo kea we yu givim long ol olfala Kristin, we plante long olgeta ‘ol man oli luk se oli puaman, be oli rijman long fasin blong bilif.’​—Jemes 2:5.

²¹ !Yes, God bambae i givimbak fulap blesing long yu! Wan long ol blesing ya, hemia laef we i no save finis. Bighaf blong ol man blong Jeova bambae oli kasem laef long paradaes long wol ya. Bambae sin i finis wetem ol trabol we sin i mekem long bodi blong yumi, ale ol olfala we oli obei long God bambae oli kam strong bakegen long bodi blong olgeta, olsem ol yangfala. (Revelesen 21:​3-5) Go kasem taem ya, yumi mas gohed blong mekem Kristin wok ya blong lukaot long ol olfala.

[Ol Futnot]

?Wanem Ansa Blong Yu?

• ?Olsem wanem ol pikinini we oli bigwan finis oli save ona long olfala papa mama blong olgeta?

• ?Olsem wanem ol elda oli soem se oli tinghae long ol olfala long kongregesen?

• ?Ol wanwan Kristin oli save mekem wanem blong soem se oli tingbaot ol olfala?

• ?Olgeta we oli lukaot long ol olfala, bambae oli kasem wanem blesing?

[Kwestin]

[Bokis blong pija long pej 17]

Taem Papa Mama Blong Hem i Nidim Help

Long 1999, Philip i stap wok long Laeberia, i stap givim taem blong hem i fri nomo blong bildim ol haos wosip. Nao hem i kasem nius se papa blong hem i sik tumas. Hem i save se mama blong hem i no naf hem wan blong winim trabol ya, ale Philip i tekem disisen blong gobak long ples blong hem blong faenem ol dokta we maet oli save givhan long papa blong hem.

Philip i talem se: “Mi faenem i no isi nating blong gobak, be mi harem se mi mas lukaot long papa mama blong mi fastaem.” Long ol tri yia biaen, hem i givhan long papa mama blong hem blong faenem wan narafala haos we i stret moa long tufala, mo sam Kristin brata long ples blong hem oli givhan long hem blong jenisim haos ya lelebet blong mekem i stret long samting we papa blong hem i nidim.

Naoia, mama blong Philip hem i naf blong lukaot long man blong hem mo bigfala sik we hem i gat. I no longtaem i pas, Sosaeti i singaot Philip blong wok long hedkwota blong ol Witnes blong Jeova long Masedonia, mo Philip i agri blong go wok long ples ya.

[Bokis blong pija long pej 19]

Oli No Tanem Baksaed Long Sista We i Nidim Help

Ada, wan Kristin woman long Ostrelia we i gat 85 yia blong hem, i kasem wan sik we i mekem se hem i no save wokbaot, hem i mas stap long haos nomo. Ale, ol elda long kongregesen blong hem oli mekem wan plan blong givhan long hem. Oli askem wan grup blong ol Kristin blong mekem ol wok olsem klinim haos, wasem klos, kuk, mo go long stoa. Ol Kristin brata sista ya oli glad blong mekem wok ya.

Klosap ten yia finis we oli stap mekem wok ya, mo bitim 30 Witnes blong Jeova oli givhan long Ada long ol yia we oli pas. Oli gohed yet blong visitim hem, ridim ol buk long hem we oli tokbaot Baebol, mo storian long hem long saed blong kongregesen mo olsem wanem ol brata sista oli stap gohed gud, mo oli stap prea wetem Ada tu.

Wan Kristin elda long kongregesen blong hem i talem se: “Olgeta we oli stap lukaot long Ada oli ting se i wan blesing blong givhan long hem. Plante long olgeta oli kasem paoa from eksampol blong Ada we i bin mekem wok blong God plante yia, mo oli no save tingbaot blong tanem baksaed long hem.”

[Tok blong pija long pej 16]

?Yu yu stap talem oltaem long olfala papa mama blong yu se yu lavem tufala?

[Tok blong pija long pej 18]

Olgeta evriwan long kongregesen oli save soem lav long ol olfala Kristin