Ol Man Oli Traem Mekem God i Glad

“OLTAEM, God i bin gat wan impoten ples long laef blong ol man. Oli bilif long wan God we i bos long heven mo wol, mo i wokem olgeta samting. Mo samting ya i tru tu long ol grup blong man we oli no bilif long God, no we oli seraotem skul mo gavman long kantri blong olgeta.” John Bowker i talem tok ya long buk blong hem, God​—A Brief History. Oltaem ol man oli traem ol defdefren fasin blong mekem God i glad mo kasem ol blesing long hem. Raonabaot long wol, plante man oli rili wantem mekem God i glad. Fasin we oli folem blong traem mekem hem i glad i dipen long ol wanwan bilif blong olgeta.

Sam man oli bilif se sipos oli gat wan laef we i stret, samting ya i naf blong mekem God i glad. Sam narafala oli ting se bambae God i blesem olgeta sipos oli mekem i gud long ol puaman. Mo tu, plante milian man oli ting se ol seremoni mo ol kastom blong jos oli save mekem God i glad.

Defren olgeta, i gat plante man we oli bilif se oli no save kam klosap long God, from we hem i stap longwe mo hem i bisi tumas blong lesin long ol man olbaot nomo. Epicurus, wan waes man blong Gris bifo, hem i bin talem se ‘ol god oli stap longwe tumas, taswe oli no save mekem i gud no i nogud long ol man.’ Nating se i olsem, plante man we oli gat tingting ya oli gat wan skul blong olgeta. Mo sam blong olgeta oli mekem ol sakrefaes mo ol kastom blong traem kwaetem spirit blong ol bubu blong olgeta we oli ded finis.

?Wanem tingting blong yu? ?Yu ting se God i stap luk ol traehad blong yu blong mekem hem i glad? ?Yu ting se yu save tajem hat blong God mo mekem hem i glad?

 [Foto Credit Line long pej 2]

COVER: Courtesy of ROE/Anglo-Australian Observatory, photograph by David Malin