Rod Blong Gat Wan Laef We i Longfala Mo i Hapi

“EVRI man i wantem blong laef longtaem, be i no gat wan man we i wantem kam olfala.” Hemia toktok we sam man oli stap talem. Plante man we klosap oli kasem yia blong oli save ritae long wok, oli stap lukluk long fiuja blong olgeta olsem wan taem we bambae oli gat moa taem blong mekem samting we oli wantem, mo bambae i no moa gat tumas wok. Be oli fraet tu se laef blong olgeta bambae i no moa gat mining mo i olsem nating nomo. Oli wari se bambae ol man oli no moa intres long olgeta, oli no moa hapi mo bodi blong olgeta i no moa gud.

?Olsem wanem blong gat wan hapi laef? Ol gudfala fren mo wan famle we i gat lav i givhan long ol yangfala mo ol olfala tu blong oli save hapi. Be wanem we narafala i mekem blong givhan long wan olfala, i no hemia we i moa impoten. Samting we i moa impoten hemia samting we wan olfala i save mekem blong givhan long ol narafala.

Wan stadi we oli mekem long laef blong 423 olfala we oli mared i soem se “taem oli givgivhan blong halpem ol narafala man, samting ya i givhan long olgeta blong stap laef longtaem moa.” Stephanie Brown, wan woman we i lukaot long stadi ya blong ol olfala, i eksplenem se: “Taem yumi fren wetem ol narafala yumi no rili harem gud sipos oltaem yumi wet se narafala i givim samting long yumi, yumi harem gud moa taem yumi givim samting long narafala.” Ol samting we oli givim, maet hemia taem oli halpem ol narafala blong mekem sam wok long haos, lukaot long ol pikinini, givhan long saed blong transpot mo lesin long ol narafala tu taem oli wantem toktok.

Klosap 2,000 yia bifo, Jisas Kraes i talem se: “Man we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20:35) Rod blong gat wan laef we i longfala mo i hapi, i no blong gat fulap mane long bang, no blong tekem wan spesel meresin, no blong gat fulap kakae. Be samting we i gud moa hemia blong stap bisi mo givim taem, mo paoa blong yumi blong givhan long narafala.

Be i no hemia nomo. I gat wan samting moa we bambae i givhan long yumi blong yumi no kam olfala mo blong yumi no sik mo ded. Kingdom blong God nomo bambae i finisim olgeta samting ya. Aninit long rul blong Kingdom ya bambae i no moa gat sik mo “bambae i no moa gat man i ded.” (Revelesen 21:​3, 4; Aesea 33:24) Tru ya, olgeta man we oli obei bambae oli save laef foreva we oli hapi long wan paradaes wol. (Luk 23:43) Ol Witnes blong Jeova oli glad blong soemaot rod ya long yu we i kamaot long Baebol blong gat wan laef we i longfala mo i hapi tu.