Wan Kwestin

• ?From we tabu spirit blong God hem i no wan man, olsem wanem yumi save mekem tabu spirit ya i harem nogud?

Aposol Pol nao i raetem se: “Yufala i no mas mekem Tabu Spirit blong God i harem nogud.” (Efesas 4:30) Sam man oli ting se ol tok ya oli soem we tabu spirit hem i wan man. Be, oltaem ol buk blong “man blong wok we i gat hed” oli givim ol vas long Baebol mo ol pruf long histri blong soemaot se ol Kristin blong bifo oli no tingbaot tabu spirit olsem se hem i wan man no wan god we i sem mak long Hae God, olsem wan haf blong Triniti. * (Luk 12:42) Taswe Pol i no tokbaot se tabu spirit blong God i olsem wan man.

Tabu spirit hem i bigfala paoa blong God we yumi no save luk. (Jenesis 1:​2, futnot) Jon i talem se Jisas bambae i baptaesem ol man long tabu spirit olsem we hem, Jon, i stap baptaesem ol man long wota. (Luk 3:16) Long Pentekos 33 K.T., “tabu spirit i kam fulap” long samwe long 120 disaepol​—i klia se i no wan man we i go insaed long olgeta ya. (Ol Wok 1:​5, 8; 2:​4, 33) Tabu spirit blong God i makemaot ol man ya blong oli go laef long heven, mo tabu spirit ya nao i lidim olgeta blong stap tru long God long laef blong olgeta. (Rom 8:​14-17; 2 Korin 1:22) Spirit ya i givhan long olgeta blong wokem ol gudfala fasin we i kamaot long God mo i halpem olgeta blong stap longwe long ol “fasin blong ol man we oli stap mekem ol rabis samting we tingting blong olgeta i wantem.” Sipos oli folem ol rabis fasin ya, oli save mekem we God i no glad long olgeta.​—Galesia 5:​19-25.

Sipos yumi man blong God we i gat hop ya blong laef olwe long wol, hemia i min se God i no makemaot yumi wetem tabu spirit. Nating se i olsem, yumi tu yumi save kasem tabu spirit blong God sem mak olsem olgeta we oli gat hop blong laef long heven. Mo, yumi tu yumi save mekem tabu spirit blong God i harem nogud. ?Be olsem wanem yumi mekem samting ya?

Sipos yumi sakemaot ol advaes long Baebol we tabu spirit i lidim ol man blong raetem, sloslo bambae yumi gat ol fasin we oli save pulum yumi blong mekem sin agens long tabu spirit, nao Jeova bambae i no moa agri long yumi, mo biaen yumi save ded from. (Matiu 12:​31, 32) Nating se yumi no mekem wan bigfala sin naoia, be maet yumi stap folem wan rong rod, mo maet rod ya bambae i lidim yumi blong mekem wan samting we i agensem tabu spirit. Taem yumi stap mekem samting ya, i olsem we yumi mekem tabu spirit i harem nogud.

 ?Olsem wanem yumi save lukaot blong no mekem tabu spirit i harem nogud? Yumi mas bos long ol tingting mo ol aksin blong yumi. Long leta we Pol i raetem i go long ol man Efesas, long japta 4 blong hem, aposol Pol i talem se yumi mas, agensem ol tingting we i save lidim yumi blong giaman, fasin blong stap kros, fasin les, mo ol tok we i rabis. ?Sipos yumi putum “niufala fasin blong laef” be yumi letem ol nogud fasin ya i pulum yumi, samting ya i soem se yumi stap mekem wanem? Hemia i soem se yumi stap go agensem Tok blong God, Baebol, we i kamaot long paoa blong tabu spirit. Taem yumi mekem olsem, yumi mekem tabu spirit i harem nogud.

Long Efesas japta 5, Pol i givim advaes blong agensem nogud fasin blong man i ronem woman. Mo tu blong agens long ol tok we i save mekem man i sem, ol tok we i save mekem man i harem nogud. Sipos yumi no wantem mekem tabu spirit i harem nogud, i gud blong tingbaot ol poen ya taem yumi jusum ol pleplei no ol samting blong mekem taem yumi spel. I nogud yumi intres blong storebaot ol samting we i nogud, mo ridim ol buk we i nogud, mo lukluk long ol nogud pija long televisin no long narafala ples.

I tru, yumi save mekem tabu spirit i harem nogud long sam narafala rod tu. Tabu spirit blong Jeova i mekem kongregesen i joengud. ?Be olsem wanem sipos yumi stap goraon blong tokbaot narafala no yumi stap mekem ol smosmol grup insaed long kongregesen? Sipos yumi mekem olsem, yumi stap blokem tabu spirit blong i no save lidim kongregesen blong i joengud. Olsem sam Kristin long Korin we oli seraotem kongregesen, yumi tu yumi save mekem tabu spirit i harem nogud. (1 Korin 1:10; 3:​1-4, 16, 17) Mo tu, yumi save mekem we tabu spirit i harem nogud sipos yumi no respektem ol man long kongregesen we tabu spirit i putumap olgeta.​—Ol Wok 20:28; Jud 8.

Taswe, i waes blong jekemap sipos fasin blong yumi blong tingting mo aksin i laenap wetem Baebol mo Kristin kongregesen we tabu spirit i lidim. Mo tu, yumi mas “prea long paoa blong tabu spirit,” blong hem i gat paoa long laef blong yumi mo blong yumi mekem wanem we i stap long Tok blong God oltaem. (Jud 20) I gud yumi neva mekem tabu spirit i harem nogud be i gud oltaem yumi letem hem i lidim yumi blong givim ona long tabu nem blong Jeova.

• Jisas Kraes i skelem laef blong wan rijman we i strong blong God i kam king blong hem, wetem wan kamel we i gotru long ae blong nidel. ?Olsem wanem? ?Jisas i stap tokbaot wan prapa kamel mo wan prapa nidel blong somap?

Long Baebol long Bislama, ol tok blong Jisas long trifala vas ya oli rid klosap sem mak nomo se: “I strong blong kamel i gotru long ae blong nidel, be i strong moa blong rijman i kam we God i King blong hem.”​—Matiu 19:24; Mak 10:25; Luk 18:25.

Sam buk blong givim save oli se “ae blong nidel” hem i wan long ol smol get we oli stap insaed long ol bigfala get blong Jerusalem. Sipos ol bigfala get oli sat long naet, ale man i save openem smol get. Ol man oli talem se kamel i naf blong gotru long ol smol get ya. ?Olsem wanem? ?Hemia nao samting we Jisas i stap tokbaot?

I klia se no gat. Jisas i stap tokbaot wan prapa nidel blong somap. Ol man we oli digim draon long ples ya oli faenem plante nidel we oli wokem long bun mo long aean. Samting ya i soem se ol manples oli stap yusum ol samting ya. I gud blong makem se long New World Translation vas blong Luk 18:25 i rid olsem se: “I isi moa long wan kamel blong gotru long wan nidel blong somap, be i no isi nating blong wan rijman i go long kingdom blong God.” Vas ya i soemaot klia  mining blong tok blong Jisas taem hem i yusum tok ya nidel.

Sam man we oli wokem diksonari oli agri wetem tok ya “nidel blong somap” we New World Translation i yusum. Grik tok ya ‘nidel’ (rha·phis’) we Matiu 19:24 mo Mak 10:24 oli yusum i kamaot long wan veb we i minim “somap.” Mo Grik tok ya (be·loʹne) we Luk 18:25 i yusum i minim prapa nidel blong somap, olsem nidel blong dokta. Vine’s Expository Dictionary of Old and New Testament Words i talem se: “Tingting ya se ‘ae blong nidel’ hem i minim ol smol get, ating i kamaot long taem blong yumi nomo, from we i no gat samting blong pruvum se ol man long taem bifo oli yusum tok ya olsem. Masta i wantem we yumi kasem save olsem wanem i strong blong wan man [i go long kingdom]. Mo yumi no nid blong traem mekem toktok blong hem i sofsof moa, taem yumi talem se nidel ya i minim wan narafala samting. Nidel ya hem i wan prapa nidel nomo.”​—1981, Volume 3, pej 106.

Sam man oli talem se long ol vas ya tok ya “kamel” oli mas tanem i kam “rop.” Grik tok ya blong rop (kaʹmi·los) mo blong kamel (kaʹme·los) i klosap sem mak. Be, long olfala hanraet blong Gospel blong Matiu we oli raetem long lanwis Grik (Sinaitic, Vatican No. 1209, mo Alexandrine) oli yusum Grik tok ya blong “kamel” (kaʹme·los) long Matiu 19:24. I luk olsem se, Matiu i raetem Gospel blong hem fastaem long lanwis ya Hibru mo afta hem wan i tanem i go long lanwis Grik. Hem i save gud wanem we Jisas i stap tokbaot, taswe hem i yusum tok we i stret nomo.

Taswe, Jisas i stap tokbaot wan prapa nidel blong somap mo wan prapa kamel. Hem i stap yusum ol tok ya blong makem wan samting we i had blong mekem. ?Be, Jisas i minim se i no gat wan rijman nating we bambae i save go long Kingdom? No, hem i no minim olsem, from we Jisas i yusum pijatok nomo. Mo pijatok ya i blong makem poen ya se olsem we wan prapa kamel i no save gotru long ae blong wan prapa nidel blong somap, wan rijman tu i no save go long Kingdom sipos hem i gohed blong holemtaet ol sas samting mo i no putum Jeova long fasples long laef.​—Luk 13:24; 1 Timoti 6:​17-19.

Jisas i talem tok ya afta we wan rijman i sakem gudfala janis ya blong kam wan man blong Jisas. (Luk 18:​18-24) Wan rijman we i laekem moa ol sas samting blong hem bitim ol samting long saed blong spirit, hem i no save kasem laef aninit long Kingdom. Be, i gat sam rijman we oli kam disaepol blong Jisas. (Matiu 27:57; Luk 19:​2, 9) Taswe wan rijman we i luksave se hem i nidim ol samting long saed blong spirit mo i lukaot help blong God, God i save sevem hem.​—Matiu 5:3; 19:​16-26.

[Futnot]