Yu Save Mekem God i Glad

?FASIN blong yumi i save gat paoa long ol filing blong God? ?God i save haremgud? Sam man oli ting se God i wan paoa nomo. ?Yu ting se wan paoa i save haremgud? Nogat. Nao plis, i gud yu luk samting we Baebol i talem long saed blong God.

Jisas Kraes i talem se: “God, hem i Spirit.” (Jon 4:24) Wan spirit hem i wan laef samting we i defren long ol man. Ol man oli no save luk wan spirit, be wan spirit i gat wan bodi​—“wan bodi blong spirit man.” (1 Korin 15:​44, NW; Jon 1:​18, NW ) Baebol i yusum sam pijatok blong tokbaot God. Hem i talem se God i gat ae, sora, han, mo sam narafala haf blong bodi bakegen. * God i gat wan nem blong hem tu​—nem blong hem se Jeova. (Eksodas 3:​15, futnot) Taswe, God blong Baebol hem i wan spirit man. (Hibrus 9:24) ‘Hem i God. Hem i laef, i stap we i stap. Hem i King. Hem i stap oltaem nomo, gogo i no save finis.’​—Jeremaea 10:10.

Olsem wan trufala man, Jeova i gat wan tingting mo hem i save tekem aksin. Hem i gat ol gudfala fasin mo ol filing, hem i laekem sam samting mo i no laekem sam narafala samting. I gat plante tok long Baebol we oli eksplenem samting we God i laekem, mo samting we hem i no laekem. Taem yumi luk ol god mo ol aedol we ol man oli wokem, yumi luksave nomo fasin blong ol man ya we oli wokem olgeta. Be God ya we i gat olgeta paoa, Jeova, hem i Stamba blong olgeta filing we hem i bin putum long ol man.​—Jenesis 1:27; Aesea 44:​7-11.

Yes, Jeova hem i wan God we “i stap harem gud oltaem.” (1 Timoti 1:11) Hem i haremgud long ol samting we hem i wokem, mo tu hem i glad blong mekem stamba tingting blong hem i kamtru. Tru long profet Aesea, Jeova i talem se: “Bambae mi mi save mekem olgeta samting we mi mi [glad long hem] . . . Mi mi talemaot finis se bambae i olsem, mo ol samting ya bambae oli kamtru olsem we mi mi talem.” (Aesea 46:​9-11) Man blong raetem Sam i tokbaot Jeova se: “Oltaem bambae hem i glad long olgeta samting ya we hem i mekem.” (Ol Sam 104:31) I gat wan narafala samting bakegen we i save mekem God i glad. Hem i talem se: “Pikinini blong mi, yu yu mas kam waes. Sipos yu kam waes, bambae mi glad we mi glad.” (Ol Proveb 27:11) Traem tingbaot​—!Tok ya i min se yumi save mekem God i glad!

Olsem Wanem Yumi Save Mekem God i Glad

Tingbaot eksampol blong hed famle ya Noa, mo olsem wanem hem i bin mekem Jeova i glad. “Hae God i stap glad long [Noa]” from we “hem i wan stret man, we ol man oli no save jajem hem.” Fasin blong Noa i defren olgeta long ol fasin blong ol rabis man long taem ya. Noa i gat bilif mo i stap obei long Jeova mo samting ya i mekem God i glad, taswe Baebol i talem se ‘oltaem Noa i stap fren gud  wetem God.’ (Jenesis 6:​6, 8-10, 22) “From we Noa i stap bilif strong long God . . . hem i obei long God, nao i wokem wan bigfala sip blong sevem olgeta famle blong hem.” (Hibrus 11:7) Jeova i glad long Noa mo hem i blesem Noa wetem famle blong hem, i mekem olgeta oli stap laef tru long wan taem blong bigfala trabol.

Hed famle ya Ebraham, hem tu i savegud ol filing blong Jeova. Hem i savegud fasin blong tingting blong Jeova, mo samting ya i kamaot klia taem Jeova i talem long hem se bambae hem i spolem ol man Sodom mo Gomora, from we oli rabis tumas. Ebraham i save finis we bambae Jeova i no save kilim i ded ol stret man wetem ol man nogud tu. (Jenesis 18:​17-33) Sam yia biaen, Ebraham i obei long ol oda blong God mo “hem i rere blong kilim pikinini blong hem Aesak,” from we hem “i stap tingbaot we God i save mekem man i laef bakegen long ded.” (Hibrus 11:​17-19; Jenesis 22:​1-18) Ebraham i gat wan gudfala save long ol filing blong God mo hem i soem strong bilif mo i obei long olgeta tok blong God, taswe “ol man oli stap singaot hem se, ‘Fren blong God.’ ”​—Jemes 2:23.

King Deved blong Isrel bifo, hem tu i wantem tumas blong mekem God i glad. Jeova i tokbaot hem i talem se: “Mi mi luk finis we King Deved ya, pikinini blong Jese, fasin blong hem i stret long tingting blong mi. Hem i wan man we bambae i mekem i stret olsem we mi mi wantem.” (Ol Wok 13:22) Bifo we Deved i faet agensem bigbigfala man ya Golaeat, hem i putum tras blong hem i stap long God mo hem i talem long King Sol blong Isrel se: “Hae God i stap blokemgud mi, blong ol laeon mo bea oli no spolem mi. . . . Bambae hem i blokemgud mi bakegen blong man ya bambae i no spolem mi.” Jeova i blesem Deved from we hem i trastem hem, mo hem i lidim han blong Deved blong hem i kilim i ded Golaeat. (1 Samuel 17:​37, 45-54) Deved i wantem se ol wok blong hem wetem ‘ol tok mo ol tingting blong hem bambae oli stret gud long fes blong God.’​—Ol Sam 19:14.

?Olsem wanem long yumi? ?Olsem wanem yumi save mekem Jeova i glad? Moa yumi save ol filing blong Jeova, moa yumi save olsem wanem blong mekem Hem i glad. Taswe, taem yumi ridim Baebol, i impoten tumas blong traehad blong save ol filing blong God, traem luksave olgeta samting we God i wantem, blong bambae yumi savegud olgeta. ‘Nao bambae yumi save mekem ol stret fasin wetem ol gudgudfala wok, mo long fasin ya bambae yumi gohed blong save God moa, nao hem bambae i save glad long yumi from ol samting ya.’ (Kolosi 1:​9, 10) Biaen, save ya bambae i halpem yumi blong gat wan strong bilif. Bilif ya i impoten tumas from we “sipos man i no bilif strong long God, hem i no save mekem God i glad long hem.” (Hibrus 11:6) Yes, sipos yumi traehad blong gat wan strong bilif mo laef folem ol samting we Jeova i wantem, yumi save mekem hem i glad. Be long sem taem, yumi mas lukaot we yumi no mekem Jeova i harem nogud.

Yumi No Wantem Mekem Jeova i Harem Nogud

Samting we i hapen long taem blong Noa i givim wan eksampol blong ol samting we i save mekem Jeova i harem nogud. Long taem ya, “olbaot long evri ples, oli stap faet mo oli stap kilim man i ded. Nao taem God i luk long wol ya, hem i luk we wol i kam nogud tumas from ol rabis fasin blong ol man ya.” ?God i harem olsem wanem taem hem i luk se ol man oli kam nogud mo oli raf tumas? Baebol i talem se “tingting blong hem i kam nogud. Hem i tingbaot we hem i bin mekem olgeta, mo i bin putum olgeta long wol ya, mo i stap harem nogud tumas from.” (Jenesis 6:​5, 6, 11, 12) Tingting blong God i kam nogud from we ol man oli kam rabis olgeta, taswe God i mas jenisim fasin we hem i mekem long ol man we oli laef bifo Bigfala Wota i foldaon. Fastaem, God i soem fasin blong Man we i Wokem olgeta samting, be naoia, from we ol man oli kam nogud tumas, God i mas spolem olgeta.

 Jeova i harem nogud bakegen taem hem i luk ol man blong hem, nesen ya blong Isrel, oli stronghed mo oli no tingbaot ol filing mo lav we God i soem blong lidim olgeta. Man blong raetem Sam i krae se: “Oltaem oli stap agensem hem long draeples ya, mo plante taem, oli mekem hem i sore, i harem nogud. God ya blong yumi ol laen blong Isrel hem i tabu, be oltaem, olgeta ya oli stap traem hem, oli stap mekem hem i harem nogud.” Nating se i olsem, “God i gat sore long ol man blong hem, mo i fogivim olgeta, i tekemaot ol sin blong olgeta, nao i no spolem olgeta. Plante taem, hem i holem kros blong hem. Hem i kros tumas long olgeta be i no letem i kamaot.” (Ol Sam 78:​38-41) I stret nomo we ol rebel blong Isrel oli safa from ol rabis fasin blong olgeta, be nating se i olsem, Baebol i talem se “taem olgeta oli kasem trabol, samting ya i mekem hem i harem nogud.”​—Aesea 63:​9, NW.

God i soem we hem i lavem ol man Isrel, “be olgeta oli stap jikim ol profet ya, oli stap tanem baksaed long ol tok blong olgeta, mo oli stap laf nogud long olgeta. Oli stap mekem olsem gogo Hae God i kros long olgeta we i kros gud, we oli no moa save ronwe long hem.” (2 Kronikel 36:16) Oli rebel agensem God gogo ‘tabu spirit blong God i harem nogud,’ nao God i no moa blesem olgeta. (Aesea 63:10) ?Wanem frut i kamaot? God i no moa protektem olgeta, mo oli safa bigwan taem ol man Babilonia oli winim Juda mo oli spolemgud Jerusalem. (2 Kronikel 36:​17-21) !Sore tumas long ol man we oli jusum blong folem wan nogud rod long laef, mo blong mekem God i harem nogud!

Baebol i talem klia we God i harem nogud tumas taem yumi mekem wan samting we hem i no laekem. (Ol Sam 78:41) Long ol fasin we i mekem God i harem nogud, ol fasin we i nogud olgeta long fes blong God, i gat fasin praod, giaman, fasin blong kilim man i ded, majik, man we i talemaot fiuja, wosip blong ol dedman, rabis fasin long saed blong seks, man we i slip wetem man, man we i mekem i krangke long waef blong hem, man we i slip wetem wan famle blong hem, mo fasin blong mekem i strong tumas long ol puaman.​—Levitikas 18:​9-29; 19:29; Dutronome 18:​9-12; Ol Proveb 6:​16-19; Jeremaea 7:​5-7; Malakae 2:​14-16.

?Jeova i harem olsem wanem taem ol man oli wosipim ol aedol? Eksodas 20:​4, 5 i talem se: “Bambae yufala i no mas mekem pija blong ol samting long heven, no long wol, no long solwota we wol ya i stanap long hem, blong yufala i mekem wosip long hem. Bambae yufala i no mas bodaon long aedol olsem blong mekem wosip long hem.” ?From wanem? From we “long fes blong Hae God, ol [aedol] ya oli nogud we i nogud.” (Dutronome 7:​25, 26) Aposol Jon i givim woning ya se: “Ol pikinini blong mi. Yufala i mas lukaot gud blong yufala i no go mekem wosip long ol giaman god.” (1 Jon 5:21) Mo aposol Pol i raetem se: “Ol fren blong mi. . . . I nogud yufala i stap mekem wosip long ol narafala god.”​—1 Korin 10:14.

Traehad Blong Mekem God i Glad

God “i trastem ol stret man, mo i stap talemaot tingting blong hem long olgeta.” “Ol man we fasin blong olgeta i stret gud, hem i lavem olgeta.” (Ol Proveb 3:32; 11:20) Defren olgeta, ol stronghed we oli no kea no oli agensem ol filing blong Jeova, bambae i no longtaem God i panisim olgeta from we oli no wantem mekem hem i glad. (2 Tesalonaeka 1:​6-10) Klosap nao bambae Jeova i finisim ol rabis fasin blong wol tede.​—Ol Sam 37:​9-11; Sefanaea 2:​2, 3.

Be Baebol i talem klia tu se Jeova “i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.” (2 Pita 3:9) Hem i glad moa blong soem kaen fasin blong hem long ol stret man we oli lavem hem, i bitim we hem i soem kros blong hem long ol man we oli no wantem lego ol nogud fasin blong olgeta. Jeova ‘i no  glad nating blong luk wan man nogud i ded long sin blong hem. God i wantem luk we hem i tanem tingting blong hem, i lego ol sin blong hem, nao bambae i laef i stap.’​—Esikel 33:11.

I no nid we ol man oli kasem kros blong Jeova. “Hae God i kaen tumas, mo hem i gat sore long man.” (Jemes 5:11) Yumi save trastem fulwan ol filing blong God, mo ‘putum ol trabol blong yumi long han blong hem, from we oltaem hem i stap tingbaot yumi.’ (1 Pita 5:7) Yes, ol man we oli mekem God i glad oli gat nambawan janis ya blong kasem ol blesing mo frengud wetem Jeova. Taswe, tede, bitim olgeta taem bifo, yumi mas “traehad blong faenemaot ol fasin we Masta blong yumi i glad long hem.”​—Efesas 5:10.

!Yumi haremgud tumas blong luk se Jeova, long gladhat blong hem, i soemaot long yumi ol nambawan fasin mo ol filing blong hem! Mo yu yu save mekem hem i glad. Sipos yu wantem se God i glad long yu, plis, go luk ol Witnes blong Jeova long ples blong yu. Bambae oli glad blong soem long yu ol samting we i gud mo i isi blong mekem, nao bambae yu save mekem God i glad.

[Futnot]

[Bokis blong pija long pej 7]

?From Wanem Baebol i Yusum Ol Haf Blong Bodi Blong Man Blong Tokbaot God?

“God, hem i Spirit,” taswe yumi no save luk hem wetem prapa ae blong yumi. (Jon 4:24) Baebol i yusum ol pijatok, no ol haf blong bodi blong man blong halpem yumi blong save paoa blong God, posisen blong hem olsem king, mo ol wok blong hem. Yumi no save se bodi blong God i olsem wanem, be nating se i olsem, Baebol i talem se God i gat han, leg, ae, mo sora.​—Jenesis 8:21; Eksodas 3:20; 31:18; Job 40:9; Ol Sam 18:9; 34:15.

Ol pijatok ya oli no minim se spirit bodi blong God i gat ol semfala haf blong bodi olsem ol man. Oli pijatok nomo. Oli jes blong halpem ol man blong save moa Jeova. Sipos i no gat ol pijatok ya, bambae i no isi, no maet bambae yumi no naf blong save ol fasin blong God. Be i no min se ol man oli bin mekemap ol fasin ya blong God. Baebol i talem klia se taem God i wokem man, man i tekem fasin blong God, be i no God we i tekem fasin blong man. (Jenesis 1:27) “Olgeta tok blong Baebol oli kamaot long God fastaem,” taswe ol vas we oli tokbaot ol gudfala fasin blong God oli no rili kamaot long ol man, be oli kamaot long God hem wan, we i tokbaot ol fasin blong hem​—ol semfala fasin ya we God i putum long ol man we hem i bin wokem. (2 Timoti 3:​16, 17) Ol gudfala fasin ya oli no ol fasin blong man, we man i bin givim i go long God. Nogat. Oli fasin blong God, we God i putum long ol man we hem i bin wokem.

[Tok blong pija long pej 4]

God i glad long Noa

[Tok blong pija long pej 5]

Ebraham i savegud ol filing blong God

[Tok blong pija long pej 6]

Deved i trastem Jeova fulwan

[Tok blong pija long pej 7]

Taem yu ridim Baebol, yu lanem olsem wanem blong mekem God i glad

[Foto Credit Line blong pija long pej 4]

Courtesy of Anglo-Australian Observatory, photograph by David Malin