?Bambae Yu Jusum Wanem Jos?

‘OL DEFREN jos oli jes defren rod we i lidim man i go long semfala ples. ?I gat wan God nomo, no?’ Plante man oli gat tingting ya. Oli harem se i impoten blong joenem wan jos, be oli ting se eni jos nomo i oraet.

Fastaem, maet i luk olsem se tingting blong olgeta i stret, from we i tru se i gat wan God nomo, God ya we i gat Olgeta Paoa. (Aesea 44:6; Jon 17:3; 1 Korin 8:​5, 6) Be, i gat sam bigbigfala samting we oli mekem se ol skul oli defdefren, nating se olgeta evriwan oli talem se oli wosipim trufala God, mo yumi no save mekem olsem se ol samting ya oli no stap. Ol wok, ol bilif, ol tijing, mo ol samting we oli askem ol man blong mekem, oli defdefren olgeta. Oli defren tumas, mekem se sam memba blong wan skul no wan grup oli faenem i had blong kasem save mo akseptem ol tijing mo ol bilif blong narafala skul.

Defren olgeta, Jisas i talem se: “God hem i wan Spirit, mo olgeta we oli mekem wosip long hem, oli mas wosip long spirit mo trutok.” (Jon 4:​24, NW ) ?Sipos yumi wosipim God long trutok, yu ting se yumi save gat plante defren tingting long ol kwestin olsem God hem i hu, wanem stamba tingting blong hem, mo olsem wanem yumi mas wosipim hem? ?Yu ting se God ya we i gat Olgeta Paoa, hem i no kea long fasin we yumi folem blong wosipim hem?

Ol Trufala Kristin Long Taem Bifo Mo Tede

Sam samtaem, ol Kristin blong faswan handred yia oli gat ol defdefren tingting. Eksampol, aposol Pol i tokbaot ol Kristin blong Korin i talem se: “Ol brata mo sista. Ol famle blong Kloe oli talemaot nius long mi finis, mo i klia gud we yufala nomo i stap rao wetem yufala. Mi mi stap tingbaot ol tok ya we yufala i stap talem. Sam long yufala i stap talem se, ‘Mifala i blong Pol,’ mo sam long yufala i stap talem se, ‘Mifala i blong Apolos.’ Mo sam narafala i stap talem se, ‘Mifala i blong Pita,’ mo sam narafala bakegen i stap talem se, ‘Mifala i blong Kraes.’ ”​—1 Korin 1:​11, 12.

?Olsem wanem? ?Pol i ting nating long ol rao ya? ?Ol man wanwan oli save folem prapa rod blong olgeta blong kasem laef? !Nogat! Pol i talem se: “Ol brata mo sista. Long nem blong Jisas Kraes ya, Masta blong yumi, mi mi talem strong long yufala, se mi wantem tingting blong yufala i mas kam wan nomo. Bambae yufala i no moa seraot long ol naranarafala grup. Yufala i mas joen gud we yufala i gat wan tingting nomo, mo we fasin blong yufala i wan nomo.”​—1 Korin 1:10.

Wan man i no save fosem olgeta blong oli gat wan bilif nomo. Taem olgeta man wanwan oli stadigud long wan poen, mo oli kasem semfala tingting mo oli bilif long tingting ya, nao oli save gat wan bilif nomo. Taswe, i impoten tumas blong stadigud long Baebol mo blong wantem mekem ol samting we yu lanem i wok long laef blong yu, sipos yu wantem haremgud long wan tingting nomo olsem Pol i talem. ?I gat wan grup we i joengud olsemia? Olsem yumi luk finis long faswan haf, longtaem finis i kam, God i luk ol  man blong hem olsem wan grup nomo. ?Yumi save luksave grup ya tede?

God i Blesem Ol Man We Oli Joenem Grup Blong Hem

Deved i raetem long ol Sam se: “Hae God. ?Hu man we i stret blong go long Haos Tapolen blong yu? ?Hu man we i stret blong go mekem wosip long yu long Saeon, tabu hil ya blong yu?” Hemia wan dip kwestin. Deved i ansa, i talem se: “Man we i stret blong mekem olsem, hemia man we i stap obei long yu long evri samting, mo oltaem i stap mekem ol samting we i stret. Ol tok blong hem i tru mo i stret.” (Ol Sam 15:​1, 2) Stret save blong Baebol bambae i givhan long yu blong luksave jos we i laenap wetem ol tok ya blong God. Afta, taem yu joenem grup ya, yu save haremgud blong kampani wetem ol man we oli wosipim God long wan tingting nomo, “long spirit mo trutok.”

Ol Witnes blong Jeova oli pruvum we oli save joengud tugeta long wan bilif mo wan wok, nating se yumi stap long wan wol we i seraot. Samfala we oli kam Witnes, fastaem oli stap long plante defdefren skul, no long wan skul we ol man long kantri blong olgeta oli go long hem. Bifo, samfala oli no sua sipos God i stap, sam narafala oli no bilif long God nating, mo sam narafala bakegen oli no intres long ol skul. Ol wanwan Witnes oli kamaot long ol defren skul, kalja, mo tingting, mo tede oli joengud tugeta mo oli gat wan bilif nomo, wan samting we yu no save luk long ol narafala grup long wol tede.

Baebol hem i stamba blong fasin joengud ya. Ol Witnes blong Jeova oli no stap fosem ol narafala blong folem Baebol. Be oli glad blong leftemap tingting blong ol man blong oli kasem save long Baebol. Save ya bambae i halpem olgeta blong jusum wan wosip we i stanap long Baebol, wan wosip we God i glad long hem. Olsemia, plante moa man oli save kasem ol gudfala frut we i kamaot from fasin ya blong wosipim God “long spirit mo trutok.”

Tede, ol nogud kampani mo ol rabis fasin oli save mekem man i safa bigwan. Taswe i impoten tumas blong frengud wetem ol gudfala man. Baebol i talem se, “sipos man i go joen long ol waes man, bambae hem i save kam waes,” mo ‘olgeta we oli no stret, oli save spolem fasin blong ol stret man.’ (Ol Proveb 13:20; 1 Korin 15:33) Sipos yu frengud wetem ol man we oli wosipim God long trufala fasin, bambae samting ya i protektem yu. Baebol i talem se: “I gud yumi stap tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin. I nogud yumi lego ol miting blong jos, olsem we sam long yumi oli mekem finis. Oltaem yumi mas toktok gud long yumi blong leftemap tingting blong yumi, from we yumi save se Dei ya we Masta blong yumi bambae i jajem olgeta man long hem, hem i kam klosap finis.” (Hibrus 10:​24, 25) !Hem i wan bigfala blesing taem ol trufala fren we oli brata sista long saed blong spirit, oli soem lav mo oli givgivhan long olgeta blong mekem wok blong God!

Ottmar i agri wetem tingting ya. Hem i gruap long wan Katolik famle long Jemani, be taem hem i yang yet, hem i no moa go long jos. Hem i eksplenem se: “Evri taem mi go long jos, mi no lanem wan samting we i givim mining long laef blong mi.” Nating se i olsem, hem i stap bilif long God yet. Biaen, hem i storian wetem ol Witnes blong Jeova mo hem i sua we olgeta nao oli trufala man blong God. Hem i luk we i impoten blong joen wetem olgeta. Naoia hem i talem se: “Mi wok long wan ogenaesesen we i gat ol memba blong hem long fulwol, mo mi harem se mi gat pis long tingting mo long hat blong mi. Sloslo oli stap halpem mi blong kasem stret save blong Baebol. Samting ya i impoten tumas long lukluk blong mi.”

Mifala i Singaot Ol Man We Oli Stap Lukaotem God

Ol man we oli gat wan tingting nomo mo oli wokgud tugeta olsem wan grup oli save mekem plante moa wok, i bitim ol wanwan man we oli stap mekem prapa wok blong olgeta. Eksampol, jes bifo we Jisas i aot long wol ya, hem i talem long ol disaepol blong hem se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit. Mo  yufala i mas tijim olgeta blong oli folem olgeta tok ya we mi mi givim finis long yufala. Mo yufala i mas save se mi bambae mi stap wetem yufala oltaem, gogo wol ya i finis.” (Matiu 28:​19, 20) Wok ya i no save gohed gud sipos i no gat sam man we oli lidim mo ogenaesem evri samting. ?Olsem wanem wan man i save folem advaes ya blong Baebol sipos hem i traem wosipim God hem wan nomo?

Long yia 2003, long fulwol ol Witnes blong Jeova oli seremaot 91,933,280 buk mo buklet we i tokbaot Baebol, wetem 697,603,247 magasin. Olsemia, oli talemaot gud nius blong Baebol long plante milian man long 235 kantri. !Hemia wan pruf we i soem se taem wan grup i joengud tugeta mo i ogenaesem gud evri samting, hem i mekem plante moa wok i bitim wok we wanwan man nomo oli save mekem!

Ol Witnes blong Jeova oli no seremaot ol buk long saed blong Baebol nomo. Oli mekem fri Baebol stadi tu blong halpem ol man blong kasem dip save long ol samting we God i wantem. Long yia 2003, ol Witnes oli lidim samwe long 5,726,509 Baebol stadi evri wik wetem sam grup blong man, no wetem wanwan man. Tijing ya blong Baebol i halpem plante milian man finis blong oli gat stret save, we i halpem olgeta blong jusum olsem wanem blong wosipim God. Mifala i singaot yu blong yu lanem ol samting long Baebol we God i wantem yu blong mekem. Biaen bambae yu save jusum wanem jos yu wantem joenem.​—Efesas 4:13; Filipae 1:9; 1 Timoti 6:20; 2 Pita 3:18.

Sipos yu wantem mekem God i glad, i impoten tumas we yu joenem wan skul​—be i no enikaen skul nomo. Jus blong yu i mas stanap long stret save blong Baebol, i no mas stanap long samting we ol narafala oli talem long yu. (Ol Proveb 16:25) Yu mas lanem ol samting we yu mas mekem blong folem trufala skul. Mo yu mas skelem ol samting ya wetem ol prapa bilif blong yu. Afta, yu mas jusumgud.​—Dutronome 30:19.

[Tok blong pija long pej 7]

Ol Witnes blong Jeova oli joengud tugeta long wan wol we i seraot