Mekem i Gud Long Taem We i Gat Nid

“YUMI mas mekem i gud long olgeta man. Be i impoten moa blong yumi mekem olsem long olgeta we oli brata blong yumi long saed blong bilif.” Hemia nao samting we aposol Pol i talem. (Galesia 6:10, NW ) Ol Witnes blong Jeova long ful wol oli rili traehad blong folem rul ya long laef blong olgeta, blong mekem i gud long olgeta man, antap moa long olgeta we oli brata long saed blong bilif. Yumi save luk ol gudfala wok ya bakegen mo bakegen long ol taem we i gat nid. I gud yumi tingbaot tri eksampol we oli kamaot i no longtaem long trifala kantri.

Long Disemba 2002, wan strongfala hariken we win blong hem i kasem 300 kilomita long wan aoa, i spolem Guam. Plante haos oli brokbrok, mo sam oli nogud olgeta. Kwiktaem nomo, ol kongregesen oli rerem sam grup blong ol brata blong givhan long ol Witnes famle we hariken i spolemgud olgeta. Branj ofis long Guam i sanem sam wokman mo ol samting tu we oli nidim blong bildim bakegen ol haos we i nogud, mo branj long Hawai tu i sapotem plan ya. Wan wik nomo afta long disasta ya, wan tim blong ol brata we oli gat save long wok blong kapenta oli kam long Hawai blong givhan blong wokem bakegen ol haos we oli nogud, mo sam brata long Guam oli tekem spel long wok blong olgeta blong givhan long ol brata ya blong Hawai. Glad we oli gat blong wok wanples i givim gudfala witnes long ol man long olgeta komuniti ya.

Long wan smol eria afsaed long Siti ya Mandalay, long Mianma, i gat wan faea we i laet klosap long wan Haos Kingdom. Klosap long Haos Kingdom ya i gat haos blong wan sista mo famle blong hem. Sista ya i no moa prij mo i no moa kam long miting blong longtaem. Win i stap pusum faea i kam stret long haos blong sista ya, mekem se hem i ron i go long Haos Kingdom blong askem help. Long taem ya ol brata oli stap fiksimap sam samting long Haos Kingdom, mekem se i gat plante brata i stap. Oli sapraes blong luk sista ya from we oli no save se hem i stap long eria ya. Kwiktaem nomo ol brata oli givhan blong karemaot olting long haos blong sista ya blong faea i no bonem. Taem man blong sista ya we i no wan Witnes i harem nius blong faea, hem i kambak kwiktaem long haos mo i luk we ol brata oli lukaotgud long famle blong hem. Hem i sapraes mo i glad tu, from we samting we ol brata oli mekem i blokem ol stilman we oli stap yusum ol janis olsemia blong stilim olting blong ol man. Kaengud fasin we ol brata oli soem i pusum sista ya mo boe blong hem, blong oli joen bakegen wetem Kristin kongregesen, mo naoia oli stap kam long olgeta miting.

Long las sevis yia, plante man long Mosambik oli fesem hadtaem blong kasem kakae from draetaem mo ol garen i no grugud. Branj ofis blong ol Witnes blong Jeova long Mosambik i tekem aksin kwiktaem blong givim kakae long olgeta we oli gat nid. Oli yusum ol Haos Kingdom blong seremaot ol kakae, samtaem oli mekem samting ya jes afta long ol miting. Wan sista we hem wan nomo i lukaot long  ol pikinini blong hem, i talem se: “Mi kam long miting we tingting blong mi i foldaon, from we mi no save se ol pikinini blong mi bambae oli kakae wanem taem mifala i gobak long haos.” Kaengud fasin we ol brata oli soemaot i leftemap tingting blong hem. Mo hem i se: “!I olsem se mi laef bakegen!”

Mo tu, ol Witnes oli “mekem i gud” long ol man long saed blong spirit, taem oli serem mesej blong hop we i stap long Baebol mo leftemap tingting blong ol man. Oli gat sem bilif olsem waes man blong bifo we hem i talem se: “Be man we i stap lesin long [God], bambae hem i stap gud oltaem long laef blong hem. Hem bambae i save we i no gat wan samting nating we i save mekem hem i fraet.”​—Ol Proveb 1:33.

[Tok blong pija long pej 31]

1, 2. Oli seremaot kakae long olgeta we oli gat nid long Mosambik

3, 4. Hariken long Guam i spolem plante haos

[Credit Lines]

Child, left: Andrea Booher/FEMA News Photo; woman, above: AP Photo/Pacific Daily News, Masako Watanabe