!Ol Samting We God i Wokem Oli Leftemap Hem!

“Oltaem skae i stap soemaot bigfala paoa blong God, mo olgeta samting we oli stap long hem oli stap soemaot ol gudgudfala wok we God i mekem.”​—OL SAM 19:1.

1, 2. (a) ?From wanem ol man oli no naf blong luk God stret long ae blong olgeta? (b) ?Olsem wanem ol 24 elda oli leftemap God?

 “MI NO save letem yu yu luk fes blong mi, from we sipos wan man i luk fes blong mi, man ya bambae i ded from.” (Eksodas 33:20) Hemia woning we Jeova i givim long Moses. From we ol man oli gat bodi blong mit mo blad, oli no strong naf blong lukluk God stret long ae blong olgeta. Be aposol Jon i gat janis blong luk wan nambawan vison we i soemaot Jeova long bigfala jea blong king long heven.​—Revelesen 4:​1-3.

² Ol spirit pikinini blong God oli no olsem ol man, olgeta ya oli save luk fes blong Jeova. Long olgeta ya i gat ol “twanti fo elda” we Jon i luk long heven long wan vison blong hem. Olgeta ya oli pija blong ol 144,000 man. (Revelesen 4:4; 14:​1-3) ?Olgeta ya oli mekem wanem taem oli luk God? Folem tok blong Revelesen 4:​11, olgeta ya oli singaot se: “Yu yu Masta blong mifala, mo yu God blong mifala. Yu yu mekem olgeta samting evriwan. Mo from we yu yu wantem olsem, yu yu mekem olgeta, nao oli stap, mo oli gat laef. From samting ya, i stret nomo blong ol man oli leftemap nem blong yu, mo blong oli bodaon, oli ona long yu, mo blong oli stap aninit long paoa blong yu oltaem.”

?From Wanem “Oli No Gat Wan Tok Nating Blong Talem”?

3, 4. (a) ?From wanem i krangke nomo blong talem se yumi no save bilif long God from we sayens i no givim pruf se God i stap? (b) ?Samtaem, sam man oli no wantem bilif long God from wanem?

³ ?Yu yu wantem tumas blong leftemap God? Bighaf blong ol man long wol ya oli no wantem mekem olsem, mo sam long olgeta oli talem se i no gat God nating. Eksampol, hemia toktok we wan man i raetem, we hem i man blong stadi long ol sta: “?Olsem wanem? ?God nao i wokem olgeta samting long skae, mo hem nao i putum gud olgeta loa we oli folem blong mekem yumi harem gud? . . . Ating hemia wan gudfala tingting. Be sore tumas, mi ting se hemia wan drim nomo. . . . I no God we i wokem olgeta samting.”

⁴ Ol man blong sayens oli no save faenemaot evri samting from we oli dipen nomo long samting we man i naf blong lukluk mo stadi long hem. Olgeta narafala samting we ol man oli wantem eksplenem, bambae oli eksplenem long tingting blong olgeta nomo. From we “God, hem i wan Spirit” ol sayentis bambae oli neva save luk hem mo stadi long hem. (Jon 4:​24, NW ) Tru ya, ol man oli tok flas nomo taem oli talem se i no gat God from we sayens i no faenem hem. Wan sayentis we nem blong hem Vincent Wigglesworth, we i wok long  Yunivesiti blong Kambrij, i eksplenem se wok blong man we i stadi mo bilif long sayens i sem mak nomo “olsem man we i gat skul mo bilif blong hem.” ?Weswe i sem mak? “Stadi blong sayens i stanap long wan strong bilif se ol samting raonabaot long yumi oli folem ol loa we i stap finis.” Taswe, taem wan man i sakemaot bilif long God from we hem i bilif long sayens, i sem mak nomo olsem we hem i lego wan bilif blong go long narafala bilif. Samtaem, ol man oli no wantem bilif long God from we oli no wantem luksave trutok. Man ya blong raetem Sam i talem se: “Man nogud i no kea long yu nating, hem i flas tumas, nao long tingting blong hem i stap talem se, ‘I no gat God i stap.’ ”​—Ol Sam 10:4.

5. ?From wanem ol man we oli no bilif long God oli no gat wan tok nating blong talem?

⁵ Be taem man i bilif se i gat wan God i stap, bilif blong hem i stanap long ol pruf. Yes, i gat plante plante samting we oli pruvum se God i stap. (Hibrus 11:1) Allan Sandage, wan man blong stadi long ol sta, i talem se: “Mi no save agri long tingting ya se oda mo loa we i stap biaen [long olgeta samting long yunivas *] i kamaot from laki nomo. I mas gat wan Man we hem i tingbaot mo wokem plan blong olgeta samting ya. Mi mi no save God, be mi save se God nomo i mas stap olsem stamba blong olgeta samting we i stap, hem nao i jusum blong wokem evri samting olsem we i stap.” Aposol Pol i talem long ol Kristin man long Rom se, “yumi no save luk ol fasin ya blong [God] stret long ae blong yumi. Hem i God. Hem i stap oltaem, mo paoa blong hem i no save finis. Be i stat long taem ya we hem i mekem wol ya fastaem, i kam kasem tede, hem i bin mekem ol fasin ya blong hem oli klia, blong yumi luk. Yumi save faenemaot long ol samting blong wol ya we hem i bin mekem. From samting ya, ol man oli no gat wan tok nating blong talem.” (Rom 1:20) Yes, stat “long taem ya we hem i mekem wol”​—mo antap moa, stat long taem ya we hem i mekem ol man we oli naf blong luksave se God i stap—​plante pruf i soemaot se i gat wan Man i stap we hem i Wokem olgeta samting ya, mo God ya i stret blong yumi wosipim hem. Taswe, ol man we oli no wantem luksave paoa blong God, oli no gat wan tok nating blong talem. ?Be wanem ol pruf ya we yumi save luk long ol samting raonabaot long yumi?

Yunivas i Soemaot Bigfala Paoa Blong God

6, 7. (a) ?Olsem wanem skae i stap soemaot bigfala paoa blong God? (b) ?From wanem skae i stap “makem wol”?

⁶ Ol Sam 19:1 i ansa se: “Oltaem skae i stap soemaot bigfala paoa blong God, mo olgeta samting we oli stap long hem oli stap soemaot ol gudgudfala wok we God i mekem.” Deved i luksave se ol sta mo ol planet we oli saenaot long “skae” oli givim klia pruf se i gat wan God i stap we paoa blong hem i bigwan tumas. Deved i gohed i se: “Oltaem nomo, dei i stap talemaot ol samting ya i go long narafala dei, mo naet i stap talemaot ol samting we hem i save i go long narafala naet.” (Ol Sam 19:​2, Nyutesteman wetem Ol Sam long Bislama) Yes, evri dei mo evri naet, skae i stap soemaot waes mo paoa blong God blong wokem samting. I olsem we olgeta samting ya long heven oli stap ‘talemaot’ ol tok we oli blong presem God.

⁷ Be i tru se, man we i gat fasin luksave, hem nomo bambae i naf blong harem toktok blong ol samting ya. “Skae wetem olgeta samting ya oli no save tok, man i no save harem voes blong olgeta.” Be oli givim  bigbigfala witnes long saed blong God. “Tok blong olgeta i stap goaot long olgeta ples long wol [“oli stap makem wol,” NW ], toktok blong olgeta i stap go long evri kona blong hem.” (Ol Sam 19:​3, 4) Yes, i olsem we skae i stap “makem wol” blong meksua se toktok blong hem we i givim witnes long saed blong God i go kasem evri kona blong wol.

8, 9. ?Wanem sam nambawan samting long saed blong san?

⁸ Long nekis tok blong hem, Deved i tokbaot wan narafala samting we Jeova i wokem, we i samting blong sapraes. “God i mekem ples blong hem long skae [“i givim wan haos tapolen long san,” NW ]. San i stap girap long moning, i kamaot olsem wan man we i jes mared we i hapi tumas, olsem wan jampion blong resis we i rere blong resis blong i win. Hem i stat long narasaed blong skae, nao i gokros long narasaed blong hem. Mo i no gat wan samting we i save ronwe long hot blong hem.”​—Ol Sam 19:​4-6.

⁹ Sipos yu skelem san wetem sam narafala sta long yunivas, san ya i smol nomo. Nating se i olsem, san ya hem i wan bigbigfala sta yet, taem yu skelem wetem ol narafala planet we oli stap goraon long hem. Wan buk i talem se hevi blong san i kasem “2 bilian mo bilian mo bilian tan.” !Taem oli kaontem hevi blong olgeta planet we oli stap raonem san, wetem wol blong yumi, mo san tugeta, san nao i tekem 99.9 pesen blong hevi ya! Graviti * we i kamaot long san ya i holem wol i stap long stret ples blong hem, hemia 150 milian kilomita longwe long san, we i no kam klosap tumas mo i no go longwe tumas long san. Wan smosmol haf nomo blong hot blong san i kasem wol blong yumi, be hemia i naf blong givim laef long evri samting long wol ya.

10. (a) ?Olsem wanem san i kamaot mo i go insaed long “haos tapolen” blong hem? (b) ?Olsem wanem san i sem mak long wan “jampion blong resis”?

¹⁰ Man blong raetem Sam i tokbaot san olsem wan “jampion blong resis” we long dei hem i stat long narasaed blong skae i resis i gokros long narasaed blong hem. Nao long naet hem i go slip long “haos tapolen” blong hem. Taem yumi wajem san i godaon long wes, i luk olsem se hem i go insaed long “haos tapolen” blong hem, i go blong spel. Ale, long moning, taem hem i girap long is, hem i kamaot we i saen bigwan olsem “wan man we i jes mared we i hapi tumas.” Deved i wan man blong lukaot sipsip taswe plante taem kolkol i stap kasem hem long naet. (Jenesis 31:40) Ating hem i stap tingbaot olsem wanem we hot blong san i mekem hem i harem gud tumas, taem san i kam antap long moning mo i laetem ol ples raon long hem. I klia se san i no taed nating long longfala wokbaot blong hem stat long is go kasem wes, be hem i olsem wan “jampion blong resis,” hem i rere blong mekem longfala wokbaot blong hem bakegen evri dei.

Ol Nambawan Sta Mo Galaksi

11, 12. (a) ?From wanem Baebol i tru nomo taem hem i talem se ol sta long skae oli olsem sanbij long solwota? (b) ?Ol sayentis oli ting se yunivas maet i bigwan olsem wanem?

¹¹ Deved i no gat wan bigfala glas blong lukluk ol sta, taswe hem i save luk smol haf nomo long olgeta sta long skae. Folem wan stadi we ol man oli mekem i no longtaem, namba blong ol sta long yunivas we man i save lukluk wetem wan bigfala glas, i kasem 70 sekstilian​—!hemia wan namba we sipos yumi raetem bambae yumi putum 7 wetem 22 siro biaen long hem! Jeova i bin soemaot se ol sta oli plante we oli plante tumas taem hem i talem se oli “olsem sanbij daon long solwota.”​—Jenesis 22:17.

¹² Blong plante yia, ol man we oli stadi long ol sta oli stap luk sam samting we oli talem se i “olsem wan klaod we laet i kamaot long hem, be i had blong talem stret se hem i wanem.” Ol sayentis oli ting se maet ol “raon klaod” ya, oli pat blong galaksi * blong yumi we oli kolem Milki Wei. Be long 1924, taem oli lukluk long wan kaen klaod olsem we hem i klosap moa long yumi, nem blong hem Andromeda, oli faenemaot se hem i no pat blong galaksi blong yumi be hem i wan narafala galaksi bakegen. !Oli se hem i stap samwe long tu milian laet-yia * farawe long yumi! Tede, ol sayentis oli ting se i gat plante bilian moa galaksi bakegen, we evri wan long olgeta oli holem plante taosen, no plante bilian, sta. Tru ya, i gat plante sta, be Baebol i talem se Jeova i “makem namba blong ol sta, mo i putum nem blong olgeta wanwan.”​—Ol Sam 147:​4.

13. (a) ?From wanem ol man oli sapraes taem oli faenem moa save long saed blong ol sta we oli grup wanples? (b) ?Olsem wanem i klia se ol sayentis oli no “savegud ol loa we i holem ol samting long skae”?

¹³ Jeova i askem Job se: “?Ol seven sta ya we nem blong olgeta Pleades, yu yu save fasem olgeta i stap wanples? ?Mo ol sta ya we nem blong olgeta Oraeon, yu save tekemaot rop ya we i fasemtaet olgeta?” (Job 38:31) I gat sam sta we taem yumi luk olgeta i olsem we oli grup wanples mo oli mekem pija blong wan  samting. Be oli no rili grup wanples. Wanwan long olgeta i stap longlongwe long narawan. Nating se i olsem, from we ol sta ya oli neva jenisim ples, yumi lukluk olgeta olsem se oli stap tugeta. Yes, from we ol sta ya oli stap long stret ples blong olgeta oltaem oli “halpem ol man blong faenem rod blong olgeta taem oli stap long sip, [oli halpem] ol man we oli go antap long skae long ol roket blong oli save weples oli mas go long hem, mo oli [halpem ol man] blong putum nem long ol sta.” (The Encyclopedia Americana) Be i no gat man we i naf blong eksplenem wanem i stap “fasem” ol sta ya oli stap wanples. Yes, ol sayentis oli no save givim ansa yet long kwestin ya we i stap long Job 38:33 se: “?Yu yu savegud ol loa we i holem ol samting long skae?”

14. ?Wanem samting long saed blong laet we i stap yet olsem wan tokhaed?

¹⁴ Ol sayentis oli no save ansa long wan narafala kwestin we God i aksem long Job. Hemia kwestin ya se: “?No samtaem yu go long ples ya we san [“laet,” NW ] i stap kam antap long hem?” (Job 38:24) Wan man we i stap raetem ol buk, i talem se kwestin ya long saed blong ples we laet i kamaot long hem, i wan “dip kwestin long saed blong sayens.” Bifo, ol waes man blong Gris oli tingting se laet hem i samting we i kamaot long ae blong man. Long taem blong yumi, fastaem ol sayentis oli tingting se laet hem i wan samting we i gat plante smosmol haf blong hem. Sam narafala sayentis oli talem se laet hem i wan samting we i muf olsem ol wef blong solwota. Be naoia, ol sayentis oli tingting se laet hem i wan samting we i gat plante smosmol haf blong hem mo i stap muf olsem ol wef tu. Nating se i olsem, i no gat man yet we i kasem save gud long “ples ya” we laet i stap kam long hem mo se laet i olsem wanem.

15. ?Olsem Deved, yumi mas harem olsem wanem taem yumi tingbaot ol samting ya long skae?

¹⁵ Taem yumi tingbaot olgeta samting ya, ating yumi harem sem mak olsem Deved we hem i raetem Sam ya se: “Taem mi mi luk skae we yu yu mekem, mo mi luk mun mo ol sta we yu yu putum olgeta oli stap long stret ples blong olgeta, mi luk man se hem i nating nomo. I no stret blong yu yu tingbaot hem. I no stret nating blong yu lukaot gud long hem.”​—Ol Sam 8:​3, 4.

Graon Ya Wetem Ol Anamol Long Hem Oli Presem Jeova

16, 17. ?Olsem wanem ol anamol long “dipsi” oli presem Jeova?

¹⁶ Ol Sam 148 i tokbaot sam narafala samting we oli talemaot bigfala paoa blong God. Vas 7 i talem se: “Yufala ol bigbigfala fis, mo dipsi, yufala i mas presem hem.” Yes, “dipsi” i fulap long ol nambawan samting we oli soemaot waes mo paoa blong God. Tingbaot welfis ya we oli kolem blu welfis. !Hevi blong hem i save kasem 120 tan​—hemia i olsem hevi blong 30 elefen tugeta! !Hat blong welfis ya nomo be hem i bitim 450 kilo, mo hat ya i save pamem samwe long 6,400 kilo blong blad i go long ful bodi blong hem! ?Ol bigbigfala anamol ya oli slo tumas mo i hadwok long olgeta blong swim? Nogat. Wan ripot we i kamaot long wan spesel kampen (European Cetacean Bycatch Campaign) i talem se ol blu welfis ya oli “swim aninit long solwota” long spid we yumi sapraes long hem. Wan satelaet we man i yusum blong makem rod blong ol welfis ya i soemaot se “wan long ol anamol ya i bin swim 16,000 kilomita long 10 manis.”

¹⁷ Tingbaot narafala anamol ya dolfin. Dolfin ya we oli kolem botelnus i save daeva i godaon 45 mita aninit long solwota. !Be oli faenemaot se sam long ol dolfin ya oli daeva i godaon long 547 mita! ?Olsem wanem dolfin ya i save daeva i go dip olsem? Taem wan dolfin i daeva i go dip, hat blong hem i pam sloslo nomo, mo blad i no moa ron i go long ful bodi be i ron nomo i go long hat, waetleva, mo bren blong hem. Mo tu, long ol masel blong hem i gat wan spesel kemikol we i save holem oksijen. Ol man oli faenem se elefen sil mo spem welfis, oli save daeva i go dip moa. Niuspepa ya Discover, i talem se: “[Elefen sil mo spem welfis] oli no faet agensem presa blong wota, oli letem presa ya i blokem tufala waetleva blong olgeta gogo tufala i no moa wok.” Bighaf blong oksijen we oli nidim, oli putumgud i stap long masel blong olgeta. Tru ya, ol anamol ya oli pruvum waes blong God ya we hem i holem olgeta paoa.

18. ?Olsem wanem solwota i soemaot waes blong Jeova?

¹⁸ Solwota tu i soemaot waes blong Jeova. Niuspepa ya Scientific American i talem se: “Evri drop blong wota go kasem 100 mita daon long solwota, i holem plante taosen smosmol gras we yumi no save luk wetem ae blong yumi, samting ya nem blong hem fitoplankton.”  Ol smosmol samting ya we ol man oli talem se i olsem “wan dakbus we man i no save luk,” i stap klinim win blong yumi taem hem i karemaot plante bilian tan blong kabon daeoksaed * we i stap long win. Fitoplankton i stap givimaot bitim haf blong oksijen we ol man long wol oli stap pulum.

19. ?Olsem wanem faea mo sno, tufala i mekem samting we Jeova i wantem?

¹⁹ Ol Sam 148:8 i talem se: “Laetning [“faea,” NW ], wetem ol ston blong aes, sno, wetem ol klaod, yufala i mas presem hem. Hariken, yu yu stap obei long hem, yu mas presem hem.” Tru ya, ol samting we oli no gat laef, be Jeova i yusum olgeta tu blong mekem samting we hem i wantem. Tingbaot faea. Plante yia bifo, ol man oli tingbaot bus faea olsem samting blong spolem ples nomo. Be stadi we ol man oli mekem naoia i soemaot se ol faea oli givhan bigwan long ol bus. Bus faea i bonem ol olfala tri mo ol tri we oli sik, samting ya i mekem se plante niufala sid i save gru, i givim kakae long graon, mo tu, i blokem kaen faea ya we oli kolem wael faea, hemia wan bigbigfala faea we i bonem plante ples wantaem mo kwiktaem. Sno tu i wan gudfala samting. Hem i wotarem graon mo i givim kakae long hem, i fulumap ol reva, i blokem ol gras mo flaoa wetem ol anamol tu blong oli no kam olsem aes.

20. ?Olsem wanem ol bigbigfala hil mo ol tri oli givhan long man?

²⁰ Ol Sam 148:9 i talem se: “Yufala ol bigbigfala hil wetem ol smosmol hil, yufala ol tri blong kakae wetem ol narafala tri.” Ol bigbigfala hil oli olsem pruf blong soemaot bigfala paoa blong Jeova. (Ol Sam 65:6) Be ol bigbigfala hil ya oli gat wok blong olgeta tu. Wan ripot we oli mekem long Institut blong Jiografi long Berne, Swiselan, i talem se: “Olgeta bigbigfala reva blong wol oli kamaot long ol hil. Bitim stret haf blong olgeta man long wol oli nidim fres wota we ol bigbigfala hil ya oli holem . . . Oli olsem ol ‘wota tang’ we man i nidim blong laef.” Ol tri raonabaot long yumi, olgeta tu oli leftemap God we i Wokem Olgeta. Wan ripot we oli mekem long Yunaeted Nesen Envaeronmen Program i talem se ol tri “oli impoten samting long laef blong ol man long evri kantri . . . Plante tri oli impoten tumas long ekonomi blong ol kantri from we oli givim ol samting olsem timba, frut, nat, glu, mo raba. Tu bilian man raon long wol oli yusum wud blong mekem faea blong kukum kakae mo blong wokem plante narafala samting.”

21. Talem olsem wanem wan lif nomo i save pruvum se God nao i wokem ol samting.

²¹ Taem yumi lukluk gud long wan tri mo wok we i stap gohed long hem, bambae yumi faenem moa pruf se God i waes tumas. Tingbaot lif blong tri. Wanwan lif i gat wan samting i kavremap hem, we samting ya i luk olsem oel we i saen lelebet. Samting ya we i olsem oel, i blokem lif blong i no kam drae. Aninit long oel ya, long saed blong lif antap, i gat plante smosmol samting we oli kolem kloroplast insaed long ol sel. * Ale, insaed long ol kloroplast ya i gat wan samting we nem blong hem klorofil we hem i stap pulum laet blong san. Ale, lif i save mekem wok blong hem nao olsem wan “smol faktri blong wokem kakae,” wok ya oli kolem fotosintesis. Ol rus blong tri oli pulum wota we i stap long graon, nao wota ya i go long olgeta lif wanwan, i olsem we tri i gat ol “paep blong wota” we oli paspas olbaot insaed long hem. Saed blong lif aninit, i gat plante taosen smosmol “hol” (we oli kolem stomata), ol smosmol hol ya oli stap open mo sat oltaem blong pulum win ya kabon daeoksaed. Laet we lif i pulum i olsem paoa we i miksim wota wetem kabon daeoksaed mo tufala samting ya tugeta oli kam olsem kakae blong tri ya (carbohydrates). Yes, tri i stap wokem prapa kakae blong hem. Hem i mekem wok olsem wan “faktri,” be samting we i defren se hem i no mekem noes mo hem i naes tumas. !“Faktri” ya i no sakem doti olbaot, be hem i givimaot oksijen we yumi nidim!

22, 23. (a) ?Wanem spesel samting we sam pijin mo anamol oli save mekem? (b) ?Wanem narafala kwestin we yumi mas tokbaot?

²² Ol Sam 148:10 i talem se: “Yufala  ol anamol blong vilej wetem ol anamol blong bus, yufala ol snek wetem ol pijin.” Plante anamol long graon mo pijin oli gat sam fasin we oli mekem yumi sapraes. Pijin ya we oli kolem Laysan albatros i save flae longwe (wan taem oli makem se wan pijin olsem i flae 40,000 kilomita long 90 dei nomo). Narafala pijin ya blakpol wobla i save flae stat long Not i go kasem Saot blong Amerika, mo hem i save flae 80 aoa we i no spel nating. Anamol ya kamel i save holem plante wota, mo hem i no holem wota ya long baksaed blong hem, olsem sam man oli bin ting bifo, be hem i holem wota ya long bel blong hem. Samting ya i mekem we hem i save wokbaot longtaem we hem i no tosta. Taswe, yumi no sapraes we ol man blong save oli lukluk i go long ol anamol taem oli wokem plan blong ol mesin no nara samting we oli wantem wokem. Wan woman we i stap raetem buk, nem blong hem Gail Cleere, i talem se: “Sipos yu wantem wokem wan samting we yu sua se bambae i wokgud . . . mo we bambae i no spolem ol samting raonabaot long yumi, ating yu save faenem plante gudfala eksampol long ol samting [we God i wokem].”

²³ !Tru ya, ol samting raonabaot long yumi oli rili leftemap God! Ol sta antap long skae, ol tri mo ol anamol, evriwan, long prapa fasin blong olgeta, oli stap presem God ya we i wokem olgeta. ?Be olsem wanem long yumi ol man? ?Olsem wanem yumi tu yumi save presem God?

[Ol Futnot]

?Yu Yu Rimemba?

• ?From wanem ol man oli no gat wan tok blong talem se i no gat God?

• ?Olsem wanem ol sta mo ol planet oli leftemap God?

• ?Olsem wanem ol anamol mo ol fis oli pruvum se i gat wan God we i wokem olgeta samting mo hem i gat lav?

• ?Olsem wanem ol samting raonabaot long yumi we oli no gat laef, oli stap mekem samting we Jeova i wantem?

[Kwestin]

[Tok blong pija long pej 10]

Ol sayentis oli talem se namba blong ol sta we yumi naf blong lukluk i kasem 70 sekstilian

[Credit Line]

Frank Zullo

[Tok blong pija long pej 12]

Dolfin ya we oli kolem botelnus

[Tok blong pija long pej 13]

Wan pis blong sno

[Credit Line]

snowcrystals.net

[Tok blong pija long pej 13]

Wan yangfala pijin ya Laysan albatros