Olgeta We Oli Presem God Bambae Oli Kasem Blesing

“Bambae oli kam, oli bodaon long yu, oli presem hae nem blong yu.”​—OL SAM 86:9.

1. ?From wanem yumi ol man i save presem God long fasin we i gud moa i winim ol narafala samting we God i wokem?

 I STRET nomo we olgeta samting we Jeova i wokem oli mas presem hem. Ol samting we oli no gat laef, oli stap leftemap Hem nating se oli no save toktok. Be yumi ol man, yumi naf blong yusum tingting, yumi naf blong kasem save samting, yumi naf tu blong soem tangkiu from samting we yumi kasem, mo yumi naf blong mekem wosip. Taswe, ol tok ya blong man blong raetem Sam, i go stret long yumi nao, i se: “!Olgeta man! !Yumi presem God! !Yumi glad! !Yumi singsing long hem! !I gud yumi sing blong leftemap nem blong hem! !Yumi presem hem! !Yumi leftemap nem blong hem!”​—Ol Sam 66:​1, 2.

2. ?Hu i folem oda ya blong leftemap nem blong God, mo from wanem oli lesin?

² Bighaf blong ol man oli no wantem save long God mo oli no leftemap hem. Be long 235 kantri, i gat bitim sikis milian Witnes blong Jeova we oli soemaot se oli luk “fasin ya blong [God]” long ol samting we hem i wokem, mo oli “harem” witnes we ol samting ya oli givim nating se oli no save toktok. (Rom 1:20; Ol Sam 19:​2, 3) Taem oli stadi long Baebol oli stat blong save Jeova mo oli lavem hem. Ol Sam 86:​9, 10 i talemaot se: “Ol man blong olgeta kantri, yu yu bin mekem olgeta, mo bambae oli kam, oli bodaon long yu, oli presem hae nem blong yu. Yu nomo yu God. Yu yu gat paoa, mo yu stap mekem ol bigbigfala samting.”

3. ?Olsem wanem “bigfala kampani” blong ol man i stap ‘mekem wosip long God, dei mo naet’?

³ Revelesen 7:​9, 15 (NW ) i tokbaot wan “bigfala kampani” blong ol man we ‘long dei mo long naet, oli stap mekem tabu wok blong God insaed long haos blong hem.’ Hemia i no min se God i wantem ol man  blong hem blong presem hem oltaem nomo we oli neva spel. Nogat. Tok ya i stret long ol man blong God we oli stap mekem wosip long hem long evri ples long wol. Taswe taem ples i tudak long sam kantri mo ol man oli go slip, be long narasaed wol, ol man blong God oli bisi long wok blong prij. From samting ya i olsem se i gat man i stap presem Jeova long dei mo long naet. I no longtaem, “olgeta samting we i gat laef” bambae oli leftemap voes blong olgeta blong presem Jeova. (Ol Sam 150:6) ?Be bifo we taem ya i kam, wanwan long yumi i save mekem wanem blong leftemap nem blong God? ?Wanem sam traem we maet oli mekem i had long yumi blong leftemap God? ?Mo wanem blesing i stap blong olgeta we oli leftemap God? Blong ansa long ol kwestin ya, i gud yumi tingbaot wan stori long Baebol we hem i long saed blong laen blong Gad long nesen blong Isrel.

Wan Traem Blong Bifo

4. ?Wanem traem we i kasem laen blong Gad?

⁴ Bifo we nesen blong Isrel i go insaed long Promes Lan, laen blong Gad i askem sipos i save kasem graon long is saed blong Jodan Reva. Ol graon ya i gud blong ol anamol blong olgeta. (Namba 32:​1-5) Be sipos oli stap long graon ya, bambae oli fesem plante bigbigfala traem. Ol laen blong Isrel we oli go tekem ol graon long wes saed blong Jodan Reva oli sef gud from we reva ya i blokem olgeta long ol ami blong ol enemi blong olgeta. (Josua 3:​13-17) ?Be, olsem wanem long ol laen ya we oli tekem graon long is saed blong Jodan Reva? Man ya George Adam Smith i talem long buk ya The Historical Geography of the Holy Land, se: “[Graon blong olgeta] i open nomo, i stap antap long bigfala level ples blong Arebia, mo i no gat samting we i blokem olgeta long ol enemi blong olgeta. Taswe, oltaem oli kasem trabol from ol grup blong stil man we oli stap wokbaot olbaot blong faenem kakae, sam long ol grup ya oli kam evri yia blong stilim kakae long garen blong olgeta mo ol anamol blong olgeta.”

5. ?Jekob i talem long Gad mo laen blong hem se oli mas mekem wanem taem ol enemi oli kam stil mo faet agensem olgeta?

⁵ ?Laen blong Gad bambae i mekem wanem from ol trabol ya we hem i stap fesem olwe nomo? Plante handred yia bifo finis, taem olfala Jekob i stap slip long bed blong hem we klosap hem i ded, hem i talemaot wan profet tok se: “Gad. Bambae ol man blong stil oli kam blong mekem faet long yu, be yu bambae yu girap, yu ronemaot olgeta i go.” (Jenesis 49:19) Taem oli harem tok ya fastaem, ating oli harem nogud. Be rili, ol tok ya oli olsem wan oda we Jekob i givim long laen blong Gad se oli mas faet bak. Jekob i soem se sipos laen blong Gad i ronemaot ol stilman ya, bambae ol stilman ya oli ronwe, we oli sem nomo.

Sam Trabol We Oli Save Traem Wosip Blong Yumi

6, 7. ?Olsem wanem ol Kristin tede oli fesem samting we i sem mak long traem we i kasem laen blong Gad?

⁶ Olsem laen ya blong Gad, ol Kristin tede tu oli stap fesem ol traem mo hadtaem long wol ya blong Setan. Mo i no gat wan merikel blong karemaot yumi long ol trabol ya. (Job 1:​10-12) Plante long yumi i stap fesem ol trabol we oli kamaot taem yumi mas go long skul, wok blong winim mane, mo lukaot long pikinini. Antap long hemia, i gat ol traem we oli kamaot  long yumi wan bakegen, maet from tingting no prapa slak fasin blong yumi. Sam long yumi oli stap harem nogud from we oli sik no oli handikap, mo samting ya i stap stikim olgeta olsem “nil blong aranis.” (2 Korin 12:​7-10) Sam long yumi oli harem nogud oltaem from we oli tingting se oli nogud. “Trabol” we i kamaot taem yumi olfala, i save blokem ol olfala Kristin brata sista blong oli no moa mekem plante long wok blong Jeova olsem bifo.​—Prija 12:​1, NW.

⁷ Aposol Pol i mekem yumi tingbaot tu se “yumi mas faet . . . agens long paoa blong ol rabis spirit we oli stap long ol ples long heven.” (Efesas 6:​12, NW ) Evri dei yumi stap fesem “spirit we i kamaot long wol,” hemia wan spirit blong fasin rebel mo blong no moa tingbaot fasin mo tingting we i klin mo gud. Setan mo ol rabis enjel blong hem nao oli stap leftemap ol fasin ya. (1 Korin 2:12; Efesas 2:​2, 3) Yumi olsem Lot we hem i onagud long God, yumi stap harem nogud tumas from ol fasin nogud we ol man raonabaot long yumi oli stap tokbaot mo mekem. (2 Pita 2:7) Mo tu, Setan i stap faet agensem yumi stret. Hem i stap mekem faet agensem ol tabu brata, olgeta ya “we oli stap obei long ol tok blong God, mo we oli stap holem ol tok we Jisas i talemaot se i tru.” (Revelesen 12:17) Setan i stap faet agensem ol “narafala sipsip” blong Jisas tu, taem hem i pulum ol gavman blong oli putum tabu long wok blong yumi mo taem ol man oli kilim yumi.​—Jon 10:16.

?Bambae Yumi Letem Oli Win No Bambae Yumi Faet Bak?

8. ?Yumi mas mekem wanem taem Setan i faet agensem yumi, mo from wanem?

⁸ ?Yumi mas mekem wanem taem Setan i faet agensem yumi? Olsem laen blong Gad bifo, yumi mas stanap strong long saed blong spirit mo yumi mas faet bak, folem wanem we God i lidim yumi blong mekem. Sore tumas, sam long yumi oli stat kam slak taem oli fesem ol trabol no traem long laef. Oli stat lego ol Kristin wok blong olgeta. (Matiu 13:​20-22) Wan Witnes i talem from wanem hem i ting se plante brata sista oli no stap kam long ol miting long kongregesen blong hem. Hem i se: “Ol brata oli taed. I gat tumas presa long laef we i mekem se oli no moa gat paoa.” I tru, i gat plante samting long laef we oli mekem ol man tede oli taed. Mo from samting ya, i isi nomo blong luk wosip blong God olsem se hem i wan narafala presa blong laef, wan narafala baden we yumi mas karem. ?Be yu ting se i stret, mo i waes, blong gat tingting olsem?

9. ?Olsem wanem yumi save harem gud taem yumi tekem yok blong Kraes?

⁹ Tingbaot wanem we Jisas i talem long ol man long taem blong hem, we ol samting long laef i mekem oli taed. Hem i se: “Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud.” ?Ol tok ya blong Jisas i min se, blong spel, yumi mas katemdaon sam long ol wok we yumi mekem blong God? Nogat. Jisas i talem se: “Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala.” Ol man oli wokem yok long wud no aean, mo yok i givhan long olgeta no long wan anamol blong karem wan samting we i hevi. Be yumi stap “karem ol hevi samting” finis. ?From wanem yumi mas tekem wan yok bakegen? Long Grik hanraet, vas ya i save rid olsem se: “Yufala i kam aninit long yok blong mi, yufala i karem yok ya wetem mi.” Tingbaot: !Jisas i wantem halpem yumi blong karem ol hevi samting blong yumi! Yumi no mekem wok ya long prapa paoa blong yumi.​—Matiu 9:36; 11:​28, 29; 2 Korin 4:7.

10. ?Wanem i hapen taem yumi stap traehad blong leftemap God?

¹⁰ Taem yumi tekem yok ya we Jisas i wantem givim long yumi, we i min se yumi kam ol disaepol blong hem, yumi stap faet agensem Setan. Jemes 4:7 i mekem promes ya long yumi se: “Yufala i mas blokem Setan, nao hem bambae i ronwe long yufala.” Ol tok ya oli no min se bambae i isi nomo blong faet agensem Setan. Nogat. Man we i wantem mekem wok blong God bambae hem i mas wokhad. (Luk 13:24) Be Baebol i mekem promes ya long Ol Sam 126:5 se: ‘I gat ol man we, taem oli stap planem kakae long garen blong olgeta, oli stap krae. Be taem oli tekemaot kakae long garen ya, oli glad.’ Yes, God ya we yumi stap wosip long hem, hem i wan God we i gat fasin tangkiu. Hem “i stap mekem i gud long olgeta we oli stap traem faenem hem,” mo i stap blesem olgeta we oli leftemap hem.​—Hibrus 11:6.

Yumi Leftemap God Taem Yumi Talemaot Kingdom

11. ?Olsem wanem wok blong prij i halpem yumi blong faet agensem Setan?

¹¹ Jisas i givim oda ya se: “Yufala i mas go long ol man long olgeta ples long wol, blong pulum olgeta oli  kam man blong mi.” Wok blong prij hem i nambawan rod blong ‘mekem sakrefaes blong leftemap nem blong God.’ (Matiu 28:19; Hibrus 13:15) Wan impoten haf blong “klos blong faet” we yumi putum blong blokem Setan, hemia ol ‘but blong wokbaot’ we i min se yumi “rere blong talemaot gud nius blong pis.” (Efesas 6:​11-15) Taem yumi presem God long wok blong prij, hemia wan nambawan rod blong mekem bilif blong yumi i strong. (2 Korin 4:13) Hem i halpem yumi blong yumi no putum tingting i stap oltaem long ol samting we oli save mekem yumi harem nogud. (Filipae 4:8) Taem yumi joen long wok blong prij yumi harem gud from we yumi gat janis blong kampani wetem ol gudfala fren we oli wosip olsem yumi.

12, 13. ?Olsem wanem fasin blong joen oltaem long wok blong prij i save halpem ol famle? Talem wan eksampol.

¹² Wok blong prij i wan samting we famle i save mekem tugeta. I tru, ol yangfala oli nidim blong pleplei tu. Be, ol papa mama oli save mekem we taem ya we oli spenem tugeta long wok blong prij i no olsem wan wok. Oli save mekem se hem i wan hapi taem, sipos oli trenem ol pikinini blong oli save mekem smol long wok ya tu. Ol yangfala oli glad taem oli luksave se oli naf blong mekem samting. Taswe, ol papa mama oli no mas mekem i strong tumas long pikinini, olsem we oli fosem hem blong mekem samting we hem i no naf blong mekem. Sipos oli no strong tumas, bambae oli halpem pikinini blong laekem wok blong prij.​—Jenesis 33:​13, 14.

¹³ Mo tu, wan famle i save joengud moa taem hem i presem God tugeta. Tingbaot wan sista we man blong hem i no stap long trutok, nao man ya i lego hem wetem ol faef pikinini blong tufala. Ale sista ya i mas faenem wan wok blong lukaot long ol pikinini blong hem. ?Olsem wanem? ?Hem i taed tumas blong lukaot long ol pikinini blong hem long saed blong spirit? Sista ya i tingtingbak se: “Mi strong blong stadi long Baebol mo ol buk we oli tokbaot Baebol. Mo mi traehad tu blong mekem ol samting we mi ridim i wok long laef blong mi. Mi tekem ol pikinini blong mi i go long miting mo long wok blong prij oltaem. ?Wanem frut i kamaot from? Olgeta faef pikinini blong mi oli baptaes finis.” Sipos yu mo famle blong yu i joen oltaem long wok blong prij samting ya i save halpem yu tu, long traehad we yu mekem blong ‘stretem mo tijim [ol pikinini blong yu] olsem we Masta blong yumi i stap stretem yumi, i stap tijim yumi.’​—Efesas 6:4.

14. (a) ?Olsem wanem ol yangfala oli save leftemap God long skul? (b) ?Wanem i save halpem ol yangfala blong oli no “sem nating long gud nius”?

¹⁴ Ol yangfala, sipos yu laef long wan kantri we i no gat loa agensem wok blong prij long ol pablik ples, ale yu save leftemap God taem yu prij long skul. ?Yu yu stap mekem olsem, no yu fraet long ol man? (Ol Proveb 29:25) Wan yangfala Witnes long Porto Riko, we hem i gat 13 yia, i raetem se: “Mi neva sem blong prij long skul from we mi mi save se hemia trutok. Taem mifala i stap sidaon long klasrum, mi putum han blong mi i go antap, mo mi talemaot wanem we mi lanem long Baebol. Sipos mi gat smoltaem, mi go long laebri mo mi ridim buk ya Ol Yangfala Oli Askem.” * ?Jeova i blesem ol traehad blong yangfala sista ya? Yangfala ya i talem se: “Samtaem ol fren long klas blong mi oli askem sam kwestin long mi mo oli talem tu se oli wantem wan buk olsem.” Sipos yu yu wan yangfala we yu stap fraet blong prij long skul, ating yu mas mekem dip stadi yu wan blong bambae yu naf blong “jusumaot ol fasin we God i wantem, wanem i gud, mo wanem hem i glad long hem, mo wanem i stret gud blong mekem.” (Rom 12:2) Ale taem bambae yu sua fulwan se samting ya we yu stap lanem, hemia nao trutok, bambae yu no moa “sem nating long gud nius.”​—Rom 1:16.

Wan ‘Doa We i Open’ Blong Mekem Moa Wok

15, 16. ?Wanem ‘doa i open blong mekem gudfala wok’ we sam Kristin oli go insaed long hem, mo wanem blesing we oli kasem from?

¹⁵ Aposol Pol i raetem se wan ‘doa i open finis long hem blong hem i mekem wan gudfala wok we bambae i gat plante frut blong hem.’ (1 Korin 16:9) ?Maet  ol samting long laef blong yu i stret blong yu pastru long wan doa olsem, mo mekem moa wok? Sipos yu joen long wok blong fultaem no haftaem paenia, i min se bambae yu save givim 70 no 50 aoa blong taem blong yu i go long wok blong prij long wan manis. Ol Kristin brata sista oli glad long wok we ol paenia oli mekem. Be ol paenia ya oli no gat tingting se oli moagud long ol brata mo sista blong olgeta from we oli spenem moa taem long wok blong prij. Nogat. Ol paenia oli wokem gudfala fasin ya we Jisas i pulum yumi blong gat, hemia: “Yumi ya, yumi man blong wok nomo blong hem. I stret nomo blong yumi mekem olsem.”​—Luk 17:10.

¹⁶ Blong mekem wok blong paenia, man i mas bos strong long hem wan, hem i mas ogenaes gud long laef blong hem, mo i mas rere tu blong lego sam samting we hem nomo i wantem. Be ol blesing we oli kamaot from wok ya, oli mekem se yu no save sore long disisen ya. Wan yangfala paenia we nem blong hem Tamika i talem se: “Taem yu naf blong tijim ol man long Tok blong God long fasin we i stret gud, hemia i wan bigfala blesing. Taem yu mekem wok blong paenia, yu yusum Baebol oltaem. Naoia, taem mi go prij long ol haos wanwan mi save tingbaot plante vas we oli stret long ol defdefren man.” (1 Timoti 2:15) Wan narafala paenia we nem blong hem Mica, i talem se: “Wan narafala nambawan blesing hemia taem yu luk olsem wanem trutok i jenisim laef blong ol man.” Wan yangfala we nem blong hem Matiu, hem tu i talem se hem i kasem bigfala glad taem hem i “luk wan man i kam long trutok. I no gat wan narafala glad we i olsem glad ya.”

17. ?Olsem wanem wan sista i winim ol rong tingting we hem i gat long saed blong wok blong paenia?

¹⁷ ?Yu ting se doa blong wok blong paenia i save open long yu tu? Maet yu yu wantem paenia be yu harem se yu no naf. Wan yangfala sista we nem blong hem Kenyatte i talem stret se: “Bifo, mi gat plante rong tingting long saed blong wok blong paenia. Mi no ting se mi naf blong mekem wok ya. Mi no save olsem wanem blong storian wetem ol man mo olsem wanem blong givhan long olgeta blong kasem sam ansa insaed long Baebol.” Be ol elda oli askem wan sista we i wok longtaem olsem paenia, blong hem i givhan long Kenyatte. Kenyatte i tingtingbak se: “Mi mi laekem blong wok wetem hem. Samting ya i mekem mi mi wantem joen long wok blong paenia.” Sipos narafala i leftemap tingting blong yu mo i givim trening long yu, ating yu tu bambae yu wantem joen long wok blong paenia.

18. ?Wanem blesing i save kam long olgeta we oli joen long wok blong misinari?

¹⁸ Wok blong paenia i save openem doa long yu blong yu mekem sam narafala wok long ogenaesesen  blong Jeova. Eksampol, sam hasban mo waef we oli paenia oli save kasem trening long wok blong misinari nao oli save go prij long wan narafala kantri. Ol misinari oli mas lan blong laef long wan narafala kantri, maet oli nidim blong lanem wan narafala lanwis, lan long wan narafala kalja, mo long ol narafala kakae. Be ol blesing we wok ya i karem, oli bigwan gogo yu no moa tingbaot ol smosmol samting ya we maet i defren. Mildred i wan sista we i spenem plante yia olsem wan misinari long Meksiko, hem i se: “Mi no sore nating long disisen ya we mi tekem blong wok olsem misinari. Hemia wan samting we mi bin wantem mekem longtaem finis, stat taem mi wan smol gel yet.” ?Wanem blesing we hem i kasem? “Long ples blong mi i had blong faenem man we i wantem stadi Baebol. !Be naoia, mi gat plante stadi mo samtaem i gat fo long ol stadi ya wantaem we oli wantem joen long wok blong prij!”

19, 20. ?Olsem wanem wok long Betel, intenasnal volontia, mo Ministeriol Trening Skul, oli olsem wan blesing long plante brata?

¹⁹ Plante blesing i kasem olgeta ya tu we oli wok long ol haos Betel, hemia long ol branj ofis blong ol Witnes blong Jeova. Sven, wan yangfala brata long Jemani, i tokbaot wok blong hem long Betel i se: “Mi harem olsem se wok ya we mi mekem bambae i karem frut we i blong olwe. Mi save yusum save blong mi long wan wok blong wol sipos mi wantem. Be sipos mi mekem olsem, bambae mi harem olsem se mi stap putum mane long wan bang we i stap brokdaon.” I tru se taem yu mekem wan wok we oli no pem yu from, yu mas rere blong lego plante samting we maet yu wantem. Be Sven i talem se: “Taem mi gohom evri dei, mi save se evri samting we mi mi mekem long dei ya, i blong Jeova. Mo samting ya i givim wan ‘gudfala’ filing long mi.”

²⁰ Sam brata sista oli kasem blesing blong wok olsem ol intenasnal volontia, hemia olgeta we oli go long narafala kantri blong wokem ol haos blong Sosaeti. Wan hasban wetem woman blong hem, tufala i go finis long eit defren kantri blong mekem wok ya, tufala i raetem se: “Ol brata long ples ya oli gud tumas. Bambae mitufala i harem nogud taem mitufala i mas gobak. Bambae hemia namba eit taem we hat blong mitufala i ‘brok.’ !Mitufala i gat gudfala taem!” I gat wan narafala blesing tu, hemia Ministeriol Trening Skul. Skul ya i givim trening long ol brata we oli no mared mo we oli naf. Wan studen blong skul ya i talem se: “Mi no save olsem wanem blong talem tangkiu long yufala from nambawan skul ya. I no gat wan narafala ogenaesesen we i wokhad olsemia blong givim trening ya long sam man.”

21. ?Wanem traem we olgeta Kristin oli fesem long wok blong God?

²¹ Yes, i gat plante doa oli open blong mekem moa wok. I tru se i no evriwan we oli save go wok long Betel no long wan narafala kantri. Jisas hem wan i luksave se ol Kristin bambae oli karem defdefren namba blong “frut” from we laef blong olgeta wanwan i defdefren. (Matiu 13:23) Ale, ating traem blong yumi ol Kristin, hemia blong mekem bes blong yumi long wok blong Jeova​—joen fulwan long wok blong Jeova olsem we yumi naf blong mekem. Taem yumi mekem olsem, yumi stap leftemap Jeova, mo yumi save sua se hem i glad tumas. Tingbaot Ethel, wan olfala sista we i stap long wan spesel hospital blong ol olfala. Evri dei hem i stap prij long ol narafala olfala long hospital ya mo i yusum telefon tu blong prij. Nating se hem i no save mekem moa, hem i mekem wok ya wetem olgeta laef blong hem.​—Matiu 22:37.

22. (a) ?Long wanem narafala rod yumi save leftemap God? (b) ?Yumi stap wet long wanem gudfala taem?

²² Be rimemba se, wok blong prij hem i wan wei nomo blong leftemap Jeova. Yumi save soem gudfala eksampol long fasin blong yumi mo klos blong yumi taem yumi go long wok, stap long skul, no long haos. Ale, yumi save mekem Jeova i glad. (Ol Proveb 27:11) Ol Proveb 28:20 (NW ) i mekem promes ya long yumi se: “Wan man we fasin blong hem i stret bambae hem i kasem plante blesing.” Taswe yumi mas “planem plante” sid long wok we yumi mekem blong God, from we yumi save se biaen bambae yumi karem plante frut. (2 Korin 9:6) !Sipos yumi gohed olsem, bambae yumi gat janis ya blong stap long taem ya we ‘olgeta laef samting’ bambae oli presem Jeova bigwan, stret olsem we oli mas mekem!​—Ol Sam 150:6.

[Futnot]

?Yu Yu Tingbaot?

• ?Olsem wanem ol man blong God oli stap mekem wok blong hem long “dei mo long naet”?

• ?Wanem trabol we laen blong Gad i kasem, mo samting ya i tijim wanem long ol Kristin tede?

• ?Olsem wanem wok blong prij i protektem yumi long ol traem blong Setan?

• ?Wanem “doa i open finis” long samfala, mo wanem blesing we oli kasem?

[Kwestin]

[Tok blong pija long pej 15]

Ol man long laen blong Gad oli faet bak agensem ol stilman, yumi ol Kristin yumi mas faet agensem Setan

[Tok blong pija long pej 17]

Yumi glad long kampani blong ol brata sista long wok blong prij

[Tok blong pija long pej 18]

Wok blong paenia i save openem doa blong yu mekem narafala wok, olsem:

1. Intenasnal volontia

2. Wok long Betel

3. Misinari wok