Ripot Long Wok Blong Kingdom

‘Plis Yu Kam, Yu Givhan Long Mifala’

LONG Julae 2000, oli askem long ol brata sista we oli toktok lanwis Jemani long Ostria, Jemani, mo Swiselan, sipos sam blong olgeta oli save muv i go long Bolivia. ?From wanem? From we, long ol plantesen we oli stap raonabaot long Santa Cruz, Bolivia, gogo kasem olgeta we oli stap 300 kilomita longwe, ol grup blong man Mennonite we oli toktok lanwis Jemani oli intres long Baebol.

Samwe 140 Witnes oli muv i go long Bolivia. Sam oli stap sam wik nomo, sam narafala oli stap wan yia, mo samfala oli stap moa long wan yia. Long rod ya, oli folem eksampol blong ol misinari blong faswan handred yia we oli obei long tok ya se: “Plis yu kamkros long Masedonia, yu givhan long mifala.”​—Ol Wok 16:​9, 10.

?Olsem wanem long wok blong prij long teritori ya? Wan elda long wan kongregesen blong ples ya i talem se: “Mifala i save tekem samwe long eit aoa long wan trak we i gat fowil long ol bus rod, blong go long wan long ol 43 vilej blong ol man Mennonite. Plante taem, mifala i mas wokbaot fo dei mo slip long ol haos tapolen blong visitim ol grup blong man we oli stap longwe moa. Be i gud tumas blong mekem ol traehad ya, from we ol man ya klosap oli neva harem gud nius bifo.”

Fastaem, plante long ol man Mennonite oli no glad blong luk ol Witnes. Be ol traehad blong ol brata sista we oli kambak bakegen mo bakegen i halpem ol man Mennonite blong luksave ol gudfala samting we ol Witnes oli save givim long olgeta. Eksampol, wan man blong wokem garen i talem se hem i bin ridim ol magasin ya Wekap! blong wan yia. Hem i ademap se: “Mi save we plante man long ples ya oli no agri wetem ol tijing blong yufala, be mi mi ting se yufala i talem trutok.” Long wan narafala vilej, wan man i talem se: “Sam long ol man we oli laef raonabaot long mi oli talem se yufala i giaman profet, sam narafala oli talem se yufala i talem trutok. Mi mi wantem mekemap prapa tingting blong mi.”

Naoia long Bolivia, i gat wan kongregesen blong ol man we oli toktok lanwis Jemani, we i gat 35 pablisa long hem, wetem 14 paenia. Kam kasem tede, 14 man we bifo oli man Mennonite oli kam ol man blong talemaot Kingdom, mo 9 narafala man oli stap kam long ol miting oltaem. Wan olfala man we i jes tekem baptaes i talem se: “Mifala i luk we han blong Jeova i lidim wok ya. Hem i sanem ol brata sista we oli toktok lanwis Jemani mo oli gat ekspiriens, blong oli halpem mifala. Mifala i tangkiu tumas long Jeova.” Dota blong man ya i gat 17 yia blong hem, mo hem tu i baptaes finis. Hem i ademap se: “Ol yangfala brata sista oli glad blong mekem wok blong prij, mo oli pasem glad ya long ol narafala. Bighaf blong olgeta oli paenia, we oli spenem taem mo mane blong olgeta blong halpem ol narafala. Fasin ya i pulum mi blong mekem i sem mak.”

Yes, ol man we oli ‘kam givhan,’ oli kasem bigfala glad mo oli haremgud.