Wan Kwestin

?From wanem Deved, wan man blong Jeova we i strong long bilif, i letem Mikal woman blong hem, i gat wan aedol (teraphim), olsem 1 Samuel 19:​12, 13 i soemaot?

Fastaem i gud blong tingbaot stori we i laenap wetem vas ya. Taem woman blong Deved i harem nius se King Sol i wantem kilim Deved i ded, kwiktaem nomo hem i tekem aksin. Baebol i talem se: “Nao [Mikal] i givhan long [Deved] blong i gotru long windo, mo i slakem hem i godaon long graon, nao hem i ronwe. Nao woman ya i tekem wan aedol blong hem we oli katem long wud [we lukluk mo saes blong hem i olsem wan man], i putum long bed, mo i tekem wan pilo we oli wokem long hea blong nani, i putum aedol ya i pilo long hem, nao i kavremap hem.” Taem ol man blong Sol oli kam blong holem Deved, Mikal i talem long olgeta se: “Hem i sik.” Trik ya i wokgud from we i givim naf taem long Deved blong i ronwe.​—1 Samuel 19:​11-16.

Ol samting we ol man blong digim graon oli faenem, i soem se long taem bifo, oli yusum ol aedol ya (teraphim) long saed blong wosip, mo tu long saed blong loa. Long taem bifo, wan aedol olsem, i sem mak long wan pepa long saed blong loa we ol man oli wokem tede blong makemaot raet we man i gat long olting blong hem. I luk olsem se, sam samtaem, wan man we i mared i save gat raet blong kasem graon blong papa blong woman blong hem we i ded finis, sipos man ya i holem aedol ya (teraphim). Samting ya i givhan long yumi blong kasem save from wanem Rejel i karem aedol (teraphim) blong papa blong hem, mo from wanem papa blong hem i wari tumas blong faenem aedol ya bakegen. Long taem ya, Jekob we i man blong Rejel, i no save nating wanem we woman blong hem i mekem.​—Jenesis 31:​14-34.

Taem ol man Isrel oli kam wan nesen, oli kasem ol Ten Komanmen, mo namba tu long ol komanmen ya i blokem fasin ya blong wokem ol aedol. (Eksodas 20:​4, 5) Biaen, profet Samuel i tokbaot loa ya taem hem i stap toktok long King Sol. Hem i se: “Fasin ya we man i stap mekem stronghed, hem i sin, i olsem we hem i stap mekem ol bisnes blong posen mo kleva. Mo fasin ya we man i stap flas, i stap leftemap hem, hem i nogud tumas, i olsem we hem i stap mekem wosip long ol narafala god [“i olsem we hem i stap yusum wan teraphim,” NW ].” (1 Samuel 15:23) From samting ya, ating ol man Isrel oli no stap yusum ol aedol olsem blong makemaot samting we man i gat raet blong kasem long papa blong hem. Nating se i olsem, sam famle long Isrel oli holem yet bilif ya we ol man Jiu oli gat bifo se ol aedol ya oli karem gudlak. (Jajes 17:​5, 6; 2 King 23:24) From we Mikal i kipim wan aedol long medel blong olting blong hem, samting ya i soemaot se hat blong hem i no fulwan long Jeova. Maet Deved i no save se Mikal i gat wan aedol olsem, no maet hem i letem nomo blong Mikal i holem aedol ya from we Mikal i gel blong King Sol.

Deved i soemaot se tingting blong hem i blong givim wosip i go fulwan long Jeova, taem hem i talemaot ol tok ya: “Hae God i hae we i hae, mo yumi mas presem hem, yumi mas leftemap nem blong hem. Hem i hae moa long ol narafala god, mo i stret blong yumi ona moa long hem, i winim we yumi ona long ol narafala god. Olgeta god ya blong ol man blong ol narafala kantri oli giaman god nomo, oli no save mekem wan samting, be Hae God ya, hem i mekem skae.”​—1 Kronikel 16:​25, 26.

[Tok blong pija long pej 29]

Namba tu long ol Ten Komanmen i blokem fasin ya blong wokem ol aedol, olsem teraphim we yu luk long pija ya

[Credit Line]

From the book The Holy Land, Vol. II, 1859