?Yu Yu Letem Ol Trabol i Spolem Laef Blong Yu?

YUMI stap kasem plante wari mo trabol long taem ya we ‘laef i strong tumas.’ (2 Timoti 3:1) Sam trabol oli blong smoltaem, ale oli save lus kwiktaem. Be sam narafala trabol oli save stap plante manis no maet plante yia. From samting ya, plante man oli harem olsem Deved we i raetem Sam ya blong krae long Jeova, i se: “Plis yu tekemaot ol samting we i stap mekem mi mi wari tumas, mo yu sevem mi long ol trabol blong mi.”​—Ol Sam 25:17.

?Olsem wanem? ?Yu yu stap traehad naoia blong winim plante bigfala trabol? Sipos i olsem, yu save lukluk i go long Baebol blong givhan long yu mo leftemap tingting blong yu. Bambae yumi tokbaot tufala man ya Josef mo Deved, we tufala i stap tru long Jeova mo tufala i winim plante trabol long laef blong tufala. Bambae yumi luk wanem we tufala i mekem taem trabol i kasem tufala, nao bambae yumi lanem ol gudfala lesen we oli save givhan long yumi blong winim ol semfala trabol tede.

Oli Kasem Bigfala Trabol

Taem Josef i gat 17 yia blong hem, hem i kasem bigfala trabol long prapa famle blong hem. Ol bigfala brata blong hem oli luk we papa blong olgeta Jekob, “i lavem [Josef] moa, i winim we i lavem olgeta.” Ale, “olgeta oli no moa laekem [Josef] nating, oli agens long hem, nao oli no moa save toktok gud long hem.” (Jenesis 37:4) Traem tingbaot olsem wanem Josef i mas wari mo harem nogud from samting ya. Sloslo, ol brata blong Josef oli agensem hem moa, gogo oli salem hem i go long ol man blong wan narafala laen, blong hem i kam slef blong olgeta.​—Jenesis 37:​26-33.

Taem Josef i stap wok slef long Ijip, hem i talem no long woman blong masta blong hem we i wantem slip wetem hem. Woman ya i kros tumas, nao hem i giaman se Josef i traem blong repem hem. Ale “oli go holem Josef, oli sakem hem long kalabus.” Long ples ya, “ol jen oli fasemtaet leg blong hem, mo bigfala aean i holemtaet nek blong hem.” (Jenesis 39:​7-20; Ol Sam 105:​17, 18) !Yumi save se Josef i mas harem nogud tumas! Blong 13 yia, hem i wok slef mo i stap long kalabus from we ol narafala oli mekem i no stret long hem, mo sam we oli mekem olsem oli prapa famle blong hem.​—Jenesis 37:2; 41:46.

Long Isrel bifo, Deved tu i kasem plante trabol taem hem i yangfala. Hem i mas ronwe long King Sol we i stap ronem  hem olsem we hem i wan anamol nomo, mo hem i stap haed olbaot long ol hol blong ston blong plante yia lelebet. Oltaem laef blong Deved i stap long denja. Wan taem, hem i go luk pris ya Ahimelek blong askem sam kakae long hem. (1 Samuel 21:​1-7) Taem Sol i harem nius se Ahimelek i halpem Deved, hem i talem long ol gad blong hem blong kilim Ahimelek i ded wetem ol pris tu mo ol famle blong olgeta. (1 Samuel 22:​12-19) Traem tingbaot olsem wanem Deved i mas harem nogud taem hem i save se ol man ya oli ded from hem.

Tingbaot ol trabol mo fasin nogud ya we ol narafala oli mekem long Josef mo Deved blong plante yia. Sipos yumi lukluk wanem samting we tufala i mekem taem ol trabol ya i kasem tufala, yumi save lanem sam bigfala lesen. Bambae yumi tokbaot tri fasin blong tufala we i gud yumi folem.

Lego Kros Mo Fasin Agens

Faswan gudfala fasin blong tufala man ya blong bilif, hemia se tufala i no holemtaet kros mo fasin agens. Taem Josef i stap long kalabus, i isi blong hem i tingting nogud long ol brata blong hem we oli bin salem hem i kam wan slef. Hem i gat plante taem blong tingbaot wanem we hem i save mekem blong givimbak long olgeta, sipos wan dei hem i luk olgeta bakegen. Be Josef i blokem ol nogud tingting olsem. ?Olsem wanem yumi save samting ya? Yumi save, from samting we hem i mekem taem ol brata blong hem oli kamdaon long Ijip blong pem kakae, nao hem i gat janis blong givimbak long olgeta. Baebol i talem se: “[Josef] i aot long olgeta, i go krae . . . Nao Josef i talem long ol man blong hem se, ‘Yufala i fulumap ol kakae ya long ol bag blong ol [brata blong mi]. Olgeta oli pem ol kakae ya finis, be mane we man i pem i mas gobak long bag blong hem, wetem kakae blong hem. Mo yufala i mas givim kakae long olgeta blong oli kakae long rod.’ ” Biaen, Josef i sanem ol brata blong hem oli go karem papa blong olgeta i kam long Ijip. Hem i talem ol gudfala tok ya long olgeta se: “Taem yufala i stap wokbaot i go, bambae yufala i no raorao long yufala.” Long ol toktok mo fasin blong Josef, hem i soem se hem i no letem kros mo fasin agens i spolem laef blong hem.​—Jenesis 42:​24, 25; 45:24.

Deved tu i no stap kros long King Sol. Tu taem, Deved i gat janis blong kilim Sol i ded. Be taem ol man blong Deved oli talem long hem blong mekem olsem, Deved i talem se: “Prea blong mi we Hae God bambae i blokem mi oltaem, blong mi no mekem wan trabol long king blong yumi, we Hae God i jusumaot. Mi no mas mekem wan samting nating long hem we i nogud, from we Hae God nomo i jusumaot hem.” Deved i livim bisnes ya long han blong Jeova, ale i talem long ol man blong hem se: “Hae God i laef, i stap we i stap, mo long fes blong hem, mi mi talem tru long yu, se hem nomo bambae i kilim king ya i ded. Maet bambae hem i kam olfala nomo, nao i ded, no i ded long taem blong faet, be ded blong hem bambae i wok blong Hae God nomo.” Biaen, taem Sol mo pikinini blong hem Jonatan i ded, Deved i wokem wan singsing blong soem sore. Yes, Deved i gat fasin olsem Josef, hem i no letem kros i spolem laef blong hem.​—1 Samuel 24:​3-6; 26:​7-13; 2 Samuel 1:​17-27.

 ?Taem narafala i mekem wan samting we i no stret long yu nao yu yu harem nogud tumas long hem, yu yu holemtaet kros mo fasin agens? I isi nomo blong letem samting ya i hapen. Sipos yumi letem ol filing blong yumi oli bos long yumi, oli save spolem yumi i bitim trabol ya we narafala i mekem long yumi. (Efesas 4:​26, 27) I tru se yumi no save blokem narafala we i mekem i no stret long yumi, be yumi save bos long tingting mo fasin blong yumi biaen. Samting we i save mekem i moa isi blong lego kros mo fasin agens, hemia strong bilif ya se Jeova bambae i stretem trabol ya long prapa taem blong hem.​—Rom 12:​17-19.

Haremgud Long Laef, Nating Se Trabol i Stap

Seken lesen we yumi lanem, hemia blong no letem ol trabol we i kasem yumi i mekem yumi harem nogud tumas we yumi no moa save gohed. Maet yumi stap wari tumas long trabol ya we yumi no naf blong jenisim, mekem se yumi no moa tingbaot ol gudfala samting we yumi naf blong mekem. Long taem ya nao, yumi stat letem ol trabol ya i spolem laef blong yumi. Josef i no letem samting ya i hapen long hem. Hem i haremgud long laef blong hem, nating se trabol i stap. Taem hem i wok olsem wan slef, “[masta blong hem] i glad long hem, i mekem hem i stap wetem hem oltaem, i man blong givhan long hem. Mo hem i putumap hem i bos long olgeta samting long haos blong hem.” Josef i holem gudfala fasin ya taem hem i stap long kalabus tu. Jeova i blesem Josef, mo Josef i tinghevi long wok blong hem, nao “bos blong kalabus ya i glad long hem, i putumap hem blong i lukaot long ol narafala man we oli stap long kalabus ya, mo i mekem hem i bos tu long olgeta wok long kalabus ya.”​—Jenesis 39:​4, 21-23.

Taem Deved i stap haed olbaot long ol hol blong ston, hem tu i traehad blong haremgud long laef, nating se trabol i stap. Taem hem i stap long draeples klosap long taon ya Paran, hem wetem ol man blong hem oli lukaot long ol sipsip blong Nabal, blong ol stilman oli no kam karemaot olgeta. Wan man blong wok blong Nabal i talem se: “Longtaem ya we mifala i stap wetem olgeta, we mifala i stap lukaot long ol sipsip blong yumi, be long dei mo long naet, olgeta ya oli stap lukaot gud long mifala.” (1 Samuel 25:16) Biaen bakegen, taem Deved i stap long taon ya Jiklag, hem i spolem plante taon we ol enemi blong Isrel long saot oli bin kam stap long olgeta. Wok ya i givhan bigwan blong winimbak plante ples long eria blong Juda.​—1 Samuel 27:8; 1 Kronikel 12:​20-22.

?Olsem wanem? ?Yu yu save traehad blong haremgud long laef, nating se trabol i stap? Ating i hadwok blong mekem olsem, be yu save winim. Aposol Pol i tingtingbak long ol yia blong laef blong hem, nao hem i talem se: “Mi mi lanem finis, se long wanem rod we mi stap long hem, be mi save stap gud nomo. . . . Long wanem rod mi pas long hem, be mi stap harem gud. Sipos mi fulap gud, no mi hanggri, sipos mi gat plante samting, no mi trabol, be nating.” ?Olsem wanem Pol i lanem fasin ya? Hem i dipen long Jeova oltaem. Hem i talem se: “Mi save mekem evri samting, long paoa blong [God] we i stap mekem mi mi strong.”​—Filipae 4:​11-13.

Wet Long Jeova

Namba tri lesen we yumi lanem, se yumi no mas brekem wan loa blong Baebol blong traem stretem trabol long laef blong yumi, be yumi mas wet long Jeova nomo. Disaepol Jemes i raetem se: “Yufala i mas stanap strong olwe gogo kasem en blong rod, blong bambae yufala i stret gud, yufala i no sot long wan samting, mo yufala i gat olgeta samting blong Kristin laef blong yufala.” (Jemes 1:4) Yumi mas stanap strong “gogo kasem en blong rod,” hemia i min se yumi mas stanap strong go kasem we trabol blong yumi i finis, yumi no mas brekem wan loa blong Baebol blong traem finisim trabol ya hareap. Olsem nao, trabol ya we i traem bilif blong yumi, bambae i mekem bilif i kam strong moa, mo bambae i soemaot bigfala paoa we bilif ya i givim long yumi. Josef mo Deved tufala i gat fasin ya blong stanap strong longtaem. Tufala i no traem stretem trabol blong tufala long wan fasin we Jeova i no glad long hem. Tufala i wok strong blong haremgud long laef blong tufala, nating se trabol i stap. !Tufala i wet long Jeova, mo tru, Jeova i givim fulap blesing long tufala! Jeova i yusum tufala tugeta blong sevem mo lidim ol man blong hem.​—Jenesis 41:​39-​41; 45:5; 2 Samuel 5:​4, 5.

Yu tu, taem wan trabol i kasem yu, maet yu harem se i moagud blong folem wan rod we i no laenap wetem Baebol, blong traem stretem trabol ya. Olsem nao, maet yu harem nogud from we yu no faenem yet wan man no woman we yu save mared  wetem hem. Sipos i olsem, yu no mas tingbaot blong brekem tok ya blong Jeova se yumi mas mared long “man blong Masta” nomo. (1 Korin 7:39) Maet yu gat trabol insaed long mared blong yu. I moagud we yutufala i wok tugeta blong traem winim hadtaem ya, i bitim we yutufala i letem spirit blong wol ya i pulum yutufala blong seraot mo divos. (Malakae 2:16; Efesas 5:​21-23) Maet yu stap faenem i had blong lukaotgud long famle blong yu from we yu sot long mane. Sipos yu wet long Jeova, bambae yu no save mekem wan samting we i no stret no i agensem loa, blong yu kasem mane. (Ol Sam 37:25; Hibrus 13:18) Yes, yumi evriwan i mas wokhad blong haremgud long laef mo traehad blong mekem samting we Jeova bambae i blesem yumi from. Taem yumi stap folem rod ya, yumi mas gat strong tingting blong wet long Jeova blong stretem trabol blong yumi long rod we i beswan.​—Maeka 7:7.

Jeova Bambae i Givhan Long Yu

Sipos yumi tingting dip long fasin blong ol man long Baebol, olsem Josef mo Deved, we oli winim ol trabol mo oli winim tingting we i foldaon, samting ya i save mekem i gud tumas long yumi. Stori blong olgeta i fulumap sam pej blong Baebol nomo, be ol trabol we i traem olgeta ating i gohed blong plante yia. I gud blong tingbaot se: ‘?Olsem wanem ol man ya blong God oli lanem blong haremgud, nating se trabol i stap? ?Oli mekem wanem blong holemtaet fasin glad? ?Wanem ol fasin we oli mas lanem?’

Mo tu, i gud we yumi tingbaot ol man blong Jeova tede, mo olsem wanem oli stanap strong. (1 Pita 5:9) Evri yia long Wajtaoa mo Wekap! i gat plante stori blong laef blong ol man ya. ?Yu yu stap ridim ol stori ya mo tingting dip long gudfala eksampol blong ol Kristin ya we oli gat strong bilif? Mo tu, long ol kongregesen blong yumi, samfala oli gat bigfala trabol long laef blong olgeta, be oli gohed nomo blong stanap strong. ?Yu yu stap joen oltaem wetem ol brata sista ya, mo yu yu stap lanem plante samting from ol olfala ya taem yu joen wetem olgeta long ol miting blong kongregesen?​—Hibrus 10:​24, 25.

Taem wan trabol i kasem yu, yu mas save se Jeova i stap tingbaot yu, mo se bambae hem i givhan long yu. (1 Pita 5:​6-10) Wokhad blong no letem trabol ya i spolem laef blong yu. Yu mas folem fasin blong Josef, Deved, mo plante narafala we oli lego kros, oli traehad blong haremgud long laef nating se trabol i stap, mo oli wet long Jeova blong stretem trabol blong olgeta long rod we i beswan. Blong kam klosap long Jeova, yu mas prea oltaem mo mekem plante wok long saed blong spirit. Sipos yu mekem ol samting ya, bambae yu tu yu save glad mo yu save gat pis, nating se trabol i kasem yu.​—Ol Sam 34:8.

[Tok blong pija long pej 21]

Josef i wokhad blong haremgud long laef, nating se trabol i stap

[Tok blong pija long pej 23]

Deved i wet long Jeova blong stretem trabol blong hem