?Yu Yu Mas Joenem Wan Jos?

‘!BLONG bilif long God, mi no nidim blong joenem wan jos no go long jos oltaem!’ Hemia tingting blong plante man long saed blong fasin ya blong joenem wan jos no wan grup blong skul. Sam man oli harem se oli stap klosap moa long God taem oli wokbaot long bus, i bitim taem oli stap long jos. Tede, plante man oli ting se, blong bilif long God, oli no nidim blong joen wetem wan ogenaesesen no wan grup blong jos.

Be sam narafala oli gat wan defren tingting. Oli talem se i impoten tumas we oli joenem wan jos mo oli go long jos sipos oli wantem mekem God i glad. Taswe, kwestin ya i no jes wan samting blong stadi long hem, be hem i wan impoten kwestin we evri man i mas ansa long hem. Nomata wanem tingting blong yu, be fasin frengud wetem God i laenap wetem kwestin ya. Taswe i impoten tumas blong save tingting blong God long saed blong kwestin ya. ?Hem i talem wanem long Baebol?

Fasin We God i Mekem Long Ol Man Long Taem Bifo

Samwe long 4,400 yia bifo, bigbigfala wota i ron mo i spolem ful wol. Ol man oli no save fogetem wan bigfala trabol olsemia, mo raon long wol, ol man oli gat ol prapa histri blong olgeta blong tokbaot taem ya. Ol stori blong olgeta oli defdefren lelebet, be olgeta evriwan oli gat sam haf we i sem mak, olsem haf ya we i talem se smol man wetem sam anamol nomo i laef i stap.

?Ol man we oli pastru long Bigfala Wota we i ron oli laef i stap from we oli laki nomo? Baebol i talem se no. God i no talem long evri man se bambae i mekem Bigfala Wota i ron. Hem i talem samting ya long Noa nomo, mo biaen Noa i talemaot long ol man se bambae God i mekem Bigfala Wota i ron.​—Jenesis 6:​13-16; 2 Pita 2:5.

 Ol man we oli wantem laef i stap, oli mas joenem grup ya we i stapgud tugeta, mo oli mas obei long ol oda we God i givim tru long Noa. Sam anamol tu, oli pastru long Bigfala Wota from we oli stap wetem grup ya. God i givim sam advaes long Noa, blong hem i mekem rere evri samting blong sevem laef blong ol anamol.​—Jenesis 6:​17–7:8.

Plante handred yia biaen, laen blong Sem, pikinini boe blong Noa, i kam slef long Ijip. Be God i wantem se oli fri long Ijip mo oli go long wan kantri we hem i promes blong givim long Ebraham, olfala bubu blong olgeta. Bakegen, God i no talem plan blong hem long evri man, be hem i talem samting ya long tufala man we bambae tufala i lidim ol narafala​—Moses wetem brata blong hem, Eron. (Eksodas 3:​7-10; 4:​27-31) Taem ol man Isrel oli aot long Ijip olsem wan grup, God i givim Loa blong hem long olgeta long Hil ya Sinae, mo oli kam nesen blong Isrel.​—Eksodas 19:​1-6.

I gat wan rod nomo blong ol wanwan man Isrel oli save kamfri long Ijip, hemia se oli mas joen wetem grup we God i stanemap, mo oli mas folem ol oda blong ol lida we God i putumap olgeta. Sam man Ijip tu oli save joen wetem grup ya. Taem ol man Isrel oli aot long Ijip, sam man Ijip oli folem olgeta. Olsemia, olgeta tu oli gat janis blong kasem ol blesing blong God.​—Eksodas 12:​37, 38.

Plante yia biaen, long ol faswan handred yia, Jisas i statem wok blong prij blong hem, mo i hivimap plante man oli kam disaepol blong hem. Jisas i luk olgeta olsem wan grup, mo long sem taem hem i lukaotgud long ol nid blong ol man wanwan. Jisas i talem long ol 11 aposol we oli stap tru long hem se: “Yufala ya, oltaem yufala i bin stap wetem mi long olgeta traem we mi mi bin kasem. Mo mi mi mekem wan kontrak wetem yufala, olsem we Papa blong mi i mekem wan kontrak wetem mi, from wan kingdom.” (Luk 22:​28, 29, NW ) Biaen, tabu spirit blong God i kam long ol disaepol taem oli stap tugeta olsem wan grup.​—Ol Wok 2:​1-4.

Ol eksampol ya oli soem klia we long taem bifo, oltaem God i wok wetem ol man blong hem olsem wan grup. I tru se God i bin toktok wetem sam man, olsem Noa, Moses, Jisas, mo sam narafala bakegen. Be God i yusum olgeta blong oli talemaot ol tok blong Hem long wan grup. Tede, God i mekem i sem mak long ol man blong hem tede. Taswe, kwestin i stap se: ?Sipos yumi joenem enikaen skul nomo, hemia i naf? Haf we i kam biaen i tokbaot impoten kwestin ya.

[Tok blong pija long pej 4]

Longtaem finis i kam, God i luk ol man blong hem olsem wan grup nomo