Beswan Presen We Yu Save Kasem Long Papa Mama Blong Yu

KLOSAP long en blong laef blong hem, olfala aposol Jon i raetem se: “Taem mi harem we oltaem ol pikinini blong mi oli stap folem ol tok we i tru, hemia i mekem mi mi harem gud moa, i winim we mi harem gud long ol narafala samting.”​—3 Jon 4.

Aposol Jon i tokbaot ol pikinini blong hem long saed blong spirit. Be plante papa mama oli gat ol semfala filing. Oli wokhad blong tijim ol pikinini blong olgeta ‘olsem we God i stap tijim yumi,’ mo oli haremgud taem oli luk ol pikinini blong olgeta “oli stap folem ol tok we i tru.” (Efesas 6:4) Yes, beswan presen we papa mama i save givim long ol pikinini blong olgeta, hemia sipos oli tijim olgeta long rod blong kasem laef we i no save finis. ?From wanem? From we man we i fasgud long God hem i traehad blong mekem olgeta samting we God i wantem, nao fasin ya “i givhan long hem long laef ya long wol, mo bakegen, long laef ya we bambae i kamtru biaen.”​—1 Timoti 4:8.

Jeova hem i wan Papa we fasin blong hem i stretgud olgeta. Hem i tinghae long ol papa mama we oli ona long hem mo we oli traehad blong tijim ol pikinini blong olgeta long saed blong spirit. Taem ol pikinini oli obei long tijing ya, oli glad blong joen long trufala wosip wetem papa mama blong olgeta. Taem ol pikinini ya oli kam bigman, oli gat plante gudfala memori blong ol samting we oli bin mekem wetem papa mama blong olgeta long wosip blong Jeova. Sam blong olgeta oli glad blong rimemba faswan taem we oli givim wan tok long Tiokratik Skul. * No maet oli tingbaot faswan taem we oli ridim wan vas blong Baebol taem oli go prij wetem papa mama blong olgeta. Oli rimembagud taem papa mama blong olgeta i ridim buk ya My Book of Bible Stories no Listening to the Great Teacher * long olgeta. Gabriel i rimemba sam samting we hem i laekem tumas, i se: “Taem mi gat fo yia nomo, mama blong mi i stap sing long mi evri dei, taem hem i stap rerem kakae. I gat wan singsing blong Kingdom we i kasemgud filing blong mi. Biaen, singsing ya i halpem mi blong luk se wok blong Jeova i impoten tumas.” Maet yu tu yu rimemba naesfala singsing ya we Gabriel i tokbaot. Hemia singsing namba 157 long buk ya Mekem Singsing Long Jeova, we taetel blong hem se “Ol Yangfala Oli Save Wosip Long Jeova.”

Singsing ya i stat wetem ol tok ya: “Ol pikinini bifo i singaot;/mo oli presem nem blong Jisas Kraes.” Tru ya, i gat sam pikinini we oli bin gat janis blong kampani wetem Jisas. Ol pikinini ya oli mekem Jisas i glad from we fasin blong olgeta i naes mo oli no gat tu fes. Jisas i yusum fasin blong ol pikinini  we oli wantem lanem plante samting, olsem wan eksampol we ol disaepol blong hem oli mas folem. (Matiu 18:​3, 4) Yes, ol pikinini oli save wosipim Jeova. Singsing ya i gohed i se: “I tru, oli save ona long God.”

Tru long gudfala fasin blong olgeta​—long haos, long skul, no long sam narafala ples bakegen—​plante pikinini oli givim ona long God mo long famle blong olgeta. God i blesem olgeta wetem ‘papa mama we i tijimgud’ olgeta. (Dutronome 6:7) Ol papa mama we oli fasgud long God oli mekem samting we God i wantem. Mo God, we hem i wan Papa we i gat lav, i tijim ol man blong hem blong folem rod ya we i stret blong folem. !Ol papa mama oli kasem plante blesing from! !Oli tijim ol yangfala long famle blong olgeta, mo oli harem gud tumas taem oli luk we ol pikinini ya ‘oli obei gud’ long olgeta! (Aesea 48:​17, 18) Angélica, we naoia hem i stap wok long branj ofis blong ol Witnes blong Jeova long Meksiko, i talem se: “Oltaem, papa mama blong mi oli traehad blong laef folem ol rul blong Baebol. From samting ya, mi haremgud long laef blong mi taem mi smol yet. Mi hapi long taem ya.”

Ol Kristin ya oli agri se i impoten blong kipim sas samting ya long saed blong spirit we papa mama i pasem i kam long olgeta. Maet yu yu wan yangfala we i stap gruap long wan famle we i folem ol gudfala Kristin fasin. Sipos i olsem, singsing ya i pulum yu blong mekem wan samting: “Ol yangfala Kristin oli mas stap long rod ya we i klin.” Taem i stap kam we bambae yu mas tekem prapa disisen blong yu, taswe, naoia we yu yangfala yet, yu mas lanem blong ‘trastem God./Yu no mas joen long ol rabis fren.’

Sipos yu mestem mo yu wantem moa blong gat gudnem long fes blong ol man, trening we yu kasem i blong nating nomo, mo yu save spolem fiuja blong yu. Sipos yu wantem tumas blong mekem ol fren blong yu oli glad, samting ya i save pulum yu blong no moa lukaotgud. Sam yangfala oli joen wetem ol fren we, long tingting blong olgeta, oli no denja nating, oli naes mo oli gat ol gudfala fasin. Be ol fren ya oli no intres nating long ol Kristin fasin. Hemia samting we stori blong yangfala gel ya Tara i traem soemaot long video kaset ya Young People Ask​—How Can I Make Real Friends? Sem mak olsem Tara, ol yangfala Kristin we oli joen wetem olgeta we oli no tinghae long trufala wosip, bambae oli luksave kwiktaem nomo no smoltaem biaen, se ‘ol rabis fren i save spolem fasin blong olgeta,’ olsem singsing ya i talem. Man i save traehad blong plante yia blong wokem ol gudfala fasin, be ol gudfala fasin ya oli save lus wantaem nomo.

I tru se i no isi blong fasgud long God. Nating se i olsem, singsing ya i gohed i se, sipos yu “tingting long God taem yu yangfala yet,/mo mekem wok blong hem wetem trutok,” bambae yu bildimap wan strong fandesen mo yu kasem ol gudfala frut. Mo “taem yu kam bigman mbae yu harem gud.”  Bambae fasin tangkiu blong yu i kam dip moa taem yu luksave se, taem Jeova i lukaot long yu wetem lav, i no gat wan samting i save blokem yu blong yu mekem ol samting we i stret long fes blong hem. Hemia nao rod blong kam wan bigman we i save yusum tingting blong hem mo we i fasgud long God. Mo antap long samting ya, sipos yu waes mo yu folem ol advaes blong Kristin papa mama blong yu, bambae yu gat janis blong ‘mekem God i glad oltaem long yu.’ I no gat wan samting we i gud moa i bitim janis ya blong mekem God i glad.​—Ol Proveb 27:11.

Taswe, yufala ol yangfala, rimemba oltaem se trening ya we yu kasem long Jeova mo papa mama blong yu i impoten tumas. Mifala i prea se bigfala lav ya we oli gat long yu bambae i pulum yu blong mekem ol samting we Jeova i glad long hem. Olsem Jisas Kraes mo yangfala Timoti, bambae yu mekem Papa blong yu long heven, wetem papa mama blong yu long wol, oli hapi. Mo sipos long fiuja yu tu yu kam wan papa no wan mama, ating bambae yu agri wetem Angélica, we yumi tokbaot hem finis, we i se: “Sipos wan dei mi gat wan pikinini, bambae mi traehad blong putum lav blong Jeova insaed long hat blong hem stat long taem we hem i smol yet, blong lav ya i lidim hem oltaem.” !Yes, nambawan rod ya we i lidim yu yu go long laef we i no save finis, hem i beswan presen we yu save kasem long papa mama blong yu!

[Ol Futnot]