‘Hem i Tijim Mifala Blong Respektem Skul Blong Hem’

WAN Witnes blong Jeova long provins blong Rovigo long Itali, i faenemaot se hem i gat kansa, mo se hem i save ded from sik ya. Hem i go slip long hospital plante taem mo hem i talem long ol dokta se oli no mas putum blad long bodi blong hem, be oli save yusum ol narafala meresin. Taem hem i gobak long haos blong hem, ol dresa we oli wok long saed blong sik ya kansa oli stap kam luk hem.

Ol dokta mo dresa we oli save woman ya we i gat 36 yia blong hem, oli sapraes long strong bilif blong hem, mo oli glad long fasin blong hem we hem i traehad oltaem blong folem ol advaes blong olgeta. Jes bifo we Witnes ya i ded from sik blong hem, wan dresa we hem i bin givhan long hem plante, i raetem stori blong woman ya we hem i kolem Angela, long wan niuspepa blong ol dresa. Hem i se:

“Angela i hapi oltaem mo i gat strong tingting blong winim sik ya. Hem i save se hem i mas ded from sik ya, mo hem i stap lukaot rod mo meresin blong winim sik ya, olsem we yumi evriwan bambae i mekem sipos yumi stap long ples blong hem. . . . Sloslo, mifala ol dresa i savegud Angela. Taem mifala i wantem givhan long hem, hem i neva agensem mifala. Defren olgeta, Angela i mekem i isi long mifala from we hem i talemaot evri samting we i stap long tingting blong hem. Mifala i glad nomo blong go luk hem, from we mifala i save se smoltaem we mifala i pasem wetem hem, bambae mifala i storian wetem wan woman we i gat stret tingting mo filing, mo we i save leftemap tingting blong mifala tu, i no se mifala i leftemap tingting blong hem nomo. . . . Kwiktaem nomo, mifala i luksave se from skul blong hem, bambae hem i no save agri long ol rod blong winim sik we mifala i wantem yusum.” Dresa ya i talem tok ya from we hem i ting se Angela i mas letem olgeta oli putum blad long bodi blong hem, be Angela i no wantem samting ya.​—Ol Wok 15:​28, 29.

Dresa ya i gohed blong storian se: “Mifala i talem long Angela se mifala i kasem trening finis blong givhan long ol sikman, taswe mifala i no save agri long disisen blong hem. Be hem i halpem mifala blong kasem save se laef i wan samting we i sas tumas long tingting blong hem. Mo tu, mifala i kasem save se skul blong hem i impoten tu long laef blong hem mo laef blong famle blong hem. Angela i no letem tingting blong hem i kam slak, hem i gohed nomo blong faetem sik ya. Hem i gat strong tingting. Hem i wantem tumas blong winim sik ya, hem i stap traehad from we hem i wantem laef. Hem i talemaot klia ol tok we i soem strong tingting mo bilif blong hem. Hem i gat wan tingting mo bilif we i strong bitim tingting mo bilif blong mifala. . . . Angela i tijim mifala se i impoten blong respektem skul blong hem, hemia samting we ol trening blong mifala i no tijim mifala long hem. . . . Mifala i ting se samting we Angela i tijim mifala long hem i impoten tumas, from we oltaem mifala i givhan long ol man we oli gat ol defdefren tingting, laef blong olgeta i defdefren, mo oli stap long ol defdefren skul. Wanwan long olgeta oli save tijim mifala long wan samting, mo mifala i save givim samting long wanwan long olgeta.”

Niuspepa ya i tokbaot Ol Rul We Ol Dresa Long Itali Oli Folem, we i kamaot long yia 1999. Pepa we i tokbaot ol rul ya i talem se: “Taem dresa i mekem wok blong hem, hem i mas tingbaot skul blong sikman, ol rul we sikman i folem long saed blong fasin blong hem, kalja blong hem, kantri blong hem, mo i mas tingbaot filing blong hem olsem wan woman no wan man.” Maet sam dokta mo dresa oli faenem i had blong respektem bilif blong wan sikman, be mifala i talem bigfala tangkiu long olgeta we oli naf blong mekem olsem mo mifala i tinghae long olgeta.

Ol Witnes blong Jeova oli tingting gud bifo we oli tekem disisen long saed blong helt blong olgeta mo meresin we oli agri blong tekem. Oli tingbaot ol tok blong Baebol olsem Angela i mekem. Oli no wan krangke skul we tingting blong olgeta i olbaot. (Filipae 4:5) Long olgeta ples blong wol, naoia plante moa dokta mo dresa oli respektem disisen blong ol Witnes long saed blong helt.