Luksave Se Laef i Wan Sas Presen

“[Blad blong Kraes] i stap mekem tingting blong yumi i klin long ol samting we yumi mekem we i blong ded nomo, blong yumi save mekem ol wok blong God ya we i laef, i stap we i stap.”​—HIBRUS 9:​14.

1. ?Wanem i soemaot se yumi tinghae long laef?

 ?SIPOS yu yu mas talem wanem praes i stret long laef blong yu, bambae yu talem hamas? Yumi tinghae long laef blong yumi mo laef blong ol narafala. From samting ya, taem yumi sik yumi go luk dokta, mo samtaem we yumi no sik tu yumi go luk dokta blong jekap nomo. Yes, yumi wantem stap laef mo yumi wantem gat wan strong bodi. Ol man we oli olfala finis mo oli handikap, be olgeta tu oli no wantem ded, oli wantem stap laef nomo.

2, 3. (a) ?Folem tok blong Ol Proveb 23:​22, yumi mas mekem wanem? (b) ?Olsem wanem God i joen wetem wok ya we Ol Proveb 23:22 i tokbaot?

² Sipos yu tinghae long laef, samting ya bambae i gat paoa long fasin we yu mekem long ol narafala. Blong luksave samting ya, tingbaot tok ya blong Baebol: “Pikinini blong mi. Mi mi papa blong yu. Yu mas lesin long mi, from we mi mi bonem yu. Mo taem mama blong yu i kam olfala, yu mas soemaot long hem, we yu yu stap tingbaot ol samting we hem i mekem long yu.” (Ol Proveb 23:22) Tok ya “lesin” i no minim nomo se yu haremsave ol tok blong papa blong yu. Proveb ya i minim se yu harem ol tok ya mo yu obei long olgeta tu. (Eksodas 15:26; Dutronome 7:12; 13:18; 15:5; Josua 22:2; Ol Sam 81:13) ?Folem Tok ya blong God, from wanem yu mas lesin? ?Yu yu lesin nomo from we papa mama blong yu tufala i olfala moa long yu, mo tufala i gat save mo waes? Nogat. Vas ya i talem se yu lesin long papa blong yu from we hem i “bonem yu.” Sam Baebol oli tanem vas ya olsem: “Lesin long papa blong yu we i givim laef long yu.” I klia se, sipos yu tinghae long laef, bambae yu wantem soem tangkiu long hemia we i stamba blong laef blong yu.

³ Sipos yu yu wan trufala Kristin, bambae yu bilif se Jeova i Bigfala Stamba blong laef. Hem nao i mekem se yu yu “gat laef,” yu save “wokbaot,” filim mo tajem samting, yu save “mekem evri samting,” tingbaot mo mekem plan, mo yu save plan tu from laef we i no save finis long fiuja. (Ol Wok 17:28; Ol Sam 36:9; Prija 3:11) Olsem Ol Proveb 23:22 i talem, i stret nomo blong “lesin” mo obei long God. Yu mas wantem blong kasem tingting blong God long saed blong laef mo yu mas letem tingting ya i lidim yu, i bitim we yu folem tingting blong ol narafala.

Respek Long Laef

4. ?I no longtaem afta we Jeova i wokem man, wanem i hapen blong soem se man i mas gat respek long laef?

⁴ I no longtaem afta we Jeova i wokem man, hem i mekem i klia se man i no mas yusum laef blong hem olsem hem nomo i wantem, mo i no mas westem laef ya. Ken i letem jalus i lidim hem blong i kam kros tumas, ale hem i tekemaot laef blong gudfala brata blong hem Ebel. ?Yu ting se Ken i gat raet blong tekem wan disisen olsem long saed blong laef? God i no ting se hem i gat raet. God i panisim Ken from. Hem i se: “?Wanem samting ya we yu yu mekem? !Yu lesin! Brata blong yu i ded finis. Blad blong hem i ron i go long graon, mo blad ya i stap krae long mi yet blong mi stretem samting ya.” (Jenesis 4:10) Makemgud se blad blong Ebel we i ron i go long graon, hem i olsem laef blong hem we Ken i finisim wantaem nomo, mo blad ya i krae i go long God, blong hem i givim panis long Ken from.​—Hibrus 12:24.

5. (a) ?Long taem blong Noa, God i putum tabu long wanem samting, mo hu ol man we oli mas obei long loa ya? (b) ?From wanem tabu ya i wan impoten samting?

⁵ Afta we Bigfala Wota i ron, eit man mo woman nomo i stap long wol, nao olgeta ya oli statem ol laen blong man bakegen. God i talem sam tok we i stret long olgeta man, blong soemaot moa wanem tingting blong hem long saed blong laef mo blad. Hem i talem se stat long taem ya ol man oli save kakae mit blong anamol. Be hem i putum tabu long wan samting, i se: “Fastaem, mi mi givim ol kakae nomo long yufala blong yufala i kakae, be i stat naoia, mi givim ol [anamol] ya tu long yufala, blong oli kam mit blong yufala blong kakae. Be bambae yufala i no save kakae mit we blad blong hem i stap long hem yet. Yufala i  mas letem blad blong hem i ronaot fastaem, finis bambae yufala i save kakae. Mi mi blokem samting ya, from we laef i stap long blad.” (Jenesis 9:​3, 4) Sam man Jiu oli talem mining blong vas ya se ol man oli no mas kakae mit mo blad blong wan anamol we i laef i stap. Be biaen i kam klia se God i talem ol tok ya blong blokem man, blong i no kakae blad. Mo tu, loa ya we God i talem long Noa, i givhan bigwan blong soemaot stamba tingting we hem i gat​—hemia tingting blong givim janis long ol man blong oli save kasem laef blong olwe. Tingting ya i joen wetem blad.

6. ?God i talem wanem long Noa blong soemaot tingting blong hem se laef i tabu?

⁶ God i go moa i se: “Sipos wan man i kilim narafala man i ded, bambae mi mi panisim hem. Mo sipos wan anamol i kilim man i ded, bambae mi mi kilim anamol ya tu i ded. Man we i kilim narafala man i ded, ol man ples blong hem oli mas kilim hem i ded, from we mi mi mekem we man i tekem fasin blong mi, i olsem mi.” (Jenesis 9:​5, 6) Tok ya we God i talem long olgeta man, i soem se long tingting blong Hem, blad blong man i olsem laef blong hem nomo. God i givim laef long man, mo i no gat wan man we i gat raet blong tekemaot laef ya we blad i saen blong hem. Sipos wan man i kilim narafala i ded, olsem Ken i mekem, God i gat raet blong “kilim hem i ded.”

7. ?From wanem, tok we God i talem long Noa long saed blong blad i mas pulum tingting blong yumi?

⁷ Long ol tok ya, God i stap talem long ol man se oli no mas yusum blad long rong fasin. ?From wanem God i talem olsem? ?Wanem bigfala tingting blong God we i stap biaen long loa ya? ?Yu yu bin tingbaot tufala kwestin ya? Ansa blong tufala i joen wetem wan impoten tijing blong Baebol we i olsem stamba blong Kristin bilif. Nating se i olsem, plante skul oli jusum blong tanem baksaed long tijing ya. ?Wanem nao tijing ya? ?Mo olsem wanem tijing ya i joen wetem laef blong yumi, ol disisen blong yumi, mo ol samting we yumi mekem?

?Isrel i Save Yusum Blad Olsem Wanem?

8. ?Long Loa, Jeova i talem se i tabu blong yusum blad long wanem fasin?

⁸ Taem Jeova i givim Loa long ol man Isrel, hem i givim moa save bakegen long saed blong laef mo blad. Olsem nao, hem i soemaot moa olsem wanem stamba tingting blong hem bambae i kamtru. Ating yu save finis we Loa i talem long ol man Isrel se oli mas givim sam presen i go long God, olsem kakae blong garen, olifoel, mo waen. (Levitikas 2:​1-4; 23:13; Namba 15:​1-5) Oli mas givim sam anamol tu olsem sakrefaes. Long saed blong ol anamol ya, God i talem se: “Olgeta samting we i gat laef, be laef blong olgeta i stap long blad blong olgeta. Taswe mi mi mekem rod blong yufala se yufala i save kilim anamol, mo pris i save kafsaedem blad blong hem i go long Olta ya blong mi, blong tekemaot ol sin blong yufala. Blad blong anamol, we i olsem laef blong hem, hem nao i save tekemaot ol sin blong yufala. Taswe mi mi talem long yufala, se yufala wetem ol narafala man we oli stap wetem yufala, bambae yufala i no mas kakae . . . blad.” Jeova i talem tu se, sipos wan long olgeta i go lukaot mit, nao i holem wan anamol no wan pijin mo i kilim, hem i mas kafsaedem blad blong hem i go long graon mo i mas berem. Wol i olsem ples we God i stap putum leg blong hem antap long hem. Taswe, taem man i kafsaedem blad blong wan anamol i go long graon, hem i soem se hem i stap givim laef ya i gobak long Man ya we i Givim laef.​—Levitikas 17:​11-13; Aesea 66:1.

9. ?Loa i talem se ol man Isrel oli save yusum blad long wanem rod nomo, mo from wanem risen?

⁹ Loa ya i no wan kastom blong skul blong olgeta nomo we i no impoten long yumi tede. Nogat. ?Yu yu luksave from wanem ol man Isrel oli no mas kakae blad? God i talem se: “Taswe mi mi talem long yufala, se yufala wetem ol narafala man we oli stap wetem yufala, bambae yufala i no mas kakae . . . blad.” ?From wanem? “Blad blong anamol, we i olsem laef blong hem [mo we pris i kafsaedem i go long olta], hem nao i save tekemaot ol sin blong yufala.” Tok ya i givhan long yumi blong luksave from wanem God i talem long Noa se ol man oli no mas kakae blad. ?Yu yu luksave from wanem? God we i wokem yumi i jusum blong putum wan bigfala mining long blad, hem i makemaot blad olsem samting blong yusum long wan spesel rod nomo we i save sevem laef blong plante man. Blad bambae i mekem wan impoten wok blong tekemaot sin (askem sore blong God). Yes, long Loa, God i talem se ol man Isrel oli save yusum blad long wan fasin nomo: Ol man we oli wantem Jeova blong fogivim sin blong olgeta, oli save putum blad long olta blong askem God blong sore long olgeta mo sevem laef blong olgeta.

10. ?From wanem blad blong ol anamol i no save tekemaot sin fulwan, be ol sakrefaes ya oli mekem ol man we oli folem Loa i tingbaot wanem?

¹⁰ Tingting ya se blad i save tekemaot sin, i klosap sem mak long bilif blong ol Kristin. Long wan leta blong Kristin aposol Pol, hem i tokbaot haf ya blong Loa, i se: “Long fasin blong Loa ya, klosap olgeta samting, be pris i mas yusum blad blong anamol no pijin blong mekem olgeta oli klin long fes blong God. Mo  sipos i no gat blad i ron, bambae God i no save tekemaot sin blong man.” (Hibrus 9:22) Pol i soemaot klia se ol sakrefaes blong ol man Isrel oli no save mekem se oli kam stretgud olgeta we oli no moa gat sin. Nogat. Hem i raetem se: “Evri yia, ol sakrefaes ya oli stap mekem ol man oli stap tingbaot bakegen ol sin blong olgeta, from we blad blong bul mo blad blong man nani i no save tekemaot sin blong man samtaem.” (Hibrus 10:​1-4) Nating se i olsem, ol sakrefaes ya i impoten. Sakrefaes i mekem ol man Isrel oli tingbaot se oli sinman, mo oli nidim wan samting we i bitim ol sakrefaes, blong oli save kamfri olgeta long sin. Blad ya we i saen blong laef blong ol anamol i no save tekemaot sin blong ol man. ?Ale, wanem blad i save mekem samting ya?

Man We i Givim Laef Long Yumi i Mekem Rod

11. ?Olsem wanem yumi save se blad blong anamol we oli givim olsem sakrefaes i gat wan bigfala mining moa?

¹¹ Loa i stap pulum ol man blong tingbaot samting we i moagud olgeta blong mekem wil blong God i kamtru. Pol i askem se: “?God i givim Loa blong wanem?” Nao hem i ansa se: “Hem i joenem Loa ya long promes blong hem, blong soemaot ol fasin we i nogud, mo i putum Loa blong i stanap, gogo kasem taem we man ya we i laen blong Ebraham, we promes ya i tokbaot bifo, hem i kamtru. Taem Loa i kam, i gat ol enjel oli kam givim long Moses, blong hem i karem i kam givim long olgeta man.” (Galesia 3:19) Narafala tok we Pol i raetem i klosap sem mak, i se: “Loa we God i givim long Moses, hem i pija nomo blong ol tru samting we i stap. Hem i no klia gud, i olsem sado nomo blong ol gudgudfala samting, we bambae i kamtru.”​—Hibrus 10:1.

12. ?Olsem wanem stamba tingting blong God long saed blong blad i stap kam klia?

¹² Long stadi ya, yumi tokbaot finis se, long taem blong Noa, God i talem se ol man oli save kakae mit blong anamol, be oli no mas kakae blad. Biaen, God i tokbaot olgeta samting we i laef, se “laef blong olgeta i stap long blad blong olgeta.” Yes, hem i jusum blong mekem blad i kam olsem wan saen blong laef, mo hem i talem se: “Mi mi mekem rod blong yufala se yufala i save kilim anamol, mo pris i save kafsaedem blad blong hem i go long Olta ya blong mi, blong tekemaot ol sin blong yufala.” Be, God i mekem sam moa nambawan samting blong soemaot stamba tingting blong hem. Loa i olsem sado nomo blong ol gudgudfala samting we bambae i kamtru. ?Wanem gudgudfala samting?

13. ?From wanem ded blong Jisas i impoten tumas?

¹³ Pol i tokbaot ol tru samting we i stap, hemia i minim ded blong Jisas Kraes. Yu save finis se oli mekem Jisas i harem nogud tumas long bodi blong hem mo oli nilim hem long wan pos. !Hem i ded olsem wan man nogud ya! Pol i raetem se: “Long taem ya we yumi no gat paoa yet blong kam stret man long fes blong God, stret long taem we God i makem, Kraes i ded blong sevem ol man nogud. . . . God i lavem yumi tumas, mo i soemaot samting ya long yumi long fasin ya we Kraes i ded blong sevem yumi, long taem ya we yumi stap mekem i nogud yet.” (Rom 5:​6, 8) Taem Kraes i ded from yumi, hem i givim wan ransom we i kavremap ol sin blong yumi. Ransom ya i stamba tijing blong ol Kristin. (Matiu 20:​28, NW; Jon 3:16; 1 Korin 15:3; 1 Timoti 2:6) ?Be olsem wanem ransom i joen wetem blad mo laef? ?Mo olsem wanem hem i joen wetem laef blong yu?

14, 15. (a) ?Olsem wanem sam Baebol oli makem ded blong Jisas nomo long Efesas 1:7? (b) ?Maet yu save mestem wanem samting long Efesas 1:7?

¹⁴ Sam skul oli toktok plante long saed blong ded blong Jisas, ol man long ol skul ya oli talem ol tok olsem “Jisas i ded blong sevem mi.” Long sam Baebol, Efesas 1:7 i talem olsem: “Hem mo ded blong hem i sevem yumi, hemia se, i tekemaot ol sin blong yumi.” (The American Bible, we Frank Scheil Ballentine i wokem long 1902) “Ded blong Kraes i mekem yumi kam fri man, mo i tekemaot ol sin blong yumi.” (Today’s English Version, 1966) “From Kraes mo sakrefaes blong laef blong hem, yumi kam fri man, we i min se God i fogivim ol sin blong yumi.” (The New Testament, we William Barclay i wokem  long 1969) “Tru long ded blong Kraes, God i fogivim sin blong yumi mo yumi kam fri man.” (The Translator’s New Testament, 1973) Ating yu luk we ol Baebol ya oli makemgud ded blong Jisas. Maet samfala oli talem se: ‘Ded blong Jisas i impoten tumas. ?Wanem samting i no stret long ol Baebol ya?’

¹⁵ Sipos yu lukluk nomo long ol Baebol ya, maet yu mestem wan samting we i impoten tumas, nao bambae yu no kasem fulwan mining we Baebol i wantem givim. Ol Baebol ya oli haedem wan samting we i stap long Efesas 1:7. Long vas ya, ol olfala hanraet oli yusum wan Grik tok we i minim “blad.” Taswe, plante Baebol, olsem Baebol Long Bislama oli tanem olfala hanraet i stret moa, se: “Nao from we blad blong Kraes i ron, God i mekem yumi ya we yumi joen long Kraes, yumi friman finis. Hem i fogivim yumi finis, i tekemaot ol sin blong yumi. Gladhat blong God i bigwan tumas.”

16. ?Tok ya “blad blong Kraes” i mas pulum yumi blong tingbaot wanem?

¹⁶ Tok ya “blad blong Kraes” i gat bigfala mining mo i mas pulum yumi blong tingbaot plante samting. Ded blong wan man i no naf blong tekemaot sin, nating se man ya hem i Jisas we i stretgud olgeta. Loa mo speseli Dei blong Stretem Sin i sado nomo blong sam narafala samting, ale Jisas nao i mekem ol samting ya oli kamtru. Loa i talem se long spesel Dei ya blong Stretem Sin, ol man Isrel oli mas kilim sam anamol olsem sakrefaes. Nao hae pris i mas tekem blad blong ol anamol ya i go insaed long Rum we i Tabu we i Tabu, long haos tapolen no long tempol. Long ples ya, i olsem we hem i stanap fored long God, mo i givim blad ya i go long hem.​—Eksodas 25:22; Levitikas 16:​2-19.

17. ?Dei blong Stretem Sin i olsem sado nomo blong wanem samting we Jisas i mekem?

¹⁷ Olsem Pol i talem, Dei blong Stretem Sin i olsem sado nomo blong wan samting we Jisas i mekem. Fastaem, Pol i tokbaot hae pris blong Isrel we wan taem nomo long wan yia, hem i go insaed long Rum we i Tabu we i Tabu, i givim blad i go long God. Blad ya i “blong tekemaot ol sin blong hem, mo i blong tekemaot ol sin we ol man oli mekem, we oli no save se oli mekem sin.” (Hibrus 9:​6, 7) Jisas i mekem samting we i klosap sem mak. Afta we hem i laef bakegen olsem wan spirit man, hem i go insaed long heven stret. Wan spirit man i no gat bodi blong mit mo blad, ale hem i save go stanap “long fes blong God blong toktok long saed blong yumi.” ?Hem i givim wanem i go long God? Hem i no givim wan samting we yumi save luk, be hem i givim samting we i gat bigfala praes. Pol i gohed i se: “[Kraes] i Hae Pris . . . [nao] hem i no tekem blad blong man nani mo blad blong smol bul blong tekemaot ol sin blong ol man, nogat. Hem i tekem blad blong hem nomo, nao i go insaed wan taem nomo, i mekem wok ya blong tekemaot ol sin blong yumi, mo i mekem yumi fri, nao bambae yumi fri gogo i no save finis. Blad blong man nani mo blad blong ol bul . . . [i save mekem ol man] oli kam klin bakegen. Be blad blong Kraes i save mekem wok we i strong moa, i winim wok blong ol samting ya blong bifo. Kraes i olsem wan anamol we i no gat wan samting nating i rong long bodi blong hem, we oli kilim blong tekemaot sin blong man. . . . Blad ya blong hem i stap mekem tingting blong yumi i klin long ol samting we yumi mekem we i blong ded nomo, blong yumi save mekem ol wok blong God ya we i laef, i stap we i stap.” Yes, i olsem we Jisas i givim blad blong hem we i gud tumas, i go long God.​—Hibrus 9:​11-14, 24, 28; 10:​11-14; 1 Pita 3:18.

18. ?From wanem ol tok blong Baebol long saed blong blad i mas impoten long ol Kristin tede?

¹⁸ Trutok ya we i kamaot long God, i givhan long yumi blong kasem save long ol nambawan samting we Baebol i talem long saed blong blad​—tingting blong God mo from wanem hem i tingting olsem, tingting we yumi mas gat, mo from wanem yumi mas respektem tabu we God i putum long blad. Taem yu ridim ol buk long Grik haf blong Baebol, bambae yu faenem plante vas we oli tokbaot blad blong  Kraes. (Lukluk bokis.) Ol vas ya oli soemaot klia se wanwan Kristin oli mas bilif long “blad blong [Jisas].” (Rom 3:25) I gat wan rod nomo blong kasem fogif blong ol sin mo blong gat pis wetem God, hemia tru long “blad blong Kraes [we] i ron.” (Kolosi 1:20) Hemia i tru tumas long saed blong olgeta we Jisas i mekem wan spesel kontrak wetem olgeta, se bambae oli rul wetem hem long heven. (Luk 22:​20, 28-30; 1 Korin 11:25; Hibrus 13:20) Mo hemia i tru tu long saed blong “bigfala kampani” (NW ) tede, we bambae oli laef tru long taem blong “bigfala trabol” mo bambae oli haremgud long laef we i no save finis long paradaes long wol ya. I olsem we oli “wasem ol klos blong olgeta finis long blad blong Smol Sipsip ya we i ded.”​—Revelesen 7:​9, 14.

19, 20. (a) ?From wanem God i jusum blong putum loa long saed blong blad, mo wanem filing we yumi mas gat long saed ya? (b) ?I stret nomo we yumi wantem save wanem?

¹⁹ I klia se God i tingbaot blad olsem samting we i gat spesel mining. Yumi tu, yumi mas tingbaot blad long sem fasin ya. Bigfala Man ya we i Wokem yumi mo we hem i tingbaot laef blong yumi, hem i gat raet blong putum tabu long blad. From we hem i tingbaot laef blong yumi tumas, hem i tekem disisen se blad i wan samting blong yusum long fasin we i impoten tumas, hemia blong mekem rod long yumi blong yumi save kasem laef blong olwe. Fasin ya i joen wetem blad blong Jisas we i sas tumas. !Yumi mas gat bigfala tangkiu long Jeova God! !Hem i mekem i gud tumas long yumi! !Hem i yusum blad, yes blad blong Jisas, blong sevem laef blong yumi! !Mo yumi talem bigfala tangkiu long Jisas tu from we hem i letem blad blong hem i ron olsem wan sakrefaes blong pemaot yumi! Tru ya, yumi kasem save long filing blong aposol Jon we i talem se: “Jisas Kraes ya, hem i lavem yumi tumas, mo long ded blong hem, we blad blong hem i ron, hem i tekemaot ol sin blong yumi, i mekem yumi fri. Hem i King, mo i mekem we yumi kam ol man  blong hem, mo yumi ol pris blong mekem wok blong God ya we i Papa blong hem, mo i God blong hem tu. Bambae yumi stap leftemap nem blong hem i go antap oltaem, yumi stap talemaot we hem i gat olgeta paoa, gogo i no save finis. Amen.”​—Revelesen 1:​5, 6.

²⁰ Longtaem finis, God blong yumi we i gat olgeta waes mo i givim laef long yumi, i tingting blong mekem rod ya blong sevem yumi. From samting ya, maet yumi wantem save se: ‘?Bigfala wok ya blong hem i mas gat paoa olsem wanem long ol disisen blong yumi mo ol samting we yumi mekem?’ Nekis stadi bambae i tokbaot samting ya.

?Bambae Yu Yu Ansa Olsem Wanem?

• ?Long stori blong Ebel mo Noa, yumi luk se God i gat wanem tingting long saed blong blad?

• ?Long Loa, God i talem se ol man oli save yusum blad long wanem rod nomo, mo from wanem?

• ?Dei blong Stretem Sin i olsem sado nomo blong wanem samting we Jisas i mekem?

• ?Olsem wanem blad blong Jisas i save sevem laef blong yumi?

[Kwestin]

[Bokis blong pija long pej 18]

?BLAD BLONG HU I SAVE SEVEM YUMI?

“Yufala i mas lukaot gud long yufala, mo long ol man ya we Tabu Spirit i putum olgeta oli stap finis long han blong yufala. Yufala i mas lukaot long ol man blong jos blong God, olsem we man blong lukaot long sipsip i stap lukaot long ol sipsip blong hem. Yufala i mas mekem olsem, from we God i pemaot ol man ya finis long blad blong Pikinini blong hem.”​—Ol Wok 20:28.

“From we blad blong Kraes i ron, God i mekem yumi kam stret man finis long fes blong hem. Mo from we Kraes i ded olsem, i klia moa, se God bambae i no jajem yumi, bambae hem i sevem yumi.”​—Rom 5:9.

“Fastaem yufala i man blong wol ya nomo, yufala i no save God nating, mo yufala i no save putum tingting blong yufala i stap strong long ol promes ya blong hem. Fastaem yufala i stap longwe long mifala, be naoia, from we yufala i joen long Jisas Kraes, ded blong Kraes we blad blong hem i ron, hemia i tekem yufala i kam klosap long mifala finis.”​—Efesas 2:​12, 13.

“God i glad blong letem olgeta laef blong hem i stap long Kraes. Mo from we blad blong Kraes i ron long [“pos,” NW ], God i glad blong mekem rod long Kraes blong i tekem olgeta samting . . . oli kam joen long hem bakegen blong oli gat pis.”​—Kolosi 1:​19, 20.

“Ol brata mo sista. . . . Blad blong Jisas i mekem yumi klin finis, naoia yumi gat raet blong go insaed long Rum ya we i Tabu we i Tabu.”​—Hibrus 10:19.

“Yufala i save finis wanem samting we God i yusum blong pemaot yufala, blong tekemaot yufala long rabis laef ya we yufala i kasem long ol olfala blong yufala bifo, blong mekem yufala i fri. Hem i no yusum samting we i save kam nogud . . . [be] hem i yusum blad blong Kraes . . . Blad ya i olsem blad blong wan smol sipsip we i no gat wan samting nating i rong long bodi blong hem. Mo long fes blong God, blad ya blong Kraes i gud tumas.”​—1 Pita 1:​18, 19.

“Sipos yumi stap wokbaot long delaet, olsem we God i stap long delaet, oltaem bambae yumi evriwan i stap joen gud we yumi gat wan tingting nomo. Mo blad blong Jisas Pikinini blong God, bambae i stap wasemaot olgeta sin blong yumi, i stap mekem yumi klin.”​—1 Jon 1:7.

“Ol man oli kilim yu finis, mo long ded blong yu, we blad blong yu i ron, yu yu pemaot ol man, oli blong God. Olgeta ya oli kamaot long olgeta kala, mo long olgeta kantri, mo long olgeta laen, mo long olgeta lanwis. . . . Nao from ol samting ya, i stret nomo blong yu yu tekem buk ya, yu brekemaot ol gris blong kandel ya we i stap holemtaet.”​—Revelesen 5:9.

“Man ya we i agensem ol brata blong yumi . . . naoia God i sakemaot hem finis i gowe long heven. . . . Oli winim hem finis long paoa blong blad blong Smol Sipsip ya, mo long paoa blong trutok ya we oli stap talemaot.”​—Revelesen 12:​10, 11.

[Tok blong pija long pej 16]

Long Loa, God i soemaot klia se blad i save mekem wan wok blong givhan blong tekemaot sin

[Tok blong pija long pej 17]

Blad blong Jisas i save sevem plante man