?Ol Prea Blong Yu Oli Save Mekem Wan Jenis i Kamaot?

ATING yumi evriwan i fesem wan bigfala trabol finis long laef blong yumi we yumi no save olsem wanem blong dil wetem. Baebol i soemaot se aposol Pol i save we ol prea oli save mekem wan jenis i kamaot long ol trabol olsem.

Taem Pol i stap kalabus long Rom, hem i askem long ol brata blong hem blong oli prea from hem. Hem i talem se: “Mi mi wantem tumas se yufala i mas askem long God, blong mi save kambak bakegen long yufala kwiktaem.” (Hibrus 13:​18, 19) Long wan narafala taem, Pol i soemaot we hem i sua fulwan se God bambae i harem prea blong ol brata ya nao hem i save aot long kalabus ya kwiktaem. (Filimon 22) I no longtaem biaen, Pol i kam fri long kalabus mo hem i gohed bakegen long misinari wok blong hem.

?Be olsem wanem? ?Prea i rili save jenisim ol trabol blong yu? Maet i jenisim be maet i no jenisim tu samtaem. Tingbaot se, prea i no wan samting we yumi mekem nomo from we yumi man blong go long jos. Hem i rili wan storian we yumi mekem wetem Papa blong yumi ya we i stap long heven, we i gat bigfala paoa mo lav. Taem yumi prea, yumi mas harem se yumi fri blong talemaot stret ol samting we yumi wantem talem be biaen yumi mas wet wetem longfala tingting blong luk olsem wanem bambae Jeova i ansa long ol prea ya.

God bambae i no ansa stret long evri prea, mo maet bambae hem i no ansa long wei we yumi ting se i stret no long wan taem we yumi wantem. Tingbaot Pol, hem i prea bakegen mo bakegen from ‘nil blong aranis ya we i stap stikim hem.’ Nating se i olsem, God i no karemaot problem ya blong Pol, be hem i givim paoa long Pol taem hem i talem ol tok ya se: “Mi mi save givhan long yu long gladhat blong mi, mo hemia i naf blong holem yu. Taem we yu yu no gat paoa, paoa blong mi i save kam strong moa long yu.”​—2 Korin 12:​7-9.

Yumi tu, yumi save sua se nating sipos God i no karemaot sam trabol blong yumi, be hem i save mekem rod blong yumi, blong yumi winim samting ya. (1 Korin 10:13) I no longtaem bambae God i finisim ol trabol we ol man oli stap fesem tede. Be go kasem taem ya, sipos yumi lukluk i go long God we hem i “stap harem prea,” samting ya i save mekem wan jenis i kamaot long ol trabol we yumi fesem.​—Ol Sam 65:​2, NW.