God i Rili Kea Long Yu

I STRET nomo we yumi prea long God blong kasem help taem yumi fesem sam bigfala trabol. Baebol i talem se God “i gat olgeta paoa, mo man i no save makem waes blong hem.” (Ol Sam 147:​4-6) Hem nao i stret man we i save givhan long yumi blong stretem ol problem we yumi fesem. Mo tu, Baebol i singaot yumi blong yumi ‘talemaot ol trabol blong yumi long hem.’ (Ol Sam 62:8) Be sipos i olsem, ?From wanem plante man oli harem olsem we God i no ansa long ol prea blong olgeta? ?I min se God i no kea long ol man?

Yu no mas kwik blong blemem God from we i luk olsem se hem i no mekem wan samting. Tingbaot taem we yu yu pikinini yet. ?Taem papa mama blong yu i no wantem mekem evri samting we yu yu askem, yu mekem wanem? ?Yu yu gat tingting ya se oli no lavem yu? Plante pikinini oli gat tingting olsem. Be taem yu gruap, yu luksave we i gat plante defren fasin blong soem lav. Mo yu luksave we fasin ya blong talem yes long olgeta samting we wan pikinini i askem, hem i no wan gudfala fasin blong soem lav.

Long sem fasin, sipos Jeova i no ansa long ol prea blong yumi stret olsem we yumi wantem, i no min se hem i no kea long yumi. God i soem we hem i kea long yumi long plante defren rod.

“Long God Nomo, Yumi Gat Laef”

Faswan samting, God i mekem se “yumi gat laef, yumi stap wokbaot, mo yumi stap mekem evri samting.” (Ol Wok 17:28) God i givim laef long yumi. !Hemia wan pruf we hem i lavem mo i kea long yumi!

Antap long samting ya, Jeova i givim ol samting we yumi nidim blong stap laef evri dei. Baebol i talem se: “Yu mekem gras i gru blong ol anamol oli kakae, mo yu mekem ol samting we man i save planem. From samting ya, man i save wokem ol garen blong hem.” (Ol Sam 104:14) Yes, Man we i Wokem yumi i mekem moa, i no jes givim ol stamba samting we yumi nidim blong laef. Long gladhat blong hem, God ‘i stap mekem ren i foldaon, mo i stap mekem ol garen oli gat kakae long stret taem blong olgeta. Hem i stap givim kakae long yumi, mo hem i stap mekem yumi harem gud.’​—Ol Wok 14:17.

Nating se i olsem, maet sam man oli askem se: ‘?Sipos God i lavem mifala olsemia, from wanem hem i letem mifala i safa?’ ?Yu yu save ansa blong kwestin ya?

?Yumi Save Blemem God From Ol Trabol Blong Yumi?

Plante taem, ol man nomo oli gat fol from ol trabol we oli kasem. Olsem nao, ol man oli save gud we sam fasin blong laef oli denja. Nating se i olsem, ol man oli mekem nogud long saed blong seks, oli tekem tumas strong dring mo sam narafala drag, oli smok tabak, oli mekem ol spot we i denja, oli spid tumas taem oli draevem trak, mo plante narafala samting bakegen. ?Sipos man i safa from ol fasin ya, hu nao i gat fol? ?Hem i fol blong God no i fol blong man ya we i mekem ol samting we i no waes? Baebol i talem se: “Yufala i no mastik long samting ya. I no gat man i save giaman long God. Wanem sid we man i planem fastaem long garen blong hem, be frut blong hem nomo, man ya bambae i mas kakae.”​—Galesia 6:7.

Mo tu, plante taem ol man oli mekem i nogud long ol narafala. Taem wan kantri i faet agensem wan narafala kantri, i no fol blong God sipos plante man i safa. Taem wan man i brekem loa nao i kilim wan narafala man, ?yu ting se God i gat fol sipos man ya i harem nogud no i ded? !Nogat! Taem wan rula i strong tumas, i mekem i nogud bitim mak, mo i kilim i ded ol man we oli stap aninit long rul blong hem, ?yumi save putum fol long God? I no stret blong mekem samting ya.​—Prija 8:9.

?Nao olsem wanem long ol milian man we oli pua tumas mo oli ded from we oli no gat naf kakae? ?Hem i fol blong God? Nogat. Wol blong yumi i givim plante kakae, we i naf blong fidim evri man. (Ol Sam 10:​2, 3; 145:16) God i givim  plante gudfala samting, be ol man oli no stret long fasin blong olgeta blong seremaot ol samting ya, mekem se plante man oli no gat naf kakae mo oli pua. Mo ol man oli tingbaot olgeta wan nomo, taswe oli no save stretem trabol ya.

Stamba Blong Ol Trabol

?Hu i gat fol taem wan man i sik no i ded from we hem i olfala tumas? Bambae yu sapraes blong lanem se yumi no save blemem God from samting ya tu. Taem God i wokem ol man, hem i no wantem se oli kam olfala mo oli ded.

Taem Jeova i putum Adam mo Iv long garen blong Iden, hem i talem long tufala se bambae tufala i laef blong olwe long paradaes long wol. Hem i wantem we bambae ol man oli fulumap wol mo oli haremgud long ol samting we hem i givim long olgeta. Be, sipos oli wantem kasem laef ya, oli mas mekem wan samting. Bambae Adam mo Iv tufala i laef long paradaes, sipos tufala i stap obei oltaem long God we i Wokem tufala wetem lav.​—Jenesis 2:17; 3:​2, 3, 17-23.

Sore tumas, Adam mo Iv, tufala i rebel agensem God. Iv i jusum blong lesin long Devel Setan. Setan i giaman long Iv, i talem se God i blokem Iv blong i no haremgud long wan samting. Taswe Iv i stat mekem ol samting we hem nomo i wantem, mo hem i traem ‘kam olsem God, we i save ol fasin we i nogud mo ol fasin we i gud.’ Adam i folem Iv mo hem tu i rebel agensem God.​—Jenesis 3:​5, 6.

Taem Adam mo Iv tufala i mekem sin ya, tufala i soem we tufala i no stret blong laef blong olwe. Tufala i kasem ol nogud frut we i kamaot from sin blong tufala. Paoa blong tufala i godaon mo bodi blong tufala i kam nogud, mo biaen tufala i ded. (Jenesis 5:5) Be fasin rebel blong tufala i karem plante moa nogud frut. Yumi stap safa yet from sin blong Adam mo Iv. Aposol Pol i raetem se: “Wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” (Rom 5:12) Yes, from we Adam mo Iv tufala i rebel agensem God, sin mo ded i kasem olgeta man olsem wan rabis sik.

Beswan Pruf We i Soem Se God i Kea Long Yumi

?Hemia i min se ol man we God i wokem oli lus blong olwe? Nogat. Samting ya i pulum yumi blong lukluk i go long beswan pruf we i soem we God i kea long yumi. God i givim wan bigfala sakrefaes blong pemaot ol man long sin mo ded. Sakrefaes ya, hemia laef blong Jisas  we i stretgud olgeta, we hem i givim long yumi long gladhat blong hem. (Rom 3:24) Aposol Jon i raetem se: ‘God i lavem tumas ol man long wol, nao hem i givim Jisas, stret Pikinini blong hem, hem wan nomo we God i gat, blong olgeta man we oli bilif long hem bambae oli no save lus, oli gat laef we i no save finis.’ (Jon 3:16) Nambawan sakrefaes ya we i soem lav blong God, i openem rod bakegen blong yumi kasem laef we i no save finis. Pol i raetem tok ya long ol man Rom se: “Stret samting ya we wan man nomo i mekem, hem i mekem we God i talem se ol man oli save go fri, oli save laef.”​—Rom 5:18.

Yumi save sua we long stret taem blong hem, bambae God i mekem se i no moa gat man long wol we i safa no i ded. Defren olgeta, bambae ol man oli gat wan laef olsem we buk blong Revelesen i tokbaot, se: “!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, mo olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.” (Revelesen 21:​3, 4) Maet yu talem se, ‘Bambae mi no stap taem samting ya i kamtru.’ Be si, yu save stap long taem ya. Mo nating sipos yu ded bifo we taem ya i kamtru, God i save mekem yu yu laef bakegen. (Jon 5:​28, 29) Hemia nao stamba tingting blong God long saed blong yumi, mo hemia nao samting we bambae i kamtru. !Tru ya, i rong olgeta blong talem se God i no kea long ol man!

“Kam Klosap Long God”

I gud blong save we God i stanemap finis wan plan blong finisim ol trabol blong ol man long fiuja. ?Be olsem wanem long ol trabol blong yumi tede? ?Bambae yumi mekem wanem sipos wan man we yumi laekem tumas i ded, no sipos wan pikinini blong yumi i sik? Stret taem blong God blong karemaot sik mo ded i no kamtru yet. Baebol i talem se yumi mas wet smol yet, bifo we God i finisim ol trabol ya. Be God i no lego yumi. Disaepol Jemes i talem se: “Yufala i mas kam klosap long God, mo hem bambae i kam klosap long yufala.” (Jemes 4:​8, NW ) Yes, God we i Wokem yumi i singaot yumi blong kam klosap long hem. Mo ol man we oli mekem olsem oli luk we oltaem nomo God i givhan long olgeta taem oli fesem ol trabol.

?Olsem wanem yumi save kam klosap long God? Samwe tri taosen yia bifo, King Deved i askem semfala kwestin i se: “Hae God. . . . ?Hu man we i stret blong go mekem wosip long yu long Saeon, tabu hil ya blong yu?” (Ol Sam 15:1) Deved i ansa long prapa kwestin blong hem, i se: “Man we i stret blong mekem olsem, hemia man we i stap obei long yu long evri samting, mo oltaem i stap mekem ol samting we i stret. Ol tok blong hem i tru mo i stret, mo hem i no save giaman long ol narafala man. Hem i no save mekem ol samting nogud long ol fren blong hem.” (Ol Sam 15:​2, 3) Blong talem stret, Jeova i welkamem ol man we oli glad blong mekem samting we Adam mo Iv tufala i no wantem mekem. Jeova i kam klosap long ol man we oli mekem samting we hem i wantem.​—Dutronome 6:​24, 25; 1 Jon 5:3.

?Olsem wanem yumi save mekem samting we God i wantem? Yumi mas lanem ol fasin we “i gud tumas, mo i save mekem God ya we i sevem yumi i haremgud,” mo biaen yumi mas jusum blong laef folem ol fasin ya. (1 Timoti 2:3) Blong mekem olsem, yumi mas kasem stret save we i stap long Tok blong God, Baebol. (Jon 17:3; 2 Timoti 3:​16, 17) I no naf sipos yumi ridim Baebol sam samtaem nomo. Yumi mas folem eksampol blong ol man Jiu blong faswan handred yia long Berea, taem oli harem ol tok blong Pol. Long Baebol, yumi ridim se: ‘Oli wantem tumas blong harem tok ya, mo evri dei, oli stap ridimgud ol tok blong Baebol, blong faenemaot se ol tok ya i tru no i no tru.’​—Ol Wok 17:11.

Long sem fasin tede, dip stadi long Baebol i pulum yumi blong bilif strong long God, mo i halpem yumi blong kam klosap moa long Hem. (Hibrus 11:6) Mo tu, i halpem yumi blong kasem save ol fasin blong Jeova long saed blong ol man. Hem i save blesem ol man tede, be tu, hem i save blesem blong olwe ol man we oli obei long hem.

Ridim toktok ya blong sam Kristin we oli stap klosap long God. Danielle, we i gat 16 yia blong hem, i talem se: “Mi lavem Jeova tumas,  mo mi gat plante risen blong talem tangkiu long hem. Hem i givim wan papa mama long mi we tufala i lavem mi, tufala i lavem God, mo tufala i yusum Baebol blong tijim mi.” Wan Kristin brata long Urugwae i talem se: “Mi tangkiu tumas long Jeova, mo mi wantem tumas blong talem tangkiu long hem from lav blong hem we i kaengud, mo from fasin fren blong hem.” God i glad long ol pikinini tu. Gabriela, we i gat seven yia blong hem, i talem se: “!Mi lavem God i bitim eni narafala samting long fulwol! Mi gat prapa Baebol blong mi. Mi glad blong lanem plante samting long saed blong God mo Pikinini blong hem.”

Tede, plante milian man long wol oli glad tumas blong serem semfala tingting olsem man ya blong raetem Sam we i talem se: “Taem we mi mi kam stap klosap long [God], mi harem se i gud tumas long mi.” (Ol Sam 73:28) Ol man ya oli kasem help blong fesem ol trabol blong olgeta, mo oli gat wan strong hop se bambae oli save laef blong olwe long Paradaes long wol. (1 Timoti 4:8) ?Olsem wanem long yu? ?Yu yu wantem “kam klosap long God”? Baebol i talem se: “I tru we God ya i no stap longwe long yumi nating.” (Ol Wok 17:27) !Yes, God i rili kea long yu!

[Tok blong pija long pej 5]

I gat plante pruf we i soem se God i kea long yumi

[Tok blong pija long pej 7]

Ol smol pikinini tu oli save kam klosap long God

[Tok blong pija long pej 7]

Tede, Jeova i halpem yumi blong stanap strong. Long fiuja bambae hem i karemaot sik mo ded