Kasem Tingting Blong Kraes Long Saed Blong Haenem

“Sipos wan long yufala i wantem kam haeman blong yufala, hem i mas kam olsem man blong wok blong yufala.”​—MATIU 20:26.

1. ?Ol man oli ting se wan man i hae sipos i olsem wanem?

 FAEF handred kilomita saot long Cairo, klosap long taon ya Thebes long Ijip bifo (tede oli kolem ples ya Karnak), i gat wan bigfala ston i stanap we oli katem pija blong Fero Amenhotep 3 long hem. Pija ya i hae olsem 18 mita. Ol man we oli kam stanap klosap long bigfala ston ya oli harem we oli smol we oli smol. Ating oli bin katem pija blong king long ston ya from we oli wantem mekem ol man oli fraet long hem. Yes, pija ya i soemaot se long lukluk blong wol, wan man i hae moa sipos hem i bigwan mo i gat paoa mo i mekem ol narafala man oli harem se oli nating nomo klosap long hem.

2. ?Wanem eksampol we Jisas i soem long ol man blong hem, mo wanem sam kwestin we yumi mas askem long yumi wan?

² Nao yu traem skelem tingting ya blong wol wetem wanem we Jisas i tijim long saed blong haenem. Ol man blong Jisas oli singaot hem se ‘Masta mo Tija’ be Jisas i soemaot long olgeta se samting we i mekem man i hae tru, hemia taem hem i rere blong mekem wok blong narafala. Long laswan dei blong laef blong Jisas long wol ya, hem i soemaot mining blong tok ya blong hem taem hem i wasem leg blong ol disaepol blong hem. !Hemia wan wok we i soemaot tingting daon! (Jon 13:​4, 5, 14) ?Weswan nao yu laekem moa​—se man i mekem wok blong yu, no se yu yu mekem wok blong narafala? ?Eksampol blong Jisas Kraes i pulum yu blong yu wantem gat tingting daon olsem hem? Ale i gud yumi luk tingting we Kraes i gat long saed blong haenem mo skelem wetem tingting we ol man blong wol oli gat.

Sakemaot Tingting Blong Wol Long Saed Blong Haenem

3. ?Wanem ol eksampol blong Baebol we oli soemaot samting we i save hapen taem man i wantem se narafala i leftemap hem?

³ I gat plante eksampol long Baebol we oli soem  se tingting blong wol long saed blong haenem i rong mo olgeta we oli gat tingting ya oli kasem trabol nomo. Tingbaot man ya we nem blong hem Haman. Hem i wan haeman we i wok blong king blong Pesia long taem blong Esta mo Modekae. From we Haman i griri tumas blong kasem ona, hem i mekem bigfala sem nomo long hem wan mo biaen hem i ded. (Esta 3:5; 6:​10-12; 7:​9, 10) ?Olsem wanem long Nebukadnesa we i tokflas tumas? Hem i lusum hed taem rul blong kingdom blong hem i kam antap bigwan. Yes, man ya i no save nating se wanem nao i rili mekem man i gat haenem. Yumi luksave samting ya long ol tok ya blong hem we hem i se: “!Maewad! !Babilon ya i wan bigfala taon ya! Hem i hedkwota blong mi we mi mi wokem blong soemaot bigfala paoa blong mi we mi mi king, mo mi gat hae nem, nao olgeta man oli stap ona long mi.” (Daniel 4:30) Ale, tingbaot praod man ya Herod Agripa 1. Hem i glad we i glad taem ol man oli tok blong leftemap hem, be i fogetem se God nomo i stret blong man i leftemap hem. Taswe, wantaem nomo “ol wom oli kakae gat blong hem, nao hem i ded.” (Ol Wok 12:​21-23) Tru ya, ol man ya oli no gat tingting blong Jeova long saed blong haenem mo from samting ya olgeta evriwan oli lusum paoa blong olgeta mo oli sem.

4. ?Tingting blong wol we i mekem se man i praod tumas, i kamaot long hu?

⁴ I stret nomo we yumi wantem yusum laef blong yumi blong mekem ol wok we oli gud mo we ol narafala oli stap tinghae long yumi mo respektem yumi from. Be, Devel Setan i save yusum samting ya blong pulum yumi blong kam flas. Hemia i laenap stret wetem prapa fasin blong hem we hem i wantem tumas blong kasem haenem. (Matiu 4:​8, 9) Yumi neva mas fogetem se Setan i “rabis god blong wol ya” mo hem i wok strong blong mekem se olgeta man long wol oli karem tingting olsem hem. (2 Korin 4:4; Efesas 2:2; Revelesen 12:9) From we ol Kristin oli save se fasin praod i kamaot long Setan stret, ale oli wokhad blong faet agensem tingting blong wol ya long saed blong haenem.

5. ?Laef blong yu i rili gat mining taem yu kasem hae posisen, taem evri man oli save long yu, mo taem yu gat mane? Eksplenem.

⁵ Wan tingting we Setan i traem putum long ol man hemia se oli save gat wan hapi laef sipos oli kasem haenem, sipos narafala i talem ol tok blong leftemap olgeta, mo sipos oli gat fulap mane. ?Be samting ya i tru? ?Laef blong yu i rili gat mining taem yu kasem hae posisen, taem evri man oli save yu, mo taem yu gat mane? Baebol i givim woning long yumi blong no letem tingting ya i trikim yumi. Waes King ya Solomon i raetem se: “Mo mi luk tu, stamba blong fasin ya we ol man oli stap wok strong blong kasem plante samting. Oli stap wok strong olsem from we oli jalus tumas long ol narafala man we oli stap raonabaot long olgeta, oli wantem tumas blong winim olgeta. Be fasin ya tu i blong nating nomo. Hemia i olsem we man i stap resis olbaot nomo.” (Prija 4:4) Plante man we oli yusum ful laef blong olgeta blong kam bigman long wol ya, ating oli save agri se ol tok ya blong Baebol oli tru tumas. Wan man olsem, hem i man ya we i wok blong mekem plan, bildim, mo traem spesel plen ya we i tekem ol man oli go long mun. Man ya i tingting plante, nao hem i se: “Mi mi wokhad mo mi nambawan long wok ya we mi stap mekem. Be olgeta samting ya oli nating nomo, oli no givim wan gudfala samting long mi, mo oli no givhan long mi blong kasem glad mo pis long tingting we i save stap olwe.” * Tru ya, tingting blong wol long saed blong haenem, nomata se hem i long saed blong bisnes, spot, ol sinema no ol nara pleplei, be i no save mekem man i harem gud olwe.

 Haenem i Kamaot Taem Lav i Pulum Yumi Blong Wok

6. ?Wanem i soem se Jemes mo Jon, tufala i gat rong tingting long saed blong haenem?

⁶ Wan samting we i hapen long laef blong Jisas i soemaot tru se haenem i minim wanem. Long taem blong lafet blong Pasova long yia 33 K.T., Jisas mo ol disaepol blong hem oli stap wokbaot i go long Jerusalem. Taem oli stap wokbaot, tu kasen brata blong Jisas, we nem blong tufala Jemes mo Jon, tufala i soemaot se tufala i gat rong tingting long saed blong haenem. Tufala i sanem mama blong tufala i go long Jisas blong askem long hem se: ‘Plis, yu promes se taem we bambae yu yu King, mitufala ya, wan i save sidaon long raet saed blong yu, mo wan long lef saed blong yu.’ (Matiu 20:21) Long kastom blong ol man Jiu, fasin ya blong sidaon long raetsaed no long lefsaed blong wan man hemia wan bigfala ona ya. (1 King 2:19) Jemes mo Jon, tufala i yusum fasin we i no stret, blong traem kasem ol beswan ples. Tufala i wantem kasem hae posisen ya, olsem se tufala i gat raet long samting ya. Be Jisas i save tingting blong tufala ya, ale hem i tekem janis blong stretem rong tingting we tufala i gat long saed blong haenem.

7. ?Wanem i mekem se wan Kristin i rili haeman, olsem we Jisas i talem?

⁷ Jisas i save se long wol ya ol man oli praod tumas, taswe i gat tingting ya i stap, se wan haeman hem i man we i stap bos mo givim oda long narafala, no hem i man we taem hem i tok be wantaem nomo olgeta man oli mekem samting we hem i wantem. Be samting we i makem wan man blong Jisas se hem i hae, hemia wok we hem i rere blong mekem blong givhan long narafala wetem tingting daon. Jisas i talem se: “Sipos wan long yufala i wantem kam haeman blong yufala, hem i mas kam olsem man blong wok blong yufala [“minista,” NW ]. Mo sipos wan long yufala i wantem kam bos blong yufala, hem i mas kam olsem slef nomo blong yufala.”​—Matiu 20:​26, 27.

8. ?Man we hem i “minista” hem i mekem wanem, mo wanem sam kwestin we yumi save askem long yumi wan?

⁸ Grik tok ya we yumi tanem i kam “haeman” mo we long sam Baebol oli tanem i kam “minista” i minim wan man we i traem bes blong hem oltaem blong mekem wok blong narafala. Hem i wok strong mo i gohed oltaem blong givhan long narafala. Taem Jisas i talem tok ya, hem i stap tijim wan bigfala lesen long ol disaepol blong hem. Lesen ya se: Man i no haeman taem hem i stap givim oda long narafala mo narafala i stap obei long hem, nogat. Man i haeman taem lav i pusum hem blong mekem wok blong narafala. Askem long yu wan se: ‘?Sipos mi mi Jemes, no mi Jon, bambae mi mekem wanem taem mi harem ol tok ya blong Jisas? ?Bambae mi kasem save se man we i haeman tru hem i man we lav i pusum hem blong mekem wok blong narafala, no olsem wanem?​—1 Korin 13:3.

9. ?Wanem eksampol we Jisas i soemaot long ol narafala?

 ⁹ Jisas i soem long ol disaepol blong hem se samting we wol i talem se i mekem man i hae, i defren olgeta long samting we Kraes i talem long saed blong haenem. Neva Jisas i mekem hem olsem wan bigfala masta mo ol narafala olsem we oli nating nomo. Olkaen man​—ol man, woman, ol pikinini, ol rijman, ol puaman, mo ol lida tu, wetem olgeta we oli bin mekem bigfala rong—​oli no fraet blong kam long hem. (Mak 10:​13-16; Luk 7:​37-50) Plante taem yumi ol man yumi no gat longfala tingting long olgeta we oli gat sam slak fasin. Jisas i no olsem. Samtaem, ol disaepol blong Jisas oli no tingbaot narafala no oli raorao. Be Jisas i gat longfala tingting, i tijim olgeta, i soem long olgeta se hem i rili gat tingting daon mo hem i wan kwaet man.​—Sekaraea 9:9; Matiu 11:29; Luk 22:​24-27.

10. ?Olsem wanem Jisas i soemaot oltaem long laef blong hem se hem i no tingbaot hem wan nomo?

¹⁰ Pikinini blong God hem i gat wan nem we i hae we i hae, be hem i no tingbaot hem wan. Hem i soemaot klia, wanem nao i rili mekem man i hae. Taem Jisas i kam long wol hem i no ting se ol man oli mas mekem wok blong hem. Nogat. Hem i mekem wok blong ol man. Yes, hem i mekem ol man we oli gat “ol defren kaen sik” oli gud bakegen mo i ronemaot devel long sam man. Samtaem hem i taed mo i nidim blong spel smol, be neva hem i putum ol nid ya fastaem long nid blong ol man. Oltaem hem i lego samting we hem i laekem, from we hem i wantem mekem i gud long ol man. (Mak 1:​32-34; 6:​30-34; Jon 11:​11, 17, 33) Lav blong hem i pulum hem blong halpem ol man long saed blong spirit, hem i wokbaot plante handred kilomita long rod we i fulap long das blong talemaot gud nius blong Kingdom. (Mak 1:​38, 39) I klia nomo se Jisas i rili tinghevi long wok ya blong givhan long ol man.

Folem Fasin Blong Kraes We i Gat Tingting Daon

11. ?Wanem fasin we brata i mas wokem blong oli save putumap hem blong wok olsem elda insaed long kongregesen?

¹¹ Klosap long en blong ol yia 1800, Sosaeti i stat lukaot sam Kristin elda we oli naf blong mekem wok blong seket elda. Long taem ya oli makem klia, wanem kaen fasin nao we ol elda ya oli mas gat blong oli save lukluk long nid blong ol man blong God. Long magasin ya Zion’s Watch Tower blong Septemba 1, 1894, oli raetem se oli lukaot ol man we oli gat “fasin daon, from we i nogud oli kam flas . . . , [oli mas man we] tingting blong olgeta i stap daon, we oli no lukaot rod blong prijimaot tingting blong olgeta, be oli prijimaot tingting blong Kraes. [Oli mas man we] oli no traem soemaot prapa save blong olgeta, be oli soemaot save blong Baebol we i klia mo i gat paoa.” Yes, ol trufala Kristin oli neva mas lukaot wok insaed long kongregesen from we oli wantem blong ol man oli tinghae long olgeta no blong kasem haenem, paoa, mo blong bos antap long ol narafala. Hemia i no stret ya. Wan elda we i gat tingting daon bambae i neva fogetem se wok ya we hem i holem i “wan gudfala wok ya,” be i no wan hae posisen we hem i gat blong leftemap hem wan. Nogat. (1 Timoti 3:​1, 2) Evri elda mo man blong givhan oli mas traem bes blong olgeta blong wok wetem tingting daon blong givhan long ol narafala mo blong lidim narafala long tabu wosip blong yumi. Oli mas soem eksampol we i stret blong ol narafala oli folem.​—1 Korin 9:19; Galesia 5:13; 2 Timoti 4:5.

12. ?Wanem ol kwestin we yumi save askem long yumi wan sipos yumi gat tingting blong kasem wok insaed long kongregesen?

 ¹² Ol brata we oli putum mak ya blong gat wok insaed long kongregesen oli save askem long olgeta wan se: ‘?Mi mi lukaot janis blong givhan long narafala, no mi stap laekem moa we ol narafala oli mekem samting blong mi? ?Mi mi glad blong mekem ol smosmol wok we maet narafala i no save luk, no mi laekem moa ol wok we ol narafala oli save luk klia?’ Tingbaot. Maet wan yangfala brata i laekem givim tok insaed long Kristin kongregesen, be maet hem i no laekem tumas blong halpem ol olfala. Maet hem i laekem blong joen oltaem wetem ol elda insaed long kongregesen be hem i no wantem tumas blong joen long wok blong prij. Wan yang man olsem, i mas askem long hem wan se: ‘?Mi mi laekem moa blong mekem ol wok ya blong God we oli save pulum narafala blong lukluk mi mo presem mi? ?Mi stap wokhad blong kasem wanem? ?Blong kasem haenem nomo?’ Tru, sipos yumi lukaot rod blong leftemap yumi wan nomo, yumi no gat fasin blong Kraes nating.​—Jon 5:41.

13. (a) ?Olsem wanem tingting daon blong wan elda i save gat paoa long narafala? (b) ?From wanem tingting daon i no wan samting we ol Kristin oli save jusum sipos oli wantem wokem no nogat?

¹³ Taem yumi wokhad blong gat tingting daon olsem Kraes, yumi wantem tumas blong givhan long ol narafala. Tingbaot eksampol blong wan son elda. Hem i stap jekemap wok we ol brata oli mekem long wan branj ofis blong ol Witnes blong Jeova. Hem i gat wan program we i bisi gud mo wok blong hem i bigwan. Be hem i luk wan yangfala brata we i gat wan problem wetem mesin we hem i wok long hem blong somap ol pej blong ol buk long faktri, nao hem i sore long yangfala ya, i kam givhan long hem. Yangfala brata ya i talem se: “!Mi no save bilif we son elda bambae i mekem olsem! Hem i talem long mi se taem hem i yangfala, hem tu i wok long Betel long wan mesin olsem, mo hem i save se wok ya i no isi. Ale, hem i wok wetem mi long mesin ya blong longtaem lelebet, nating se hem i gat plante narafala impoten samting blong mekem. Samting ya i rili kasem hat blong mi.” Naoia brata ya i stap lukaot long wok blong wan branj ofis blong ol Witnes blong Jeova, mo hem i rimemba yet, tingting daon blong son elda ya. Yumi no mas ting se yumi hae tumas no yumi impoten tumas, nao yumi no save mekem ol wok we oli daon no ol smosmol wok. ‘Tingting we i stap daon’ i wan fasin we yumi mas putum, olsem we hem i klos blong yumi. Hemia i no wan samting we yumi save jusum sipos yumi wantem wokem no yumi no wantem wokem. Nogat. Hemia wan fasin we olgeta Kristin oli mas putum from we hem i haf blong “niufala laef.”​—Filipae 2:3; Kolosi 3:​10, 12; Rom 12:16.

?Olsem Wanem Blong Kasem Tingting Blong Kraes Long Saed Blong Haenem?

14. ?Olsem wanem yumi save kasem stret tingting long saed blong haenem sipos yumi tingbaot fasin fren blong yumi wetem God mo wetem ol narafala?

¹⁴ ?Olsem wanem yumi save kasem stret tingting long saed blong haenem? Wan rod blong mekem olsem, hemia blong tingting dip long fasin fren blong yumi wetem Jeova God. Tingbaot haenem blong hem, paoa mo waes blong hem we oli mekem se hem i antap we i antap olgeta, mo yumi ol man yumi nating nomo. (Aesea 40:22) Narafala samting we i save halpem yumi blong wokem tingting daon hemia blong tingbaot fasin fren blong yumi wetem ol narafala. Maet yumi gat save long wan wok we narafala i no save mekem, be ating narafala ya i save moa samting long saed blong laef i bitim yumi, mo maet save ya i moa impoten i bitim wok blong yumi. Yumi mas tingbaot se ol Kristin brata blong yumi maet oli gat sam nambawan fasin we yumi no gat. Yes, plante man we God i laekem olgeta tumas oli no pulum ae blong narafala, from we fasin blong olgeta i kwaet mo oli stap daon.​—Ol Proveb 3:34; Jemes 4:6.

15. ?Olsem wanem fasin blong sam man blong God we oli stanap strong i soem se i no gat man we i gat raet blong ting se hem i moa gud i bitim narafala?

¹⁵ Ol stori blong ol Witnes blong Jeova we oli kasem trabol from bilif blong olgeta, i soemaot gud poen ya. Plante taem, olgeta we oli holem strong  long God taem oli kasem ol strong traem, hemia ol man we long lukluk blong wol ya, oli nating nomo. Taem yumi tingting gud long ol eksampol ya samting ya i save halpem yumi blong holem tingting daon mo i save tijim yumi se ‘yumi no mas letem tingting blong yumi i go antap.’​—Rom 12:3. *

16. ?Olsem wanem evriwan insaed long kongregesen oli save wokem tingting blong Kraes long saed blong haenem?

¹⁶ Olgeta Kristin, ol yangfala mo ol olfala, oli mas traehad blong wokem tingting blong Kraes long saed blong haenem. I gat plante defdefren wok blong mekem insaed long kongregesen. Yumi neva mas kros sipos oli askem long yumi blong mekem sam wok we yumi ting se i daonem yumi. (1 Samuel 25:41; 2 King 3:11) Ol papa mama, yufala i mas pulum ol pikinini mo yangfala blong yufala, blong oli glad long enikaen wok we oli kasem, nating se hem i long Haos Kingdom, no long taem blong asembli. Mo i gud sipos oli luk we yufala papa mama tu i mekem ol wok ya we i daon. Wan brata we i wok naoia long hedkwota blong ol Witnes blong Jeova i rimemba gudfala eksampol blong papa mama blong hem. Hem i se: “Taem mi luk fasin blong tufala blong mekem ol wok blong klinim Haos Kingdom no ples blong asembli, mi luksave se ol wok ya oli impoten tumas long tingting blong tufala. Plante taem oli rere blong mekem ol wok we oli save givhan long kongregesen no long ol brata, nating se maet long lukluk blong narafala, ol wok ya oli nating nomo. Fasin blong tufala i halpem mi naoia, blong mi rere oltaem blong mekem enikaen wok we oli askem mi blong mekem long haos Betel.”

17. ?Olsem wanem ol woman we oli gat tingting daon oli wan blesing long kongregesen?

¹⁷ Yumi mas tingbaot ol narafala fastaem. Wan gudfala eksampol long saed ya hemia Esta. Hem i kam kwin blong Pesia long ol yia fo handred B.K.T. * Nating se hem i laef long bigbigfala haos blong king, hem i rere blong lusum laef blong hem wan blong sevem ol man blong God from we hem i wantem mekem samting we God i wantem. (Esta 1:​5, 6; 4:​14-16) Tede, ol Kristin woman oli save gat sem tingting olsem Esta, nating se oli gat plante samting no nogat. Oli save mekem olsem, taem oli leftemap tingting blong olgeta we oli harem nogud, visitim ol sikman, joen long wok blong prij, mo wokgud wetem ol elda. !Ol sista we oli gat tingting daon oli wan blesing long kongregesen!

Blesing We i Kamaot From We Yumi Gat Tingting Blong Kraes

18. ?Wanem blesing i kamaot taem yumi soemaot tingting olsem Kraes long saed blong haenem?

¹⁸ Yu save kasem plante blesing taem yu holem tingting blong Kraes long saed blong haenem. Taem yu mekem samting from we yu tingbaot narafala fastaem, bambae narafala i glad, mo yu tu yu save glad. (Ol Wok 20:35) Taem yu rere oltaem mo yu wokhad blong givhan long ol brata blong yu, ol brata oli save laekem yu moa. (Ol Wok 20:37) Samting we i moa impoten se, Jeova i luk samting we yu yu mekem blong givhan long ol Kristin brata blong yu olsem wan gudfala sakrefaes we i presem hem.​—Filipae 2:17.

19. ?Wanem mak we yumi wantem kasem long saed blong tingting blong Kraes long haenem?

¹⁹ Wanwan long yumi i mas jekemap hat blong yumi mo askem se: ‘?Tingting blong Kraes long saed blong haenem i wan samting we bambae mi tokbaot nomo, no bambae mi traehad tu blong wokem tingting ya long laef blong mi?’ Baebol i soemaot klia nomo se Jeova i no laekem nating ol man we oli stap flas. (Ol Proveb 16:5; 1 Pita 5:5) I gud sipos ol fasin blong yumi oli soemaot se yumi laekem wokem tingting ya blong Kraes long saed blong haenem, taem yumi stap wetem Kristin kongregesen, wetem famle, no taem yumi kampani wetem ol narafala man evri dei. Yes, yumi mas mekem olgeta samting blong leftemap nem blong God.​—1 Korin 10:31.

[Ol Futnot]

?Yu Yu Save Eksplenem?

• ?From wanem yumi mas sakemaot tingting blong wol long saed blong haenem?

• ?Wanem samting we Jisas i talem se i mekem man i hae?

• ?Olsem wanem ol elda oli save folem tingting daon blong Kraes?

• ?Wanem i save halpem yumi blong wokem tingting blong Kraes long saed blong haenem?

[Kwestin]

[Bokis blong pija long pej 17]

?Long Lukluk Blong Kraes Hu i Gat Haenem?

?Man we i wantem narafala i mekem samting blong hem, no man we i rere blong givhan long narafala?

?Man we i laekem we evriman oli luk hem, no man we i rere blong mekem ol smosmol wok?

?Man we i leftemap hem wan, no man we i leftemap narafala?

[Tok blong pija long pej 14]

Bigfala ston ya we oli katem pija blong Fero Amenhotep 3 long hem

[Tok blong pija long pej 15]

?Yu yu save wanem i mekem we Haman i sem bigwan?

[Tok blong pija long pej 16]

?Yu yu lukaot janis blong mekem wok we i save givhan long narafala?