Kingdom Gavman Blong God Hem i Rul Tede

“?Olsem wanem plante defdefren kantri, we oli gat ol defdefren kalja, mo oli no gat semfala save, oli save joen tugeta? Ol man oli talem se sipos sam samting afsaed long wol blong yumi i kam faet agensem yumi, long taem ya nao bambae olgeta man long wol oli joen tugeta.”​—The Age, wan niuspepa blong Ostrelia.

?WANEM kaen samting ya afsaed long wol blong yumi we i save faet agensem yumi? Yumi no save sipos wan faet olsem i save joenem olgeta nesen blong wol, be Baebol i tokbaot wan bigfala trabol we bambae i kam, mo we bambae i pulum olgeta nesen blong wol blong oli joen tugeta. Mo i tru, trabol ya bambae i kamaot long sam samting afsaed long wol blong yumi.

King Deved blong Isrel bifo i talem wan profet tok long saed blong trabol ya. Tabu spirit i pulum hem blong raetem se: “Ol king blong olgeta oli girap [oli kam wanples], oli putum wan tok we i agens long Hae God, mo i agens long king ya tu we hem i makemaot hem i putumap hem blong mekem wok blong hem. Oli stap talem se, ‘Yumi brekemaot ol rop ya we tufala i stap fasem yumi long hem. Yumi kamaot long han blong tufala ya blong yumi fri.’ ” (Ol Sam 2:​2, 3; Ol Wok 4:​25, 26) Makemgud se ol king blong wol oli kam wanples, mo oli agensem Jeova, God ya we i wokem yunivas, mo Jisas Kraes, we God i makemaot hem mo i putumap hem olsem King. ?Samting ya i kamtru olsem wanem?

Folem fasin blong kaontem taem long Baebol mo ol profet tok we oli kamtru finis, God i stanemap Kingdom blong hem long heven long yia 1914, mo i putumap Jisas Kraes olsem King blong Kingdom ya. * Long yia ya olgeta nesen blong wol oli gat wan tingting nomo. Oli no wantem stap  aninit long rul blong Kingdom blong God we i jes stanap, be oli stap faetfaetem olgeta blong kasem moa paoa​—hemia taem oli joen long Bigfala Wo, no Wol Wo Wan.

?Jeova God bambae i mekem wanem taem ol king blong wol oli agensem hem? “Hae God, hem i King. Hem i stap sidaon long heven, i stap laf. Hem i stap laf gud long ol rabis plan blong olgeta. Mo hem i kros, i tok strong long olgeta, i talem se, ‘!Yufala i lukaot, a!’ Mo from we hem i kros olsem, olgeta oli fraet, oli seksek.” Biaen, Jeova bambae i talem long Pikinini blong hem, man ya we hem i putumap olsem King blong Kingdom se: “Ol narafala kantri ya, wetem olgeta man long wol, yu yu save askem olgeta long mi, nao mi bambae mi givim olgeta long yu, oli blong yu. Bambae yu yu kilim ol man ya long wan aean, bambae yu smasem olgeta long ol smosmol pis, olsem graonpot we i brobrok.”​—Ol Sam 2:​4, 5, 8, 9.

Taem ya we bambae Jisas i kilim olgeta nesen long wan aean, hem i tekples long Amagedon. Laswan buk blong Baebol, hemia Revelesen, i tokbaot impoten faet ya olsem “faet long bigfala Dei blong God ya we i gat olgeta paoa,” we long faet ya “ol king blong evri ples long wol” oli kam wanples. (Revelesen 16:​14, 16) Ol rabis enjel bambae oli pulum tingting blong olgeta kantri blong wol, nao bambae oli joen tugeta mo oli gat wan tingting nomo: Oli wantem faet agensem God ya we i gat Olgeta Paoa.

Taem ya we bambae ol man oli kam wanples blong faet agensem rul blong God i stap kam hareap. Be, wan narakaen samting se, nating se ol kantri oli “joen tugeta,” bambae oli no kasem gudfala frut from. Afta we ol kantri ya oli faet agensem Jeova, bambae ol man oli kasem pis ya we oli bin wet long hem longtaem finis. ?Bambae samting ya i kamaot olsem wanem? Long laswan faet ya, Kingdom blong God bambae i “flatemgud paoa blong ol narafala king [blong wol], nao bambae hem i rul oltaem gogo i no save finis.” (Daniel 2:44) Taswe i no wan ogenaesesen blong man we bambae i karem pis long ol man long wol. Kingdom blong God nao bambae i mekem samting ya.

Man Ya We i Mekem Se Wok Blong Kingdom Gavman i Gohed

Kingdom blong God hem i Kingdom ya we plante man we oli gat gudhat oli stap prea from, taem oli se: “Letem kingdom blong yu i kam. Mekem ol samting we yu yu wantem oli kamaot long wol, olsem we oli kamaot finis long heven.” (Matiu 6:​10, NW ) Kingdom blong God i no wan samting we i stap insaed long hat. Hem i wan trufala gavman we i mekem sam bigfala wok finis stat long 1914, taem hem i stanap long heven. Bambae yumi luk sam impoten poen we oli pruvum se Kingdom blong God i wan trufala gavman we i stap wok tede.

Faswan samting, Kingdom ya i gat ol grup blong man we oli wok blong hem long wol ya. King Jisas Kraes i stap lidim olgeta blong oli mekem sam bigbigfala wok mo oli stap tekem sam bigfala disisen blong mekem se wok blong Kingdom i gohed. Long 33 K.T., * Jeova God i putumap Jisas Kraes olsem Hed blong Kristin kongregesen. (Efesas 1:22) Stat long taem ya, Jisas i bin lidim ol grup ya we oli wok blong Kingdom. Olsem nao, hem i pruvum we hem i naf blong mekem se wok blong Kingdom i gohed. Eksampol, taem ol man Judia oli sot long kakae long faswan handred yia, wantaem nomo Kristin kongregesen i tekem aksin blong givhan long ol Kristin long Judia. Oli mekem wan plan blong givhan long olgeta, mo oli sanem Banabas mo Pol tufala i go long Antiok blong givim ol presen long ol brata longwe.​—Ol Wok 11:​27-30.

Naoia we Kingdom gavman i stap rul finis, yumi sua se Jisas Kraes bambae i mekem sem wok. Taem ol disasta oli kamaot​—olsem etkwek, kakae i  sot, bigfala wota i ron, hariken, no volkeno i bosta—​kwiktaem nomo, Kristin kongregesen blong ol Witnes blong Jeova i halpem ol Kristin brata mo ol narafala man tu we oli fesem hadtaem long kantri blong olgeta. Eksampol, taem ol bigfala etkwek oli kasem El Salvador long Jenuware mo Februari 2001, long olgeta ples long kantri ya ol brata oli ogenaesem sam help, mo ol grup blong Witnes blong Jeova blong Kanada, Guatemala mo Yunaeted Stet oli kam givhan. Long smoltaem nomo, oli bildim bakegen tri Haos Kingdom wetem bitim 500 haos.

Ol Man Aninit Long Rul Blong Kingdom Gavman

Stat long taem we God i stanemap Kingdom blong hem long heven long 1914, hem i bin hivimap mo ogenaesem ol man blong hem, we oli kamaot long olgeta ples long wol. Samting ya i laenap wetem profet tok blong Aesea we i talem se: “I mas hapen long laswan haf blong ol dei, se bigfala hil blong haos blong Jeova [trufala wosip blong hem] bambae i stanap strong antap long ol bigfala hil, . . . mo ol nesen oli mas kam wanples long hem, we oli fulap.” Profet tok ya i soem se “plante pipol” bambae oli go long hil ya mo oli obei long ol tijing mo ol rul blong Jeova.​—Aesea 2:​2, 3, NW.

Wok ya i mekem wan samting we ol man oli neva luk long taem blong yumi, hemia: Wan bigfala famle blong bitim 6,000,000 Kristin long bitim 230 kantri we oli joen tugeta olsem brata sista. Taem ol Witnes blong Jeova oli holem ol intenasnal asembli blong olgeta, plante taem ol man we oli lukluk oli sek long lav, pis, mo fasin blong joengud we i stap bitwin plante taosen man, nating se oli kamaot long ol defdefren kantri, kalja, mo lanwis. (Ol Wok 10:​34, 35) Ating bambae yu agri se, wan gavman we i save joenem tugeta ol man blong plante handred laen, mo mekem we oli gat pis mo oli agri gud tugeta, hem i mas wan gavman we i wokgud mo i strong, mo i mas wan trufala gavman tu.

Edukesen Aninit Long Kingdom Blong God

Evri gavman i gat ol prapa loa blong hem we hem i wantem ol man blong folem. Mo ol man we oli wantem laef aninit long rul blong gavman ya oli mas folem ol loa ya. Long sem fasin, Kingdom blong God i gat ol prapa loa blong hem, mo evri man we i wantem laef aninit long rul blong kingdom ya i mas respektem ol loa blong hem. Be i no wan isi wok taem gavman i mas pulum plante man we oli gat ol defdefren fasin blong laef, blong olgeta evriwan oli folem ol semfala loa. Taswe, poen ya tu i soem we Kingdom blong God i wan trufala gavman​—hem i gat wan program blong tijim ol man, we i jenisim tingting mo hat blong ol man ya.

?Olsem wanem Kingdom gavman blong God i save mekem bigfala wok ya? Hem i yusum semfala fasin ya we ol aposol oli bin mekem, hemia blong go prij “long ol haos blong ol man” mo tijim Tok blong God long ol man wanwan. (Ol Wok 5:42; 20:20) ?Edukesen ya i wokgud? Jacques Johnson, wan Katolik pris, i raetem wan stori long wan niuspepa blong Kanada blong eksplenem ol traehad blong hem blong pulum wan woman blong stopem stadi blong hem wetem ol Witnes blong Jeova. Hem i talem se: “Tingting blong mi i konfius mo mi luksave se mi joen long wan faet we mi lusum finis. Mi stat luk se afta sam manis, ol Witnes oli kam gud fren wetem yangfala  mama ya we i neva aot long ples blong hem. Blong kam fren blong hem, oli halpem hem, oli storian mo oli soem kaen fasin long hem, mo samting ya i tajem hat blong hem. Kwiktaem nomo hem i kam wan memba blong jos blong olgeta mo i wok wetem olgeta, mo mi no save mekem wan samting blong blokem hem.” Mesej blong Baebol mo gudfala Kristin fasin blong ol Witnes blong Jeova i tajem hat blong woman ya we bifo hem i wan Katolik, mo long sem fasin, mesej ya i tajem hat blong plante milian man raonabaot long wol.

Edukesen ya blong Kingdom, hem i stanap long Baebol, mo i leftemap ol gudfala fasin mo ol rul blong hem long saed blong klin fasin. Hem i tijim ol man blong lavem mo soem ona long ol narafala, nomata wanem laen blong olgeta. (Jon 13:​34, 35) Fasin ya i givhan tu blong obei long woning ya se: “Yufala i no mas letem fasin blong yufala i kam olsem fasin blong ol man long wol. Yufala i mas letem God i jenisim tingting blong yufala, blong mekem tingting blong yufala i niuwan olgeta. Nao bambae yufala i save jusumaot ol fasin we God i wantem, wanem i gud, mo wanem hem i glad long hem, mo wanem i stret gud blong mekem.” (Rom 12:2) Plante milian man oli lego fasin blong laef blong olgeta bifo, mo oli glad blong obei long ol loa mo ol stamba rul blong Kingdom gavman. Olsem nao, oli faenem pis mo glad long wol blong tede, mo oli stap wet long ol nambawan blesing we bambae oli kasem long niufala wol.​—Kolosi 3:​9-11.

Wan nambawan tul we i givhan bigwan blong joenemgud ol man ya long fulwol, hemia magasin ya, Wajtaoa, we yu stap ridim. Long fulwol, sam man oli transletem mo oli prentem ol stamba haf blong Wajtaoa long sem taem long 135 lanwis, mo bitim 95 pesen blong ol man we oli ridim magasin ya raon long wol oli save stadi long sem taem ol semfala atikol long prapa lanwis blong olgeta.

Wan Momon we i raetem ol buk, i mekem wan lis blong ol misinari afsaed long jos blong hem, we oli bin kasem sam nambawan frut long wok blong olgeta. Hem i putum tufala magasin ya Wajtaoa mo Wekap!, we ol Witnes blong Jeova oli wokem, olsem beswan magasin blong talemaot gud nius, mo hem i talem se: “I no gat man i save talem se Wajtaoa mo Wekap! tufala i pulum ol man blong oli les. Defren olgeta, [ol magasin ya] oli pulum ol man blong wekapgud. Hemia wan samting we klosap mi no faenem long ol buk blong ol narafala skul. Tufala magasin ya Wajtaoa mo Wekap! oli mekem i gud long ol man from we oli givim ol infomesen we oli stanap long ol samting we i hapen long laef. Ol man we oli raetem ol stori insaed long tufala magasin ya oli mekem ol risej, mo oli tokbaot ol trufala samting we i stap hapen long wol tede.”

I gat plante pruf we oli soem se Kingdom blong God i wan trufala gavman we i stap wok naoia. Ol Witnes blong Jeova oli glad mo oli wokhad blong serem “gud nius ya blong Kingdom” wetem ol man raonabaot long olgeta, oli singaotem ol man blong laef aninit long rul blong Kingdom ya. (Matiu 24:​14, NW ) ?Olsem wanem long yu? ?Yu yu wantem laef aninit long rul blong Kingdom ya tu? Yu save haremgud sipos yu joen wetem ol man we oli kasem edukesen blong Kingdom ya mo we oli stap traehad blong mekem laef blong olgeta i laenap wetem ol rul blong hem. Be samting we i moagud yet se, yu save kasem ol blesing we bambae i kamaot taem ol man oli laef aninit long rul blong Kingdom ya long niufala wol “we stret fasin nomo bambae i stap long hem.”​—2 Pita 3:13.

[Ol Futnot]

[Tok blong pija long pej 5]

Long 1914, ol nesen oli joen long Wol Wo Wan

[Tok blong pija long pej 6]

Volontia wok blong givhan long ol man we oli gat nid i pruvum se Kristin lav i stap wok

[Tok blong pija long pej 7]

Ol Witnes blong Jeova raonabaot long wol oli folem semfala program blong edukesen