Laef Stori

Mifala i Laef Long Paoa Blong Jeova Nomo

ERZSÉBET HAFFNER I TALEM STORI YA

“Bambae mi no letem olgeta oli sanem yu yu go long wan narafala kantri.” Hemia ol tok blong Tibor Haffner, taem hem i harem se oli givim oda long mi blong mi aot long Jekoslovakia. Biaen hem i se: “Sipos yu wantem, bambae mi mared wetem yu, nao bambae yu stap wetem mi blong olwe.”

LONG Jenuware 29, 1938, sam wik nomo afta we Tibor i askem mi, mitufala i mared. Tibor hem i Kristin brata ya we hem i faswan blong kam prij long famle blong mi. I no bin isi blong tekem disisen ya blong mared. Mi jes kasem 18 yia blong mi, mi wan fultaem paenia blong ol Witnes blong Jeova, mo mi wantem spenem yang taem blong mi long wok blong Jeova. Mi krae. Mi prea. Nao taem tingting blong mi i kam kwaet, mi luksave se sipos Tibor i askem mi, i no jes from we hem i wantem halpem mi. Hem i rili lavem mi, mo mi harem se mi wantem laef wetem man ya.

?Be from wanem gavman i wantem sanem mi mi go long wan narafala kantri? Tru ya, mi laef long wan kantri we i praod long demokratik gavman blong hem, wan kantri we i letem ol man oli fri blong jusum skul blong olgeta. ?Taswe wanem i hapen? Ating i gud mi talem moa long saed blong laef blong mi fastaem.

Mi mi bon long Disemba 26, 1919, long vilej ya Sajószentpéter, long Hangari, samwe 160 kilomita longwe long Budapest. Papa mama blong mi, tufala i memba blong Grik Katolik jos. Sore tumas, papa blong mi i ded bifo we mi bon. Mama blong mi i maredem wan widoman we i gat fo pikinini blong hem, mo mifala i muv i go long Lučenec, wan naesfala taon long Jekoslovakia. Long taem ya, laef long wan step famle i no isi nating. Mi mi laswan blong ol faef pikinini, mo mi harem olsem se mi mi no wan memba blong famle ya. Laef i had long saed blong mane, taswe mi no kasem plante samting long saed blong bodi, mo mi no kasem plante lav mo kea long step papa blong mi mo long mama blong mi tu.

 ?I Gat Man i Save Ansa?

Taem mi gat 16 yia blong mi, mi wari long sam impoten kwestin. Mi rili intres blong ridim histri long saed blong Wol Wo Wan, mo mi sapraes bigwan taem mi luk ol nesen we oli talem se oli Kristin, be oli kilkilim olgeta long taem blong faet ya. Mo tu, mi luk we plante kantri oli wantem mekem ol ami blong olgeta oli kam strong moa. Samting ya i no laenap nating wetem ol samting we mi lanem long jos long saed blong lav we yumi mas soem long narafala.

Taswe, mi go luk wan pris blong Roman Katolik jos mo mi askem hem se: “?Olsem Kristin man, yumi mas obei long wanem oda​—yumi mas joen long faet mo kilim ol man raonabaot long yumi no yumi mas lavem olgeta?” Pris ya i kros long kwestin blong mi, mo i ansa se hem i stap tijim nomo wanem samting we ol haeman oli talem long hem blong tijim. Sem samting i hapen taem mi askem kwestin ya long wan lida blong Protestan jos mo long wan rabae blong skul blong ol man Jiu. Mi no kasem ansa long kwestin blong mi, be olgeta oli sek long kwestin ya. Biaen, mi go luk wan prija blong Luteran jos. Hem i kros long mi, be jes bifo we mi go, hem i talem se: “Sipos yu rili wantem save ansa long kwestin ya, yu go luk ol Witnes blong Jeova.”

Mi lukaotem ol Witnes be mi no save faenem olgeta. Sam dei biaen, mi kamhom afta long wok, mo mi luk doa blong haos i open. Wan naesfala yang man i stap ridim Baebol long mama blong mi. Wantaem nomo mi ting se, ‘!Mi sua se man ya i wan Witnes blong Jeova!’ Mifala i invaetem man ya, nem blong hem Tibor Haffner, i kam insaed, nao mi askem ol kwestin blong mi long hem. Hem i no givim prapa tingting blong hem blong ansarem kwestin blong mi, be hem i yusum Baebol blong soem long mi wanem fasin we i olsem mak blong trufala Kristin skul, mo i eksplenem ol samting we i stap hapen long taem naoia.​—Jon 13:​34, 35; 2 Timoti 3:​1-5.

Mi tekem baptaes sam manis biaen, bifo we mi kasem 17 yia blong mi. Mi harem se evriwan i mas save ol impoten trutok ya we mi bin traehad blong faenem. Mi stat prij fultaem, mo samting ya i no isi nating long Jekoslovakia long en blong ol yia 1930. Nating se gavman i rejistarem skul blong mifala, be ol lida blong jos oli pulum ol man blong agensem strong mifala.

Fastaem We Mi Fesem Fasin Agens

Wan dei long en blong yia 1937, mi stap prij wetem wan narafala sista long wan vilej klosap long Lučenec. Kwiktaem nomo, ol man oli arestem mitufala mo oli putum mitufala long kalabus. Gad blong kalabus ya i talem long mitufala se, “Bambae yutufala i ded long ples ya,” nao hem i sarem doa blong kalabus.

Long sapa, oli putum fo narafala woman long kalabus wetem mitufala. Mitufala i stat leftemap tingting blong olgeta, mo prij long olgeta. Oli kam kwaet, mo mitufala i tokbaot ol trutok blong Baebol wetem olgeta long fulnaet.

Long sikis klok long moning, gad i singaot mi mi aot long kalabus. Mi talem long sista we i bin kampani wetem mi se: “Bambae mi luk yu bakegen long Kingdom blong God.” Mi talem long hem se, sipos hem i laef i stap, hem i mas talemaot long famle blong mi wanem i bin hapen. Mi mekem wan prea long hat blong mi mo mi folem gad ya. Hem i tekem mi mi go long smol haos blong hem we i stap insaed long kalabus. Hem i talem long mi se: “Mi wantem askem sam kwestin long yu. Las naet, yu talem se nem blong God i Jeova. ?Yu save soem samting ya insaed long Baebol?” !Mi sapraes tumas mo mi haremgud tu! Hem i karem Baebol blong hem, mo mi soem nem ya Jeova long hem mo long waef blong hem. Hem i gat plante narafala kwestin long saed blong ol samting we mifala i bin storebaot wetem ol fofala woman ya long naet. Hem i glad long ol ansa we hem i kasem, mo i askem waef blong hem blong rerem wan ti blong mi mo sista we i stap wetem mi.

Tu dei biaen, oli letem mitufala i aot long kalabus, be wan jaj i tekem disisen ya se, from we mi mi wan woman Hangari, mi mas aot long Jekoslovakia. Afta long samting ya nao, Tibor i askem mi sipos mi wantem mared wetem hem. Mitufala i  mared, mo mi muv i go long haos blong papa mama blong hem.

Fasin Agens i Kam Strong Moa

Mi wetem Tibor, mitufala i gohed tugeta long wok blong prij, nating se Tibor i gat narafala wok tu we ol brata oli putum long han blong hem. Sam dei nomo bifo we ol soldia blong Hangari oli kam insaed long taon blong mifala long Novemba 1938, pikinini boe blong mitufala, nem blong hem Tibor Junior, i bon. Long Yurop, Wol Wo Tu klosap i stat. Hangari i bos long wan bigfala haf blong Jekoslovakia, mo from samting ya ol Witnes blong Jeova we oli laef long ples ya oli fesem strongfala fasin agens.

Long Oktoba 10, 1942, Tibor i go long Debrecen blong mitim sam brata. Be hem i no kambak long trip ya. Biaen, hem i talem long mi wanem i bin hapen. Long brij ya we hem i mas mitim ol brata, hem i no faenem ol brata, be hem i faenem ol polisman we oli werem ol klos blong wokman. Oli stap wet long hasban blong mi mo Pál Nagypál, we tufala i laswan brata blong kasem ples ya. Ol polisman oli tekem tufala i go long polis stesen, mo oli kilkilim aninit blong leg blong tufala wetem wud gogo soa i kam bigwan tumas mo ae blong tufala i dak.

Biaen oli givim oda long tufala se oli mas putum ol but blong tufala mo stanap. Nating se tufala i safa bigwan, be ol polisman i fosem tufala blong wokbaot i go kasem tren stesen. Polis i karem wan narafala man i kam, we oli fasem ol soa long hed blong hem wetem wan kaliko, mekem se man ya i no moa save luk. Man ya, hem i Brata András Pilling, we hem tu i bin kam long brij blong mitim ol narafala brata. Oli tekem hasban blong mi i go long tren go kasem wan kalabus long Alag, klosap long Budapest. Wan long ol gad we i luk ol soa long leg blong Tibor i laf nogud long hem i se: “!Tru, i gat sam man we oli nogud tumas! Yu no wari, bambae mifala i hilim yu.” Tu narafala gad oli stat kilim ol leg blong Tibor, oli mekem blad blong hem i ron olbaot. Afta long sam menet, ae blong hem i dak.

Long nekis manis, oli putum Tibor long kot wetem bitim 60 narafala brata mo sista. Oli jajem Brata András Bartha, Brata Dénes Faluvégi, mo Brata János Konrád se bambae oli hangem trifala i ded. Oli jajem Brata András Pilling se hem i mas kalabus blong ful laef blong hem, mo hasban blong mi i mas stap 12 yia long kalabus. ?Wanem fol blong olgeta? Loea we i agensem olgeta i talem se olgeta ya oli wantem kafsaedem gavman, oli no wantem joen long ami, oli spae blong ol narafala kantri, mo oli tok nogud agensem tabu jos. Biaen oli jenisim jajmen blong ol brata we oli mas ded se bambae oli kalabus ful laef blong olgeta.

Mi Folem Hasban Blong Mi

Tu dei afta we Tibor i go mitim ol brata long Debrecen, mi girap eli long moning mo mi stap aenem ol klos blong mifala. Wantaem nomo mi harem wan man i kilkilim doa. Mi ting se, ‘Olgeta ya oli kam.’ Sikis polisman oli kam insaed long haos mo oli talem long mi se oli gat raet blong lukluk insaed long haos blong mi. Oli arestem mifala evriwan we i stap long haos ya, wetem smol boe blong mitufala we i gat tri yia blong hem. Long semfala dei, oli sanem mifala i go long kalabus long Pétervására, Hangari.

Taem mi kasem ples ya, mi fiva bigwan mo oli seraotem mi long ol narafala man we oli kalabus. Taem mi kam gud bakegen, i gat tu soldia i stap insaed long rum blong mi long kalabus. Tufala i stap raorao long saed blong mi. Wan i talem se, “!Yumi mas kilim hem i ded! !Bambae mi mi kilim hem!” Be narawan i wantem jekem helt blong mi bifo we oli kilim mi mi ded. Mi plis long tufala se tufala i no sutum mi. Biaen tufala i aot, mo mi tangkiu long Jeova from help blong hem.

Ol gad oli gat wan spesel fasin blong askem ol kwestin. Oli givim oda long mi se mi mas ledaon, we fes blong mi i lukluk i godaon long floa. Oli putum ol stoking i go long maot blong mi, oli fasem ol han mo ol leg blong mi, mo oli wipim mi  gogo blad blong mi i ron. Oli stop nomo taem wan long ol soldia i taed tumas. Oli askem mi, hu ya ol man we hasban blong mi i mas mitim long dei we oli arestem hem. Mi no talem wan samting long olgeta, taswe oli gohed blong kilim mi gogo kasem tri dei. Long namba fo dei, oli letem mi mi karem boe blong mi i go long mama blong mi. Long taem ya, weta i kolkol we i kolkol tumas. Mi karem smol boe blong mi long bak blong mi we i soa tumas, mo mi wokbaot samwe 13 kilomita go kasem tren stesen. Mi gohom long tren, be mi mas kambak long kalabus long semfala dei.

Oli jajem mi se mi mas kalabus sikis yia long Budapest. Taem mi kasem kalabus ya, mi harem se Tibor tu i stap long ples ya. !Mitufala i glad tumas taem oli letem mitufala i storian tugeta, nating se mitufala i storian sam menet nomo, mo i gat wan bigfala fenis i seraotem mitufala! Mitufala i filim lav blong Jeova, mo ol smol menet ya we mitufala i spenem tugeta oli givim paoa long mitufala. Bifo we mitufala i mit bakegen, mitufala i mas fesem sam rabis traem, we plante taem klosap mitufala i ded from.

Mifala i Go Long Plante Defdefren Kalabus

Mifala samwe long 80 sista i hivap long wan rum blong kalabus. Mifala i wantem tumas blong kasem sam kakae long saed blong spirit, be i luk olsem se i no gat rod blong ol man afsaed long kalabus oli save sanem samting i kam long mifala. ?Olsem wanem? ?Maet i gat rod blong mifala i tekem sam kakae long saed blong spirit insaed long kalabus nomo? Hemia samting we mifala i mekem. Mi volontia blong somap ol stoking blong ol man we oli wok long ofis blong kalabus ya. Long wan long ol stoking ya, mi putum wan pis pepa blong askem se wanem nao namba blong Baebol long lis blong ol buk we i stap long laebri blong kalabus. Mi askem namba blong tu narafala buk tu, blong mekem we ol man ya oli no askem eni kwestin.

Long nekis dei, mi kasem sam moa stoking long ol man blong ofis. Long wan long ol stoking ya, i gat ol namba blong ol buk ya we mi bin askem. Biaen, mi givim ol namba ya long wan gad, mo mi askem ol buk ya. !Mifala i glad tumas taem mifala i kasem ol buk, wetem Baebol tu! Evri wik, mifala i jenisim tu narafala buk ya, be mifala i kipim Baebol oltaem. Taem gad i wantem save from wanem mifala i holem Baebol, oltaem mifala i ansa se: “Hemia wan bigfala buk ya, mo evriwan i wantem ridim.” Olsem nao, mifala i save ridim Baebol.

Wan dei, wan ofisa i singaot mi long ofis blong hem. Fasin blong man ya i swit tumas long mi.

Hem i talem long mi se: “Misis Haffner, mi gat gud nius blong talem long yu. Yu save gobak hom. Maet tumora yu save gohom. Be sipos i gat wan tren, yu save go tede nomo.”

Mi ansa long hem se: “I gud tumas sipos i olsem.”

Hem i se: “Yes, i gud tumas. Yu gat wan pikinini, mo ating yu wantem lukaotgud long hem.” Nao hem i se, “Yu mas saenem pepa ya nomo.”

Mi askem hem se: “?Pepa blong wanem ya?”

Hem i gohed i se: “Yu no wari long samting ya. Yu saenem pepa ya nomo, afta yu save go.” Nao hem i talem long mi se: “Taem yu kasem haos blong yu, yu save mekem eni samting we yu wantem. Be naoia, yu mas saenem pepa ya we i talem se yu no moa wan Witnes blong Jeova.”

Wantaem nomo mi talem long hem stret se mi no wantem.

Hem i kros long mi mo i singaot strong se, “!Olsem nao bambae yu ded long ples ya!” mo hem i aotem mi long ofis blong hem.

Long Mei 1943, oli sanem mi mi go long wan narafala kalabus long Budapest, mo biaen bakegen oli sanem mi mi go long vilej ya Márianosztra. Long vilej ya, mifala i stap long wan haos blong trenem ol sista blong Katolik jos, mo mifala i laef wetem samwe 70 blong ol Katolik sista ya. Wan long ol Katolik sista ya i rili intres long tijing blong Baebol mo hem i talem se: “Ol tijing ya oli nambawan. Mi neva harem wan samting olsem hemia. Plis, mi wantem save moa.” Mifala i tokbaot niufala wol mo gudfala laef  long wol ya. Taem mifala i stap storian, wan narafala sista we i bos blong ol sista blong Katolik jos i kam. Wantaem nomo, oli tekem Katolik sista ya we i stap storian wetem mifala, oli karemaot ol klos blong hem, mo oli wipim hem. Taem mifala i luk hem bakegen, hem i plis long mifala se: “Plis, yufala i mas prea long Jeova blong hem i sevem mi mo i tekemaot mi long ples ya. Mi wantem joen wetem yufala.”

Biaen oli sanem mifala i go long wan olfala kalabus long Komárom, wan taon long Danube Reva, samwe 80 kilomita long wes blong Budapest. Laef long ples ya i nogud tumas. Olsem plante narafala sista, mi kasem sik ya taefus, mi traot blad mo bodi blong mi i kam slak olgeta. Mifala i no gat meresin, mo mi ting se bambae mi ded. Be biaen, ol ofisa oli lukaotem wan man blong wok long ofis. Ol sista oli talem se mi mi save mekem wok ya. Ale, oli givim sam meresin long mi, mo mi kamgud bakegen.

Mi Stap Wetem Famle Blong Mi Bakegen

Taem ami blong Rasia i kam long is blong kantri, oli fosem mifala blong muv i go long wes. Bambae i tekem plante taem sipos mi tokbaot olgeta rabis samting we mifala i bin gotru long hem. Klosap mi ded plante taem, be Jeova i kea long mi, mo mi laef i stap. Taem wo i finis, mifala i stap long taon blong Tábor, samwe 80 kilomita longwe long Prague. Tri wik biaen, mi wetem Magdalena, hemia smol sista blong hasban blong mi, mitufala i kasem hom blong mifala long Lučenec, long Mei 30, 1945.

Mi stap longwe lelebet long haos yet, be mi luksave mama blong hasban blong mi wetem Tibor Junior, boe blong mi we mi laekem tumas, tufala i stanap afsaed. Wota blong ae blong mi i ron, nao mi singaot se, “!Tibike!” Boe blong mi i resis i kam long mi mo i holem mi. “?Mama, naoia bambae yu stap a? ?Bambae yu no moa gowe long mi?” Hemia ol faswan tok we boe blong mi i talem long mi, mo bambae mi neva fogetem ol tok ya.

Jeova i gat sore long hasban blong mi tu, Tibor. Hem i stap long kalabus long Budapest, mo biaen oli sanem hem i go long wan kamp blong wok long Bor, wetem samwe 160 narafala brata. Plante taem klosap oli ded, be olsem wan grup, oli stap laef. Tibor i kamhom long Eprel 8, 1945, wan manis bifo we mi mi kambak.

Taem wo i finis, mifala i nidim help blong Jeova yet blong fesem ol traem we oli kamaot long ol 40 yia aninit long rul blong ol Komunis long Jekoslovakia. Bakegen, oli putum Tibor long kalabus blong plante yia. Mi nomo mi mas lukaot long boe blong mitufala. Taem Tibor i aot long kalabus, hem i wok olsem seket elda. Long ol 40 yia we ol man Komunis oli rul, mifala i tekem evri janis blong talemaot bilif blong mifala. Mifala i halpem plante man blong oli save trutok. Olsem nao, oli kam ol pikinini blong mifala long saed blong spirit.

!Mifala i glad tumas taem gavman i letem mifala i fri blong wosip long 1989! Long 1990, mifala i stap long faswan asembli we mifala i holem long kantri blong mifala, afta plante yia. Taem mifala i luk plante taosen brata sista we oli bin fasgud long God long ol yia ya, mifala i luksave we Jeova i bin givim paoa long olgeta evriwan.

Tibor, hasban blong mi we mi laekem tumas, hem i stap tru long God go kasem ded blong hem long Oktoba 14, 1993. Naoia mi laef klosap long boe blong mi long Žilina, Slovakia. Mi no moa gat plante paoa long saed blong bodi, be tingting blong mi i strong yet from we Jeova i sapotem mi. Mi sua fulwan se, wetem paoa blong Jeova, mi save fesem eni traem we i kamaot long olfala wol ya. Mo tu, mi stap wet long taem ya we bambae, long kaengud fasin blong hem, Jeova i save givim paoa long yumi blong yumi save laef blong olwe.

[Tok blong pija long pej 20]

Pikinini boe blong mi, Tibor Junior (taem i gat 4 yia) we mi mas lego

[Tok blong pija long pej 21]

Tibor, wetem sam narafala brata long Bor

[Tok blong pija long pej 22]

Wetem Tibor mo Magdalena, sista blong hasban blong mi, long 1947, long Brno

[Tok blong pija long pej 23]

Klosap mi ded plante taem, be Jeova i kea long mi, mo mi laef i stap