“Mifala i Wantem Blong Talem ‘!Yes!’ ”

I NO longtaem i pas, branj ofis blong ol Witnes blong Jeova long Naejeria i kasem wan leta we sam haf blong leta ya i talem olsem:

“Boe blong mifala, Anderson, i ded taem hem i gat 14 yia. Bifo we hem i ded, hem i stap fidim tu smol faol. Hem i wantem salem ol faol ya mo sanem mane we hem i winim i go long branj ofis olsem wan presen blong sapotem wok blong prij raon long wol. Be hem i ded bifo we hem i save salem tufala faol ya.

“Mitufala, papa mo mama blong hem, mitufala i lukaotgud long ol faol ya mo biaen mitufala i salem, olsem we Anderson i bin wantem mekem. Mitufala i sanem mane ya long yufala olsem presen blong Anderson. From ol promes blong Jeova, mitufala i trastem fulwan se i no longtaem, yes i no longtaem nating, bambae mitufala i luk Anderson bakegen. Mitufala i wantem blong talem ‘!Yes!’ taem hem i askem sipos mitufala i mekem samting we hem i bin wantem tumas blong mekem. Mitufala i stap wet blong luk Anderson bakegen, wetem ol narafala ‘witnes blong God we oli plante we plante,’ we olgeta ya tu bambae oli laef bakegen.”​—Hibrus 12:1; Jon 5:​28, 29.

Samting we i stap long leta ya i klia. Bilif long saed blong laef bakegen long ded i wan hop we i rili leftemap tingting blong ol trufala Kristin. !I wan bigfala glad ya blong plante milian famle, olsem famle blong Anderson, we bambae oli welkamem ol fren mo famle blong olgeta we enemi ya ded i bin tekemaot olgeta!​—1 Korin 15:​24-26.

Gudfala hop ya long saed blong laef bakegen long ded i stap insaed long Tok blong God, Baebol. Hem i wan long plante gudgudfala samting we i no longtaem bambae oli kamtru long niufala wol ya we stret fasin nomo bambae i stap long hem, aninit long Kingdom blong God. (2 Pita 3:13) Baebol i soemaot wanem we God bambae i mekem long ol man long taem ya, hem i se: “Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”​—Revelesen 21:4.