Ol Bigfala Poen Long Buk Blong Namba
Tok Blong Jeova i Wan Samting We i Laef
Ol Bigfala Poen Long Buk Blong Namba
OL MAN Isrel oli kam wan nesen afta we oli aot long Ijip. Smoltaem biaen, oli save go insaed long Promes Lan. Be samting ya i no hapen. Taswe oli wokbaot samwe long 40 yia long “bigfala draeples ya we i nogud olgeta.” (Dutronome 8:15) ?From wanem? Stori blong olgeta, we i stap long buk ya blong Namba, i talem long yumi wanem we i bin hapen. Stori ya i mas pulum yumi blong tingbaot, se i impoten blong obei long Jeova God mo respektem ol man we hem i putumap.
Moses i raetem buk ya long draeples mo long ol Flatples blong Moab. I tekem 38 yia mo 9 manis—stat long 1512 B.K.T go kasem 1473 B.K.T.— blong raetem buk ya fulwan. (Namba 1:1; Dutronome 1:3) Oli karem nem blong buk ya Namba long tufala sensas we oli mekem long ol man Isrel. Afta we oli mekem faswan sensas, oli wet 38 yia blong mekem namba tu sensas. (Japta 1-4, 26) Stori ya i seraot long tri haf. Faswan haf i tokbaot ol samting we i hapen long Hil ya Sinae. Seken haf i tokbaot wanem we i hapen taem ol man Isrel oli wokbaot long draeples. Mo laswan haf i tokbaot ol samting we i hapen long Flatples blong Moab. Taem yu ridim buk ya, ating yu save askem long yu wan se, ‘?Mi save lanem wanem from ol stori ya? ?I gat sam rul long buk ya we i save givhan long mi tede?’
LONG HIL YA SINAE
Faswan long tufala sensas ya i tekem ples taem ol man Isrel oli stap daon long Hil ya Sinae. Ol man we oli gat 20 yia i go antap, oli kaontem se namba blong olgeta i kasem 603,550 man. Ol Livae oli no insaed long namba ya from we sensas ya i blong save hamas man oli save joen long ami. Ol woman, pikinini mo ol Livae long ful kamp ya, namba blong olgeta maet i bitim tri milian.
Afta long sensas ya, ol man Isrel oli kasem sam advaes blong rerem olgeta long wokbaot we bambae oli mekem, mo ol save long saed blong wok blong ol Livae, wok long haos tapolen, ol loa long saed blong fasin klin, mo ol loa long saed blong fasin jalus, mo ol promes we ol man Nasiraet oli mekem. Long Japta 7 i gat ol infomesen long saed blong sakrefaes we ol lida blong ol twelef laen oli mas mekem we i joen wetem taem we oli openem olta. Mo Japta 9 i tokbaot lafet ya blong Pasova. Mo tu oli kasem ol advaes long saed blong fasin blong putumap mo tektekemaot ol haos tapolen blong olgeta.
Ansa Blong Sam Kwestin Long Saed Blong Baebol:
2:1, 2—?Wanem ya ol “flaeg” we fofala kampani blong ol laen blong Isrel oli kamp raon long hem long draeples? Baebol i no talem stret se ol flaeg ya oli olsem wanem. Be, yumi save se ol flaeg ya oli no olsem samting we i tabu mo we oli yusum long wosip blong olgeta. Ol “flaeg” ya oli olsem ol saen nomo blong soem long ol man Isrel stret ples blong olgeta long kamp.
5:27—Vas ya i tokbaot woman we i mared finis be i slip wetem narafala man, i se “ples blong pikinini long bel blong hem bambae i kam drae.” ?Hemia i minim wanem? Tok ya “ples blong pikinini long bel” i minim haf blong bodi we i mekem we woman i save gat pikinini. (Jenesis 46:26) Mo taem i se “bambae i kam drae” i minim se woman i no moa naf blong karem bebi.
Ol Lesen Blong Yumi:
6:1-7. Ol man Nasiraet oli no save dring alkol no eni samting we oli wokem long frut ya grep, mo oli mas lego sam samting we olgeta nomo oli wantem. Oli mas lego hea blong olgeta i longfala—hemia wan saen blong soem se oli obei long God, olsem we ol woman oli mas obei long man blong olgeta no papa blong olgeta. Ol man Nasiraet oli mas stap klin taswe oli stap longwe long ol ded bodi, nating we i blong wan famle blong olgeta. Tede tu, ol paenia oli soemaot fasin ya blong lego ol samting we olgeta nomo oli wantem mo obei long Jeova mo ol plan blong hem. Sam long olgeta oli mas go long narafala kantri blong mekem wok ya, mekem se i hadwok samtaem blong oli kambak long kantri blong olgeta taem wan famle blong olgeta i ded.
8:25, 26. Blong mekem sua se wok ya blong ol Livaet i gohed gud, mo from we sam oli kam olfala, ol olfala oli mas ritae long wok ya blong olgeta. Be, oli save givhan yet long ol narafala Livaet. Tede, man i no stap ritae long wok ya blong talemaot Kingdom, be rul we i stap long loa ya i save tijim yumi long wan impoten lesen. Sipos wan Kristin i kam olfala, mo i gat sam wok we hem i no moa save mekem, hem i save mekem narafala wok we hem i naf blong mekem.
OLI WOKBAOT OLBAOT LONG DRAEPLES
Taem klaod ya we i kavremap haos tapolen i muv i go antap, ol man Isrel oli statem wokbaot blong olgeta we i go finis long flat ples blong Moab. Hemia i tekem 38 yia mo wan no tu manis. Blong givhan long yu, yu save lukluk long map long pej 9 long buklet ya “See the Good Land,” we ol Witnes blong Jeova oli wokem.
Taem oli stap wokbaot i go long Kades, mo oli kasem draeples blong Paran, i gat tri samting we oli stap komplen from. Faswan komplen i stop taem Jeova i sanem faea i kam spolem sam long ol man ya. Namba tu komplen, hemia taem ol man Isrel oli toktok smol from mit, nao Jeova i givim pijin blong oli kakae. Mo namba tri komplen, hemia taem Meriam mo Eron oli toktok smol agens long Moses, ale Meriam i kasem sik ya leprosi.
Taem oli kamp long Kades, Moses i sanem 12 spae oli go lukluksave Promes Lan. Long en blong 40 dei oli kambak. Ol man oli lesin long nogud ripot we ten long ol spae oli talem, mekem se oli wantem stonem Moses, Eron, mo Josua mo Keleb we oli gat bilif. Jeova i talemaot se bambae i sanem wan rabis sik i kam blong kilim ol man oli ded, be Moses i prea from olgeta. Taswe God i talemaot se bambae oli wokbaot olbaot long draeples blong 40 yia—go kasem taem we olgeta man ya we oli gat 20 yia i go antap, oli ded.
Jeova i givim sam moa rul. Kora mo ol narafala, oli agens long Moses mo Eron, nao i gat sam we faea i kakae olgeta mo sam we graon i open i solemdaon olgeta. Long nekis dei olgeta man evriwan long kamp oli toktok smol agens long Moses mo Eron. From samting ya, i gat 14,700 man we Jeova i kilim olgeta oli ded. God i jusumaot Eron blong i kam hae pris, taem hem i mekem we wokingstik blong Eron i gat flaoa long hem. Biaen Jeova i talemaot sam moa loa long saed blong ol wok blong ol Livaet mo olsem wanem blong ol man oli kam klin. Rod ya blong yusum ases blong red kao i olsem pija blong sakrefaes blong Jisas we i mekem ol man oli kam klin.—Hibrus 9:13, 14.
Meriam i ded taem ol laen blong Isrel oli gobak long Kades. Ale, ol man Isrel oli stat toktok smol bakegen agens long Moses mo Eron. ?From wanem oli mekem olsem? From we oli no gat wota. Moses mo Eron, tufala i lusum janis we tufala i gat blong go insaed long Promes Lan, from we tufala i no leftemap nem blong Jeova, taem hem i mekem merikel blong givim wota long ol man Isrel. Eron i ded long Hil ya Horo taem ol man Isrel oli aot long Kades. Taem ol man Isrel oli go raon long Edom, oli kam taed mo oli stat tok agens long God mo Moses. Jeova i sanem ol posen snek blong panisim olgeta. Bakegen Moses i prea long God from olgeta ya. Nao God i talem long hem blong i mekem wan snek we oli wokem long bras mo putum long wan pos, mekem se ol man we posen snek i kakae olgeta, oli save lukluk i go long snek ya mo kam gud bakegen. Snek ya we oli wokem long bras i pija blong Jisas Kraes we oli hangem long pos, blong yumi save kasem plante gudfala samting from. (Jon 3:14, 15) Isrel i winim ol King blong Sihon mo Og, mo oli tekem kantri blong olgeta.
Ansa Blong Sam Kwestin Long Saed Blong Baebol:
12:1—?From wanem Meriam mo Eron i toktok smol agens long Moses? From we Meriam i wantem moa paoa hemia nao risen from wanem tufala i toktok smol. Taem waef blong Moses, Jipora, i kam long draeples blong stap wetem Moses, Meriam maet i fraet se bambae oli no moa tingbaot hem olsem wan lida blong ol woman long kamp.—Eksodas 18:1-5.
12:9-11—?From wanem Meriam nomo i kasem sik ya leprosi? Ating, from we hem nao i statem fasin ya blong komplen, afta hem i pulum Eron i joen wetem hem. Eron i gat stret tingting taem hem i talemaot rong we hem i mekem.
21:14, 15—?Wanem buk ya we oli tokbaot long ol vas ya? Ol vas ya i tokbaot sam buk we ol man blong raetem Baebol oli yusum. (Josua 10:12, 13; 1 King 11:41; 14:19, 29) “Ol Stori blong ol Faet we Hae God i Mekem” hem i wan long ol buk ya. Hem i gat olgeta stori blong ol wo blong ol man blong Jeova.
Ol Lesen Blong Yumi:
11:27-29. Moses i soem nambawan eksampol we yumi save folem taem ol narafala oli kasem sam blesing long wok blong Jeova. Moses i glad taem Eldad mo Medad oli kam olsem ol profet. Hem i no kam jalus mo i no gat tingting ya se hem nomo i nambawan.
12:2, 9, 10; 16:1-3, 12-14, 31-35, 41, 46-50. Jeova i wantem we ol man we oli wosipim hem oli mas respektem olgeta we God i putumap olgeta.
14:24. Wan rod blong agensem ol traem blong wol we oli save pulum yumi blong mekem rong samting, hemia blong wokem wan ‘tingting [“spirit,” NW ] we i narafala.’ I minim se yumi gat wan tingting we i defren long tingting blong wol.
15:37-41. Ol spesel tasel we oli hanghang long klos blong ol man Isrel i blong mekem olgeta oli tingbaot se God i makemaot olgeta finis blong oli wosip long hem mo obei long ol loa blong hem. Taswe yumi tu, yumi mas obei long ol rul blong God mo soemaot se yumi stap defren long wol ya.
LONG FLATPLES BLONG MOAB
Taem ol laen blong Isrel oli kamp long flat ples blong Moab, ol man Moab oli fraet. King Balak, blong Moab, i pem man ya Balam, blong i singaot trabol i kam long ol man Isrel. Be Jeova i fosem Balam blong i singaot blesing nomo i kam long olgeta. Ol woman Moab mo ol woman Midian oli pulum ol man Isrel blong foldaon long fasin blong slip olbaot mo blong wosip long ol aedol. From samting ya, Jeova i kilim i ded 24,000 man we oli mekem nogud fasin. Trabol ya i stop taem Finehas i tekem aksin blong no letem nogud fasin ya agens long Jeova.
Taem oli mekem namba tu sensas, i no gat wan long olgeta man long faswan sensas we oli laef i stap. Be Josua mo Keleb nomo tufala i laef yet. God i jusum Josua blong i tekem ples blong Moses. Ol man Isrel oli kasem sam moa advaes long ol rod blong mekem ol defdefren sakrefaes mo fasin blong mekem ol promes. Mo tu, ol man Isrel oli go mekem faet long ol man Midian blong panisim olgeta from ol samting ya we oli bin mekem long olgeta. Ol laen blong Ruben, Gad mo haf long laen blong Manase oli stap long is saed blong Jodan Reva. Ol man Isrel oli kasem advaes tu blong gokros long Jodan mo blong tekem kantri ya i blong olgeta. Oli talemaot ol boda blong kantri ya. Oli sakem ol spesel ston blong faenemaot se wanem graon bambae i go long wanem laen. Ol Livaet oli gat 48 taon, mo 6 long ol taon ya i ples we man i save go blong haed long hem.
Ansa Blong Sam Kwestin Long Saed Blong Baebol:
22:20-22—?From wanem Jeova i kros long Balam? Jeova i bin talem long profet ya Balam blong i no singaot trabol i kam long ol man Isrel. (Namba 22:12) Be nating, profet ya i go wetem ol man blong Balak we tingting blong hem se bambae i mas singaot trabol i kam long man Isrel. Balam i wantem mekem king ya blong Moab i glad long hem from we hem i wantem se king ya i givim pei long hem. (2 Pita 2:15, 16; Jud 11) Balam i traem plante taem blong singaot trabol i kam long Isrel be God i mekem we hem i talemaot blesing nomo. Nating se i olsem, Balam i laekem moa blong mekem we king ya i glad long hem, ale hem i talem long king blong sanem ol woman we oli wosip long Bal blong oli pulum ol man Isrel oli gowe long God. (Namba 31:15, 16) Taswe, fasin griri blong profet ya Balam we i nogud, i mekem we God i kros long hem.
30:6-8—?Wan Kristin man i save blokem promes we woman blong hem i mekem? Long saed blong ol strongfala promes, Jeova i dil wetem ol man blong hem wanwan. Eksampol, taem wan man i givim laef blong hem i go long Jeova, hemia wan promes we hem wan i mekem long God. (Galesia 6:5) Hasban i no gat raet blong blokem no kanselem wan promes olsem. Be, wan waef i no mas mekem wan promes we i agens long Tok blong God no ol wok we hem i mas mekem blong hasban blong hem.
Ol Lesen Blong Yumi:
25:11. !Finehas i soemaot nambawan eksampol long yumi, blong gat strong tingting long wosip blong Jeova! Taswe, filing ya blong wantem we kongregesen i stap klin i mas pusum yumi blong talemaot long ol elda ol bigfala sin long saed blong seks we samfala oli mekem.
35:9-29. Taem wan man i kilim narafala i ded, be hem i no minim, hem i mas lego hom blong hem mo ronwe i go long wan long ol taon ya blong haed. Samting ya i tijim yumi se laef i tabu mo yumi mas respektem laef.
35:33. Fasin ya blong kilim i ded ol man we oli no mekem rong, hem i mekem wol i doti. I gat wan rod nomo blong mekem wol ya i klin bakegen, hemia blong kilim ol man ya we oli kilim man i ded. !Taswe, i stret nomo we Jeova bambae i spolem ol rabis man bifo we wol ya i kam wan paradaes!—Ol Proveb 2:21, 22; Daniel 2:44.
Tok Blong God i Gat Paoa Mo i Save Wok
Yumi mas soem respek long Jeova mo ol man we hem i makemaot olgeta we oli gat wok long medel blong ol man blong hem. Buk blong Namba i soemaot klia poen ya. !Hemia wan impoten lesen blong yumi tede blong holem pis oltaem mo fasin joengud insaed long kongregesen!
Ol stori we oli stap long buk blong Namba i soemaot se, sipos man i kam slak long saed blong spirit, samting ya i save mekem hem i foldaon long sin, olsem fasin blong toktok smol, doti fasin long saed blong seks mo wosip long giaman god. Sam long ol eksampol mo lesen long buk ya, oli save yusum blong mekem ol tok blong lokol nid long Miting blong Kingdom Wok long ol kongregesen blong ol Witnes blong Jeova. Tru ya, ‘tok blong God i wan samting we i laef, i gat paoa mo i stap wok’ long laef blong yumi.—Hibrus 4:12.
[Tok blong pija long pej 25]
Klaod we i stap antap long haos tapolen i soemaot se Jeova i stap lidim ol man Isrel blong putumap mo tektekemaot ol haos tapolen blong olgeta
[Tok blong pija long pej 26]
I stret nomo we yumi obei long Jeova mo yumi mas respektem ol man we hem i putumap