Wan Kwestin

?Wanem mining blong tok blong Jisas long ol disaepol blong hem taem hem i se: “Mi mi luk Setan i aot long heven, i foldaon olsem we laetning i sut i kamdaon”?

Afta we Jisas i jusum ol 70 disaepol blong hem, ‘hem i sanem olgeta oli go tutu long ol vilej mo ol narafala ples we bambae, i no longtaem, hem i save pas long olgeta.’ Taem ol 70 man ya oli kambak bakegen, oli glad tumas long wok we oli mekem. Mo oli se: “!Masta! Nating we ol devel, be taem mifala i tok long olgeta long nem blong yu, olgeta oli obei long mifala.” Long taem ya nao Jisas i se: “Mi mi luk Setan i aot long heven, i foldaon olsem we laetning i sut i kamdaon.”​—Luk 10:​1, 17, 18.

Fastaem i luk olsem se samting we Jisas i stap tokbaot hem i samting we i hapen finis. Be, 60 yia afta we Jisas i talem ol tok ya, olfala aposol Jon i yusum klosap ol semfala tok taem hem i raetem se: “Bigfala algita ya, hem i snek ya blong bifo we nem blong hem ‘Setan’ no ‘Man we i agensem man’, we i stap giaman long olgeta man long wol, i lidim olgeta oli go krangke. Nao olgeta long heven oli sakemaot hem wetem olgeta enjel blong hem oli aot long heven, oli kamdaon long wol.”​—Revelesen 12:9.

Taem Jon i raetem ol tok ya, Setan i stap yet long heven. ?Olsem wanem yumi save samting ya? From we buk ya blong Revelesen i wan buk blong profet tok, mo i no buk blong talemaot histri. (Revelesen 1:1) Taswe, taem Jon i raetem buk blong Revelesen, oli no sakemaot Setan i kamdaon long wol yet. Ol pruf oli soemaot se smol taem afta we Jisas i sidaon olsem King long Kingdom blong God long 1914, hemia nao taem we hem i sakemaot Setan i kamdaon long wol ya. *​—Revelesen 12:​1-10.

?Ale, from wanem Jisas i toktok olsem se hem i sakemaot Setan long heven finis? Sam man blong hae save oli talem se, Jisas i tok strong long ol disaepol blong hem from we oli soem flas tingting. Ol man ya blong hae save oli ting se samting we Jisas i minim hemia se: ‘I tru yufala i ronemaot ol devel, be yufala i no mas flas from samting ya. Setan i gat flas tingting, mo tingting ya nao i lidim hem blong i foldaon.’

Yumi no save talem stret se i olsem. Be, i luk olsem se Jisas i talem tok ya from we hem i glad long ol disaepol blong hem mo hem i tokbaot nogud samting we bambae i kasem Setan long fiuja. Jisas i save moa i bitim ol disaepol blong hem se Setan i agensem olgeta bigwan. !Tingbaot bigfala glad we Jisas i gat taem hem i harem we ol strongfala devel ya, oli obei long ol disaepol blong hem we oli man nomo mo oli no stret gud olgeta! Paoa we oli gat blong winim ol devel ya i mekem yumi kasem save smol wanem we Mikael, jif blong ol enjel, hemia Jisas, bambae i mekem taem hem i faet wetem Setan mo i sakemaot hem long heven i kamdaon long wol ya.

Taem Jisas i talem se hem i luk we Setan i “foldaon” finis, hem i soemaot klia se Setan bambae i mas foldaon. Hemia i sem mak long sam narafala profet tok long Baebol we oli tokbaot ol samting we bambae oli hapen long fiuja, be oli talem long wan fasin we i olsem se oli hapen finis. Wan eksampol, tingbaot ol profet tok long saed blong Mesaea long Aesea 52:​13–53:12 (NW ). Profet tok ya i yusum sam toktok we i mekem man i ting se tok ya i hapen finis mo sam narafala tok i mekem man i ting se samting ya bambae i hapen long fiuja nomo. Taswe, ol tok ya blong Jisas oli soemaot we hem i sua fulwan se bambae Setan i mas aot long heven folem stamba tingting blong Papa blong Hem. Mo tu, Jisas i sua se long stret taem blong God, hem bambae i sakemaot Setan mo ol rabis enjel blong hem oli go long bigfala hol ya we i godaon we i godaon olgeta mo biaen bambae oli lus blong olwe.​—Rom 16:20; Hibrus 2:14; Revelesen 20:​1-3, 7-10.

[Futnot]