Faenem Ol Advaes We Oli Wok Gud

OL MAN oli wantem tumas blong gat wan gudfala laef. Sipos yumi wantem haremgud long wan wol we laef i had tumas, yumi nidim ol advaes we oli wokgud, mo yumi mas traehad tu blong folem ol advaes ya. Be plante taem ol man oli no wantem lesin long ol gudfala advaes. Plante man oli ting se wanwan man i sud mekem samting we hem nomo i wantem long laef blong hem. Baebol i talem se, Setan, enemi ya we i agensem rul blong God, hem i givim independens long faswan man mo woman. Long Jenesis 3:​5, Setan i talem long Iv se: “[God] i save se sipos yutufala i kakae frut ya, bambae ae blong yutufala i open, nao bambae yutufala i kam olsem hem, we i save ol fasin we i nogud mo ol fasin we i gud.”

?Olsem wanem long Adam mo Iv? ?Tufala i haremgud long laef blong tufala taem tufala i mekem samting we tufala nomo i wantem? ?Tufala i no kasem trabol taem tufala i tekem disisen blong bos long prapa laef blong tufala? Si tufala i kasem trabol. Jes afta we tufala i ting se, saye, naoia tufala i save fasin we i gud mo fasin we i nogud, ale tufala i kasem rabis frut. God i panisim tufala, nao tufala i statem wan had laef, bodi blong tufala i no moa stretgud olgeta olsem bifo, mo biaen tufala i ded. (Jenesis 3:​16-19, 23) Yumi evriwan yumi mas ded wan dei. Baebol i talem se: “Bifo olgeta, wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.”​—Rom 5:12.

Nating se disisen blong Adam mo Iv i karem ol nogud frut, plante man oli ting yet se ol advaes blong God ya we i Wokem man, oli no waes. Be Baebol i talem se ‘olgeta tok blong Baebol oli kamaot long God mo oli stret gud,’ mo oli save halpem yumi blong “yumi save kam waes long olgeta samting, nao bambae yumi savegud ol rod blong mekem ol gudfala wok.” (2 Timoti 3:​16, 17) Bambae yumi glad moa sipos yumi folem ol advaes blong Baebol. Famle laef i wan impoten haf long laef blong yumi we i nidim ol advaes blong Baebol.

Stap Tru Insaed Long Mared

Baebol i talem se taem God i stanemap mared, mared ya i blong stap olwe. (Jenesis 2:​22-24; Matiu 19:6) Mo tu, Baebol i givim advaes ya long ol man we oli mared se “yufala i mas lukaot gud long mared blong yufala, blong i stap klin gud oltaem,” minim se hasban mo waef, tufala i mas slip tugeta nomo, i no mas slip wetem wan narafala man no woman. (Hibrus 13:4) Be ating yu luk finis we, tede, plante mared oli no folem ol  rul ya. Sam man * oli laekem blong pleplei wetem ol narafala woman we oli no waef blong olgeta, long ples blong wok. Sam narafala bakegen oli giaman long famle blong olgeta from we oli stap slip wetem wan narafala woman we i no waef blong olgeta. I gat sam man tu we oli lego waef blong olgeta blong stap wetem wan woman we i yang moa, oli talem se samting ya i mekem olgeta oli harem se oli yang moa mo oli glad moa. Hemia nao samting we i bin hapen long Verónica.

Nating se i olsem, man we i gat strong tingting blong mekem i gud long hem wan nomata wanem i hapen biaen, hem i no save glad blong longtaem. Ronald i bin luksave samting ya long laef blong hem. Hem i sua se bambae laef blong hem i kam gud moa, ale hem i lego waef blong hem mo i statem wan niufala famle laef wetem wan narafala woman. Hem wetem woman ya, tufala i bin slip tugeta long fasin haed blong sikis yia mo tufala i gat tu pikinini finis, bifo we Ronald i divos long waef blong hem. !Be, smol taem nomo afta we Ronald i divos, niufala woman blong hem i lego hem! Ronald i gobak long haos blong papa mama blong hem. Hem i talem se laef blong hem “i wan samting blong sem nomo.” I gat plante narafala stori olsem hemia. Tru, fasin ya we man i lukaot samting we hem wan nomo i save harem gud long hem, i lidim plante man long divos, i brekem ol famle, mo i karem bigfala soa long hat blong plante man, woman, mo pikinini tu.

Defren olgeta, man we i folem ol advaes blong Baebol i faenem trufala glad. Hemia nao samting we i hapen long Roberto. Hem i talem se: “Ol advaes blong Baebol oli halpem mi blong mi no lusum waef blong mi. Yumi no save kasem trufala glad sipos yumi mekem krangke wetem wan narafala woman, nating se woman ya i luk naes. Tijing blong Baebol i halpem mi blong tinghae long waef blong mi, we i bin stap wetem mi blong plante yia finis.” Advaes blong Baebol we i talem se “yufala i mas lukaot gud we i no gat wan long yufala, i brekem promes ya we hem i mekem wetem woman blong hem,” i givhan plante long laef blong Roberto. (Malakae 2:15) ?Wanem narafala advaes blong God we i save halpem yumi?

Trenem Ol Pikinini Blong Yumi

Samwe 40 yia bifo, plante man oli agri wetem tingting ya se taem oli tijim ol pikinini blong olgeta, oli no mas blokem olgeta tumas. Oli ting se i stret nomo blong letem pikinini i tekem prapa disisen blong hem, long fasin blong tingting mo long fasin blong mekem eni samting. Oli ting se olsemia, ol papa mama oli halpem ol pikinini blong olgeta blong oli gruap gud. Long sam ples, oli putum sam program blong edukesen we i moa fri yet. Ol program ya oli letem ol pikinini oli tekem disisen se bambae oli go skul no nogat, mo i letem olgeta nomo oli jusum hamas taem oli spel mo hamas taem oli spenem blong kasem save. Wan skul we i folem program ya i talem se stamba  rul blong hem i blong “letem ol pikinini oli fri blong talemaot prapa filing blong olgeta, we i no gat wan bigman i jajem olgeta no i faenem poen agens long olgeta.” Tede yet, sam man we oli stadi long fasin blong man oli talem se i nogud blong stretem ol pikinini, nating se sam papa mama oli ting se i impoten blong stretem ol pikinini wetem lav.

?Wanem frut i kamaot? Wan buk (For Your Own Hidden Cruelty in Child-Rearing and the Roots of Violence) i talem se plante man “oli ting se kaen trening ya we i letem wan pikinini i mekem evri samting we hem i wantem, hem i givim ‘tumas’ fasin fri long pikinini, mo fasin ya nao . . . i stamba blong fasin blong brekem loa mo blong dipen long drag, we i kam antap bigwan.” Wan ripot we oli mekem long Yunaeted Stet i talem se klosap 70 pesen blong ol man we oli ansa long ripot ya oli ting se ol bigman oli sud stretem moa ol pikinini mo ol yangfala. Taem ol man oli traem eksplenem wanem i pusum sam yangfala blong sutum man long skul, no mekem ol narafala rabis fasin agensem loa, plante man oli blemem “ol papa mama we oli slak tumas blong stretem pikinini blong olgeta.” Mo nating se sam pikinini oli no mekem ol fasin we i rabis olsemia, be ol papa mama mo ol pikinini oli stap kasem rabis frut yet, from we ol pikinini oli no kasem tijing we i lidim olgeta i go long stret rod.

?Baebol i talem wanem long saed blong samting ya? Tok blong God i talem se papa mama i mas bos long pikinini blong olgeta wetem lav mo oli mas strong lelebet tu. Baebol i talem se: “Krangke fasin i stap long hat blong boe. Stik blong stretem hem i save tekemaot fasin ya i go longwe long hem.” (Ol Proveb 22:​15, NW ) Plante taem, i no nid blong wipim wan pikinini blong stretem hem. Taem papa no mama i stretem wan pikinini, hem i mas kaen, i mas bos long tingting blong hem wan, mo i mas tingbaot ol nid blong pikinini. Olsem nao bambae hem i stretem pikinini blong hem wetem lav. Wan proveb blong Baebol i talem se: “Sipos yu no wantem panisim pikinini blong yu, hemia i min se yu no lavem hem. Sipos yu lavem hem, bambae yu stap stretem hem.”​—Ol Proveb 13:24.

Gudfala frut i kamaot taem wan famle i folem advaes ya. Arturo, wan man Meksiko we i gat 30 yia blong hem mo i jes mared, i talem se: “Papa blong mi i talem klia long mi mo long ol brata blong mi se, hem mo mama, tufala i bos long famle. Oltaem oli stretem mifala. Be tu, oltaem oli tekem taem blong storian wetem mifala. Naoia we mi mi kam wan bigman, mi glad blong gat wan laef we i skelgud, mo mi save se laef blong mi i olsem from ol gudfala advaes we mi bin kasem taem mi yang yet.”

Haremgud Long Ol Beswan Advaes

Tok blong God, Baebol, i givim ol beswan advaes blong mekem man i haremgud. Ol advaes  blong hem oli wok insaed long famle, be i no hemia nomo. Hem i halpem yumi long plante defren rod, from we hem i lanem yumi olsem wanem blong wok long wan wol we bighaf blong ol man oli no wantem se God, we i Hem i Stamba blong ol waes advaes, i bos long laef blong olgeta blong mekem i gud long olgeta.

Long buk blong Ol Sam, Jeova God, God ya we i Wokem olgeta samting, i mekem wan strong promes long yumi. Hem i yusum Deved blong raetem se: “Mi bambae mi tijim yu long rod we i stret blong yu yu folem. Bambae mi stap givim gudfala tingting long yu, mo mi stap lukaot gud long yu.” (Ol Sam 32:8) Traem tingbaot: !God we i Wokem yumi i stap lukaot gud long yumi blong sevem yumi long ol denja! Be nao wan kwestin i stap, we yumi wanwan i mas ansa long hem, se: ‘?Bambae mi mi gat tingting daon, mo mi akseptem ol gudfala advaes blong God?’ Wetem lav, Tok blong God i talem long yumi se: “Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.”​—Ol Proveb 3:​5, 6.

Yumi mas traehad mo yumi mas gat strong tingting blong savegud Jeova. Samting ya i no isi, be Baebol i halpem yumi blong kasem mak ya. Ol fasin blong laef we Jeova i leftemap ‘oli givhan long laef ya long wol, mo bakegen, long laef ya we bambae i kamtru biaen.’ Mo taem yumi tingbaot ol bigfala blesing we hem i karem, yumi save talem se hem i wan rod blong kasem plante samting.​—1 Timoti 4:8; 6:6.

Sipos yu intres long klia tijing blong Baebol mo long ol blesing we i kamaot taem man i folem ol rul blong Baebol long laef blong hem, yu mas putum fasin ya blong ridim mo tingting dip long Tok blong God fasples long laef blong yu. Fasin ya bambae i halpem yu blong winim ol traem we yu fesem tede, mo ol traem we bambae oli kamaot long fiuja. Antap long samting ya, bambae yu gat hop blong laef long niufala wol blong God, we long wol ya bambae Jeova i tijim olgeta man mo i givim pis long olgeta.​—Aesea 54:13.

[Futnot]

[Tok blong pija long pej 5]

Fasin joengud i kam strong moa insaed long mared taem hasban mo waef tufala i folem ol advaes blong Baebol

[Tok blong pija long pej 6]

Ol advaes blong Baebol oli lidim man long stret rod, mo oli no blokem man blong pleplei tu

[Tok blong pija long pej 7]

Ol man we oli folem ol advaes blong Baebol oli haremgud long laef blong olgeta