“Hemia Beswan Samting We Yu Save Mekem”

ALEXIS i gat faef yia. Hem i stap long taon blong Morelia long Meksiko. Papa, mama blong hem oli stadi Baebol wetem ol Witnes blong Jeova mo oli stap joen long ol miting blong olgeta tu. Taem Alexis i go wetem papa mo mama blong hem long wan seket asembli, hem i luk wan pleplei long saed blong wok blong prij long ol haos wanwan. Hem i tanem hem kwiktaem i go long papa blong hem mo i talem se: “Papa, Papa. ?From wanem yu yu no go prij?” Papa blong hem i ansa se: “Mi mi stap stadi yet blong lanem olsem wanem blong prij.” Alexis i talem bakegen wetem glad se: “Papa hemia beswan samting we yu save mekem.”

Pikinini ya i luksave nid blong wok folem ol save blong Jeova. Long taem ya i gat ol kasen brata mo sista blong hem tu oli stap wetem hem long haos. Ale, hem i prea fastaem long Jeova mo afta hem i storian wetem olgeta long saed blong save we hem i bin lanem wetem papa mo mama blong hem long buk ya My Book of bible Stories. Alexis i no save rid yet, be hem i savegud ol stori long buk ya from ol pija we oli talemaot ol stori ya. Hem i talem tu se hem i wantem visitim ol man long haos blong olgeta mo tokbaot wetem olgeta wanem we hem i lanem long saed blong stamba tingting blong God.

Yes, ol yangfala mo ol olfala evriwan oli save mekem se laef blong olgeta i laenap gud wetem wanem we Jeova, we hem i “tabu”, i wantem olgeta blong mekem. Mo oli gat nambawan janis ya blong traem bes blong olgeta long wok blong givim witnes long saed blong Jeova long olgeta nesen. (Aesea 43:3; Matiu 21:16) Yes, hemia beswan samting we ol man oli save mekem.