Ol Manples Blong Meksiko Oli Harem Gud Nius

LONG Novemba 10, 2002, wan grup blong ol manples blong Meksiko oli hivap wanples long taon ya San Miguel long Quetzaltepec. Hemia wan taon we i stap long saot blong naesfala kantri ya Oaxaca. Grup ya oli go long wan distrik asembli blong ol Witnes blong Jeova. Bigfala samting long moning ya, hemia wan Baebol drama.

Taem oli harem ol fasfala toktok blong drama ya, ol man we oli hivap oli sapraes. Oli klaphan mo plante long olgeta oli gat wota long ae blong olgeta. !Drama i kamaot long lanwis ya Mixe! Taem drama i finis, plante oli talemaot tangkiu long niufala blesing ya. Wan woman i talem se: “Hemia fastaem we mi kasem save long wan drama. Hem i tajem hat blong mi.” Wan narafala woman i talem se: “Naoia, nating sipos mi ded, be mi glad from we Jeova i givim janis long mi blong lesin long drama long prapa lanwis blong mi.”

Drama we i kamaot long moning ya i haf blong wan traehad we ol Witnes blong Jeova long Meksiko oli statem i no longtaem blong gud nius blong Kingdom i kasem ol manples.​—Matiu 24:14; 28:​19, 20.

Jeova i Lesin Long Ol Prea

I gat bitim 6,000,000 manples oli laef long Meksiko​—hemia i naf blong mekem wan nesen we i gat plante kastom mo 62 defren lanwis. Long olgeta lanwis ya, i gat 15 lanwis we wanwan long olgeta i gat bitim 100,000 man oli save toktok long hem. Bitim 1,000,000 manples oli no save toktok long lanwis Spen, we hem i ofisol lanwis blong Meksiko. Mo plante long olgeta we oli toktok lanwis Spen, oli naf moa blong lanem trutok blong Baebol long prapa lanwis blong olgeta wan. (Ol Wok 2:6; 22:2) Samfala oli stadi Baebol mo oli strong oltaem blong go long ol miting, be save we oli gat long Baebol i smol nomo. Taswe blong harem trutok long prapa lanwis blong olgeta i wan samting we oli bin prea from blong longtaem finis.

Blong dil wetem traem ya, branj ofis blong ol Witnes blong Jeova long Meksiko i statem wan plan long 1999 blong mekem ol miting blong kongregesen long ol lanwis blong ol manples. Mo tu oli statem ol tim blong tanem ol tok i go long narafala lanwis. Long distrik asembli blong yia 2000, oli mekem drama long lanwis Maya mo biaen long sam narafala lanwis bakegen.

Nekiswan samting, hemia nao blong tanem ol buk we ol Witnes blong Jeova oli yusum blong stadi Baebol wetem ol man. Faswan smol buk we oli tanem i go long lanwis Huave, Maya, Mazatec, Totona, Tzeltal, mo Tzotzil hemia Yu Yu Save Harem Gud Blong Olwe Long Wol. Oli mekem plante moa buk, mo Kingdom Wok Blong Yumi i kamaot evri manis long lanwis Maya. Mo tu, oli rikodem toktok blong sam buk long ol kaset. Blong tijim ol manples blong save rid mo raet long prapa lanwis blong olgeta oli yusum smol buk ya Apply Yourself to Reading and Writing. Naoia i gat ol buk we oli tokbaot Baebol long 15 lanwis blong ol manples, mo bambae i gat plante moa buk yet we oli stap wok long hem.

 “Traehad Bigwan”

Wok ya blong tanem tok i go long narafala lanwis i no isi. Wan risen se i no gat plante buk long wol we oli wokem long ol lanwis blong Meksiko. Plante taem i hadwok blong faenem wan diksonari. Mo tu, i gat plante smolsmol lanwis we oli kamaot long sam bigfala lanwis. Wan eksampol, long lanwis Zapotec hem wan, i gat nara faef smosmol lanwis we oli yusum. Ol smosmol lanwis ya oli defdefren olgeta, taswe ol man Zapotec long wan ples oli no save kasem save long wanem we ol man Zapotec blong narafala ples oli talem taem oli toktok long ol smosmol lanwis ya.

Mo tu, taem i no gat wan stret rul blong folem long wan lanwis, olgeta we oli tanem tok i go long narafala lanwis, olgeta nao, oli mas mekemap sam rul blong olgeta wan. Samting ya i nidim plante risej mo storian tugeta. !Taswe plante oli gat semfala tingting olsem Elida we i wok wetem tim ya we oli tanem tok i go long lanwis Huave! Hem i se: “Taem oli askem mi blong wok long branj ofis blong ol Witnes blong Jeova long Meksiko, blong tanem tok i go long narafala lanwis, mi harem se mi glad be mi fraet tu.”

Mo tu, olgeta ya we oli tanem tok i go long narafala lanwis oli mas lan blong yusum kompiuta, wok folem plan, mo ol teknik blong wok ya. Tru ya wok ya i wan traem blong olgeta. ?Oli harem olsem wanem long wok ya? Gloria, wan memba blong Maya tim, i talem se: “Glad we mifala i gat i bigwan tumas blong joen long wok blong tanem ol buk long saed blong Baebol i go long prapa lanwis blong mifala.” Wan brata we i lukaot long dipatmen ya blong tanem tok i go long narafala lanwis, i tokbaot olgeta we oli wok long dipatmen ya i se: “Filing we oli gat blong kasem ol buk long lanwis blong olgeta i strong tumas, taswe oli traehad bigwan blong winim ol traem we oli kasem blong mekem wok ya.” ?Oli kasem frut from ol traehad ya?

“!Tangkiu Jeova!”

I klia se, Jeova i rili blesem wok we ol manples oli stap mekem. Namba blong ol man we oli stap kam long ol miting mo ol asembli i gru. Wan eksampol, long 2001 i gat 223 Witnes we oli toktok lanwis Mixe, oli hivap blong mekem Memoriol blong ded blong Kraes. !Be wetem olgeta ya i gat 1,674 narafala man we oli kam blong joen long lafet ya​—hemia i seven mo haf taem bitim namba blong ol Witnes!

Naoia, ol man we oli wantem lanem trutok, oli naf blong kasem save trutok long fastaem we oli harem. Mirna i tingbaot wanem we i hapen bifo we oli gat ol miting long lanwis Maya, hem i se: “Mi tekem baptaes afta we mi stadi Baebol tri manis nomo. Mi save se mi mas baptaes be blong talem stret, mi no kasem save trutok fulwan. Risen blong samting ya se, lanwis Maya nao i prapa lanwis blong mi mo mi no save gud long lanwis Spen. I tektaem bifo we mi save gud long trutok.” Tede, Mirna mo hasban blong hem, tufala i glad blong joen long tim ya we oli tanem tok i go long lanwis Maya.

Olgeta insaed long kongregesen oli glad taem oli kasem ol buk long prapa lanwis blong olgeta. Taem oli talemaot se smol buk ya Yu Yu Save Harem Gud Blong Olwe Long Wol i kamaot long lanwis Tzotzil, wan woman we i kam long ol miting blong fastaem i laekem tumas buk ya mo i talem  se: “!Tangkiu Jeova!” Ol ripot i soemaot se plante Baebol studen oli gru long saed blong spirit mo oli tekem baptaes, ol pablisa we oli kam slak oli wok strong bakegen, mo plante Kristin brata oli harem se oli naf blong mekem moa wok insaed long kongregesen. Sam man long teritori oli glad blong karem ol buk long prapa lanwis blong olgeta mo blong stadi long ol buk ya tu.

Wantaem, wan Witnes i go blong mekem Baebol stadi long wan woman, be woman ya i no stap. Taem man blong woman ya i kam long doa, sista i wantem ridim wan toktok long wan smol buk blong man i lesin. Be man ya i talem se: “Mi no wantem.” Ale, sista i toktok long hem long lanwis Totonac i se, smol buk ya i stap long lanwis blong hem. Taem man ya i harem olsem, hem i karem wan stul mo i sidaon. Taem sista i rid long man ya, man ya i stap talem se, “I tru ya. Yes, i tru ya.” Naoia man ya i go long ol Kristin miting.

Long taon ya Yucatan, hasban blong wan Witnes sista i agens long trutok mo sam samtaem i kilim sista ya taem hem i kambak long ol miting. Fastaem we ol brata oli holem ol miting long lanwis Maya, sista i gat strong tingting blong askem man blong hem blong kam long miting. Man ya i kam mo i glad long ol miting. Naoia hem i go oltaem long ol miting, hem i stadi Baebol, mo i no moa kilim waef blong hem.

Wan man we i toktok long lanwis Totonac i talem long tu Witnes sista se hem i neva prea, from we wan pris blong Katolik i bin talem long hem se God i lesin nomo long ol prea we oli talem long lanwis Spen. Antap moa, man ya i stap pem pris blong i prea from ol man we oli toktok long lanwis Totonac. Ol Witnes oli eksplenem  long man ya se God i lesin long prea we oli talem long enikaen lanwis. Afta oli givim long hem wan smol buk long lanwis Totonac we hem i glad blong karem.​—2 Kronikel 6:​32, 33; Ol Sam 65:2.

“Kualtsin Tajtoua”

Plante pablisa blong Kingdom oli glad tumas long ol gudfala risal we i kamaot, from samting ya plante oli traehad blong lanem wan lanwis blong manples no blong kam moa gud long lanwis we oli save finis. Hemia nao wanem we wan seket elda i mekem. Hem i lukaot long faef kongregesen we oli toktok lanwis Nahuatl long not blong taon ya Puebla. Hem i se: “Taem mi mi toktok long lanwis Nahuatl, ol pikinini we oli stap slip long taem blong ol miting oli wekap mo oli lesin gud. Afta long wan miting, wan boe we i gat fo yia i kam long mi mo i se: ‘Kualtsin tajtoua’ (yu yu toktok gud). Samting ya i mekem mi mi harem se traehad blong mi i no blong nating.”

Tru ya, lanwis blong ol manples i olsem kakae long garen we “naoia lif blong olgeta i drae finis, i taem blong go tekem kakae nao.” Olgeta we oli joen long wok ya oli glad we oli glad. (Jon 4:35) Roberto we i wok wetem ol tim ya blong tanem ol tok i go long narafala lanwis, i talem se: “Bambae mi neva fogetem fes blong ol brata mo ol sista mo glad we oli gat, taem oli lesin mo kasem save trutok long prapa lanwis blong olgeta. Taem mi tingbaot ol samting ya mi harem se mi wantem krae nomo.” I sua se wok ya blong halpem ol man we oli rili laekem Kingdom, hemia i mekem hat blong Jeova tu i glad.​—Ol Proveb 27:11.

[Bokis blong pija long pej 10, 11]

Mitim Sam Long Olgeta Ya We Oli Tanem Tok i Go Long Narafala Lanwis

● “Papa mama blong mi, tufala i tijim trutok long mi taem mi mi smol yet. Sore samting se, papa i lego trutok taem mi mi gat 11 yia. Tu yia biaen, mama i lego mifala. Nating we mi stap go long skul yet, be mi mas lukaot long fo narafala brata mo sista blong mi, mo mekem ol wok blong mama.

“Ol brata mo sista long saed blong spirit oli soemaot lav long mifala, be laef i no isi. Samtaem mi gat tingting ya se: ‘?From wanem samting ya i hapen long mi? !Mi mi yang tumas!’ Jeova nomo i givhan long mi blong winim ol traem ya. Afta we mi kasem setifiket blong mi long hae skul, mi kam wan paenia, mo samting ya i givhan bigwan long mi. Taem tim ya blong tanem tok i go long lanwis Nahuatl i stat, oli askem mi blong wok wetem olgeta.

“Papa blong mi naoia i kambak long kongregesen, mo ol brata mo ol sista blong mi oli wosip long Jeova. Strong bilif long Jeova i no blong nating nomo. Hem i blesem famle blong mi bigwan.”​—Alicia.

● “Wan gel long klas blong mi we i wan Witnes, i givim wan tok long skul long poen ya se, olsem wanem laef i stat. Mi mi mestem klas ya, be from we mi tingbaot eksam we bambae mifala i mekem long poen ya, mi askem long hem blong eksplenem poen ya long mi. Oltaem mi stap tingbaot from wanem ol man oli ded. Mi mi glad taem hem i givim buk ya Creation * long mi, mo i askem mi sipos mi wantem stadi Baebol. Save long saed blong lav mo ol stamba tingting blong God ya we i wokem yumi, i rili tajem hat blong mi.

“Taem mi finisim skul blong mi, mi gat janis blong kam wan tija blong lanwis blong Spen mo Tzotzil. Be blong mekem wok ya, mi mas muv i go long narafala ples, mo mekem sam ekstra klas long wiken, samting ya i min se bambae mi mestem ol Kristin miting. From samting ya, mi mi mekem wok blong man blong putum brikis. Papa blong mi we i no wan Witnes i no glad nating long disisen ya. Afta, taem mi mekem wok olsem paenia, wan tim blong tanem ol buk long Baebol i go long lanwis Tzotzil i stat. Mi mi glad blong joen long tim ya.

“Mi luk se, taem ol brata mo sista oli gat buk long prapa lanwis blong olgeta, oli harem se oli impoten mo oli glad. Samting ya i mekem mi mi haremgud. I rili wan bigfala blesing long mi blong gat wok ya.”​—Humberto.

● “Taem mi mi gat sikis yia, mama i lego mifala. Taem mi jes ova long 13 yia, papa blong mi i stadi Baebol wetem ol Witnes blong Jeova. Wan dei wan sista i askem mi sipos mi wantem stadi Baebol long sam advaes blong ol yangfala. From we mi wan yangfala we i no gat mama, mi harem se hemia nao samting we mi rili nidim. Mi tekem baptaes taem mi gat 15 yia.

Long 1999 sam rabis man oli kilim papa i ded from we oli wantem graon blong hem. Mi mi harem nogud we mi harem nogud. Tingting blong mi i foldaon bigwan, mo mi filim olsem se mi no moa save laef. Be mi gohed blong prea long Jeova from paoa blong hem. Wan seket elda mo waef blong hem, tufala i leftemap tingting blong mi bigwan. Afta mi kam wan fultaem paenia.

“Wan taem mi luk sam man oli wokbaot sikis aoa blong kam lesin long wan tok blong 20 menet long lanwis Totonac, nating se ol narafala tok long miting ya i stap long lanwis Spen we oli no kasem save long hem. Taswe, mi glad taem oli askem mi blong givhan blong tanem ol Baebol buk i go long lanwis Totonac.

“Bifo, mi stap talem long papa blong mi se, mi laekem tumas blong wok long branj ofis blong ol Witnes blong Jeova. Mo hem i talem se, bambae i had, from we mi mi wan yang gel nomo. !Be taem hem i laef bakegen bambae hem i glad blong luk se mi mi bin wok long branj ofis, mo mi tanem ol buk long saed blong Baebol i go long prapa lanwis blong mifala!”​—Edith.

[Futnot]

[Tok blong pija long pej 9]

Ol memba blong tim blong tanem tok i go long lanwis Tzotzil, oli tokbaot wan wod we i had blong tanem