?Yu Yu Rimemba?
?Yu Yu Rimemba?
?Yu yu bin glad blong ridim ol Wajtaoa we oli kamaot long ol manis we i jes pas? Ale, traem luk sipos yu save ansa long ol kwestin ya:
• ?Wanem ya Complutensian Polyglot, mo from wanem hem i wan impoten tul?
Hemia wan Baebol we oli raetem long plante lanwis wantaem. Oli raetem Baebol ya folem beswan Hibru, Grik mo Latin lanwis, mo sam haf long lanwis Arameik. Baebol ya i gud tumas from we oli tanem ol toktok blong hem i stret gud folem ol olfala hanraet.—4/15, pej 28-31.
• ?Olsem wanem ol man oli save mekem God i glad?
Olsem wan trufala man, Jeova i save tingting, hem i save tekem aksin, mo hem i gat ol filing. Hem i wan God we “i stap harem gud oltaem” mo hem i glad blong mekem ol stamba tingting blong hem oli kamtru. (1 Timoti 1:11; Ol Sam 104:31) Moa yumi save ol filing blong Jeova, moa yumi save olsem wanem blong mekem Hem i glad.—5/15, pej 4-7.
• ?From wanem Deved i letem waef blong hem Mikal i tekem wan aedol (teraphim) blong wan giaman god?
Taem King Sol i mekem plan blong kilim Deved i ded, Mikal i halpem Deved blong ronwe, mo long ples we Deved i stap slip long hem, hem i putum wan aedol we i olsem pija blong wan man. Maet Mikal i kipim wan aedol ya from we hat blong hem i no fulwan long God. Maet Deved i no save se Mikal i gat wan aedol olsem, no maet hem i letem nomo blong Mikal i holem aedol ya from we Mikal i gel blong King Sol. (1 Kronikel 16:25, 26)—6/1, pej 29.
• ?Wanem trutok we God i wantem soemaot taem hem i putum ol loa long saed blong blad?
Toktok we God i talem afta we bigfala wota i ron, mo long Loa blong Moses, mo bakegen long oda we yumi faenem long Ol Wok 15:28, 29, i pulum tingting blong yumi i go long sakrefaes blong Jisas we long sakrefaes ya blad blong hem i mas ron. From blad ya nomo, yumi save kasem fogif blong ol sin mo yumi save gat pis wetem God. (Kolosi 1:20)—6/15, pej 14-19.
• ?Baebol i tokbaot hamas merikel blong Jisas?
Ol Gospel blong Baebol oli tokbaot 35 long ol merikel blong Jisas. Be yumi no save stret namba blong evri merikel we Jisas i mekem, wetem olgeta ya tu we Baebol i no tokbaot. (Matiu 14:14)—7/15, pej 5.