?Yumi Nidim Ol Gudfala Advaes?

TEDE, plante man oli ting se oli naf blong luksave samting we i gud mo samting we i nogud, mo oli ting se oli gat raet blong mekem eni samting we oli wantem. Sam narafala oli talem se oli save mekem eni samting nomo, sipos samting ya i mekem olgeta oli haremgud. Ol tingting ya oli stap afektem ol mared mo famle laef, we ol man oli luk tufala olsem fandesen blong laef blong man.​—Jenesis 3:5.

Tingbaot eksampol blong Verónica, * we i laef long Meksiko. Hem i talem se: “Mitufala i mared klosap 15 yia finis, nao hasban blong mi i talem long mi se hem i stap tekem wan narafala woman. Hem i talem se woman ya i yang moa long mi mo i mekem hem i harem gud moa, taswe hem i no wantem lego woman ya. Mi sek taem mi tingbaot se bambae mi lusum hasban blong mi, we i besfren blong mi tu. Bifo, mi ting se taem yumi lusum wan famle blong yumi long ded, hemia wan kil we i mekem yumi harem i soa moa i bitim eni narafala samting. Be, long mi, taem hasban blong mi i mekem krangke long mi, soa we mi harem i nogud moa i bitim ded, from we mi lusum man ya we mi laekem tumas, be man ya i laef yet mo i stap gohed blong mekem fasin we i mekem hat blong mi i soa.”

Tingbaot narafala eksampol ya blong wan yang man we i gat 22 yia blong hem. Hem i divos finis mo i gat wan pikinini boe, be hem i no wantem tekem wok blong hem olsem wan papa. Hem i ting se mama blong hem bambae i lukaotem hem mo boe blong hem. Sipos mama blong hem i no wantem mekem olgeta samting we hem i askem, yang man ya i kam kros mo i tok nogud long mama blong hem, olsem wan pikinini nomo we i mekem stronghed. Mama blong hem i no save wanem blong mekem taem boe blong hem i gat ol fasin olsem.

I gat plante eksampol olsem tufala stori ya. Namba blong ol man we oli stap seraot mo divos i stap kam antap long evri ples. Plante pikinini oli luk papa no mama blong olgeta i lego famle blong olgeta blong statem wan niufala laef. Sam yangfala oli no moa respektem ol narafala, wetem papa mama blong olgeta tu, mo oli  mekem sam rabis samting we ol olfala blong yumi bifo oli neva tingbaot blong mekem. Long plante kantri, ol man oli mekem olkaen rabis fasin long saed blong seks, oli tekem drag, ol yangfala oli kilim ol man, mo ol pikinini oli kilim i ded tija no papa mama blong olgeta. I no isi blong lukaot long ol pikinini mo gat wan gudfala mared, be ating yu luk finis se i gat plante narafala haf blong laef tu we i kam had tumas tede.

Taem yumi luk ol samting ya, maet yumi wantem save from wanem laef blong man i kam olsem. ?Sipos ol man oli rili save wanem i gud mo wanem i nogud, from wanem i gat plante trabol yet? ?Yumi nidim ol gudfala advaes? ?Weples yumi save faenem ol advaes we i mekem i gud long yumi, mo we oli bin wokgud finis? Plante man oli talem se oli bilif long God mo long Tok blong hem, Baebol, be nating se i olsem, bilif ya i no gat paoa long ol disisen blong olgeta. ?Yumi save kasem wanem gudfala frut sipos yumi lukaotem mo yumi faenem ol advaes blong God? Haf we i kam biaen i tokbaot samting ya.

[Futnot]