Ol Man Oli Lukaot Rod Blong Haremgud

SAM yia bifo, oli askem kwestin ya long ol man long Amerika, Franis, Inglan mo Jemani se, “?Wanem samting i save mekem man i haremgud?” Long ol man we oli ansa long kwestin ya, 89 pesen oli talem gudfala helt; 79 pesen oli talem gudfala mared no wan gudfala fren; 62 pesen oli tokbaot glad we ol papa mama oli harem taem oli gat pikinini; mo 51 pesen oli talem wan gudfala wok. Wan waes tok blong wol i talem se mane i no save mekem man i glad, be nating se i olsem, 47 pesen blong ol man we oli ansa long kwestin blong ripot ya oli talem se, si, man i save haremgud sipos hem i gat mane. ?Olsem wanem? ?Ol man oli nidim ol samting ya blong haremgud?

Fastaem, i gud blong luk sipos i tru se mane i gat paoa long fasin glad. Wan ripot long saed blong ol 100 man long Yunaeted Stet we oli rij moa long ol narafala man, i soem se ol man ya oli no haremgud moa bitim ol narafala man. Mo tu, ol man we oli stadi long tingting blong man oli makem se, nating se plante man Amerika klosap oli dabolem ol sas samting blong olgeta long ol 30 yia we i jes pas, samting ya i no mekem we oli haremgud moa. Wan ripot i talem se: “Long semtaem [we ol man oli hivimap plante sas samting], namba blong man we tingting blong olgeta i foldaon i kam antap. Namba blong ol pikinini we oli kilim olgeta wan i ded i go antap tri taem moa. Mo namba blong ol man we oli divos, i dabol.” Long samwe 50 kantri, sam man we oli traem faenemaot sipos mane i mekem man i haremgud, oli agri blong talem se mane i no save pem glad.

?Olsem wanem long tingting ya se wan gudfala helt, wan gudfala mared no wan gudfala wok oli save mekem man i glad? ?Sipos i olsem, i min se ol milian man we oli no gat wan gudfala helt mo olgeta we oli no gat wan gudfala mared oli no glad? ?Olsem wanem long ol waef mo hasban we oli no gat pikinini, mo long ol man mo ol woman we oli no gat wan gudfala wok? ?Bambae ol man ya oli neva haremgud long laef blong olgeta? Mo tingbaot ol man we maet oli gat wan gudfala helt mo wan gudfala mared tede. ?Olsem wanem sipos laef blong olgeta i jenis? ?I min se bambae oli no moa save ‘glad’?

?Yumi Stap Lukluk i Go Wea Blong Haremgud?

Olgeta man oli wantem haremgud. Yumi no sapraes long samting ya from we God we i Wokem yumi i “haremgud oltaem,” mo hem i wokem man blong i tekem fasin olsem hem. (1 Timoti 1:11; Jenesis 1:​26, 27) Taswe i stret nomo we ol man oli wantem haremgud. Nating se i olsem, plante man oli harem se i no isi blong holem glad.

?Be, maet problem i kamaot from we sam man oli go bitim mak blong traem haremgud? Eric Hoffer, wan waes man blong wol i gat tingting ya.  Hem i talem se: “Ol man oli lukaot rod blong haremgud, mo hemia wan long ol stamba risen we i mekem se man i harem nogud.” Samting ya i tru tumas sipos yumi wantem harem gud, be yumi lukluk i go long rong ples. Sipos i olsem, yumi sua se bambae yumi harem nogud nomo. Man we i traehad blong kam rij; man we i wantem kasem wan haenem; man we i wantem kam wan bigman long saed blong politik; insaed long komuniti; no long saed blong bisnes; mo man we i tingbaot hem wan nomo mo we i wokhad blong kasem samting we hem nomo i wantem, olgeta man olsem, oli no save harem gud. Taswe yumi no sapraes we sam man oli agri wetem woman ya blong raetem buk we i talem se: “!Sipos yumi stop smol, yumi no moa traem ol defdefren kaen rod ya blong haremgud, ating long taem ya nao bambae yumi haremgud!”

Long ripot we yumi tokbaot long fastok blong haf ya, i gud blong makem se 4 long evri 10 man oli talem se fasin blong halpem narafala mo mekem i gud long narafala, samting ya nao i save mekem man i harem gud. Mo 1 long evri 4 man i talem se bilif long God mo long jos i impoten tumas blong mekem man i glad. Yes, i impoten blong luksave wanem samting i save mekem man i rili haremgud. Haf we i kam biaen bambae i halpem yumi long saed ya.

[Tok blong pija long pej 3]

Plante man oli ting se blong haremgud, oli nidim mane, wan gudfala famle laef, no wan gudfala wok. ?Yu yu agri wetem tingting ya?