?Olsem Wanem Blong Dil Wetem Tingting We i Foldaon?

?TINGTING blong yu i foldaon? Long taem naoia we tingting blong ol man i hafhaf long plante samting mo man i raorao from fulap samting, tingting blong plante man i foldaon. Samfala, tingting blong olgeta i foldaon from we oli no gat wok. Sam narafala oli stap dil wetem trabol we oli kasem from wan aksiden. I gat sam narafala tu we oli stap traehad blong winim ol problem blong famle, wan strong sik, no filing ya se oli no gat fren. Yumi no sapraes se ol trabol olsemia nao oli mekem se i isi nomo blong tingting blong man i foldaon.

?Sipos tingting blong yu i foldaon, bambae yu faenem help long weples? Plante milian man long wol oli haremgud taem oli ridim Tok blong God, Baebol. Oli haremgud from ol tok blong aposol Pol we i talem se: “Yumi mas presem God ya we i God mo Papa blong Masta blong yumi, Jisas Kraes, mo hem i God we i gat gudfala sore, mo i gat olgeta fasin blong leftemap tingting blong man. Hem i stap leftemap tingting blong yumi long olgeta trabol we yumi stap kasem.” (2 Korin 1:​3, 4, NW ) I gud yu ridim vas ya mo ol narafala vas blong Baebol insaed long prapa Baebol blong yu. Sipos yu mekem olsem, samting ya bambae i ‘leftemap tingting blong yu mo bambae i mekem yu yu stap strong.’​—2 Tesalonaeka 2:17.

Be tu, yumi save faenem help blong dil wetem tingting we i foldaon taem yumi joen wetem olgeta we oli wosipim Jeova. Ol Proveb 12:25 i talem se: “Taem man i stap wari, fasin ya i stap mekem tingting blong hem i hevi, be gudfala tok blong fren blong hem i save leftemap tingting blong hem bakegen.” Taem yumi go long ol Kristin miting, yumi harem ol “gudfala tok,” we i olsem samting we i “swit, mo i mekem bodi blong hem i strong.” (Ol Proveb 16:24) Traem go long ol miting long Haos Kingdom blong ol Witnes blong Jeova nao yu wan bambae yu save luk olsem wanem ol miting ya oli save givhan long yu.

Yu save haremgud tu long paoa we prea i save givim. Sipos yu harem se yu no save dil wetem wan problem blong laef, serem ol dip filing blong yu wetem “God we i stap harem ol prea.” (Ol Sam 65:​2, NW ) Jeova, God we i Wokem yumi, hem i kasem save long yumi i bitim we yumi wan i kasem save long yumi. Yumi save trastem hem blong givhan long yumi. Tok blong hem i promes long yumi se: “Yufala i mas putum ol trabol blong yufala long Hae God, nao hem bambae i blokem yufala, i sevem yufala. Hem i no save letem stret man i lus.” (Ol Sam 55:22) Yes, “olgeta we oli stap luk long Hae God blong i givhan long olgeta, bambae oli luk we oltaem hem i stap givim paoa long olgeta i stap mekem strong oli strong bakegen.”​—Aesea 40:31.

Jeova God i givim ol samting we yumi nidim mo we oli save halpem yumi blong dil wetem tingting we i foldaon. ?Bambae yu yu yusum ol samting ya?