?Wanem Presen We Ol Papa Mama Oli Mas Livim Long Ol Pikinini Blong Olgeta?

PAVLOS i wan papa long wan famle blong saot Yurop we i no spenem plante taem wetem waef mo pikinini blong hem. Hem i gat tu gel we tufala i gat 13 mo 11 yia, mo wan boe we i gat 7 yia. Pavlos i wok seven dei long wan wik, mo plante aoa long wan dei, blong kasem naf mane blong mekem ol drim blong hem oli kamtru. Hem i wantem pem wan smol haos blong tufala gel blong hem, mo i wantem statem wan smol bisnes blong boe blong hem. Waef blong hem, Sofia, i wokhad blong hivimap ol kaliko, ol tul blong kuk, ol naesfala sospen, mo ol naef, fok mo spun, blong givim long ol pikinini blong hem taem bambae oli gat prapa famle blong olgeta. Sipos yu askem long tufala from wanem tufala i wokhad olsemia, tufala i ansa wantaem se, “!Blong givim wan gudfala laef long ol pikinini blong mitufala!”

Sem mak olsem Pavlos mo Sofia, plante papa mama raon long wol oli traem bes blong olgeta blong mekem se, taem ol pikinini blong olgeta oli kam bigman, oli gat wan isi laef. Sam papa mama oli  sevem mane blong givim long ol pikinini taem oli gruap. Sam narafala oli meksua se ol pikinini blong olgeta oli kasem wan gudfala edukesen mo oli lanem ol impoten samting we bambae i save givhan long laef blong olgeta. Bighaf blong ol papa mama oli luk ol presen ya olsem wan rod blong soem bigfala lav blong olgeta long ol pikinini. Be nating se i olsem, plante taem ol papa mama oli fesem ol bigfala hadtaem from we oli wantem mekem samting we i stret long tingting blong ol famle, ol fren, no komuniti. Taswe, ol papa mama we oli kea long ol pikinini blong olgeta oli askem kwestin ya se, ‘?Mifala i mas givim hamas samting long pikinini blong mifala?’

Givim Samting We Bambae Pikinini i Nidim Long Fiuja

Sipos ol Kristin papa mama oli lukaot long ol nid blong ol pikinini blong olgeta, i no jes from we oli lavem olgeta, be from we Baebol i talem se oli mas mekem olsem. Aposol Pol i talem long ol Kristin long taem blong hem se: “I no wok blong smol pikinini, blong i lukaot long papa mo mama blong hem. I wok blong papa mo mama nomo, blong tufala i lukaot long smol pikinini blong tufala.” (2 Korin 12:14) Biaen Pol i talem se i impoten tumas we ol papa mama oli lukaot long famle blong olgeta. Hem i raetem se: “Be man we i no wantem lukaot long olgeta famle blong hem, mo antap long hem, hem i no save lukaot long olgeta we oli stap long haos blong hem, hem i soemaot we hem i no moa holem fasin blong bilif. Hem i stap longwe moa long God, i winim man we i no bilif nating.” (1 Timoti 5:8) Plante stori long Baebol oli soem se fasin blong livim wan presen long ol pikinini i wan impoten samting long lukluk blong ol man blong wok blong God.​—Rut 2:​19, 20; 3:​9-13; 4:​1-22; Job 42:15.

Be samtaem ol papa mama oli wari tumas from we oli wantem livim wan bigfala presen long ol pikinini blong olgeta. ?From wanem? Manolis, wan papa we i aot long wan kantri long saot Yurop blong muv i go long Amerika, i givim wan risen. Hem i talem se: “Ol papa mama we oli bin safa bigwan long taem blong Wol Wo Tu, we oli bin sot long kakae, no oli bin pua, biaen oli gat strong tingting ya se ol pikinini blong olgeta oli mas gat wan laef we i gud moa.” Hem i ademap se: “Samtaem, sam papa mama oli wari tumas long fasin blong lukaot long ol pikinini blong olgeta mo oli rili wantem givhan long olgeta taem  oli kam bigman, be long rod ya, ol papa mama ya oli spolem olgeta wan nomo.” Yes, sam papa mama oli gat wan laef we i no isi nating, from we oli wantem hivimap plante sas samting blong ol pikinini blong olgeta. ?Olsem wanem? ?I waes blong mekem samting ya?

‘Hadwok Ya i Blong Nating Nomo’

King Solomon blong Isrel bifo i givim wan woning long saed blong ol presen we ol papa mama oli livim long ol pikinini. Hem i raetem se: “Ol samting ya we mi stap wok strong long hem, we mi kasem finis, bambae oli no givhan long mi nating, from we mi save se bambae mi livim olgeta i stap, oli blong man we bambae i tekem ples blong mi. ?Be man ya, maet i waes gud no i no gat hed, hu i save? Be bambae hem i kasem olgeta samting ya we mi mi hadwok long hem, wetem olgeta samting we mi kasem from waes blong mi long wol ya. Ol hadwok ya i blong nating nomo. . . . Fasin ya we man i stap hadwok tumas long wan samting long olgeta waes mo save mo gudhan blong hem, be biaen i mas livim i stap, nao wan narafala man we i no mekem wan wok nating long hem i kam tekem, hem i no stret nating. Long fasin ya, ol hadwok ya blong yumi i blong nating nomo.”​—Prija 2:​18-21.

Olsem Solomon i eksplenem, olgeta we oli kasem wan presen, maet oli no luksave se presen ya i sas olsem wanem from we oli no hadwok long hem. Long sem fasin, samtaem sam pikinini oli no kea nating long presen we oli kasem long papa mama blong olgeta, nating se papa mama i bin traehad blong livim presen ya. Maet ol pikinini bambae oli spolem ol presen ya nomo. (Luk 15:​11-16) !Tru ya, sipos oli mekem olsem, ‘hadwok ya blong papa mama i rili blong nating nomo’!

Livim Ol Presen Mo Fasin Griri

I gud we ol papa mama oli tingbaot wan narafala samting tu. Long wan kalja we ol man oli tinghae tumas long presen we oli livim long pikinini taem oli ded mo presen we oli givim taem pikinini blong olgeta i mared, ol pikinini oli save kam griri. Maet oli save askem wan graon, wan haos, no wan praes blong pem wan woman we i sas tumas, i bitim samting we papa mama i save givim. Loukas, wan papa we i laef long Gris i talem se: “Sore tumas long papa we i gat tu no tri gel blong hem. Maet ol gel ya oli skelem samting we papa blong olgeta i save givim long olgeta, wetem ol samting we ol papa mama blong ol narafala gel oli hivimap ‘long gladhat blong olgeta’ blong givim long ol gel blong olgeta. Maet oli talem se bambae oli no save mared, sipos papa i no save givim ol bigbigfala presen long olgeta.”

Manolis, we yumi tokbaot hem finis, i talem se: “Wan yangfala man i save fren longtaem wetem wan gel gogo papa blong gel ya i promes long man ya se bambae i givim wan graon, wan haos, no bigfala mane long hem. I olsem se man i stap fosem papa blong gel ya.”

Baebol i givim woning long mifala long saed blong fasin griri. Solomon i raetem se: “Man i save griri fastaem blong kasem samting we papa blong hem i givim long hem, be samting ya bambae i no kam wan blesing long hem long fiuja.” (Ol Proveb 20:​21, NW ) Aposol Pol i talem se: “Fasin blong laekem mane tumas, hem i stamba blong olgeta fasin nogud.”​—1 Timoti 6:10; Efesas 5:5.

‘Waes Wetem Graon Blong Papa’

I tru se graon no ol samting we papa mama i save livim long pikinini blong hem i wan sas samting, be  waes i impoten moa i bitim eni samting long saed blong bodi. King Solomon i raetem se: “Waes i wan samting we i gud yumi evriwan i kasem. Sipos yu kasem waes, hemia i olsem we yu kasem graon blong papa blong yu wetem olgeta samting we i stap long hem, we hem i promes finis, se bambae i blong yu. Mane i save givhan blong mekem laef blong yu i gud, be waes tu i save mekem samting ya, mo hem i save go moa. Hem i save mekem we laef blong yu bambae i stap gud olwe.” (Prija 7:​11, 12; Ol Proveb 2:7; 3:21) Mane i save givhan from we man we i gat mane i save pem ol samting we hem i nidim, be mane i save lus tu. Defren olgeta, waes (we i minim se man i naf blong yusum save blong hem blong stretem ol problem no kasem sam mak) i save sevem laef blong wan man from we hem i blokem man ya blong i no mekem ol krangke samting. Taem waes i stanap long prapa fasin blong onagud long God, hem i save halpem wan man blong kasem laef we i no save finis long niufala wol blong God we bambae i kam i no longtaem. !Hemia wan nambawan presen ya!​—2 Pita 3:13.

Ol Kristin papa mama oli soem waes ya taem oli luksave wanem nao ol samting we oli impoten moa long laef blong olgeta mo long laef blong ol pikinini blong olgeta tu. (Filipae 1:10) Ol samting long saed blong bodi we ol papa mama oli hivimap blong ol pikinini blong olgeta oli no sud kam fastaem long ol samting long saed blong spirit. Jisas i leftemap tingting blong ol man blong hem se: “Fastaem yufala i mas lukaot gud blong obei long God we i King blong yufala, mo blong folem ol stret fasin blong hem. Nao biaen hem i save givim olgeta samting ya tu long yufala.” (Matiu 6:33) Ol papa mama we oli putum ol mak long saed blong spirit insaed long famle blong olgeta oli sua se bambae oli kasem plante blesing. Waes King Solomon i raetem se: “Pikinini we fasin blong hem i stret, papa blong hem i save glad tumas from. Sipos pikinini blong yu i waes, bambae yu save glad from. Oltaem yu mas mekem we mi wetem mama blong yu, mitufala i save glad long ol samting we yu yu stap mekem. Mama blong yu i bonem yu, mo oltaem yu mas mekem hem i glad.”​—Ol Proveb 23:​24, 25.

Wan Presen We i Stap Blong Olwe

Long lukluk blong ol man Isrel blong bifo, graon we ol pikinini oli kasem long ol bubu blong olgeta i wan impoten samting. (1 King 21:​2-6) Be God i givim advaes ya long olgeta se: “Yufala i no mas fogetem ol tok ya we mi mi stap givim long yufala tede. Oltaem, yufala i mas tijim ol pikinini blong yufala long hem. Sipos yufala i stap long haos, no yufala i stap wokbaot, no yufala i go blong slip, no yufala i girap bakegen, be yufala i mas tokbaot ol samting ya.” (Dutronome 6:​6, 7) Long sem fasin, toktok ya i go long ol Kristin papa mama se: “Yufala i mas lukaot gud long [ol pikinini blong yufala]. Yufala i mas stretem olgeta, mo yufala i mas tijim olgeta, olsem we Masta blong yumi [Jeova] i stap stretem yumi, i stap tijim yumi.”​—Efesas 6:4.

Ol papa mama we oli bigman long saed blong spirit oli luksave se fasin blong lukaot long ol pikinini blong olgeta i min se oli mas tijim olgeta long Baebol tu. Andreas, wan papa we i gat tri pikinini i talem se: “Sipos ol pikinini oli lan blong mekem ol stamba rul blong God i wok long laef blong olgeta, bambae oli naf moa blong lukaot long olgeta wan long fiuja.” Wan presen olsem i soem gud long ol pikinini se i impoten we oli stanemap mo oli wokem wan fasin frengud wetem God ya we i Wokem olgeta.​—1 Timoti 6:19.

?Olsem wanem long yufala ol papa mama? ?Yufala i tingbaot ol presen long saed blong spirit we yufala i save livim long ol pikinini blong yufala? Eksampol, ?Ol papa mama we pikinini blong olgeta i wok fultaem blong Jeova, oli save mekem wanem blong halpem hem? Wan fultaem paenia i neva mas askem mane long narafala blong sapotem wok we hem i mekem blong Jeova, mo hem i no mas ting tu se ol narafala oli mas givim samting long hem. Be nating se i olsem, ol papa mama we oli laekem pikinini blong olgeta mo oli wantem halpem hem blong gohed long fultaem wok blong Jeova, oli save tekem disisen ya se bambae ‘oli givhan long hem sipos hem i trabol.’ (Rom 12:13; 1 Samuel 2:​18, 19; Filipae 4:​14-18) Yumi sua se nambawan fasin ya blong sapotem pikinini, i mekem Jeova i glad.

?Taswe, wanem presen we ol papa mama oli mas livim long ol pikinini blong olgeta? Ol Kristin papa mama oli mas lukaotgud long ol pikinini blong olgeta long saed blong bodi, be samting we i impoten moa, oli mas meksua se oli lukaotgud long olgeta long saed blong spirit. Bambae ol pikinini oli haremgud blong olwe long sas presen ya long saed blong spirit we oli kasem long papa mama blong olgeta. Olsemia, ol tok blong Ol Sam 37:18 bambae oli kamtru, we i se: “Hae God i stap lukaot gud long olgeta we oli stap obei long hem, mo graon ya bambae i blong olgeta gogo i no save finis.”

[Tok blong pija long pej 26]

?Yu wantem se ol pikinini blong yu oli gat wanem kaen laef long fiuja?