Ripot Long Wok Blong Kingdom

Yumi Tingbaot “Ol Man We Yumi Fogetem”

LONG stat blong 2001, Haykaz we i wan Witnes blong Jeova, mo i gat 15 yia blong hem, i go luk wan eksposisen long Bern, Swiselan we nem blong hem “Ol Man We Yumi Fogetem.” Eksposisen ya i tokbaot ol nogud samting we ol Nasi oli bin mekem long ol Witnes blong Jeova. Afta long visit blong Haykaz, hem i se: “Mi bin harem ol fasin safa mo ol nogud samting we rul blong Nasi i mekem long ol Witnes blong Jeova, be hemia fastaem nao we mi luk ol pepa mo ol foto blong taem ya. Ol samting we oli putumaot blong ol man oli luk, ol ripot blong ol man we oli luk ol samting we oli hapen long taem ya, mo ol toktok we ol man blong histri oli talemaot long eksposisen ya, i tajem hat mo tingting blong mi.”

Sam taem biaen, tija i askem Haykaz blong raetem wan ripot blong ol fren blong hem long haeskul. Haykaz i jusum stori ya “Ol Witnes blong Jeova​—Ol Man Long Taem Blong Nasi We Yumi Fogetem.” Tija i agri we Haykaz i raetem wan stori long saed ya be hem i talem long Haykaz blong i yusum wan buk blong wol insaed long stori ya. Haykaz i glad mo i talem se: “Mi raetem sam long ol buk we oli tokbaot ol Witnes blong Jeova long taem blong Nasi. Mo tu, mi raetem wanem tingting blong mi wan long eksposisen ya ‘Ol Man We Yumi Fogetem.’ I gat ol pija mo ol foto long stori ya we mi mi raetem, we i gat 43 pej blong hem.”

Long Novemba 2002, Haykaz i talemaot stori ya long ol skul fren, ol tija, ol fren, mo famle blong hem. Afta, Haykaz i gat janis blong eksplenem bilif blong hem long Baebol, taem sam oli askem kwestin long hem. Taem wan gel long skul i askem hem from wanem hem i jusum stori ya, Haykaz i talem se, i no gat plante buk blong histri we oli tokbaot ol Witnes blong Jeova, mo tu, hem i wantem we ol man oli save olsem wanem ol Witnes oli no fraet blong sapotem Kristin bilif blong olgeta. ?Wanem gudfala frut we i kamaot?

Haykaz i talem se: “Ol skul fren blong mi oli sapraes. Oli no bin save se ol Witnes blong Jeova oli kasem ol nogud traem olsem wan grup. Mo tu, plante oli no save se ol Witnes we oli stap kalabus long kamp blong ol Nasi oli werem wan spesel saen​—hemia wan kaliko we i pepol mo i gat tri kona long hem.”

Afta we Haykaz i talemaot ripot blong hem, hem i gat plante moa janis blong storian wetem ol skul fren blong hem mo talemaot bilif blong ol Witnes we i folem Baebol long saed blong blad, alkol, mo rabis fasin. Haykaz i talem se: “I no gat wan long ol fren blong mi we oli jikim mi.” Antap long hemia, oli putum stori blong Haykaz long laebri blong skul. Samting ya i mekem we ol man oli no fogetem strong tingting we ol Witnes blong Jeova oli soemaot long trabol taem ya.