“Bambae Yufala i Prea Olsem”

?YU YU save ol tok blong Lodsprea? Hemia prea we Jisas i tijim olsem wan eksampol long ol man blong hem. Plante man oli savegud Bigfala Tok we Jisas i givim antap long Hil, long taem ya nao Jisas i talem se: “Taem yufala i prea bambae yufala i prea olsem.” (Matiu 6:9) Jisas hem wan i tijim prea ya long ol disaepol blong hem, mekem se naoia plante man oli kolem prea ya se Lodsprea.​—Latin, Paternoster.

Plante milian man raonabaot long wol oli save prea ya baehat, mo oli stap talem hem bakegen mo bakegen, maet evri dei. Long ol yia we oli jes pas, plante man oli bin talem prea ya long ol skul blong pikinini no long pablik ples. ?From wanem ol man oli tinghae long Lodsprea?

Cyprian i wan man we i laef long ol yia 200, mo hem i stap stadi long God mo long ol bilif blong jos. Man ya i raetem se: “I no gat wan prea we i gat moa paoa long saed blong spirit, i bitim prea ya we Kraes i givim long yumi . . . I no gat wan narafala prea we yumi mekem long Papa, we i moa tru i bitim prea ya we Pikinini, we hem nao i Trutok, i givim long yumi.”​—Jon 14:6.

Katolik Jos i tokbaot Lodsprea long ol tijing blong hem se hem i olsem “stamba blong olgeta Kristin prea.” The World Book Encyclopedia i luksave se prea ya i impoten tumas long olgeta jos blong Krisendom, nao buk ya i talem se Lodsprea i wan long ol “fandesen we ol Kristin bilif oli stanap long hem.”

Nating se i olsem, i tru tu blong talem se plante man we oli talem Lodsprea oltaem, oli no rili kasem save mining blong prea ya. Wan niuspepa blong Kanada, Ottawa Citizen, i talem se: “Sipos yu bin kasem  tijing long eni Kristin skul, ating yu save talem Lodsprea baehat, kwiktaem nomo. Be sipos yu mas talem prea ya sloslo, mo yu mas tingting gud long ol wanwan haf blong hem se, oli minim wanem, ating hemia nao bambae i had blong mekem.”

?Olsem wanem? ?I impoten blong kasem save ol prea we yumi talem long God? ?From wanem Jisas i givim Lodsprea long yumi? ?Lodsprea i minim wanem long yu? I gud yumi tingbaot ol kwestin ya naoia.